San Mateo 11

1C'oya ti yivaclhitesh ja Jesús ti yeyjatsjanesh cavôque matas japi doce t'eyjatsjanjas, pa yich'in jaspa vanqu'eyjatsjanesh pa tasinôyesh'e jav'elh yitsates yiey ja lhech'e cotsjaat.

2Pa Juan, yie' lhpa vatvanc'ôcfajayte, pa tpeeycheyesh pava yisnatesh ja Cristo. Pa lhechesh pa yicheney papi napu' voqu'esha'neen ca nijochiey ja Jesús, 3ca jaspa niniyôsesh:

—¿Yijô' ti alhech a Cristo ti lhnam, ja't'ajesha ca jaychanelhc'oya peelh?

4Pa yicuulh ja Jesús pa yit'esh:

—Meelhey ja Juan pa anfacle'lhem nava lhavanelh shi' nava lhpe'yeelh. 5Anfacle'lhem nan lhjunash napi taclujuy ti yovalhvatsham'in, ti t'ôtaay napi ancojoy, ti vatsjansha'ne shta napi tashtôtaysha'ne, ti tpeeychey shta napi peeychelhôjis, napi vafsha'ne nitshamch'e shta, shi' napi ts'aclaaysha'ne chinfacleem shta na vatnilhjenjayash.*xq* *xr* 6Nisham'in papi nisuya'yi. #11.5 Is 35.5-6.,#11.5 Is 61.1

7Meelh ti tôsch'een papi chincheney ja Jesús, pa cha'yema ja Jesús japi acloj nivacle pa Juan pa yit'esh:

—¿Ta t'e lhayaash ti lhôquelhey ja cotsjaat ti ampapu ca nôv'e'? ¿She pa lhentajelh ca avanelh? ¿Ve'lha lhpa sise yiclôyan pa lhaviim? 8¿She t'e pan lhentajelh ca avanelh? ¿Lhech natane pa nivacle yuych'e lhpa vat'uyjatshiy is? Nataôyshelh avaatsheelh ti yie' pava lhajpôyjey papi lhcaanvacles papi yuych'e pava isis vat'uyjatshiyis. 9¿She ajalh pa lhentajelh ca avanelh? ¿Ve'lha ja chiytôyjata pava ti vaclan? 10Jô lhech Juan nifac java Vani'sesh'e:

‘Yivaatsha janôyinjat'ac'oya na yicavo

ca nasnatesh'am jayu pa a'nôyish.*xs*

11Yijô' ti janfaclelh'am ti ampapu ca ve'lhaa papu ca tc'aajulh ja Juan Vatnayjayash lhavo'. Taj ti pa tiqu'in jum yi'shi' ja Dios lhanvacleyash, yash'apee jô lhech. #11.10 Mal 3.1.

12Jan t'aplhuqu'e ti nam ja Juan Vatnayjayash lhavo' yamjey nôque nalhu ti chiyclôyit na Dios lhanvacleyash, vooy japi vanunatjulh tjôcjanesh. 13Lhacôm'a capi chiytôyjata pava ti vaclan shi' java lhayôjijates ja Moisés yasinôquiesh nôque vatvacleyash yamja ti nam ja Juan. Yit'esh nava Vanisesh'e ti nam jayu ja Elías.*xt* 14Ca eetajeshelh ca niacacujantajeeshelh, ja Juan ti lhech chiytôyjata pava ti vaclan Elía'esh, jô lhech chitatômjalhesh ti chiyasinôqui ti nam jayu.*xu* 15Papi caajem pava lhacfey, istaa ca ach'anelhey. #11.12-13 Lc 16.16.,#11.14 Mal 4.5; Mt 17.10-13.

16¿She t'e pa ca jajôney ca lhjunashajulh napi nivacle nôqueesh? Lhjunashjulh napi taôvclas ti tclôych'een pa clayôych'e. Tônelh'in japi lhc'utsfas, pa yit'esh ts'ivee: 17“Jafuyuelhch'eam lhja vat'ônjanche, taj ti naaclô'yelhjop. Jisheelhch'eam cava vat'acjay ts'aclaych'esha'ne taj naapelh'in.” 18Lhayaash ti nam ja Juan pa ninatsaccun ninyô' shta, pa lhteetshelha avaatsheelh ti caajem pa tsich'e'. 19Pa lhechesh pa janam, ya Nivacle Lhô'sesh, pa jaytsaccun pa c'ayô' shta, pa lhteetshelhyi ti yalhôvcônaaj shi' ti yayôjanaj shta. Lhc'utsfasesh papi sasch'e lhavos shi' papi yivoyanesh pava lhpesoc pa lhcaanvacle, papi chiyapun. Taj pa lhcajôysha ja Dios yivo'yeshch'e yinôôclhanita na lhfanishesh.

Pava yitsates ninanc'asham

(Lc 10.13-15)

20Pa lhechesh pa yitsôyeem ja Jesús java yitsates javan yaash ti yieshi cava acloj nimatasa papu ca nitô'yish, lhayaash ti nintatvaych'aclajesh pava lhfanishlhavach japin yie'. Pa yit'esh:

21—¡Pa'yijô, jay, na yitsaat Corazín! ¡Pa'yijô shta na yitsaat Betsaida! Ca nivan lhapesh papi Tiro shi' papi Sidón lhavos pava nimatasa papu ca nitô'yish navan lhavanelh, pa nitatvaych'aclajtajesh pava lhfainshlhavach, pa nitacshintajvatsham'in pa na'nitaj pava vonsac pa naôvtajshisha'ne pa shnomaj.*xv* 22Taj ti jayeetshelh'a ca shtamtajey lhac'o' pava nalhus pa t'aashelhc'oya jayu pa anclôyitsjayashelh papi Tiro shi' papi Sidón lhavos. 23Vooy avaatsha Capernaum, ¿lheclôjesh avaatsha ca chinanenjateychisham na vôôs? Pa chinanachajeyshicham jayu jan yie'japi vafsha'ne. Ca nivan lhapesh capi Sodoma lhavos cava nimatasa papu ca nitô'yish navan lhavanelh, pa mônlhataja ca lhavtsaat nôque nalhu.*xw* *xx* 24Taj ti jayeetshelh'a ca shtamtajey lhac'o' pava nalhus, pa t'aashelhc'oya jayu apey'e pa anclôyitsjayashelh papi Sodoma lhavos.#11.21 Is 23.1-18; Ez 26.1-28.26; Jl 3.4-8; Am 1.9-10; Zac 9.2-4.,#11.23 Is 14.13-15.,#11.23 Gn 19.24-28.,#11.24 Mt 10.15; Lc 10.12.

Anachelhyiy pa ichayelh

(Lc 10.21-22)

25Lhech t'aplhuqu'e ti tasinôy ja Jesús, pa yit'esh:

—C'ôclôj, Tata, Alhcaanvacleesh ja vôôs shi' na cotsjaat, lhayaash ti lhcapenate'mey papi yitô'yishtaj nava matas, vooy papi taôvclas ti lhnôclitem. 26Jech, Tata, nôque lhjunash ti lhentaj jum.

27“Nijutyi ja Tata nava matas. Ampapu ca nantôfaacyish jô ti Lhaôsyish ja Dios, ve'lha ja Tata nitôfacyish. Ampapu ca nantôfa'clesh jô ja Vatata, ve'lha na Lhaôs, shi' papi yitôychata na Vataôs pan tôfaclesh shta.*xz* *xa* 28Anachelhyiy lhacôm'a avaatsheelh papi yulhôs'e pa lhcumjayash, shi' shta papi yulhôs'e pava cacleclem, pa jajutelh'ay jayu pa ichayashelh. 29Acumelhjulh na yivovo ca janelh'atapee, pa istaa ca at'eshelh ca qu'eyjatsjaneshelh, lhayaash ti ya isesh, vanits'aclayan na yicachi'; pa lhavanelh jayu pa t'ichayash pava asôc'ôcteselh.*xb* 30Lhayaash ti nicaclecla na yivovo ca jantajelh'atapee, javôôji shta java jajutelh'ay ca atilhojtajelh. #11.27 Jn 3.35.,#11.27 Jn 1.18; 10.15.,#11.28-29 Is 30.15; Jer 6.16.

Papi Jesús t'eyjatsjanjas nitôsjelha pa trigo pa nalhu ti chit'ichayshi

(Mr 2.23-28; Lc 6.1-5)

Currently Selected:

San Mateo 11: NIVA

Highlight

Copy