Malaquías 1
1
Pa lhencheyasha pa Dios papi Israel lhavos
1Navôque lhclishay pa Lhcaanvacle ti chinôyôjem japi lhtachifas Israel lhavos ti tôlha'jop ja chiytôyjata pava vaclan lhey Malaquías.
2Yit'esh pa Lhcaanvacle: “Yivaatsha qu'enelhsha'ne.” Taj ti lhteetshelh ti lhasculheelh: “¿Ta lhjunash ca nastôyeshelh ti lhtsenelh?” Pa yicuulh pa Lhcaanvacle: “Qu'enelhsha'ne jan lhjunashesh ti lhtatvelhavot'elh ja Esaú ja Jacob, ti jen ja Jacob 3ti japun ja Esaú.*xa* Ja lhavtsateyishesh ja Esaú ti utichatch'e vena yifanisheshc'oya ti am'e pa'na, java yitsôt'ajesh ja cotsjaat tsi'shaesh java yaquisetes yalha nashch'een.”
4Vooy japi edomitas,*xb* japi tô'lha ja Esaú, ca niteetajesh ts'ivee: “Apis ti shinaflhitelhch'e, taj ti janich'ayanelhch'e jayu napi catsichifas”, vooy pa Lhcaanvacle yaash pa t'unaj pa yit'esha ca nicuulhtaj: “Japi lhech yinich'ayanch'e jayu taj ti yivaatsha javômjatsha'ne jayu shta. Vooy ja lhavtsateyish chineyiyanesh jayu ‘Vatavtsateyishesh pa Niysa'’ chiyeyiyanesh shta ‘Vatachifas ôyjôlhôyech'esh ti suya pa Lhcaanvacle’.” 5Avaatsheelh lhavanshelh jayu nava atôsjeyelh, pa lhteetshelh jayu: “¡Pa Lhcaanvacle chiyashjatjop ti yamjam java yôj'esha'ne na cotsjaat Israel!”
Pa Lhcaanvacle yiyôjieshaan papi vatcasinôc
6Pa Lhcaanvacle yaash pa t'unaj yit'esha japi vatcasinôc: “Papi vatacles tach'anjulh papi lhnavot, vooy papi vatcavos yivijatanjulh papi lhanvacles. Taj ti vooy yivaatsha a'Tata'elhyish avaatsheelh, ¿ta t'e lhayaash ti ni'ach'anelhyijulh? Ya lhech Anvacleelhyish, ¿ta t'e lhayaash ti ni'avijatanelhyijulh? Avaatsheelh lhtsapunelh pa lhteetshelh'in: ‘¿She t'e pa c'apuneshelh?’ 7Avaatsheelh lhanchaje'lhey'in na yi'itôvat'esh lhpa yucuve tcôclôy, pa mônlheesh ti lhtay'ôtsjaneshelh'in: ‘¿She pa lhech cac'ôctiyanshelh?’ Avaatsheelh lhascôctiyanshelh ti lhaychavalhelhey na yi'itôvat'esh ti chiyapun 8ti ampa ca sasa ti lhanjuteelhyiy pava yaquisetes taclujuy, pava ancojoy ja't'ajesha pava tayashaysha'ne.”*xc* ¡Moojelh, ca acha'jelhey japi lhanvacleyanelhsha'ne! ¡Pa avanshelh ca natcuumjulh japi lhech ti yacôn ti lhts'ô't'esh! 9A'lhelhajop pa Dios ca natcavts'aclayeshjoo. Taj ti ca lhech afanishtajeeshelh pava acufayjateselh, pa ya aj ca alheclôjeshelh pa Dios ca nanshameshelh'a ca natcumeshelh'ajulh. Pa Lhcaanvacle yaash pa t'unaj yit'esh: 10“¡Coostaja ca nicaaj avaatsheelh papu ca nip'o'ey nava lhashic na yishjanjavat, ca jaspa ya aj ca napecleyjop ca chinvutuyanesh atesha pa itôj na yi'itôvat'esh! Lhayaash ti ninasshameshelh'a avaatsheelh pa tanca yicuumjelh'ajulh pava acufayjateselh.*xd* 11Lhacôm'a japi vatachifas yiey na cotsjaat ti tach'anyijulh; lhacôm'a pa nash'e ti yitseclôlheyjop pa acôjqu'e pa lhniish ti tsôclôjesh shi' ti yivclanjatyam pava isis lhcufayjates. 12Pa vena ajunashelh, avaatsheelh lhascôctiyanshelh, ti lhaychavalhelhey na yi'itôvat'esh ti yijuyjavat'esh ti chiyapun, ti chiyapunc'oya shta pa vatôc ti yi'apee. 13Avaatsheelh lhteetshelh'in: ‘¡Yivaatsheelh palha tsulhôselh'e lhacôm'a cavôque!’ Pa lhtsapunelh shta. Pa mônlheesh ti lhaychavalhelheyjop ca nasshamitjat jayu ti lhnachelh ti lhastiseshelh pa yaquiset vatcutsjat, ja't'ajesha pa yiviincôquen, ja't'ajesha pa tayashay. 14¡Niyaflhach'e pa jôts'ôclônjanaj ti nifactajyam pa yaquiset vatsjan tô'lha pava lhclôy, pa nijooylhach'e ti tsitisesh pa ve'lha sasshi! Yivaatsha c'aash ti ya Lhcaanvacle, ya lhech ti nijovayijulh napi vatachifas.” Nôque yit'esh pa Lhcaanvacle yaash pa t'unaj.
Currently Selected:
Malaquías 1: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
