San Mateo 18

1Pa lhech t'aplhuqu'e ti nachey ts'ivee ja Jesús japi t'eyjatsjanjas, pa niyôsesh tsivee:

—¿She t'e papi ya'shesh pa lhjunash yi'shi' ja lhanvacleyash pa Dios?#18.1 Lc 22.24.

2Pa lhechesh pa tôney ja Jesús ja ve'lha necjôôc pa t'acum'e pa yieshi lhcachivat, 3pa yit'esh:

—Yijô' ti jayeetshelh'a, ca nieetajeeshelh avaatsheelh ca atatvaych'aclajshelh pa ajunashelh nan lhjunash napi taôvclas, pa tanca amelhey jayu ja lhanvacleyash ja Dios.*xa* 4Pa lhecha jayu, papi ya'shesh pa lhjunash yi'shi' ja lhanvacleyash ja Dios, papi vanachajshicham nan lhjunash nôque necjôôc. 5Papi ti yaychavalha ca yey ti t'acuumjulh pa necjôôc, pa lhech lhavaatsha ti t'acuumyijulh. #18.3 Mr 10.15; Lc 18.17.

Suyey ca chinvancafaycutesh pa sach'e

(Mr 9.42-48; Lc 17.1-2)

6Papu ti yifaycuta pa sasch'e papi tiqu'icsha'ne papi ninascacu'taj, pa lhech tajulhtajey ca chinôcfeesh lha'vo' lhpa uj utej ca chinuesham pa apatoj lhjôvcha. 7¡Uj ti ni'najulhjatey japi yie' na cotsjaat ti vancafaycuta pa sasch'e! Yajatesh ti yivclanjat jayu pa vatvancafaycutsjayash, taj ti ¡shiya'lhavach pa lhech nivacle pan tô'lha pa vatvancafaycutsjayash!

8“Pa lhe'naa ca iyitajaan na apôcôt ja't'ajesha na afo' pa sasch'e, pa at'ovôsey pa avôôm; lhayaash ti tajulhey'am jôcl'esh ca at'ucashic'oya ja't'ajesha ca aancoqu'eeshelhc'oya ca amey pa vatmônlhajayash ôyjôlhôyech, ojeytaj ca lhetlhalht'ajô'ja nava apôcôtôy shi' nava afoc ca chinu'jam pa itôj ninmac pa cat'elheesh.*xb* 9Ca nafaycutaja pa sasch'e lha atôsej, pa anclanshi pa avôôm; lhayaash ti tajulhey'am jôcl'esh ca ve'lha lha atôsej ca amey pa vatmônlhajayash ôyjôlhôyech, ojeytaj ca lhetlhalht'ajô'ja nava atôsjey ca chinu'jam pa itôj ninmac pa cat'elheesh.#18.8 Mt 5.30.,#18.9 Mt 5.29.

Na vatovalhjayasheyjop pa tashinshtaj ti tastay'in

(Lc 15.3-7)

10“Ya aj ca apunelh napuque tiqu'icsha'ne. Yijô' ti jayeetshelhaam ti yi'shi' ja vôôs japi lh'angeles yie' t'ajuyish ja Tata.*xd* 11Lhayaash ti nam na Nivacle Lhô'sesh jaspa yilhjensha'ne jayu japi tastay'in. #18.10 Ez 34.16; Lc 19.10.

12“¿Shepa lheclôjeshelh? Ca nicaajtaj pa ve'lha nivacle cien pava lhclôy tashinshtas, ca nicuclôntaj'in lhpa ve'lha, ¿tan t'e ca nôôy pava noventa y nueve yiey lhpa utiyuc ca nivooy lhpa ve'lha vacuclôn'in?

13Ca nivantaj lhpa lhech pa ya'shesh ti nishamesh, a'lheesh pav'elh noventa y nueve pavan nincuclôn'in. 14Lhech lhjunash jayu ja Atatelh jan yi'shi' ja vôôs ninteetajesh ca nicuclôn'in pa ca ve'lhaa napuque tiqu'csha'ne.

Pa lhjunash ti chiyvômjatemch'e pa vatvelh pava lhsasch'esha'ne

(Lc 17.3)

15Ca nasnatajesh pa sasch'e pa avelh, pa ave'lhaa ca meey ca asinô'yelh ca jaspa nitôych'e pava ninvo'yeshch'e. Ca niteetajesh ca nach'antaj'a pa lhasclansha'ne pa avelh.*xe* 16Taj ti ca ninach'antajeesh'a, pa istaa ca ôney pa ve'lha ja't'ajesha ca napu'a, pa jaspa nipe'yeesh pava yit'esh papi lhech.*xf* 17Ca ninach'antajeesha shta papi lhech, pa anfacle'lhem lhacôm'a papi avelhavot'elh. Taj ti ca ninach'antajeesha shta papi lhtatve'lhavot'elh, pa istaa ca ayjatelhey secl'esh ca lhjunashajulh papi yicacu pa Dios, ja't'ajesha ca lhjunashajulh pa yivoyanesh pava lhpesoc pa lhcaanvacle pan chiyapun. #18.15 Lc 17.3.,#18.16 Dt 19.15.

18Yijô' ti jayeetshelh'a, ti lhacôm'a java naavashanelh yiey nôque cotsjaat mônlheesh shta ti nichinvashan yiey ja vôôs. Vooy lhacôm'a java lhavashanelh yiey nôque cotsjaat mônlheesh jayu shta ti chiyvashan yiey ja vôôs.#18.18 Mt 16.19; Jn 20.23.

19Jayeetshelh'a shta, ca nicaajtaj papi napu' vatpeya'esh yiey nôque cotsjaat ti t'aalhsha pa'na ja Tata jan yiey ja vôôs, jô lhech pa yijutey jayu. 20Ca nicaajtaj papi napu' ja't'ajesha pu'jana ti tcaeshva'ne ca yey, pa lhech yie' ca jôvji' lhcaavju.

21Pa lhechesh pa yichey ja Pedro ja Jesús pa niyôsesh:

—Lhcaanvacle, ¿Ta t'ajô'jesh ca javômjatemch'e pa yivelh ca nasnatajeshyam pa niysa'? ¿Tajulhsham t'e ca sieteaesh ca javômjatemch'e?

22Pa yicuulh ja Jesús pa yit'esh:

—Ama, nintajulhsham ca sieteaesh ca avômjatemch'e, vooy pava setentaesh siete ca avômjatemch'e.#18.21-22 Lc 17.3-4.

Na chiyovalheyjop atesha pa vatcavo ti ninteesh ca nivômjatemch'e pap'elh

23Nôquen lhayaash, ja lhanvacleyash ja Dios lhjunashjulh pa lhcaanvacle ti yitsjulhch'e pava lhpiôclem papi lhcavos. 24C'oya ti yisnatesh cavôque pa chinchajey pa ve'lha lhcavo, aclojqu'e pava milliones lhpiôclesh. 25Pa lhech vatcavo ninvan pa'na ca nishayanesh pa lhpiô. Pa lhechesh pa tayôjijanesh pa lhcaanvacle ca chinatcasha'ya pa lhech lhcavo shi' lhpa lhch'acfa shi' shta papi lhcles shi' shta lhacôm'a pava yi'van, jaspa chinvômjach'e pava lhpiôc. 26Pa lhechesh pa t'acjatsuy'e t'ajuyish pa vatcavo pa lhanvacle pa yit'esha ti t'a'lha: “Lhcaanvacle, istaa ca acavts'aclayish, vooy peelh nalhu ca nicaajtaj pa jajut'ay jayu pava pesoc.” 27Pa tcavts'aclayesh pa lhcaanvacle pa lhcavo pa tisesh atesha lhacôm'a pava lhpiôctaj. Pa nuqueesh pan chiyôcfa'taj lhcavo. 28C'oya ti yichtaj pa lhech vatcavo pa vacutesh pa lhc'utsfa pan piôyeshem pava napuqu'e pesoc. Pa yalhalha ti yôts'ôclu, pa yit'esh: “¡Ashayanyam ja apiôyam!” 29Pa lhechesh pa t'acjatsuy'e t'ajuyish pa lhc'utsfa pa yit'esh ti t'a'lha: “Istaa ca acavts'aclayish, vooy peelh nalhu ca nicaajtaj pa jajut'ay jayu pava pesoc. 30Taj ti ninteesh pa lhech, pa t'acum'e pa yicha'jey lhpa vatvanc'ôcfajavat ca lhech mônlhaaeen namjey ca nishayantaj lhacôm'a pava lhpiôc. 31Meelh ti yivanesh côque pap'elh vatcavos pa vanutshem, pa nifaclem pa lhcaanvacle lhacôm'a pava yisnatesh. 32Pa lhechesh pa tayôjijanesh pa lhcaanvacle pa lhcavo ca nachey, pa yit'esha: “¡Na yicavo ojey jum! Apis ti catis'ash lhacôm'a ja apiôyam, lhayaash ti lht'a'lheshyi. 33Isjop ca acavts'aclayesh ja acumjafa nan yijunash ti jaycavts'aclay'ash.” 34Pa tavacôy pa lhcaanvacle pa tayôjijanesh ca chinôcfa' shi' ca chinclôyit namjey ca nishayantaj lhacôm'a pava lhpiôc.

35Pa yivaclhitesh ja Jesús cavôque, pa yit'esh:

—Lhech jayu lhjunashelh'ash ja Tata jan yi'shi' ja vôôs, ca nietajeeshelh ca niavômjatajeelhemch'e jô papi avelhavot'elh.

Pa Jesús vanqu'eyjatsjanesh pa lhjunash papu ti nivôncavômjatsutaj

(Mr 10.1-12; Lc 16.18)

Currently Selected:

San Mateo 18: NIVA

Highlight

Copy