San Mateo 22
22
1Ja Jesús yachaje'meyc'oya pa yovalhemeyjop atesha, pa yit'esh:
2—“Ja lhanvacleyash ja Dios lhjunashjulh pa lhcaanvacle ti yisnatshem pa lhaôs pa lhjayayash. 3Pa yicheney papi lhcavos papin chit'a'lhey. Taj ti papu lhech ninteesh ca nôquey. 4Pa yicheney shta pap'elh lhcavos pa yiyôjaa: ‘At'eshelha japin chit'a'lhey ti p'alha ti vacalhesh na vatôc. Apis ti jayiyôjijanesh ca chinclôn java vacôc shi' java yiclôy yilhavunsha'ne, pa lhacôm'a ti vacalheshch'e; istaa ca anachelhey na vatajayayash.’ 5Taj ti ninteesh ca nachey papi chit'alhtajey. Ve'lha pa yichey pava lhcac'ovtes, vooy peelh yichey pa lhcashavat. 6Vooy peelh t'acum'e ts'ivee papi lhcavos pa lhcaanvacle pa yiclônsha'ne pa jalhpa yiclôn jô. 7Pa lhechesh pa suy jum pa lhcaanvacle, pa yicheney papi lhcavos c'afoquelhay jaspa niclônsha'ne papi vancaclônjanjas, shi' ca napjunch'e shta pava lhajpôyjey. 8Ti yivaclhitesh cavôque pa yit'esha shta papi lhcavos: ‘P'alha ti vacalhesh lhacôm'a na t'ajuya na vatajayayash, taj ti amyijulh japi chit'aalhtajey ca nach. 9Meelh'in nôqueesh ca avoolhey papu ca avantajelh yiey java lhacoclesh java lhcaavjuc pa anfacle'lhem ca nachey na vatajayayash.’ 10Pa yichvatich'e papi lhcavos pa yich'esha'ne pava nôyishay pa yic'anatvane papi yi'van, papi isissha'ne shi' papi niysisasha'ne; pa tapooj pa c'atsaj'ôcji pa lhajpôyich.
11“Pa lhechesh pa yich'ôcji shta pa lhcaanvacle jaspa yi'van papi chit'a'lhey. Pa yi'van pa ve'lha ti anlhapa ca nuych'e pava t'ajuya pa vatajayayash. 12Pa yit'esha: ‘Na yic'utsfa, ¿ta t'e ajunash ti lhnach'ôcji ti anlhapa ca uych'e java t'ajuya ca vatajayayash?’ Vooy pa lhech nits'iseey. 13Pa lhechesh pa yit'esha pa lhcaanvacle papi lhcavoseshjop pa vatôc: ‘Acu'melh'e nava lhcaclôy shi' nava t'itjuy ca ôcfeeelh ca u'elheyfach'ee na tulh'e, pa lhech nôv'e' ca nitafshiy'in pa nijuujvatjulh shta.’*xj* 14Lhayaash ti aclôj papi chitôney, taj ti napu' papi chit'apayeyshisha'ne.” #22.13 Mt 8.12; 25.30; Lc 13.28.
Pa lhjunash ti chiycufay'ôcji pava chiytsôt'ajesh
(Mr 12.13-17; Lc 20.20-26)
15Pa lhechesh pa tac'uyesh japi fariseos pa vo'tajeyjop pa ca lhcli'sha ca jaspa nicôjôyesh ja Jesus. 16Pa yicheney japi napu' lhts'avot'esh pa yamelhvatsham japi lhtats'ovot'elh ja Herodes, pa niyôsesh ja Jesús, pa yit'esh ts'ivee:
—Vanqu'eyjatsjan, tsitôôyshelh ti yijô' ti navo'yeshch'e nava lhteesh, yajatesh ti lhnôoclhanita pa yijô' Dios lhnôyish, pa tanca at'esh ca avijatana papu, lhayaash ti niovalhey pa lhjunash napi nivacle. 17Istaa ca anfacyam pava lhaychavalhey: ¿Tajulhey t'e ca chinjutey ja uj Roma lhanvacle pava pesoc, ja't'ajesha ca ama?
18Taj ti yitôôysha tatsha ja Jesús pa lhjôts'ôclônjayashesh pa lhaychavalhjayash, pa yit'esha:
—Ajôtsôclônjanjaselh, ¿ta lhayaash ti lhanc'alhtantajelhyi? 19Anchajeelhyi lhpa tinshanja t'ajuya pa ti chiycufay'ôcji.
Pa chiyjutey ja ve'lha dinario. 20C'oya ti yi'van ja Jesús lhja tinshanja pa tay'ôtsjanesh:
—¿She t'e papi lhtaco nôque, shi' na lhey ti chiyi'sesh'e?
21Pa yicuulh ts'ivee:
—Vooy ja uj Roma lhanvacle.
Pa lhechesh pa yit'esha ja Jesús:
—Ajutelhem ja uj lhanvacle pava yitsôt'ajesh ja uj lhcaanvacle, vooy ja Dios ajutelhey nava yitsôt'ajesh ja Dios.
22Meelh ti yipe'ya cavôque, pa uj ti tamp'oyeshem; pa tayjop pa yich'in.
Pa vatcôy'ôtsjayashesh pa lhneetshamjayash capi vafsha'ne
(Mr 12.18-27; Lc 20.27-40)
23Pa lhech nalhu namey ja Jesús japi napu' saduceos ti nijôchiey. Japi saduceos yilheclojesh ca nineachisham capi vafsha'ne. Japi lhech yit'esha ja Jesús:#22.23 Hch 23.8.
24—Vanqu'eyjatsjan, yit'eshjoom ca Moisés ca nivaf lhôn pa nivacle lhpa lhjaya ca mônlhaa ca amtajeem shta papi lhcles, lhpa lhech isjop lhôn ca lhjayaeesh pa lhash'aa, jaspa nactsôyanem lhavaatsha pa lhchecla' pan vaf.*xl* 25Caaj lhôn papi napu'yama lhtatvelheyech yielhyitshi. Pa c'utsajesh pa tjayaay, taj nintactsôy ti vaf. Vooy lhpa ôschacche lhjayaesh pa lhash'aa. 26Lhet lha lhjunashesh pa tavayelhva'ne. Lhet lha lhjunashesh peelh tavayelhva'ne shta, pa jaalhpa tifesh'e papi napu'yama lhtatvelheyech. 27Pa yôjesh'esha'ne pa vaf vitsha lhpa ôschacche. 28Pa cat'elhtajeesh ca netajchishamch'e capi vafsha'ne, ¿she t'e papi yitsôt'ajshi jayu lhpa ôschacche, lhayaash ti tifesh'e capi napu'yama lhtatvelheyech ti lhjayastajesh? #22.24 Dt 25.5.
29Pa yicuulh ja Jesús pa yit'esh:
—Ninavooyshelhch'e, lhayaash ti ninatôôyshelh nava Vani'sesh'e, naantôfaacshelh shta ja Dios t'unaj. 30Eem ti meelh ca ne'tajchisham capi vafsha'ne pa tanca nitajayay, pa tanca chinjayayan shta. Lhayaash ti lhjunashjulh jayu japi ángeles yiey ja vôôs. 31Jô'lhaa ca yich'e' shita ca lhneetshamjayash capi vafsha'ne, ¿naaclôvalhelhshi nava yit'esh ja Dios? yit'esh: 32‘Yivaatsha ya'lhech lh'Diosyish ja Abraham, lh'Diosyish ja Isaac, lh' Diosyish shta ja Jacob.’ ¡Ja Dios ni lh'Diosaesh capi vafsha'ne, vooy papi mônlhasha'ne.#22.32 Ex 3.6.
33Meelh ti yipe'yach'e cavôque, pa tamp'oyeshem lhacôm'a japi yi'van pava vanqu'eyjatsjanesh.
Pa vatyôjijat ya'sheshc'oya pav'elh
(Mr 12.28-34)
34C'oya ti yitôôysha japi fariseos pa nints'isinatey ja Jesús japi saduceos, pa lhechesh pa tc'aeshva'ne. 35Pa ve'lha japi lhech ja vanqu'eyjatsjanesh pava lhfanishlhavach, pa yic'alhtantajesha ja Jesús ti niyôstajesh, yit'esh:
36—Vanqu'eyjatsjan, ¿ta t'e yie' pa ya'sheshc'oya pav'elh ti vatyôjijat'esh?
37Pa yit'esh ja Jesús:
—‘Istaa ca en ja Lhcaanvacle a'Dios pa atanipjôclônsha lhpa acachi', pa asôcôclit shi' pa acajôysha.’*xn* 38Cavôque ya'sheshc'oya pav'elh vatyôjijates. 39Vooy neelh vatyôjijat lhjunashjulh, pa yit'esh: ‘Istaa ca en pa avelh nan ajunash ti lhnen.’*xñ* 40Navôque napu' vatyôjijates lhtatsuqu'esh lhacôm'a nava lhyôjijates ja Moisés shi' cava lhavanqu'eyjatsjajayash capi chiytôyjata pava ti vaclan.#22.37 Dt 6.5. #22.39 Lv 19.18.,#22.35-40 Lc 10.25-28.
¿She t'e papi lhaôs pa Cristo?
(Mr 12.35-37; Lc 20.41-44)
41Jôjjeclay tc'ava'ne japi fariseos, 42pa niyôsesham ja Jesús, pa yit'esh:
—¿She pa lhaychavalhshelha na Cristo? ¿She t'e papi lhaôs?
Pa yit'esh ts'ivee:
—Lhaôs pa David.
43Pa lhechesh pa yit'esha ja Jesús:
—¿Ta t'e lhayaash ti tach'ansha ja David ja Espíritu Santo ti yit'esha Lhcaanvacle? Lhayaash ti yit'esh ja David:
44“Ja Lhcaanvacle yit'esha ja Yinvacle:
‘Veecum na yifayishey,
vooy ca jamjatajey afoc japi
naac'utsfasa pa lhech jan'eajop.’#22.44 Sal 110.1.
45Lhech lhavaatsha na apey ja David ti lhqueyesh Lhcaanvacle, ¿pa ta t'e lhayaash ti chiytatayanesh'in ja David?
46Pa ampapu ca nicuulh nive'lhaa pa ca ya'clisha ca nitôych'e. Jô lhech nalhu ti lhech yôjesh'e ti ampapu ca nifiiy ca niyôsesh t'ôyish'e ja Jesús.
Pa Jesús tavayelhvanôcji papi fariseos shi' papi vanqu'eyjatsjanesh pava lhfanishlhavach
(Mr 12.38-40; Lc 11.37-54; 20.45-47)
Currently Selected:
San Mateo 22: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
