Hechos 8

Pa Saulo nachan papi lhtatvelhavot'esh pa nivatcacujayasha

1Lhan'e ja Saulo yajulhjatey ca chinclôn pa Esteban.

Lhech t'aplhuqu'e pa lhech nalhu ti chivatfaycuta papi lhtatvelhavot'esh pa vivatcacujayasha papin yie' ja Jerusalén. Lhacôm'a papi lhech vacôtsôney ts'ivee ja Judea shi' ja Samaria. Pa lhan'e japi vat'eyjatsjanjas pa ampa ca nôcji'. 2Vooy papi nivacle isissha'ne yichaaj ca Esteban pa tishc'oya, pa ujesh ti yôyanch'e ts'ivee ca lhech. 3Lhan'e ja Saulo pa ninvô'mesh ti nachan papi nicacujanjasa ca nitif'e. Pa yuy'ôcjisha'ne pava jpôyjey pa yitojonfach'eeen papi yitsjôy shi' papi ôcjeclôy pa tayôjijanesh ca chinan'ôcji ts'ivee lhacôm'a lhpa vatvanc'ôcfajayte.#8.3 Hch 22.4-5; 26.9-11.

Chivanqu'eyjatsjanesh cava Dios lhasinôc yiey pa Samaria

4Taj ti papin vacôtsôney ts'ivee pava yitsates vana'shesh ti vanqu'eyjatsjanesh cava Dios lhasinôc yiey pava nash'e ts'ivee. 5Ja Felipe, jan tôlhshaam japi lhech, t'ajuyey ja yitsaat Samaria pa nifaclem papi lhech'e ja Cristo. 6Papi nivacle lhech tay'evane pa uj ti yenesh ti tach'ansha jum pava nifaclem ja Felipe, lhayaash ti yivanesh pava yivclanjatem pava nimatasa papu ca nitô'yish. 7Lhayaash ti acloj papi yi'shi'sha'ne pava tsich'es ti yilhjenesha'ne, pava lhech tsich'es tafshiyshiin ti tayshiin papu. Jô'tajesh papi ti yitsonatan'in shi' papi ancojoyesh ti yivatsjanchatsha'ne. 8Pa nôque tôlh'ejop pa lhech'e yitsaat lhacôm'a papi yi'shi' ti uj ti nishamesh.

9Lhech yie' pa ve'lha nivacle lhey Simón, vaniisnatesh lhapesh ti tôye'jesh yiey pa lhech'e yitsaat, pa tejshisha'ne papi nivacle yi'shi' ja Samaria, lhayaash ti yit'eshlhavnec'oya ca na'shesh pa ca lhjunasha. 10Pa lhech uj ti tach'ana lhacôm'a papi taôvclas shi' papi nitaôvclasa pa yit'eshem: “Nôque nivacle chiyetônesh pa uj t'unaj pa Dios.”

11Lhapa cajueshch'e ti tach'ansha ts'ivee pa lhavitôyjayash ti tejeshi'sha'ne pa lhech tôyeej. 12Taj ti meelh ti yipe'yeesh ts'ivee ja Felipe ti nifaclem cava Dios lhasinôc shi' pa lhanvacleyash pa Dios shi' pa lhey ja Jesucristo, pa acloj papi nivacle shi' papi ôcjeclôy nincacuesh ti chinajayansha'ne. 13Pa shi' shta pa lhech Simón ninatcacujanesh pa chinajayan shta, pa lhech t'aplhuqu'e ti voqu'esha'ne ja Felipe, pa nitôyeesha pava yivclanjat nimatasa papu ca nitô'yish ti yisnatesh.

14Meelh ti yaya'esh japi vat'eyjatsjanjas yiey ja Jerusalén ti caaj papi t'acuumjulh cava Dios lhasinôc yiey ja Samaria, pa yicheney ja Pedro shi' ja Juan. 15Pa meelh ti yamey pa t'a'lhem papi ninatcacujansha'ne yiey ja Samaria pa jaspa nitôts'ôteyesh pa Espíritu Santo. 16Lhayaash ti jôjjeclay ninameyshicham papu ca ve'lhaa papi lhech pa Espíritu Santo; lhayaash ti tsi'sha ti chinajayanesh ja lhey ja Lhcaanvacle Jesús. 17Pa lhechesh pa yôclôj'apee java lhpôcôtôy ja Pedro shi' ja Juan pa jaspa ts'ôteyesh pa Espíritu Santo.

18Pa meelh ti yivanesh pa Simón japi vat'eyjatsjanjas java lhpôcôtôy ti yôclôj'apee, ti ts'ôteyesh pa Espíritu Santo, pa yen ca nijutem pa lhpeso, 19pa yit'esha:

—Anjutyi vitsha nôque vat'unaj secl'esh ca meelh ca jôclôjtaj'apee nava yipôcôtôy papu, pa nitôts'ôteyesh vitsha pa Espíritu Santo.

20Pa lhechesh pa yit'esha ja Pedro:

—¡Chinaclafjaneshch'e jayu pa apeso ca chinivalh'a, lhayaash ti lhaychavalhtajey pa lhcufayjat pa Dios ca nijut'ay ti lhajulhjatajsham pava apesoc! 21Avaatsha tanca chinatsôôtjatesh cavôque, lhayaash ti ninvooyshemch'e pa Dios na acachi'. 22Avô'meshjop nôque nisa' afanish'avach, pa aalhshey pa Dios jaspa nivômjatch'e'am pava lhaychavalhey'in. 23Teya ti c'avanesh ti yam'ach'een pa vat'apôyej, shi' ti yicôjôy'ash pa nisa'.

24Pa yicuulh pa Simón:

—A'lhelheyam avaatsheelh pa Lhcaanvacle, pa jaspa tanca ninamyiy t'ôyish'e cava ônashelh'yi.

25Meelh ti tifeshch'e japi vat'eyjatsjanjas ti tanôôclhaniteshlhavne ti vanqu'eyjatsjanesh cava Dios lhasinôc, pa lhechesh pa vapecley ja Jerusalén, pa acloj pava yitsates yi'shi' ja Samaria vana'shesh ti nifaclem cava Dios lhasinôc.

Pa Felipe shi' pa Etiopía lhavo'

26Nijooylhach'e côque, pa nam pa lh'ángel pa Lhcaanvacle, pa yit'esha ja Felipe: “Aneetsham ca ajuyey na fiyatjulh, pa uyey ja nôyish tôlh'e' na Jerusalén t'ajuyey ja Gaza.” Jô lhech nôyish yitsavalhsham ja ampapu ca nôv'e'. 27Pa nitshaam ja Felipe pa yich; yiey pa nôyish lhech vacutesh'e pa ve'lha nivacle Etiopía lhavo'. Pa lhech lhavaatsha chiyashjatchisham vatcavo pa chiyclôvalhchiyinesh pava lhpesoc lhpa lhcaanvacche Etiopía lhavoque. Pa lhech tanjuyey ja Jerusalén ti yôclôjey pa Dios. 28Pa tapecley pa lhavtsaat, yi'shi' lhpa lhcaletaj pa yetônch'e pa lhqu'isjayanach pa chiytôyjata pava ti vaclan lhey Isaías.

29Pa lhechesh pa yiyôjia pa Espíritu Santo ja Felipe pa yit'esha: “Meey ca ac'uysha lha caletaj.” 30Pa meelh ti tac'uya ja Felipe lhpa caletaj, pa yipe'yeesh ti yetônch'e pa Etiopía lhavo' pa lhqu'isjayanach pa Isaías; pa lhechesh pa niyôsesh:

—¿Natôyc'oya na lhetônch'e?

31Pa yicuulh pa Etiopía lhavo' pa yit'esh:

—¿Ta ajaalh lhayaash ca nastôyc'oya ti ampapu ca nits'eyjatsjaneesh?

Pa yiyôjia ja Felipe ca nôveelhshivatjuulh lhpa caletaj. 32Nôque t'ônashch'e pava vani'sesh'e ti yetônch'e:

“Jan lhjunash pa tashinshtaj

ti chiytôjônshey pa ti chiyclôn'e;

jan lhjunash pa tashinshtaj ti nits'iseey

ti yie' t'ajuyish papu ti yivoqu'ejat.

pa tanca shta ca nanc'aatsham pa lhashi.

33Pa vanits'aclayan jum

pa ninasnatesh lhatam pa vatvoyjayasheshch'e.

¿She papi iseemjop ca niteetshema

ca nicaajem jayu papi lhcles?

Lhayaash ti chiyayjat'e na cotsjaat

pa lhamônlhajayash.”*xa*

34Pa vooy pa lhcavo lhpa Etiopía lhavoque pa niyôsesh ja Felipe pa yit'esha:

—Anfacyam cum, ¿she t'e papi yasinôqui côque chiytôyjata pava ti vaclan? ¿Tam'e ti vanasinôquiesh, ja't'ajesha ca vo'ya pap'elh? #8.32-33 Is 53.7-8.

35Pa lhechesh pa tôlheshem'e ja Felipe pava yetônch'e nava Vani'sesh'e pa nifaclemch'e pava lhanclishay lhapesh ja Jesús. 36Pa meelh ti yamey ts'ivee pan yie' pa yinôôt, pa niyôsesh pa lhcavo lhpa lhcaanvacche pa yit'esha:

—Caaj nôque yinôôt; ¿tan t'e ca isa'jop ca chinasnajayanshi?

37Pa yit'esh ja Felipe ti yicuulh:

—Ca naacacutajeesh lhacôm'a côvôque, pa isjop ca chinanajayan.

Pa yicuulh pa nivacle:

—Niycacujanesh pa Jesucristo pa lhech Lhaôs pa Dios.

38Pa lhechesh pa vatsavat'esh lhpa caletaj; pa t'eclet'eysha'ne ts'ivee papi napu' pa yinôôt, pa vooy ja Felipe yicôt'atshi pa yinôôt. 39Meelh ti tayshi pa yinôôt pa vooy pa lh'Espíritu pa Lhcaanvacle yichaaj ja Felipe, pa vooy pa lhcaanvacche lhcavo ninvan t'ôyish'e; taj ti ujesh ti c'usem'in ti yich'e' pa nôyish. 40Lhan'e ja Felipe chiyvan'e pa Azoto, pa yich'e' pava yitsates pa nifaclem cava Dios lhasinôc, pa yamjey ja Cesarea.

Tatvaych'aclaja pa nich'a lhjunash pa Saulo

(Hch 22.6-16; 26.12-18)

Currently Selected:

Hechos 8: NIVA

Highlight

Copy