Zacarías 14
14
Pa yôj'esha'ne lhcôvjoyash pa Jerusalên
1Palha nach pa lhnalhu pa Lhcaanvacle, ti chivacôtsônesh'in jayu pava ajôcjanjateselh avaatsheelh. 2Pa lhech nalhu tayeshvane jayu pa Lhcaanvacle lhacôm'a papi vatachifas ca jaspa nivôtclônelhsha'ne na Jerusalên. Pa yash'apee jayu na yitsaat, pa yivômjatsha'ne jayu nava ajpôyjey, pa chintatcayôjesh jayu napi ajayaselh, pa chiychaj'in jayu ti lhancumtesesh papi pacham napi tsitenas'e. Pa lhapa' jayu papi ca mônlhaa'e. 3Taj ti nijooylha jayu ti yichey pa Lhcaanvacle pa natjuyjulh napuque vatachifas, jan lhjunash ti vaclan pa nalhu pa vatvatclônjayash. 4Pa lhech nalhu pa Lhcaanvacle pa yiyitsjatesh'e jayu pava lhafoc lhja utiyuc yiey ja Olivochat, yiey na t'ajuyish'e na Jerusalên, yiey na lhum'ôcjinucjulh. Yiey pa uj tshim'ech'e tôlhey jayu na lhum'ôcjinucjulh pa yitsavalh jayu na nuutch'ejulh, pa yicatsônjatsham jayu ti napu'jam lhja utiyuc yiey ja Olivochat. Pa ve'lha t'iya'esh pa tac'uyjulh jayu na fchenajjulh vooy peelh t'iya'esh tac'uyjulh jayu na fiyatjulh, 5vooy avaatsheelh lhclôtelhc'oyaan jayu pôque tshim'ech'e ti yicaavjuyan pava uticuy, pa lhech yamey jayu ja yitsaat Azal, yiey ja pachamey. Lhclôtelh'in jayu jan lhjunash lhapesh japi acchevot'elh ti yiclôtc'oyaan ti vaclan ja nayuuynayuych'e ti vanôyinc'oya ja lhcaanvacle Uzías ti chinvacleyanesh ja Judá. Pa nam jayu pa Lhcaanvacle yi'Dios pa nitanôycheelh lhacôm'a papi yivo'yeshch'esha'ne.
6Pa lhech nalhu ampa jayu pa c'uy nilhecha jayu pa yicleshe, 7ve'lhasham jayu pa lhech nalhu, ve'lhajop pa Dios ti yitô'ya. Pa lhech tanca vena lhjunashac'oya jayu pa nalhu pa tulh, lha'ma ca tulha'in ti lhetipa jayu pa vatqu'isjuyaj.*xr* 8Pa lhechesh pa tôlhshaam jayu na Jerusalên pa yinôôt tajunshi,*xs* pa factsejch'e jayu ca clooptajeesh shi' ca shnôvôptajeesh, vooy pa pacham t'ajuysham jayu ja uj tovôc yiey na lhum'ôcjinucjulh vooy peelh pacham pa natjuysham ja uj tovôc yiey na nuutch'ejulh. 9Pa lhech nalhu chinvacleyanesh jayu pa Lhcaanvacle lhacôm'a na cotsjaat. Pa lhech Lhcaanvacle ve'lhajop jayu, pa ve'lhajop jayu shta pa lhey. 10Lhacôm'a pa vatavtsateyish pa vena lhjunash jayu ca natvashaych'e, nitô'lhesh'e na Geba pa namey ja Rimón, fiyatjulh na Jerusalên. Na Jerusalên pa tojachisham jayu, pa chintavtsatey'e jayu na lhech'e nitôôlhshey ja Lhcashi'esh ja Benjamín pa namja ja Lhashi'esh lhja T'afcato'esh (jan yie' lhapesh ja Apis Lhashi'esh) nitô'lhesh'e shta ja tojquisham jpôyich yiey ja Hananeel pa namjey ja chinilheesh ja lhcape ja lhcaanvacle. 11Jech, na Jerusalên chiyivtsatey'e jayu pa tanca t'ôyi'sheey ca chinvômjat. Vooy papi tsitenas'e yijô' jayu ti mônlhasha'ne.
12Taj ti papi vatachifas ca natjuytajulh na Jerusalên, pa Lhcaanvacle pa ya'shesh jayu ti yivalha: vooy papi lhchifas pa lhocji jayu pa t'asjaan ti ninvafsha'ne, shi' shta pava lhtôsjey lhoctashamsha'ne jayu shi' shta pava t'ach'acjes. 13Pa lhech lhnalhu pa Lhcaanvacle pa nijovaychat'in jayu. Pa ve'lha ts'ivee ti t'acum'e jayu pa t'ituuc papi lha'yavot, pa yanchishamneejop jayu pa t'ituuc ti t'ajuyjulh pap'elh. 14Pa lhechesh pa vatclôneelh jayu vitsha na Judá na Jerusalên, pa yichajc'oyaan jayu papi vatachifas tajulhshi pava yaash lhcaqueclitôyesh clesanilh clim shi' pa cojiyaj shi' pava t'uyjatshiyis. 15Pa lhech ti yiclôyit ti natsham papi nivacle pa natsham jayu shta pava lhclôy cuvôyu, pava maclicôc, pava camellos, pava cuvôyutas shi' lhacôm'a pava yaquisetes yiey pava t'ichavtes papi nilhc'utsfasa.
16Ca nôjtajeshch'e côque papu ca mônlhatajasha'ne papi lhtachifas ti vatclôneelhsha'ne na Jerusalên pava yincôpes jayu ca nôclôj pa Lhcaanvacle, pa Lhcaanvacle yaash pa t'unaj, pa nasnateshjop pa lhc'usiyashesh pava Lhajpeclevtes.*xt* 17Ca nicaajtaj papi vatachifas yiey na cotsjaat ca ninôctajeey na Jerusalên ca nôclôj pa Lhcaanvacle, pa Lhcaanvacle yaash pa t'unaj, pa tanca ninash'e jayu pa tsha'nu yiey pa lhcootsjat. 18Ca ninôctajeey japi Egipto lhavos, vooy pa Lhcaanvacle pa yivalha jayu, jan lhfanishesh'in pap'elh vatachifas ti ninôquey ca nasnatesh pa lhc'usiyashesh pava Lhajpeclevtes. 19Côque chiyivalhesha jayu ja Egipto shi' lhacôm'a papi vatachifas ti ninôquey ca nasnatesh pa lhc'usiyashesh pava Lhajpeclevtes.
20Pa lhech nalhu, yamja jayu pava lhtinshiyesh pava cuvôyu ti chiyi'sesh jayu “Ti Chiyvenchatesh pa Lhcaanvacle”. Vooy pava tô'lhôsiyjop pa vatishjanjavat chiy'isinatem pan lhjunash pava tacfeyisesh ti chiyan'e' t'ajuyish pa itôvat'esh. 21Lhacôm'a pava tô'lhôsiy yiey na Jerusalên yiey shta na Judá chiy'isinatem jayu pa Lhcaanvacle yaash pa t'unaj. Papu ca nôctajey ca nasnatajesh pa lhcufayjat, pa yicheneshjop jayu ca nitatayesh pa t'asjaan pava yaquisetes chiycufa'yesh. Pa lhech nalhu ampapu jayu ca lhavcashanjaseesh'e pa lhishjanjavat pa Lhcaanvacle yaash pa t'unaj.
Currently Selected:
Zacarías 14: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
