Hechos 9

1Lhetipaesh ja Saulo ti ninvô'mesh ti tafjunaan ca niclônsha'ne papi nincacuesh pa Lhcaanvacle. Pa lhe'naa ti yicheyjop pa uj lhanvacleesh papi vatcasinôc, 2pa t'aalhsha pa vatqu'isjayanachjop pa jaspa tanca nitats'ifiy ca nôctajey ts'ivee pava vatvanqu'eyjatsjavtes yiey pa Damasco, ca nivo'tajey papi niqu'ishamesh pa Ya'clishesh pa Vatnilhjenjayash, papi nivacle shi' papi ôcjeclôy yichaj'in ti yôcfa'sha'neen yiey ja Jerusalén. 3Pa meelh ti yuyey pa nôyish pa yujeey pa yitsaat Damasco, pa yalhatajesh ti tanôclitem pa uj vatqu'isjuyaj tô'lhey pa vôôs pa yamjop'in. 4Pa nata cotsjaat ja Saulo pa yipe'ya pa t'ôjôj ti yit'esha: “Saulo, Saulo, ¿ta lhayaash ti lhtsachantaj?”

5Pa niy'ôs ja Saulo ti yit'esh: “¿A'she, a Lhcaanvacle?” Pa yicuulhjulh pa vat'ôjôj pa yit'esh: “Ya lhech yivaatsha Jesús, na lhech nan lhnachantaj.” Avaatsha lhavatclôyitesh jayu jan lhjunash pa vôcô ti chiytsefesheshch'e pa tsjofji pa t'ôsjuulh. 6Pa lhechesh pa nijovayshi ja Saulo pa ts'ananan'in pa yit'esh:

—Lhcaanvacle, ¿she pa lhenyam ca jasnatesh?

Pa yit'esh pa Lhcaanvacle:

—Aneetsham ca môjaam na yitsaat, pa lhech avan'e jayu papu ca nanfac'am pa afanish'avach.

7Lhan'e papi nivacle, papin tanaôycheelh ja Saulo pa uj ti nitôyiyjatch'e, lhayaash ti yipe'ya ts'ivee pa vat'ôjôj taj ti amapapu ca nivan ts'ivee. 8Pa nijooylha ti ne'tajchisham ja Saulo pa meelh ti nic'aatajsham java lhtôsjey pa nisa'jop ca novalh'in. Pa nôque lhjunash pa yipôycôj ts'ivee pa yichaajsham pa Damasco. 9Pa lhech yie'in ti pu'jana pava nalhus ti sasjop ca novalh'in, shi' ti ninatsaccun pa ninyô' shta.

10Yie' pa Damasco pa ve'lha nivacle nicacujanaja lhey Ananías. Pa lhech yichey pa Lhcaanvacle pa tanôclitem pa yit'esha: “¡Ananías!” Pa lhech pa yicuulh: “Ya lhech nôque jôv'e', Lhcaanvacle.”

11Pa yit'esha pa Lhcaanvacle: “Aneetsham ca môqu'e' na lhcaavju lhey Yitsôt'aj. Pa yiey ja lhajpôyich ja Judas pa aniyôsesh ja ve'lha nivacle Tarso lhavo' jô lhech lhey Saulo. Jô lhech lhavaatsha t'aalh. 12Jô lhech apis ti vatvanjiyinesh na nivacle lhey Ananías ca nôctajeyshi pa nôclôj'apee nava lhpôcôtôy jô lhech pa jaspa napecleyjop ca novalh'in.”

13C'oya ti yipe'ya côque pa Ananías pa yit'esh: “Lhcaanvacle, acloj japi yasinôqui jôque nivacle ti nisa' pa lhfanisheshem papi nacacuesh yi'shi' ja Jerusalén. 14Pa vooy nôqueesh pa nacheshelhyiy pa lhqu'isjayanach ti nintats'ifiyesh tôlhesha papi lhanvaclesesh papi vatcasinôc, pa jaspa nichaj'in lhacôm'a papi yetôn na ey ca nôcfa'sha'ne.”

15Taj ti yit'esha pa Lhcaanvacle:

—Meey, lhayaash ti apis ti javooyshi yitam jôque nivacle pa jaspa nitsasinôquic'oya napi nivacle yiey pav'elh lhavtsates, shi' napi lhcaanvacles nôquee shta napi israelitas. 16Pa janôclitem jayu pava ca chinclôyitaj'apee pava ca nitôôlhtaj'eyijop.

17Pa lhechesh pa yichey pa Ananías pa jpôyich pan yiôcji ja Saulo. C'oya ti yam'ôcji pa yôclôj'apee java lhpôcôtôy pa yit'esha:

—Yivelh Saulo, pa Lhcaanvacle Jesús, pa lhech tanôclit'am yiey pa nôyish pan lhtôôlhshi, pa lhech tsichen'ay pa jaspa ve'lheeshcum ca ovalh'in pa secl'esh ca nam'ach'een pa Espíritu Santo.

18Pa nivinshaa ti nameshch'e java lhtôsjey pava lhech ti lhc'ufjas, pa jaspa yovalh'in shta. Pa lhechesh pa netshaam pa chiycôt'atshi pa yinôôt. 19Pa nijooylha ti tsaccun pa vapecleyjop shta ti t'un'in, pa t'ajôôj jô pava nalhus ti mônlhajop'in papi nicacujanjasa yi'shi' pa Damasco.

Pa Saulo nifac cava Dios lhasinôc yiey pa Damasco

20Pa nijooylhach'e ja Saulo ti tôlhesh'e ti vanqu'eyjatsjanesh'e cava Dios lhasinôc yiey pava vatvanqu'eyjatsjanjavtes pa Jesús ti Lhaôs pa Dios. 21Pa lhacôm'a papi tach'ana pa nitôyiyjatesh pa yit'esh'in ts'ivee:

—¿Ni'lhecha t'e nôcôô ja nachan papi nincacuesh na lhey Jesús yiey ja Jerusalén? ¿Ni'lhecha t'e na lhech nôque nach'e' ca jaspa yôcfa'sha'ne ti yicha'jey'in japi lhanvaclesesh japi vatcasinôc?

22Taj ti ja Saulo uj ti vanijôtjatesh ti tasinôy pa yitamp'oyjateshlhavne papi judíos yi'shi' pa Damasco, lhayaash ti nôclitemch'e jum ja Jesús ti Cristo.

Pa Saulo yiclôtc'oya papi judíos

23Vooy ti nôjeshch'e pava acloj nalhus, pa lhechesh pa vatpeya'tajesha'ne papi judíos ca niclôn ja Saulo. 24Taj ti esh lhôn ti yaya'esh ja Saulo pa lhnafjunchayash. Pant'ajôôj pava tulhis shi' pava nalhus ti yovalhtajshic'oya ts'ivee pava lhashic pa yitsaat pa jaspa niclôn. 25Taj ti papi nicacujanjasa yanch'e' lhpa uj sisenilh pa yijutesh'apee ti tulhey pa vatashclôfechjop pa yitsaat. Pa lhech tôlh'e' ti yiclôt ja Saulo.#9.23-25 2 Co 11.32-33.

Pa Saulo ti yiey pa Jerusalén

26Meelh ti yamey ja Saulo ja Jerusalén pa yen ca namelhvatsham papi nicacujanjasa; taj ti papi lhech lhacôm'a ti nijovayjulh, lhayaash ti ninlheclôjesh ca ninatcacujana jô lhech. 27Pa esh lhôn ti caaj pa Bernabé yaôychi pa yichelheyshi japi vat'eyjatsjanjas. Pa yasinôquieshch'e pa lhjunash ja Saulo ti tanôclitem pa Lhcaanvacle yiey pa nôyish, yiey pa lhjunash ti tasinôyc'oya pa Lhcaanvacle, yiey pa lhjunash shta ja Saulo ti yifi'yesh ti tasinô'yesh pa Jesús ti yiey pa Damasco. 28Nôque lhjunash ja Saulo ti mônlhee ja Jerusalén pa voqu'esha'ne japi lhech. Pa uj ti yifi'yesh ti nifac pa Jesús. 29Pa tasinôyshelh pa naashelhvanôcji papi judíos papin yitô'yishch'e pa griego lhcliish. Papi lhech tanachanesh ca niclôn ts'ivee. 30Pa meelh ti yitô'ya papi lhavelhavot cavôque, pa yicha'jey ja Saulo ja Cesarea, pa lhech'e ti tayôjijanesh ti chinchajey pa Tarso.

31Pa lhechesh pa canoqu'enshi lhacôm'a papi ve'lheesham pa nivactcacujayasha yiey ja Judea, shi' ja Galilea nôquee shta ja Samaria pa vaniyitesh pa is lhcajôysha. Pa ve'lha yan'e' ti yôclôj pa Dios pa yefenesh shta pa Espíritu Santo ti nôyôj'een pat'ajôôj ts'ivee.

Chiyvatsjanchat pa Eneas

32Meelh ti t'ajuy'e ja Pedro papi lhavelhavot, pa yijôchiey shta pap'elh nicacujanjasa yi'shi' pa yitsaat Lida. 33Pa lhech yivan'e pa ve'lha nivacle lhey Eneas. Pa lhech pu'janyama pava lhnincôpesesh nintay'apee pa lhmôjôvat, lhayaash ti côycôych'e pa lhavu'vat. 34Pa yit'esha ja Pedro:

—Eneas, navatsjanchat ja Jesucristo. Aneetsham ca asclansha'ne na amôjôvat.

Pa netshaam tatsha pa Eneas. 35Pa lhacôm'a ti yivanesh papi yi'shi' pa Lida shi' papi yi'shi' pa Sarón pa vômeshjop pa apis lhfanishlhavach pa tatvaych'aclaja pa Lhcaanvacle.

Pa lhneetshamjayash lhpa Dorcas

36Lhech t'aplhuqu'e ti yi'shi' pa yitsaat Jope lhpa ve'lha nicacujanjaa lhey Tabita, vooy pa griego lhqueyesh Dorcas nôque yich'e' Tashinsha. Lhpa lhech ôcjeclô lhavôjeshjulh pa lhamônlhajayash ti is pa yisnatesh pa yefenesh shta papi ts'aclaaysha'ne. 37Pava lhech nalhus pa aôytej'in lhpa Dorcas, pa vaf shta. Vooy ti vacalhesh pa lhavu'vat ti chiyicleesh pa chiyan'ôcji pa chishamnee lhtôvash pa jpôyich. 38Shalheema pa Jope pa yitsaat Lida yiey pan vatvanelh'e ja Pedro. Pa meelh ti yaya'esh papi nicacujanjasa ti lhech yie', pa yicheney papi napu' nivacle ca niteetsha: “Anachey ja Jope ya aj ca anee'ach'e.”

39Pa vooy ja Pedro pa voqu'e' papi lhech. Pa meelh ti yamey pa yô'yaney pa chishamnee lhtôvash pan yie' pa lhavu'vat. Pa lhacôm'a papi ôsch'acchey ti t'afayjop pa yôyan vatam. Pa nôclit vatam pava lhcôqueclitôy shi' pava t'uyajtshiyis pavan yisnatesh lhpa Dorcas ti jôjjeclay mônlha. 40Pa vooy ja Pedro pa yichenfach'eeen lhacôm'a pa yu'janejop t'acjatsuy ti t'alh'apee; pa nijooylha ti yovalhsha'ne lhcan vaf, pa yit'esha:

—¡Tabita, aneetsham!

Lhpa lhech pa nic'aatvatjulh pava lhtôsjey pa yovalhsha'ne ja Pedro, pa yi'sha'ne shta. 41Vooy jô lhech t'acum'e pa lhpôcôt pa yinenjatchisham shta; pa nijooylha ti tôney shta papi nicacujanjasa shi' papi ôsch'acchey, pa yivanjiyinesh ti mônlha. 42Côque yaya'esh lhacôm'a papi yi'shi' pa yitsaat Jope, pa acloj papi nincacuesh pa Lhcaanvacle. 43Pa vooy ja Pedro pa acloj pava nalhus ti mônlhashi pa yitsaat, yie'in pa lhajpôyich pa tinôjis lhavo' lhey Simón.

Currently Selected:

Hechos 9: NIVA

Highlight

Copy