Malaquías 3
3
1Pa Lhcaanvacle yaash pa t'unaj yit'esh: “Janchen jayu ja vanqu'eeyjatyam jaspa nasclanch'eyam pa nôyish.*xl* Pa Lhcaanvacle, pan lhavoolheysha'ne, pa yich'ôcji jayu tatsha ja lhishjanjavat. ¡Palha nach ja qu'eeyjanajesh na chivatpeya'esh jan lhenelh avaatsheelh!”
2Taj ti ¿she papi iseemjop ca nit'unjulh pa lhnalhu ti nach? ¿She papi iseemjop jayu ca mônlhaae pa vatsavat'ec'oya?*xm* Lhayaash ca ninamtaj jayu pa lha'yashaa pa itôj, ca shin'isiyansha'ne; jan lhjunashjulh jayu ja favom ca nanclantajch'e pava casats'a'sesha'ne.*xn* 3Pa Lhcaanvacle yi'shanejop jayu ca niisiyantaj japi vatcasinôc, japi tôlhshaam ja Leví, jan lhjunash ti chiy'isiyanesh pa clesanilh clim shi' pa cojiyaj pa itôj. Pa nanjooylha japi lhech ca isa'emjop jayu ca nicha'jey t'ajuyish pava lhcufayjatesem pa Lhcaanvacle, jan lhjunash ti yiisinatjop ti yisnatshem. 4Pa Lhcaanvacle nishamsha jayu pava lhcufayjates na Judá shi' na Jerusalên, jan lhjunash ti nishamshaan jav'elh nalhus.
5Pa Lhcaanvacle yaash pa t'unaj yit'esh: “Yivaatsha janachelh'ay jayu pa c'asclanelhch'e avaatsheelh. Pa lhech nalhu jatônôclitshem jayu ti jayjuyeshjulh papi vôntôyitesh ti vatvitôyjayan, papi nivôncavômjatsu, papi vancanôôlhjônchat, papi yicômclôquiin papi t'acuumvatsham'in, papi ôsch'acchey shi' papi ôftecles, papi ninasclaneshi papi vena tôlhshi' shi' papi ninasvijatanjulh.
Pa t'iya'esh pava napu'nôjesh shi' pava vatcufayjates
6“Yivaatsha ya Lhcaanvacle. Tanca vena yifanisheesh.*xñ* Pa lhe'naa avaatsheelh, napi tôlhshaam ja Jacob, ti ninvôômji na ajunashelh. 7Avaatsheelh lhtayelhjop nava yiyôjijates, nan lhjunash ti tanuc'oya japi acchevot'elh, ti ni'nen ca nanc'ashamsha'ne. Yivaatsha, ya Lhcaanvacle yaash na yunaj, lhech jayeetshelh'a: ¡Atpecleelhyi'in pa japeclelh'a jayu avaatsheelh!*xo* Taj ti avaatsheelh lhteetshelh'in: ‘¿Ta t'e lhayaash ti japeclelh'ay'in?’ 8Yivaatsha c'aniy'ôseshelh: ¿Iseemjop t'e pa nivacle ti t'acutem pa Dios? ¡Vooy avaatsheelh lhatcuteelhyam'in! Pa mônlheesh ti lhtay'ôtsjaneshelh'in: ‘¿She t'e pava jaycuteshelh'ac'oya? ¡Vooy java napu'nôjesh ti t'iya'sesh shi' pava vatcufayjates ti lhatcuteshelh'in! 9Jech, lhacôm'a napi vatachifas, lhacôm'a avaatsheelh, lhatcuteelhyam'in, pa lhe'naa ti c'apôfiyujelh jayu. Yivaatsha, ya Lhcaanvacle yaash na yunaj, lhech jayeesh. 10Achaje'lhey'in pa t'iya'esh pa napu'nôjesh ca vatcaqueclitô'a'esh na vatishjanjavat,*xp* pa lhecheesh pa caaj jayu pa vatôc yiey na yijpôyich. Asc'alhtaneshelha cavôque, pa lhavanelh jayu ca janc'atajelhey'am nava vatovalhjavtesesh na vôôs pa jôtsiyelh'atapee nava yaash ti isis. 11Tan jayu ca yivashanem pava tinvos ca nivômjat pava acavcalhjeselh shi' java avôtjayetacuyelh. 12Lhacôm'a napi vatachifas yit'eshelh'aan jayu ti lhanshameelhvatsham'in, lhayaash ti caajelh'am jayu ti c'uselh'e'am na avtsateyishelh.” Yivaatsha, ya Lhcaanvacle yaash na yunaj, lhech jayeetshelh'a.
Pa lhcavts'aclayjayasha pa Dios papi lhchifas
13Yit'esh pa Lhcaanvacle: “Avaatsheelh lhteetshelhyam'in java tavijataych'esha'ne ti lhatjuyeshelhyijulh. Pa mônlheesh ti lhtôy'ôtsjaneshelh'in: ‘¿She t'e pa jayeetshelhaan ti jayjuyeshelh'ajulh?’ 14Cavôque lhteetshelh'in: ‘Ti chit'acuumtajem'in pa Dios pa cha'lheesh. ¿She t'e pa tajulhey ca shtatôôlhsha ca shtasnatshelh nava tayôjijanesh, ca sht'uyelhch'ejop pa t'ajuya ti chitacshin'in yiey t'ajuyish pa Lhcaanvacle yaash pa t'unaj? 15Yivaatsheelh javanshelh japi nunatsjanjas ti c'usemvatsham'in, vooy japi ojiyis iseem java matas, yic'alhtantaja pa Dios pa nive'lhaa papu ca chinclôyit.’ ”*xq*
16(Japi tach'aneshjulh pa Dios ti vanasinôquiesh ts'ivee, vooy pa Lhcaanvacle tach'ansha ti vatjumteesha java yit'esh'in. Ti yie' t'ajuyish pa Lhcaanvacle pa chiyi'seshi ja vatqu'isjayanach t'ajuya ti tanca chinantôvacluqu'e japi tach'anjulh pa Lhcaanvacle shi' ti yaychavalhey na lhey.)
17Pa Lhcaanvacle yaash pa t'unaj yit'esh: “Jasclansha'nec'oya pa nalhu napi lhech pa natpec'yi'in jayu ca yichifaseesh. Jan lhjunash pa vatata ti tcavts'aclayesh pa lhaôs ti t'acum'in, lhech yijunashesh jayu ti jaycavts'aclayesh japi lhech.*xr* 18Pa lhechesh avaatsheelh pa natô'yelha jayu shta ti vena lhjunashesh papi isissha'ne shi' papi ojiyis, papin yôclôj pa Dios vooy pap'elh tanca nôclôj.”
Currently Selected:
Malaquías 3: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
