San Mateo 19

1Meelh ti yivaclhitesh ja Jesús cavôque ti nifaclem, pa tay'e ja cotsjaat Galilea pa yamey ja cotsjaat Judea pachamey ja tovôc Jordán. 2Acloj japi nivacle voqu'e, pa lhech'e ti yilhjensha'ne japi aôytes'in.

3Pa lhechesh pa nachey ja Jesús japi fariseos pa yic'alhtanesha pa niyôsesh:

—¿Chiyvashanem pa nivacle ti yivôôm lhpa lhch'acfa ti caaj pa ti tôlh'ejop?

4Pa lhechesh pa yicuulh ja Jesús:

—¿Niaclôvalhelhshi java Vani'sesh'e, jô lhech jan yisnatesh ti nich'a ja nivacle ‘yisnatesh ja yitsuuj shi lhja ôcjeclô’?*xi* 5Yit'esha shta: ‘Nôquen lhayaash pa tayjop jayu pa nivacle pa lhtata shi' lhpa lhamimi, pa vooy lhpa lhjaya yi'jop, pa nôque lhjunash papuque napu' ve'lhasham.’*xj* 6Tanca t'ôyisheey ca napua papu lhech, vooy ca ve'lhaasham. Nôquen lhayaash sasjop ca nicatsônjat pa nivacle papi yamjatva'ne ja Dios. #19.4 Gn 1.27; 5.2.,#19.5 Gn 2.24.

7Pa lhechesh pa niyôsesh ts'ivee:

—¿Ta t'e lhayaash ti niyôjeeshelhyi ca Moisés ca chinjutey lhpa vatach'acfa pa vatqu'isjayanach t'ajuya pa vatvancavômjayash, ca jaspa chinvôôm jayu?#19.7 Dt 24.1-4; Mt 5.31.

8Pa yit'esha ja Jesús:

—Jaspa yueshelh'a ja Moisés ti lhavô'melh papi ajayaselh, lhayaash ti ninach'ana nava acachi'clelh. Taj ti vooy ti nich'a chiyisnatesh tanca lhech lhjunasha. 9Yivaatsha jayeetshelh'a ca nicaajtaj papi nivômcavômjayuesh lhpa lhjaya ti nintôlh'ejop ca nôjquenelhch'e peelh, pa lhjayaesh lhap'elh, pa lhech nivacle nucuvatjulh pa lhjayayash. Vooy ca nicaajtaj papi ca lhjayatajeesh, pa lhech nucuemvatjulh shta pa lhjayayash.#19.9 Mt 5.32; 1 Co 7.10-11.

10Pa lhechesh pa yit'esh ts'ivee japi t'eyjatsjanjas:

—Ca lhech lhjunashtajeesh pa nivacle lhpa lhjaya pa sasjop ca lhjayaesh papu.

11Pa yit'esha ja Jesús:

—Tanca lhacôm'a papu ca nitô'yish cavôque, tsisha papi yitôyjata ja Dios yitô'yish jayu. 12Caaj pava matas yisasiyanjop papu ca nitajayay: Caaj papi sasemjop tatsha ti nich'a nivat'aj ca nitajayay. Caaj shta pap'elh sasemjop ca nitajayay tôlh'ejop pap'elh ti yisasinatesha'ne. Vooy pap'elh ninteesh ca nitajayay tôlh'ejop ja lhanvacleyash ja Dios ti t'acumesh'in. Papi yitô'ya cavôque pa istaa ca nitô'ya.

Pa Jesús yit'eshem pa is papi taôvclas

(Mr 10.13-16; Lc 18.15-17)

13Pa lhechesh pa chinchajey'in japi taôvclas ja Jesús jaspa yan'apee jayu java lhpôcôtôy ca nit'a'lhem japu lhech. Taj ti yicônitshiesh japi t'eyjatsjajas japi nicha'jey'in. 14Taj ti yit'esha ja Jesús:

—An'ateelh napi taôvclas ca nachyiy, istaa ca ya aj ca acônitshielh; lhayaash na lhanvacleyash ja Dios t'ajuya papi lhjunashjulh napi lhech.

15Pa yan'apee java lhpôcôtôy japi taôvclas, pa lhechesh pa tay'e jan yie'.

Pa nich'ayech acôjjiin tasinôyelh ja Jesús

(Mr 10.17-31; Lc 18.18-30)

16Pa nachey ja Jesús ja ve'lha nich'ayech pa niyôsesh:

—Na is Vanqu'eyjatsjan, ¿She t'e pa is'e'jop ca jasnatesh pa is ca jaspa jam'apee jayu pa vatmônlhajayash ôyjôlhôyech?

17Pa yit'esha ja Jesús:

—¿Ta lhayaash ti lhteesh'yi ti ya is? Ampapu caelhchaa ca isa', ve'lha ja Dios. Taj ti ca eetajesh ti lham'apee pa vatmônlhajayash, pa istaa ca anc'ashamem cava Dios lhayôjijates.

18Pa yicuulh ja nich'ayech pa yit'esh:

—¿Pava ne?

Pa yit'esha ja Jesús:

—‘Ya aj ca aclôn papu; ya aj ca avatvômelh lhpa ajaya; ya aj ca acut; ya aj ca anôôlhjônchat pa'na.*xm* *xn* *xñ* *xo* 19Asclaneshi pa atata shi' lhpa amimi; istaa ca en pap'elh ajunashajulh ti lhnen.'*xp* #19.18 Ex 20.13; Dt 5.17.,#19.18 Ex 20.14; Dt 5.18. #19.18 Ex 20.15; Dt 5.19.,#19.18 Ex 20.16; Dt 5.20.,#19.19 Ex 20.12; Dt 5.16.,#19.19 Lv 19.18.

20Pa yit'esh ja nich'ayech:

—Cavôque lhacôm'a ti yifanishyivach ti jôjjeclay ya necjôôc—. ¿She t'e pa amc'oyayam?

21Pa yit'esha ja Jesús:

—Ca eetajesh ca yijô'taja ca navooytajeshch'e, pa mapecley pava lha'van ca acashayesh'in; pa atpec ca shtatanôychi.

22C'oya ti yipe'yach'e cavôque ja nich'ayech, pa yitacshinjayan'in, lhayaash ti acloj pava yi'van lhcôqueclitôy.

23Pa lhechesh pa yit'esha ja Jesús japi t'eyjatsjanjas:

—Yijô' ti jayeetshelhaam, ti uj ti tavijatayem pa acôjjiin ca namey ja lhanvacleyash ja Dios.*xr* 24Ve'lheeshcum jachajelheyc'oyaam, c'ôôjlhatajeem jayu pa camello ca nuych'e lhpa cutjaan lhtôsej, ya'shesh'apey'e jayu ti tavijatayem pa nivacle acôjjiin ca namey ja lhanvacleyash ja Dios. #19.23-24 Pr 11.28

25Meelh ti yipe'yach'e cavôque japi t'eyjatsjanjas pa uj ti nitôyiyjach'e, pa yit'esh:

—¿Pa naô t'e papi chiyilhjen jayu?

26Pa yovalhey ja Jes'us, pa yit'esh:

—Napi nivacle yisasinatjop cavôque, lhan'e ja Dios nisaseemjop lhacôm'a cavôque.

27Pa lhechesh pa yit'esha ja Pedro:

—Lhcaanvacle, yivaatsheelh javôômjelh'ac'oya java matas, jaspa javoelh'ach'esha'ne. ¿Pa she pa javanelh jayu?

28Pa yicuulh ja Jesús pa yit'esh:

—Yijô' ti jayeetshelhaam, ca namtaj jayu pa nalhu ti chiynichayan jayu lhacôm'a, pa yie'sha'ne jayu na Nivacle Lhô'sesh ja lhc'o'vat lhasnôyech. Pa lhecheesh avaatsheelh napin tavoyich'e pa lhôvelh'e jayu vitsha java doce vatc'ovtes lhasnôyjes jaspa lhasclanelhch'e jayu japi doce tô'lha japi Israel.*xs* *xt* 29Lhacôm'a papi ti vômeshyamjop pa lhajpôyich ja't'ajesha papi lhcheclavot, shi' papi lhch'injavot, ja't'ajesha pa lhtata shi' lhpa lhamimi, ja't'ajesha lhpa lhch'acfa shi' papi lhcles shi' pa lhcac'ovat, papu lhech chiyashjatem jayu pava cien'esh, pa yi'van jayu shta pa vatmônlhajayash ôyjôlhôyech. 30Taj ti acloj papi vatjutsa' nôqueesh, pa nijooylha jayu; vooy papi nijooylha nôqueesh, pa vatjutsa' jayu.#19.28 Mt 25.31.,#19.28 Lc 22.30.,#19.30 Mt 20.16; Lc 13.30.

Currently Selected:

San Mateo 19: NIVA

Highlight

Copy