San Mateo 13

1Pa lhechesh pa tay'ôcji ja Jesús ja jpôyich pa yichey ja lhjôvcha pa yie'sha'ne ja lhtaco. 2Pa lhech tc'aesh'eva'ne japi acloj nivacle pa lhe'naa ti yishi'jop lhja vatôvjatshi ja Jesús. Vooy japi acloj nivacle mônlhee ja clayôych'e yiey ja lhtaco.*xt* 3Pa lhechesh pa yeyjatsjanesh java acloj matas ti yovalheme'jop atesha, pa yit'esh: #13.2 Lc 5.1-3.

“Ve'lha pa vatcôvjiyanjayash lhavo' yichesh pava lhcôvjiyanchey pa yisichatch'e ti yicôjiyan. 4Meelh ti yisichatch'e pa natshisha'ne pa nôyish pava lhtôsjey, pa namey pava ajôclôs pa tujqu'e'. 5Vooy pav'elh natshisha'ne pa utechat, taj ti niuja' pa cotsjaat. Pava lhech lhtôsjey tôlhch'e tatsha, lhayaash ti clasim'eshch'e pa cotsjaat. 6Taj ti meelh ti tojqu'etsham na jumcuclaay pa yiclôn, pa vafch'e' lhayaash ti ampa lhc'oseya. 7Vooy pav'elh lhtôsjey natshisha'ne pa nivachechat, pa tôlheelhvatjuulh pava nivachey pa ch'apasheyshi pava chiycôvjiyantaj. 8Vooy pav'elh lhtôsjey nat'esha'ne pa is'e' cotsjaat pa tôôlh pa vacalh jum. Lhpa ve'lha lhtôsej tô'lha pava cien lhtôsjey, pav'elh tô'lha shta pava sesenta lhtôsjey. Vooy pav'elh tô'lha shta pava treinta lhtôsjey. 9Ca nicaajtajelh'am pava acfeyelh, pa ach'anelhch'e cavôque.”

Ca chinôfiis pa lhjunash pava chiyovalheyjop atesha

(Mr 4.10-12; Lc 8.9-10)

10Pa tac'uya japi t'eyjatsjanjas ja Jesús pa niyôsesh ts'ivee pa yit'esh:

—¿Ta lhayaash ti lhtasinôyshem japi nivacle java chiyovalheyjop atesha?

11Pa yicuulh ja Jesús pa yit'esh:

“Vooy avaatsheelh yit'eshelh'am ja Dios ca chinatôyjatelhc'oya pava tanjoctsenchayesh pap'elh nalhjunash ja lhanvacleyash ja Dios. Taj ti jap'elh sasjop ca nitô'yish. 12A'va, papi p'alha ti caajem pa chiyjutey jayu shta. Lhan'e vitsha papi amemc'oya pa chinjôclesh jayu shta pan yi'tajjop.*xu* 13Nôquen lhayaash jayasinôyshem cava jovalhemeyjop atesha; lhayaash japi lhech ti yivantaj pa lha'yasha ca ninvana. Yipe'yataj shta, taj ti mônlheesh ti nintôych'e. 14Pa nôque lhjunash, yofisch'e napi lhech can t'ônashesh ja chiytôyjata pava ti vaclan Isaías, ti yit'esh:

‘Avaatsheelh lhpe'yatajelh,

taj ninatô'yelhch'e shta.

Lhavantajelh shta, taj ninatôôyshelh. #13.12 Mt 25.29; Mr 4.25; Lc 8.18; 19.26.

15Lhayaash palha t'un java lhcachic

japu lhech nivacle,

nisaemsha'ne ti yipe'yataj.

Caajtaj shta pava lhacfey taj ti chiypojaamsha'ne,

pa jaspa tanca nivanesh java lhtôsjey.

Tanca nipe'ya shta java lhacfey,

jaspa tanca nitô'ya java lhcachic,

jaspa tanca nitatvaych'aclajyi,

pa tanca yilhjensha'ne jayu.'#13.14-15 Is 6.9-10.

16“Vooy avaatsheelh anshameshelh, lhayaash ti lhavanshelh nava atôsjeyelh, pa lhpeyeeshelh shta nava acfeyelh. 17Yijô' ti jayeetshelh'am, acloj lhapesh capi chiytôyjata pava ti vaclan shi' capi isissha'ne nivacle yeetajesh ca nivan cavôque taj ti ninvan; yeetajesh shta ca nipe'ya cavôque cavan lhpeyeelh, taj ti ninpe'ya.#13.16-17 Lc 10.23-24.

Pa Jesús yinôôclhanitch'e jan chiyovalheyjop atesha pan tcôvjiyanjan

(Mr 4.13-20; Lc 11.8-15)

18“Ach'anelhch'e ca yich'e' nan chiyovalheyjop atesha pan tcôvjiyanjan. 19Papi yipe'yataj cava lhasinôc ja lhanvacleyash ja Dios taj ti nintôych'e. Papu lhech lhjunashjulh pava lhtôsjey ti natshisha'ne pa nôyish. Pa nam pa tsich'e' pa yayjatshi pava lhcachic cavôque lhasinôc ti chiycôvjiyantajshi. 20Pava lhtôsjey natshisha'ne pa utechat chiyovalheyjop papi yivanjop'in lhataj cava Dios lhasinôc. 21Taj ti niiy'eesh jô ca nit'unesh'in, lhayaash ti naaclojach'e pava lhc'osey. Meelh ti vaclan pa vatc'alhtanjayash, ja't'ajesha ti vaclan pa lhancôntajayashesh cava Dios lhasinôc, pa yit'esha ca nicôjôsa. 22Pava lhtôsjey natshisha'ne pa nivachechat chiyovalheyjop papi tach'anch'e atesha cava Dios lhasinôc, taj ti ujesh ti yaychavalhaan nava yie' na cotsjaat, nanlhjunash papu ti yen jum ca acôjjeeshiin nava matas yie' na cotsjaat ti chincu'tajesh. Lhech cavôque matas ti yip'oemey cava Dios lhasinôc, pa nôque lhjunash nintaay papu lhech. 23Vooy pava lhtôsjey nat'esha'ne pa is'e' cotsjaat chiyovalheyjop papi tach'anch'e jum cava Dios lhasinôc pa yitôych'e, pa taay jum papu lhech. Caaj papi lhjunashjulh lhpa ve'lha lhtôsej ti tô'lha pava cien, vooy pap'elh lhjunashjulh lhpa ve'lha lhtôsej ti tô'lha pava sesenta, vooy pap'elh lhjunashjulh lhpa ve'lha lhtôsej ti tô'lha pava treinta lhtôsjey.”

Chiyovalheyjop atesha pa t'aclôcchat ti yi'shi' pa trigo

24Yasinôqui ja Jesús jeelh chiyovalheyjop atesha, pa yit'esh:

—“Ja lhanvacleyash ja Dios lhjunashjulh pa nivacle ti yicôvjiyan'e pava isis lhcôvjiyanchey yiey pa lhcac'ovat. 25C'oya ti yimoqu'esha'ne lhacôm'a, pa yichey pa nilhc'utsfaa pa yicôvjiyanshi pava lhtôsjey pa t'aclôcchat, pa yich. 26Pa tôôlh pa trigo pa taay, taj ti tôôlh shta pa t'aclôcchat. 27Pa lhechesh pa yichey papi lhcavos pa lhcaanvacle pa nifaclemts'ivee: ‘Lhcaanvacle, isis java acôvjiyanchey ti lhcôvjiyan'e ja acac'ovat, ¿taj ti ta t'e tôlh'e ja taclôcchat?’ 28Pa yit'esh pa lhcaanvacle: ‘Navôque yivclanjatyam pa niyic'utsfaa.’ Pa lhechesh pa niyôsesh ts'ivee papi lhcavos, pa yit'esh: ‘¿Lhteesh ca jôquelhey ca jantsoje'lheyshi ja t'aclôcchat?’ 29Taj ti yit'esh pa lhech: ‘Am, lhayaash ca antsoojtajelh ja t'aclôcchat pa lhantsojeshelh jayu shta ja trigo. 30Isjop ca yaajlhee, istaa ca nacshen ja t'aclôcchat. Vooy ca nôquentaj'e ja trigo pa jacheney jayu napi yicavos ca nantsojqu'e pa nôcfashaamsha'ne pa napjunshamsha'ne pa t'aclôcchat. Pa nanjoolhataj ca nit'ovoseshch'e ja trigo pa nicha'jeyam jan yie' jayu yiey ja yijpôyich.’ ”

Chiyovalheyjop atesha lhpa lhtôsej lhpa mostazayuc

(Mr 4.30-32; Lc 13.18-19)

31Yasinôqui ja Jesús jeelh chiyovalheyjop atesha, pa yit'esh:

“Ja lhanvacleyash ja Dios lhjunashjulh lhpa mostaza lhtôsej ti yicôvjiyanshi pa nivacle pa lhcac'ovat. 32Ya'sheshc'oya ti tiqu'in jav'elh vatcôvjiyanchey lhtôsjey. C'oya ti tôôlh pa yichishaam pa yash'apee jav'elh vatcôvjiyanchecuy pa lhjunashjulh ti aacjiyuqu'esh, vooy pava yifo'yo ajôclôs pa yichey pa tupiyshi pava lht'oy.”

Chiyovalheyjop atesha pa yucuve t'ajuya

(Lc 13.20-21)

33Yasinôqui shta jeelh chiyovalheyjop atesha, pa yit'esh:

“Ja lhanvacleyash ja Dios lhjunashjulh pa yucuve t'ajuya ti t'acum'e lhpa nivacche pa pu'janaesh ti yueyshi pa climshi pa nivaych'aclajeshi, jaspa tanayeshchisham ti cap'ofeshi.

Yiyô'yesh ja Jesús ti vanqu'eyjatsjanesh pava yovalheyjop

(Mr 4.33-34)

34Lhacôm'a cavôque ti yit'esha ja Jesús papi nivacle ti caaj pava yovalhemeyjop atesha, pa nive'lhaaesh ca ama pava ti yovalhemeyjop atesha japi lhech nivacle ti yeyjatsjan'in. 35Cavôque vaclan pa yofisch'e jan t'ônashesh lhapesh pa chiytôyjata pava ti vaclan ti yi'sesh'e, ti yit'esh:

“Jayasinôyshem jayu pava

jovalhe'meyjop atesha;

janfacleem jayu java chiyfich'eem

ja tôlh'e' ti

yisnatesh ja Dios na cotsjaat.”#13.35 Sal 78.2.

Pa Jesús yinôôclhinitch'e pan yich'e pan chiyovalheyjop atesha pa t'aclôcchat ti yi'shi' pa trigo

36Pa lhechesh pa vaneecjuelh ja Jeús japi nivacle pa yich'ôcji ja jpôyich. Pa yichjuulh japi t'eyjatsjanjas ti yit'eshats'ivee:

“Anôôclhanitelhch'eyam pa yich'e ja chiyovalheyjop atesha ja t'aclôcchat yiey ja vatcac'ovat.”

37Pa lhechesh pa yit'esha ja Jesús:

“Jô lhech nivacle yicôvjiyan java isis lhcôvjiyanchey, lhech na lhech Nivacle Lhô'sesh. 38Vooy na cotsjaat lhcac'ovat'esh. Java isis lhcôvjiyanchey chiyjôney japi nivacle lhavosesh ja vatvacleyash. Ja t'aclôcchat chiyjôney japi lhcavosesh ja tsich'e'. 39Ja nilhc'utsfaa, jan yicôvjiyan ja t'aclôchat, lhech ja tsich'e'. Ja vatcavcalhech chiyjôney jan yôj'e jayu na cotsjaat. Pa nôqueesh japi t'acum'e ja vatcavcalhech japu lhech ángeles. 40Jan lhjunash ti chintsojqu'e ja t'aclôcchat ti chinapjunsham, lhech lhjunash jayu ja vaclan ca namtajey ja yôj'e' jayu na cotsjaat. 41Na Nivacle Lhô'sesh yicheney jayu japi lh'angeles jaspa nayjatva'ne jayu yiey ja lhanvacleyash lhacôm'a japi ojiyis sasch'e lhavosesh. 42Japu lhech chiyu'jam jayu ja itôj, yu'jam jayu japi ángeles, pa lhech'e jayu ti tafshiyvatsham'in, pa yijuujvatjulh jayu shta. 43Vooy japi nequ'ishamesh java yit'eshem ja Dios pjumtses jayu nan lhjunash na jumcuclaay yiey ja lhanvacleyash ja Lhtata. Ca nicaajtajelh'am pava acfeyelh, pa istaa ca ach'anelhey.”#13.43 Dn 12.3

Chiyovalheyjop atesha pa vatvanaach ti chiyfiich

44“Ja lhanvacleyash ja Dios lhjunashjulh pa vatvanaach ti chitish'ec'oya pa vatcac'ovat. Ve'lha pa nivacle yi'van pa vatvanaach, pa yip'oe tatsha; pa nishamesh jum pa vapecley pavan yi'van pa tcashayesh'in lhacôm'a, pa lhechesh pa tcashaya côque vatcac'ovat.

Chiyovalheyjop atesha lhpa t'un'e jum nôcshi'

45“Ja lhanvacleyash ja Dios lhjunashjulh shta pa vopovo lhavo' ti vooy pava t'un'e jum nôcshisha'ne. 46Pa yi'van lhpa ve'lha pa uj ti t'un'e, pa vapecley pavan yi'van pa tcashayesh'in lhacôm'a, pa lhechesh pa tcashaya lhôpôque nôcshi' t'un'e jum.

Chiyovalhey atesha lhpa s'chaat

47“Ja lhanvacleyash ja Dios lhjunashjulh lhpa s'chaat ti chiyu'jam pa tovôc jaspa yôjôyshi pava sajech shi' pav'elh nalhjunashvatc'oya. 48Meelh ti tapooj lhpa s'chaat pa yitojôneshfach'ee yiey pa clayôych'e papi sajech lhavos. Pa lhech yiesh'e ti vooyshi pava sajech. Pava isis yanshi' pava sisenlhiy, vooy pava niysisa pa yivôm'in. 49Lhech lhjunash jayu ja yôj'e jayu na cotsjaat. Nachey jayu japi ángeles jaspa venayijutshi jayu papi niysisasha'ne shi' papi isissha'ne. 50Pa chiyu'jam jayu papi niysisasha'ne pa itôj, yu'jam japi ángeles, pa lhech'e jayu ti tafshiyvatsham'in, yijuujvatjulh jayu shta.”

Pava vatvanjas nich'ac shi' pava lhac'utsjas

51Pa lhechesh pa niôsesh ja Jesús pa yit'esh:

—¿Natô'yelhch'e cavôque matas?

Pa yit'esh ts'ivee:

— Jech, Lhcaanvacle.

52Pa lhechesh pa yit'esha:

— Meelh ca nicaajtaj pa vanqu'eyjatsjanesh pava lhfanishlhavach ca chintôychiyintajesh ja lhanvacleyash ja Dios, pa lhech lhjunashjulh jayu pa lhcaanvacle yitô'yish ti niclaneyshi pava nich'a lhcôqueclitôy shi' pava lhac'utsjas pava lhavanjas.

Pa Jesús yie' pa Nazaret

(Mr 6.1-6; Lc 4.16-30)

53C'oya ti yivaclhitesh ja Jesús ti vanqu'eyjatsjanesh java chiyovalheyjop atesha, pa yich 54pa yamey ja lhcootsjat. Pa lhech'e ti vanqu'eyjatsjan'ôcjisha'ne java lhech'e vatvanqu'eyjatsjanjavtes, pa tamp'oyeshem japi nivacle, pa yit'eshts'ivee:

— ¿Ta t'e tôlhesh'e nôque nivacle na lhcajôysha? ¿Ta t'e lhjunash ti yisnatesh navôque nimatasa papu ca nitô'yish? 55Na lhech lhaôs ja yiclôy lhavo', lhamimi lhja María. Na lhchecla' ja Jacobo, ja José, ja Simón shi' ja Judás. 56Caschifacheyesh shta japi lhch'injavot. ¿Ta t'e tôlhesh'e cavôque ti yitô'yish lhacôm'a?

57Pa tavacôyesha japu lhech. Taj ti yit'esh ja Jesús:

—Nôv'e pa nivacle chiytôyjata pava ti vaclan ca nitôncôntay'e pav'elh yitsates, tancôntay'e t'em'ma apey'e papu pa lhavtsaat papi lhavelhavot.#13.57 Jn 4.44.

58Pa ninasnatesh pava ca acloja nimatasa papu ca nitô'yish yiey pa lhech'e, lhayaash ti yicacuesh papi lhech yie'.

Lhavafjayash pa Juan Vatnayjayash lhavo'

(Mr 6.14-29; Lc 9.7-9)

Currently Selected:

San Mateo 13: NIVA

Highlight

Copy