San Mateo 12
12
1Ve'lha ja nalhu ti chit'ichayshi pa yitsavalhsham ja Jesús pa vatcôvjiyanjavat. Yiyipcunsha'ne japi t'eyjatsjanjas pa yisooji pa trigo pa nitôsjelha pa tuj.*xc* 2Meelh ti yivanesh japi fariseos côque pa yit'esha ja Jesús: #12.1 Dt 23.25.
—A'va, napi eyjatsjanjas t'acuumjiin na nichinvashan ca lhech lhanfanasha na nalhu ti chit'ichayshi.
3Taj ti yit'esh ja Jesús ti yicuulh:
—¿Naaclôvalhelhshi nataney ja vatqu'isjayanach ja yi'shi' ca David ca lhfanishlhavach ti yiyipcunsha'ne capi tanaôycheelh? 4Yich'ôcji ja lhajpôyich ja Dios pa tuj pava yucuvec chiyvenchatesh ja Dios. Pava lhech yucuvec nichinvashantajem ca nituj papi tanaôycheelh, tsi'shajop ca nituj papi vatcasinôc.*xd* *xe* 5¿Naaclôvalhelhshi nataney java lhayôjijates ja Moisés ti t'acum'ôcjiin ja vatishjanjavat japi vatcasinôc ja nalhu ti chit'ichayshi, taj ti cavôque tanca sasch'eaesh?*xf* 6Taj ti jayeetshelh'a: —Nôque ve'lha ti chiyashjateshchisham ja vatishjanjavat. 7Tanca nataôyshelh jô na t'ônash nava Vani'sesh'e: “Jayeetajesh ca nicaajelh'am pa acavts'aclayjayashelh, pa niyit'esh ca acufayeshelh pava yaquisetes.” Ca natôôytajeshelh cavôque, pa tanca ivalhelha napi ninasnatesh pa ca ninvoyeeshch'e.*xg* 8Na Nivacle Lhô'sesh lhanvacleesh shta na nalhu ti chit'ichayshi. #12.3-4 1 S 21.1-6.,#12.4 Lv 24.9.,#12.5 Nm 28.9-10,#12.7 Os 6.6; Mt 9.13.
Pa nivacle t'unch'e pa t'ituuc
(Mr 3.1-6; Lc 6.6-11)
9Pa lhechesh pa tayjop ja Jesús pa yichey ja vatvanqu'eyjatsjanjavat. 10Lhech yie' ja ve'lha nivacle t'unch'e ja t'ituuc. Lhech'e shta ti vo'tajemey papi nicôfayuesh ja Jesús pa ca ninvo'yeeshch'e ca jaspa niyôjieshaan pa ca niyôsesh ts'ivee:
—¿Isjop t'e ti chiyfetetsiyan pa aôytej'in na nalhu ti chit'ichayshi?
11Pa yicuulh ja Jesús pa yit'esh: — ¿Ta ajalh ca afanishtajeeshelh avaatsheelh pa tashinshtaj ca natajch'e lhpa t'itsech pa nalhu ti chit'ichayshi, pa tan t'e ca anclaneelhshi?*xh* 12Ya'sheshc'oya pa tashinshtaj pa nivacle ti chinô'yesh! A'va, chiyvashanjoom ti shtasnatesh pava isis java nalhus ti chit'ichayshi. #12.11 Lc 14.5.
13Pa lhechesh pa yiyôjaa ja nivacle pa yit'esh:
—Atsôôtjat na atuuc.
Meelh ti yitsôôtjat, pa lhechesh pa vatsjan pa lhjunashjulh jeelh t'ituuc. 14Pa lhechesh pa yichfach'ee japi fariseos pa vatpeya'tajesh ca niclôn ja Jesús.
Chitôtômjalhesh lhapesh pan lhjunash pa Jesús
15Meelh ti yipe'ya ja Jesús cavôque pa yich, pa acloj japi tanaôycheelh. Ja Jesús yilhjensha'ne japi aôytes'in. 16Pa yiyôjaa japi lhech pa yit'esh: —Ya aj ca anfacle'lhem pap'elh. 17Nôque vaclan ca jaspa yofisch'e jan t'ônashesh lhapesh pa chiytôyjata pava ti vaclan Isaías, ti yit'esh:
18“Nôque yicavo nan javooyshiyitam,
nan jen pa ts'ishamesh shta.
Jajutey na yi'Espiritu,
na lhech tatômjalheshem ti nifaclem
papi ninantôfa'clesh ja Dios pa lhanclôyitsjayash.
19Na lhech tanca nishanelh papu,
tanca ts'iseey jayu shta.
Ampapu jayu shta ca nipe'ya pa t'ôjôj
yiey pava lhcaavjuc.
20Ninôcôsshi jayu lhpa sise cusasham,
tanca namcat jayu lhpa itôtaj
tiqu'in'esh ti yichesh,
yôjesh'e jayu ca nijôt'ajtaj
ja lhanvacleyash yivo'yeshch'e.
21Pa lhacôm'a papi ninantôfa'clesh ja Dios
caclecla jayu ca lhey.”#12.18-21 Is 42.1-4.
Chinôôlhjônchatesh pa Jesús ca nicaajem pa t'unaj pa tsich'e'
(Mr 3.20-30; Lc 11.14-23; 12.10)
22Pa lhechesh pa chinchajey ja Jesús ja ve'lha tacluuc, clishaclayech'esh shta. Jô lhech yi'shi' pa tsich'e'. Pa yilhjen ja Jesús jô lhech jaspa yovalh'in pa tasinôy shta. 23Lhacôm'a japi yi'van côque pa tamp'oyeshem, pa yit'esh ts'ivee:
— ¿Lhech ja David lhaôs nôque?
24Taj ti meelh ti yipe'ya japi fariseos cavôque, pa yit'eshts'ivee:
— Nôque nivacle yichenfach'eeen pava tsich'es tôlhesha pa t'unaj pa Beelzebú, pan lhanvacleesh pava tsich'es.#12.24 Mt 9.34; 10.25.
25Taj ti yitô'yish ja Jesús pava yaychavalhey, pa yit'esha: — Lhacôm'a pa vataanvaleyash ti vanicatsônjat ti vatcônitshisha'ne, pa vatvômjatshi jayu. Lhech lhjunash shta papi lhtachifas shi' papi lhet lha lhtajôôjam ca nivatcônitshitaj pa ninicatsônjat jayu. 26Lhech jayu lhjunash ja Satanás ca nisaastajfach'ee peelh pa vanicatsônjat jayu ti vatcônitshi; ¿ta lhjunash jayu shta pa lhanvacleyash? 27Lhteetshelhyi ca yisa'seshfach'ee pava tsich'es pa vat'unaj tô'lha ja Beelzebú; ¿she t'e papi yijutey japi acles pa t'unaj ti yisaasfach'ee pava tsich'es? A'va, napu lhech nôclit'am ti ninavooyshelhch'e. 28Taj ti yivaatsha jatôôlhsha ja lh'Espiritu ja Dios ti jasaasfach'ee java tsich'es. Navôque nôclitelh'am ti apis ti namelh'ay ja lhanvacleyash ja Dios.
29“¿Isjop t'e ca nôc'ôcji papu pa lhajpôyich pa t'un'in ca natcutesh pava lhcôqueclitôy, ti jôjjeclay ninôôcfa pa t'un'in? Am, vooy ca ninôôcfataj pa isaemjop ca natcutesh pava lhcôqueclitôy.
30“Ca nicaajtaj papi nintsen, papi lhech tsicônitshi. Papi ninteesh ca nits'efenesh java jantôqu'e', papi lhech yivôm'in.#12.30 Mr 9.40.
31“Nôquen lhayaash jayeetshelhaam: Lhacôm'a java lhsasch'esha'ne isjop ca chinvômjatemch'e napi nivacle, pa chinvômjatemch'e shta ca nasinôquitaj pa niysa'. Taj ti ca neyimatantaj ja Espíritu Santo, pa tanca chinvômjatemch'e jayu. 32Vooy papu ca nitseyimatantaj ti ya Nivacle Lhô'sesh pa chinvômjatemch'e jayu. Taj ti papu lhech ca neyimatantaj ja Espíritu Santo, pa tanca chinvômjatemch'e yiey nôque cotsjaat pa tanca shta peelh.#12.32 Lc 12.10.
Lhpa aacjiyuc tantôfacliyesha pava lhay
(Lc 6.43-45)
33“Ca istaja lhpa aacjiyuc, pa isis jayu shta pava lhay. Ca niistajaa lhpa aacjiyuc, pa niysisa jayu shta pava lhay. Lhayaash ti tantôfacliyesha lhpa aacjiyuc pava lhay.*xm* 34¡Ajunashelhjulh nava tosis! ¿Iseelhjop'am ca asinôquielh java isis ya'clishay, ti av'ojeyiselh? Tasinô'yesh pa vatashi pava topooj pa vatacachi.*xn* *xñ* 35Ca istajasha'ne pa nivacle, pa isis jayu shta pava lhclishay, lhayaash ti isis pava yi'shi' pa lhcachi. Ca niistajasha'ne pa nivacle, pa niysisa jayu shta pava lhclishay, lhayaash ti niysisa pava yi'shi' pa lhcachi. 36Yivaatsha jayeetshelh'a: Nam jayu pa nalhu ti chiyisclanch'e jayu nava matas. Pa lhech t'ôplhu jayu ca chiniyôsesh jayu lhacôm'a pava niysisa pava lhclishay ti chiyit'esh'in. 37Lhayaash ti chitôlha'jop jayu pava aclishay ca chinasclantajch'e, pa chinfacl'am jayu pa ajunash ja't'ajesha ca chinalhjen, ja't'ajesha ca chinaclôyit jayu. #12.33 Mt 7.20; Lc 6.44.,#12.34 Mt 3.7; 23.33; Lc 3.7. #12.34 Mt 15.18; Lc 6.45.
Papi nivacle ojiyis t'aalhtajesha pa Jesús pava nimatasa papu ca nitô'yish ca ninôôclhaniteshlhavne
(Mr 8.12; Lc 11.29-32)
38Pa lhechesh pa yit'esha ts'ivee ja Jesús japi napu' fariseos shi' japi vanqu'eyjatsjanesh pava lhfanishlhavach:
—Vanqu'eyjatsjan, jayeetajeshelh ca c'avanshelh ca asnatesh pava nimatasa papu ca nitô'yish ca atônôclitesh.#12.38 Mt 16.1; Mr 8.11; Lc 11.16.
39Pa yicuulh ja Jesús pa yit'esh: —Napi nivacle ojiyis shi' ti ninvo'yeshch'e, t'aalhtaja pava nimatasa papu ca nitô'yish ca ninôclitem. Taj ti tan ca pa caelhchaa ca chinôclitem, apis ti caaj java nimatasa papu ca nitô'yish tô'lha ja chiytôyjata pava ti vaclan Jonás.*xp* 40Lhayaash ti lhjunashjulh jayu jan lhjunash lhapesh ja Jonás ti pu'jana java nalhus shi' java tulhis ti yi'shi' pa sajech lhtata. Lhech jayu lhjunash shta na Nivacle Lhô'sesh pu'jana jayu pava nalhus shi' pava tulhis ca nôvji' na cotsjaat.*xq* 41Papi yie' lhapesh pa yitsaat Nínive vatsavatch'e jayu shta pa lhech nalhu ca chinasclantajch'e, meelh ca chinasclantajvatich'e napuque nivacle, pa yivalha jayu napuque. Lhayaash papi yie' lhapesh pa Nínive tatvaych'aclajesh pava lhfanishlhavach ti yipe'ya ja Jonás ti nifaclem cava Dios lhasinôc, taj ti nôque yie' na ve'lha yashc'oya ja Jonás.*xr* 42Pa shi' jayu shta lhpa lhcaanvacche tôlhey na fiyat, vatsavat jayu pa lhech nalhu ca chinasclantajch'e, meelh ca chinasclantajvatich'e napuque nivacle, pa yivalha jayu napuque, lhayaash ti tojey pa tôlhshi' lhavaatsha jaspa tach'ansha pa lhcajôysha pa Salomón. Taj ti nôque yie' na ve'lha yashc'oya pa Salomón.#12.39 Mt 16.4; Mr 8.12.,#12.40 Jon 1.17.,#12.41 Jon 3.5.,#12.42 1 R 10.1-10; 2 Cr 9.1-2.
Pa tsich'e' ti tapec
(Lc 11.24-26)
43“Meelh ti tayshi pa tsich'e' pa nivacle, pa t'ôtaych'een pa cotsjaat clôjôjqu'e vo'tajey pa ca nit'ichay'e. Taj ca ninvantaja pa yaychavalh'in ti yit'esh: 44“Japecley jayu ja yijpôyich jan jayay'e.” Meelh ti vapecley pa yi'van pa lhech nivacle jan lhjunash ja jpôyich ti ampapu can nôv'ôcji ti chiyclôs'ôcji shi' ti chiyisclansha'ne. 45Lhechesh pa yichaaj jav'elh siete tsich'es ya'shesh ti ojiyis, pa yich'ôcjivatam pa nivacle jaspa mônlhashi. Pa lhechesh ya'shesh ti ojey pa lhech nivacle. Lhech jayu lhjunash ca navclaneem napuque nivacle ojiyis.
Lhpa lhamimi shi' papi lhch'injavot pa Jesús
(Mr 3.31-35; Lc 8.19-21)
46Jôjjeclay ninvaclhitesh ja Jesús ti tasinô'yem japi nivacle, pa namey lhja lhamimi shi' japi lhch'injavot. Japu lhech mônlhafach'ee, yentaj ca nitasinô'yelh ja Jesús. 47Pa ve'lha ja yit'esha ja Jesús:
— A'va, lhja amimi shi' japi ach'injavot yi'fach'ee, yeetajesh lhôn ca asinô'yelh.
48Taj ti yit'esha ja Jesús jô lhech jan tfacjanem:
— ¿She t'e lhpa mimiesh, she t'e shta papi yich'injavot'esh?
49Pa lhechesh pa t'apaysham japi t'eyjatsjanjas pa yit'esh:
— Napuque mimiclesh yich'injavot'esh shta. 50Lhayaash papi niqu'ishamesh jan yit'esh ja Tata jan yiey ja vôôs, pa lhech japu lhech yich'inishesh, yich'injoesh, pa mimiesh shta.
Pa chiyovalheyjop atesha papu ti tcôvjiyanjan
(Mr 4.1-9; Lc 8.4-8)
Currently Selected:
San Mateo 12: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
