San Mateo 17

1Nôjeshch'e cava ve'lhayama nalhus, pa yaôychi ja Jesús ja Pedro, ja Jacobo shi' ja Juan pa lhch'inish ja Jacobo. Japu lhech tanaôycheey lhja ujquishaam utiyuc. 2Pa lhech'e ti tanu'jamc'oya pa t'aisiyash. Pa pjumtsej pa lhtaco jan lhjunash na jumcuclaay, vooy lhja t'uyjatshiy uj ti clim jan lhjunash ja itôtaj. 3Pa yalhalha ti yi'van ts'ivee pa Moisés shi' pa Elías ti tasinôyelhsha'ne ja Jesús. 4Pa lhechesh pa yit'esha ja Pedro ja Jesús:

—Lhcaanvacle, ¡istajeshnee jum! Ca eetajesh pa jasnatshelh pava pu'jana jpôyjey: ve'lhataja pa ca ajpôyich'aesh, peelh lhajpôyichtaja na Moisés, pa ve'lhataja pa lhajpôyich yitsha na Elías.

5C'oya ti tasinôy ja Pedro, pa nam lhpa vôse' pjumtsej pa capeshch'e. Pa tavayshi lhpa vôse' pa vat'ôjôj ti yit'esh:

“Nôque Yaôs yenach, nan ts'ishamesh, lhech nôque ach'anelha.”*xs* *xt* #17.5 Gn 22.2; Sal 2.7; Is 42.1; Mt 3.17; 12.18; Mr 1.11; Lc 3.22.,#17.5 Dt 18.15.,#17.1-5 2 P 1.17-18.

6Meelh ti yipe'yach'e côque japi t'eyjatsjanjas, pa lhechesh pa vanc'uma'ja ts'ivee cotsjaat, lhayaash ti uj ti nijovayshi ts'ivee. 7Pa yichey ja Jesús pa t'apaccuna pa yit'esha:

—Aneelhchisham; ya aj ca anjova'yelh'in.

8C'oya ti yovalhtajey pa yi'van ti ve'lha ja Jesús.

9Meelh ti tay'apee ts'ivee lhja utiyuc, pa yit'esha ja Jesús japi t'eyjatsjanjas ti yiyôjaa:

—Ya aj ca anfacle'lhem papu navan lhavanelh, namjey pa ca t'aplhutajaa ca neetajchishamshi na Nivacle Lhô'sesh capi vafsha'ne.

10Pa lhechesh pa niyôsesh ts'ivee japi t'eyjatsjanjas ja Jesús, pa yit'esh:

—¿Ta t'e lhayaash ti yit'esh japi vanqu'eyjatsjanesh pava lhfanishlhavach ca nivatjutsa pa Elías ca natshicham shta?#17.10 Mt 4.5.

11Pa yicuulh ja Jesús pa yit'esh:

—Yijô' ti vatjutsa jayu ja Elías ca natshicham shta ca nasclanvatich'e lhacôm'a nava matas. 12Taj ti jayeetshelhaam nôqueesh:

—Ja Elías ti apis ti tapec, taj ti tanca nantôfa'clesh papu, tsi'sha ja lhancôntayash chiyisnatshem. Lhech jayu lhjunash shta na Nivacle Lhô'sesh chiyclôyit jayu, yiclôyit jayu shta japu lhech.#17.12 Mt 11.14

13Pa nôqueesh yitô'yish ts'ivee japi t'eyjatsjanjas ti yasinôqui ja Jesús ca Juan Vatnayjayash lhavo'.

Pa Jesús yivatsjanchat pa nich'ayech vaf'e'in

(Mr 9.14-29; Lc 9.37-43)

14Meelh ti yamey ts'ivee jan yie' jap'elh nivacle, pa lhechesh pa nachey ja ve'lha nivacle ja Jesús pa t'acjatsuy'e t'ajuyish, pa yit'esh:

15—Lhcaanvacle, acavts'acla'yeshyam na yaôs, aclojesh ti vaf'e'in pa uj ti yiclôyit. Aclojesh ti natsham java itôs, ja't'ajesha ja yinôôt. 16Janchaajtajey na napi eyjatsjanjas, taj ti ampapu ca nitô'yish ca nalhjen.

17Pa yicuulh ja Jesús pa yit'esh:

—¡Jay napi nivacle, acacujanjaselh, ninatcajôyshaysha'ne shta! ¿Ta t'e ca yaplhuaeshch'e ca yamônlheeelh'ajop? ¿Ta t'e ca yaplhuaeshch'e shta ca nasclôyelh'ash? Anchajeelhyiy na nich'ayech.

18Pa lhechesh pa yiyôjaa ja Jesús pa tsich'e' ca nitayshi ja nich'ayech, pa tatsha ti vatsjan.

19C'oya ti tôsch'een japi nivacle pa niyôsesh ts'ivee japi t'eyjatsjanjas ja Jesús pa yit'esh:

—¿Ta t'e lhayaash ti saselhjopyam na ca yayjatelhshi pa tsich'e'?

20Pa yit'esha ja Jesús:

—Lhayaash ti tiqu'in na niacacujayasheelh. Yijô' ti jayeetshelh'a, ca nicaatajelh'am pa niacacujayasheelh jan tuc'a' lhja mostaza lhtôsej, pa istajeelhjop'am ca ayôjeelha anôque utiyuc: ‘Ataattsojquisham pa ac'uyey peelh ca vee'’; pa nitaattsojquisham jayu ca nitay'e lha utiyuc. Ampa ca saseelhjop'am jayu avaatsheelh ca nicaajtajelh'am pa niacacujayasheelh jô.*xx* 21Pa nôque lhjunash tsich'e' ti chiyisaasfach'ee tsisha ja vat'alhjayash shi' ja vat'ayipcuyash ti chiychenesh. #17.20 Mt 21.21; Mr 11.23; 1 Co 13.2.

Pa Jesús yachajeyc'oya ti nifac shita pa lhavafjayash

(Mr 9.30-32; Lc 9.43-45)

22Meelh ti yichelhch'e ja Jesús japi t'eyjatsjanjas ja cotsjaat Galilea, pa yit'esha ja Jesús: —Na Nivacle Lhô'sesh chiyjutey jayu japi nivacle, 23pa niclôn jayu. Taj ti pu'jana jayu pava nalhus pa nitshaam jayu shta. Cavôque uj ti yitacshiyan'in japi t'eyjatsjanjas.

Chivooy pava pesoc t'ajuya pa vatishjanjavat

24C'oya ti yamelhey ja Jesús japi t'eyjatsjanjas ja yitsaat Capernaum, pa lhechesh pa nachey ja Pedro japi yivoyanesh pava lhpesoc ja vatishjanjavat pa niyôsesh ts'ivee pa yit'esh:#17.24 Ex 30.13; 38.26.

—¿Ninteesh t'e na neyjatsjanelh ca nitisesh pava lhpesoc t'ajuya ja vatishjanjavat?

25Pa yicuulh ja Pedro pa yit'esh:

—Jech, yit'esh.

Meelh ti yich'ôcji ja Pedro ja jpôyich, pa tatsha ti niyôsesh ja Jesús pa yit'esh:

—¿Shepa lheclôjesh, Simón? ¿She papi chit'alhe'ma pava pesoc t'ajuya japi caanvacles yiey nôque cotsjaat; Lhech japi lhchifas, ja't'ajesha papi nilhchifasa?

26Pa yiucuulh ja Pedro pa yit'esh:

—Vooy papi nilhchifasa.

Pa yit'esh ja Jesús:

—Jech nôque lhjunash tanca nitis papin yitsôt'ajesh. 27Jech nôqueesh istaa ca ya aj ca sht'ajuyelhvatjulh. Istaa ca meey ja lhjôvcha ca u'jam ja vatcanasas. Ca nijuujtajey pa sivônôc pa antojôneshfach'ee. Pa ovalhch'e pa lhashi pa vatjutsa' ti yijujey sivônôc, pa lhavaneyshi jayu lhpa tinshanja. Acum'e lhpa lhech ca ajutey japu lhech, lhayaash ti shtajulhsham.

¿She t'e papi ya'shesh pa lhjunash?

(Mr 9.33-37; Lc 9.46-48)

Currently Selected:

San Mateo 17: NIVA

Highlight

Copy