San Mateo 20
20
Chiyovalheyjop atesha papi vatcumjayash lhavos
1Na lhanvacleyash ja Dios lhjunashjulh pa nivacle ti lhanvacleesh pa ôtjayetachat. Pa lhech vooy ti nich'a nalhu papi niclanshi jayu pava ôtjayetas. 2Pa vatpeya'shelh papin t'acum'e jayu ti yijutey jayu lhpa ve'lhach'e denario ti ve'lha nalhu. Pa lhechesh pa yicheney pa ôtjayetachat jaspa t'acum'e jayu. 3Pa clufquetsham pa yichey shta pa clayôych'e chit'ôtaych'een, pa yi'van papi ninatcum'in. 4Pa yit'esh: ‘Meelheyam shta ja yiôtjayetachat ca acumelh'eyam, c'ôfisjatelhch'eam jayu ca c'atistajelh.’ Pa yichey papu lhech. 5Pa yich shta ti nalhcachi, yich shta ti tanjuyshicham na jumcuclaay pa lhcaanvacle pa lhetlha t'ônashaan papi yivan'in. 6Vooy ti nuut pa tapecley shta pa clayôych'e chit'ôtaych'een, pa yi'van shta pap'elh ni'natcum'in, pa yit'esha: ‘¿Ta t'e lhayaash naacumelh'in, ca nalhuclay nôque lhô'velh'e?’ 7Pa yit'esh ts'ivee: ‘Lhayaash ti ampapu ca niniyôjeelhyi.’ Pa lhechesh pa yit'esha shta: ‘Meelheyam shta ja yiôtjayetachat, c'ofisjatelhch'eam jayu ca c'atistajelh.’ 8“Meelh ti yama pa tulh pa yiyôjaa pa lhcaanvacle pa lhcavo yinvacleyanesh pa vatcumjayash, pa yit'esha: ‘Istaa ca ôney napi t'acuumvatsham'in ca ajutey nava pesoc. Ajutsjat ca atis napi nuut ti t'acuumvatsham'in, pa nanjoolha papi vatchiyôf'e ti t'acuumvatsham'in.’*xv* 9Pa lhechesh pa nam papi nuut ti t'acum'in, pa chiyjutey lhpa v'lha denario. 10C'oya ti namey papi vatchiyôf'e ti t'acuumvatsham'in, pa yilheclôjtajesh ca chinashjatem ti chitis; taj ti papu lhech chiyjutey shta ve'lhach'esha'ne pava denarios. 11Meelh ti chiyjutey cavôque pa suya ts'ivee pa lhcaanvacle, 12pa yit'eshatsivee: ‘Napi nich'a nam'in na ti nuut, ve'lha hora atesha ti t'acum'in, taj ti yijôjelhch'ejulh yivaatsheelh jatifshelh na nalhu ti uj ti cus ti jaycumelh'in.’ 13Taj ti yit'esha pa lhcaanvacle pa ve'lha papu lhech: ‘Yic'utsfa, tanca yisnatesh'am pa nichinvoyeshch'e. ¿Nishtavatpeya'esh lhja ve'lhach'e denario? 14Istaa ca acum'e na apeso ca mô. Jayeesh ti jajutey nôque nijooylha ti t'acum'in jan t'ajôjqu'e lhja c'atis'ash. 15¿Sasjop ca niyjôneeshch'e jan yônashesh nava yipesoc? ¿Ta lhayaash ti lhjuctsenesh pa lhatvacôyyi ti niyacuyeja?'
16“Nôque lhjunash papi nijooylha vatjutsa' jayu, vooy papi vatjutsa' nijoolha jayu. Lhayaash ti acloj papi chitôney, taj ti napu' papi chit'apayeyshisha'ne.#20.8 Lv 19.13; Dt 24.15.,#20.16 Mt 19.30; Mr 10.31; Lc 13.30.
Nifac shta pa Jesús pa lhavafjayash
(Mr 10.32-34; Lc 18.31-34)
17C'oya ti yichey ja Jesús ja Jerusalén, pa tac'uyelh japi doce t'eyjatsjanjas, pa yit'esh:
18—Natôôyshelh ti shnôquey nôqueesh ja Jesusalén. Pa lhech'e jayu ti chiyjuteem na Nivacle Lhô'sesh japi lhanvaclesesh japi vatcasinôc shi' japi vanqu'eyjatsjanesh pava lhfanishlhavach. Japi lhech vatpeya'esh ts'ivee ca niclôn, 19jô'tajesh ti yijuta jayu japi nilhchifasa, ca jaspa niclôqui ts'ivee na lhech, ca nic'ôn'in shta shi' ca nesh lhpa cruz. Taj ca nôjtajeshch'e pava pu'jana nalhus pa nitshaamshi jayu capi vafsha'ne.
Pa t'a'lha lhpa lhamimi pa Jacobo shi' pa Juan
(Mr 10.35-45)
20Pa lhechesh pa nache'lhey ja Jesús lhja lhamimi ja Jacobo shi' ja Juan, japu lhech lhclesesh ja Zebedeo. Pa t'acjatsuy'e t'ajuyish ja Jesús pa t'a'lha. 21Pa niyôsesh ja Jesús, pa yit'esh:
—¿She t'e pôque?
Pa yit'esha lhpa lhech:
—At'eshyiyaam napi napu' yicles ca nô'vey na afayish na ve'lha vooy neelh ca nô'vey na ach'amiyish ca amtajey pa anvacleyash. 22Taj ti yit'esh ja Jesús ti yicuulh:
—Tanca natô'yelha nava lht'aalhtajeshyi. ¿Naclôôyshelh jayu ajalh pava caclec ca ayô'jelh ja vatyôjatshiy jan c'ayôôj'in jayu. Mônlheesh shta ti tajulhelhey'am jayu t'e shta ca chinanajayanshelh pa anclôyitsjayashelh jan yinfanash jayu ca chinasnajayantajesh?
Pa yit'esh ts'ivee japu lhech:
—Jech, iseelhjopyam jayu.
23Jô lhech pa yit'esha: —Jech, yijô'. Iseelhjop'am ca ayô'jelh ja c'ayôôj'in vatyôjatshiy, anayshelh jayu shta jan lhjunash ja yinayjayash; vooy ca vee'lhey yifayish shi' na yich'amiyish sasjop ca nitôlhyi ca yijutelh'ay cavôque, tsi'sha ti chiyjutey jayu papin yijuyjata ja Tata.
24Meelh ti yipe'yach'e cavôque jap'elh diez t'eyjatsjanjas ja Jesús pa vanutem ts'ivee ja Jacobo shi' ja Juan. 25Pa tôney ja Jesus japi t'eyjatsjanjas pa yiyôjaa pa yit'esh:
—Natô'yelha japi lhcaanvaclesesh'e na cotsjaat ti yicômclôquisha'ne papi lhcavos. 26Taj ti tanca lhech ajunasheelh avaatsheelh. Pa ve'lha ca niteetajesh ca nitaanvacleyantaj, pa lhech acavoaeshelh.*xx* 27Ca naôtajelh'atshi pa ve'lha ca niteetajeshlhavne ca nashjantajesh pa ca lhjunasha, pa lhech acumjatelh.*xy* 28Em ti lhech lhjunash na Nivacle Lhô'sesh, nilhecha ca nacheyshicham pa lhanvacleyash, vooy ti nacheyshicham ca vatcavoaesh, shi' ca nijutey na lhamônlhajayash ca jaspa nalhjen napi aclôj nivacle.#20.25-26 Lc 22.25-26.,#20.26-27 Mt 23.11; Mr 9.35; Lc 22.26.,#20.28 Lc 22.27; Jn 13.12-15.
Pa Jesús yovalhjat'in papi napu' taclujuy
(Mr 10.46-52; Lc 18.35-43)
29C'oya ti tay'e ja Jesús ja yitsaat Jericó, pa acloj japi tanaôycheelh. 30Pa lhech'e japi napu' taclujuy yi'shi' ja nôyish. Meelh ti tpeeycheyesh ja Jesús ti naashjop, pa lhechesh pa tônch'een ts'ivee pa yit'esh:
—¡Lhcaanvacle, David Lhaôs, acavtsáclayishelh!
31Japi nivacle yitsô'yatajshem'in ti yishanataj'in. Pa lhechesh pa yisitsenesh ti yit'esh:
—¡Lhcaanvacle, David Lhaôs, acavts'aclayishelh!
32Pa lhechesh pa vatsavat ja Jesús, pa tôney japi taclujuy pa niyôsesh:
—¿She pa lhteetajeshelh ca yisnatshelh'am?
33Japu lhech pa yicuulh:
—Lhcaanvalce, jayeetajeshelh ca yovalhelh'in.
34Pa lhechesh pa tcavts'aclayesh ja Jesús japi lhech, pa t'ajaya java lhtôsjey. Pa tatsha ti yovalh'in japi taclujuy, pa voqu'e ja Jesús.
Pa Jesús yitshaam pa Jerusalén
(Mr 11.1-11; Lc 19.28-40; Jn 12.12-19)
Currently Selected:
San Mateo 20: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
