Zacarías 13
13
1“Pava lhech nalhus pa janc'atc'oya jayu pa yinôôt ca jaspa nivaatcleshesh pava lhsasch'e shi' pava niysisa lhfanishlhavach japi tôlhshaam ja David shi' japi tsitenas'e na Jerusalên.*ñ* 2Yiey nan tuc'a'e nôque vatavtsateyish javômjateyc'oya jayu java lheyis java chiydiosiyan, pa jaspa tanca chinetôn java lhech. Shi' shta ti jayjatshi jayu na vatavtsateyish japi chiytôyjataja pava vaclan shi' java tôyjes. Yivaatsha, ya Lhcaanvacle, jajutelh'am nava yiclishay.
3“Pa lhechesh, ca nicaajtaj papi yen ca nachayeemjulh, papi yitsôt'ajesh lhnavot ti tactsôôy, yit'esha jayu: ‘¡Avaatsha lhavaf, lhayaash ti lhcôt'ata pava acuts'ajinôc ca lhclishaya pa Lhcaanvacle!’ ¡Vooy papi lhnavot lhavaatsha pa nicafômjane jayu tôlh'ejop pa lhfanishlhavach ti chiytôyjatajulh pava vaclan! 4Pava lhech nalhus papi chiytôyjata pava vaclan pa vapenesh jayu pava yi'shi' lhtô'vat ti chaytajulh. Ni ve'lhaa papu ca nijôts'ôclôn'in jayu ti lhclô'vat'esh pava tnôjichey papi chiytôyjata pava vaclan, 5pa ve'lhaae ts'ivee ti yit'esh jayu: ‘Niyalhecha ca chinastôyjata pava vaclan, ya lhech vatcôvjiyanjayash yivo'. Tôlhesh'e ti yataôvclaj ti jaycumesh'in ja vatca'c'ovat. 6Ca nicaajtaj papi tay'ôtsjanesh: ‘¿She lhavo'matas navôque yiesh na avu'vat?’, pa lhech yit'esh jayu ca nicuulhtaj: ‘Lhcavomatas'yish japi yic'utsfas yiey ja lhajpôyich.’ ”
“Pa Lhcaanvacle yi'Dios”
7Pa Lhcaanvacle yaash pa t'unaj yit'esh:
“¡Aneetsham, clesataj, pa ajuyjulhyam
na yicavo'esh tashinshtaj lhavo'
shi' ca ajuyjulh na jatanefenelh!
¡Aclôn na tashinshtaj lhavo',
vooy nava lhclôy pa nicatsôn'in jayu,*xo*
japecleyjop jayu ti jayjuyjulh
nava tashinshtas!
8-9Vafsha'ne jayu papi napu'esh
ti pu'janasham pat'ajô'jesh napi tsitenas'e
nôque yitsaat:
ve'lheesh jayu papi mônlhasha'ne
papi pu'jana'esh pat'ajô'jesh.
Vooy papi mônlha pa janapjunesh jayu
pa itôj pa ja'isiyanesh jayu jan lhjunash
ti chiy'isiyan pa clesanilh clim,
pa jat'eesh jayu jan lhjunash pa
clesanilh cojiyaj ti chiyt'eesh.*xp*
Pa lhechesh japi lhech pa tônyiy jayu ts'ivee,
vooy yivaatsha pa jacuulh jayu.
Pa jayeetsha jayu ‘Yichifas’,*xq*
vooy japi lhech yit'esh jayu ca nascuulhtaj:
‘Pa Lhcaanvacle lhech pa cas'Dios.’
Yivaatsha, ya Lhcaanvacle, jajut'am nava yiclishay.”
Currently Selected:
Zacarías 13: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
