Malaquías 2
2
1“Nôqueesh, napi vatcasinôc, navôque t'ajuyelh'a avaatsheelh: 2Avaatsheelh ca anc'ashamelhyam shi' ca ach'anelhyijulh. Ca ni'asnatajeeshelh, pa c'apôfiyujelh jayu. Ca na'ach'antajeelhyijulh, pa vena yifanisheelh'ash jayu, pa c'apôfiyujelh java isis ti chinacumjateshelh'in ti avatcasinôcshelh.” Nôque yit'esh pa Lhcaanvacle yaash pa t'unaj.
3“Jajutelh'ac'oya jayu ja unajelh, pa c'ôôtjatesh'e jayu atacoclelh pa lhasamuc pava yaquisetes ti lhanchaajtajelh ti lhatcufaayshelh. ¡Pa chinujelha pa lhech samuc pa chinavô'melh jayu! 4Nôque lhjunash pa natôôyshelha jayu ti jajutelh'am nôque vatyôjijat'esh pa jaspa ja vatpeya'shelh ja Leví*xe* ti tanca nivô'mesh ti yijôt'ajsham.” Nôque yit'esh pa Lhcaanvacle yaash pa t'unaj.
5“Na javatpeyeeshelhjop pa vatmônlhajayash shi' pa vatpiiyash ja Leví.*xf* Jajutem t'ajuya ca nivijataneshyijulh shi' ca nanjova'yeshyijulh, jô lhech tanôcliteshyam ti nijovayijulh shi' ti tach'anyijulh. 6Ja Leví vanqu'eyjatsjanesh pava yijô' pa amqu'e ja lhashi pa niysa'. Pa yamjam ti jamjelhvatjulh pa vatpiiyash pa acloj papi yinujatc'oya ca nasnatesh pa niysa'.*xg* 7Côque tanyôjijayesh japi vatcasinôc ca neyjatsjanesh japi nivacle ca nantôfaacyish,*xh* pa lhacôm'a ti tajulhey ca nôqueshey japi lhech ca jaspa neyjatsjanesh, lhayaash japi lhech ti qu'eeyjanjasem pa Lhcaanvacle yaash pa t'unaj.
8“Taj ti avaatsheelh, a'vatcasinôclelh, vena lhatjuyeelhshic'oya na is nôyish; vooy java lhavanqu'eyjatsjanôc nicôtjateshch'esha'ne japi acloj. Pa lhech ajunashelh ti lh'sasinatelhvatich'e na javatpeyashelh ja Leví. 9Pa lhe'naa, ti naanc'ashamelhyish, jô'tajesh ti t'eyjatsjantajelh japi nivacle pa tanca asclaneshelhshi lhacôm'a, pa javclanjatem jayu lhacôm'a napi vatachifas ca nav'ojiyanelh shi' ca napunelh.” Nôque yit'esh pa Lhcaanvacle yaash pa t'unaj.
Pa nilhvoyjayasheeshch'e papi Israel lhavos
10¿Tam'ey ti amjoom caslhacôm'a pa ve'lha Vatata, pa lhech Dios ti shinavclanjatelh lhacôm'a?*xi* ¿Pa ta t'e lhayaash ti shinteejshisha'ne pap'elh, pa shtasasiyanc'oya pa vatpeya'shelh pa Dios japi catsicchevot? 11Na Judá ninvooyshemch'e pa Dios, pa yisnatchiyinesh pava lhfanishlhavach suych'esha'ne yiey na Jerusalên shi' na Israel. Na Judá yisasiyan'e na is'ôcji lhishjanjavat pa Lhcaanvacle ti yen, vooy japi nivacle yiey na Judá lhjayasesh papi ôcjeclôy yôclôj pava nidiosecla. 12¡Coostaja pa Lhcaanvacle ca nivômjate'mey napi catsichifas napin yisnatesh'in cavôque matas, pa ca nôv'e' lhôn papu ti lha'ma ti nicha'jey'in pava lhcufayjates pa Lhcaanvacle yaash pa t'unaj!
13Taj ti avaatsheelh lha'ma ve'lheesh lhasnatajeshelhjop'in: pa lhponteshelh'apee pava at'eclelh na lh'itôvat pa Lhcaanvacle, ti lhapelh'in pa ujesh ti lhtafshiytajeshelh'in lhayaash pa Lhcaanvacle tanca natcumeshelh'ajulh ca nanshameshelh'a pava acufayjateselh. 14¿Pa mônlheesh ti lhtôy'ôtsjaneshelh'in ti ta lhayaash? Lhayaash pa Lhcaanvacle navan ti asasesha'ne na afaclech ti lhasnateshjop lhja ôcjeclô lhjan ajaya'esh ti anich'ayech. ¡Lhavaatsha ayôyjafacheesh, avaatsha lhanfacleem ti lhasclaneshi jayu! 15¿Nilhecha t'e pa Dios ti ve'lha ti yisnatesh na vatvuvaat shi' pa vatsôc'ôclit lhshayc'u? ¿She pa yenesh pa lhech Dios? Vooy papi ca nitôôlhsham ca chin'isinatem. ¡Anujumatseneshelh avach pa natsôt'ajeshelh asôc'ôclit lhshayc'u pa ya aj ca asaseeshelhsha'ne pa afaclech'elh ti lhasnatshelhjop papi ajayaselh ti anich'aclelhsha'ne! 16Pa Lhcaanvacle lh'Dios napi Israel lhavos, pa lhech yaash pa t'unaj, yit'esh: ¡Anujumatseneshelh avach pa natsôt'ajeshelh asôc'ôclit lhshayc'u, pa ya aj ca ninavo'yeeshelhch'e; lhayaash ti japun papu ti tayjop lhpa lhjaya, pa sats'a'sesh ti yisnatesh pa lhech niysa'!”*xj*
Pa nalhu ti chiyisclanch'e
17Pa Lhcaanvacle yulhôj'e ti tach'anshelh'a; ti mônlheesh ti lhtay'ôtsjaneshelh'in: “¿She pa shtat'eshelhaan ti jaspa yulhjôt ti tach'anjoo?” Lhayaash avaatsheelh ti lhteetshelhaan pa Lhcaanvacle ca nanshamesha papu ti yisnatesh pa niysa', shi' ca nanshamesh papi lhech.*xk* ¡Avaatsheelh na'alheclôjeshelh pa Dios ti yivo'yeshch'e!
Currently Selected:
Malaquías 2: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
