Hechos 10
10
Pa Pedro shi' pa Cornelio
1Yie' lhapesh pa yitsaat Cesarea pa ve'lha nivacle lhey Cornelio. Pa lhech lhanvacleesh papi cafoquelhay chiyeyiyanesh Italiano. 2Pa lhech nivacle yivo'yeshch'e, pa yôclôjelhey vatjuulh pa t'ajôôjam pa Dios. Pa yijutey shta pava lhpesoc papi judíos jaspa yefenesh, pa yajatesh ti t'a'lhey pa Dios. 3Ve'lha pa nalhu ti tanjuyshicham na jumcuclaay pa tavanchay, pa yi'van pa lh'ángel pa Dios ti yicheyshi yiey pan yie' pa lhech, pa yit'esha: “¡Cornelio!” 4Pa Cornelio yovalhsha'ne chin pa ángel, lhayaash ti nijovayem, pa niy'ôs:
—“¿A she t'e, Lhcaanvacle?”
Pa yit'esha pa ángel:
—“Ca alhjayash shi' cava lhatcufa'yesh'in yameychisham ja Dios, lhe'naa ti naychavalh'ay. 5Nôqueesh acheney napi nivacle ja Jope ca niyôji'aam ca nach'ay ja ve'lha nivacle lhey Simón lhanquey shta Pedro. 6Jô lhech yijop'in atesha jaelh Simón, tinôj lhavo' yie' lhavôôj pa lhajpôyich ja uj tovôc.”
7C'oya ti tayjop pa ángel pan tasinôyelh'in, pa vooy pa Cornelio pa tôney papi napu' lhcavos, pa nôquee peelh yashjat ti lhcavoesh'in, pa lhech yaychavalhey shta pa Dios. 8Vooy ti tifeshemch'e pava nifaclemch'e lhacôm'a, pa lhechesh pa yicheney ja Jope.
9Vooy ti nalhu pa yich'e' ts'ivee pa nôvyish lha pa yujeey pa lhavtsaat Jope. Pa lhan'e ja Pedro pa vôlh'apee pa yiey pa lhôtôj'e pa jpôyich, pa lhech yiesh'e ti t'aalh ti palha nalhcachi. 10Lha pa yiyipcun ja Pedro pa yeetajesh ca natsaccun. Ti jôjjeclay nichinvaclhitemsham pa lhôc, pa lhechesh pa tavanchay; 11pa yi'van ti tatc'aatsham pa vôôs ti nacha' cotsjaat pa uj sivôclôclhayeech yitshatjulh'e pava vanôôcfeesham. 12Pa lhech yi'shi' lhacôm'a pava nalhjunashvatc'oya yaquisetes yitshatjulh'e pava lhafoc shi' pava t'ôta'yesh pa t'oot shi' pava ajôclôs. 13Pa lhechesh pa yipe'ya pa vat'ôjôj ti yit'esh: “Aneetsham, Pedro, ca aclôn navôque ca atuj.”
14Pa yit'esh ja Pedro ti yicuulh:
—“Am, Lhcaanvacle; lhayaash nive'lhaaesh ca yaclafjan ca tuj pa sas pava nichinvashanelhyam.” 15Pa lhechesh pa yachajemeyc'oya shta pa vat'ôjôj ti yit'esh: “Nava yiisiyan ja Dios ya aj ca at'esha ca sasa.”
16Cavôque pu'janaesh ti chiyôji'tajesha, pa lhechesh pa chiyachajeshchisham pan lhjunash pa uj sivôclôclhayeech. 17Lhan'e ja Pedro pa jôjjeclay yistan'in pa t'ônashch'e pan yi'van ti namey pa lhashi papi nivacle papin yichen pa Cornelio, papin nachey ti tay'ôtsjanesh'in pa jpôyich yi'ôcji ja Simón. 18C'oya ti yamey ts'ivee pa tay'ôtsjanesh'in ca lhech nôv'e' ja Simón jan lhey shta Pedro.
19Jôjjeclay mônlheesh ti yaychavalhch'een ja Pedro pavan yi'van, pa lhechesh pa yit'esha pa Espíritu Santo: “A'va, napucôôvjulh pu'jana nivacle tay'ôtsjan'ash'in ti vo'aysha'ne. 20Aneetsham, ca avoqu'e napi lhech, pa ya aj ca atatvijatan, lhayaash ti janchen'ay napi lhech.”
21Pa lhechesh pa t'ecletsha'ne ja Pedro yiey pan yie' papi nivacle papin yicheney pa Cornelio pa yit'esha:
—Ya lhech yivaatsha lhavoolhyisha'ne; ¿she t'e pa lhnatshelhyiy?
22Pa yicuulh ts'ivee pa yit'esh:
—Ja lhcaanvacle Cornelio, jô lhech yivo'yeshch'e pa lhjunash ti t'ujanesh pa Dios, jô lhech tach'ana lhacôm'a japi judíos. Ve'lha pa lh'ángel pa Lhcaanvacle Dios yiyôjiesha ti vancachenjan'ay ca meey cum ja lhajpôyich ca nape'yeesh lhacôm'a ca ônashtajeem.
23Pa lhechesh pa yanlhavcop ja Pedro pa mônlhajop ts'ivee pa lhech tulh. Pa vooy ti nalhu pa voqu'e ja Pedro papi lhech, pa yôôychi papi t'ajôôj jô lhavelhavot papin yie' ja Jope.
24Vooy ti nalhu pa yamey ts'ivee pa yitsaat Cesarea. Lhan'e pa Cornelio pa p'alha ti vatjumteelhc'oya papi lhavelhavot shi' papi lhc'utsfasesh. 25Meelh ti yamey ja Pedro pa lhajpôyich pa Cornelio pa yivanjulh'in ti t'acuumjulh ti t'acjatsuy'e t'ajuyish pa lhech pa yôclôj.
26Lhan'e ja Pedro pa yinenjatchisham pa yit'esha:
—Aneetsham, lhayaash ti ya nivacle yitsha nan ajunash.
27Jôjjeclay mônlheesh ti tasinôyelh'in pa yich'ôcji pa jpôyich pa yi'van papi acloj nivacle ti tc'avanec'oya. 28Pa lhechesh pa yit'esha ja Pedro ti yiyôjisham papi nivacle:
—Natô'yelha avaatsheelh pa judío pa lhfanishlhavach ti nichinvashanem ca namelhvatsham papi vena tôlhshi', jô'tajesh ca chinôc'ôcji pa lhajpôyich. Taj ti nôclityam pa Dios ca ya ja ca chinôjtsiyesh papu ca ve'lhaa. 29Pa lhe'naa ca nitatvijatana ti chinachyiyyijop ti nôque janatshi. Nôqueesh jen ca nastôya' ti ta t'e lhayaash ti lhtônelhyiy.
30Pa lhechesh pa yicuulh pa Cornelio:
—Lhapa yitshatjulhch'e java nalhus nan yie' nôqueesh na jumcuclaay ti tanjuyshicham, ti jôv'ôcji na yijpôyich ti jat'ayipcuyan shi' ti jayaalh, pa meelh ti tanôclityam ja ve'lha nivacle uj ti nôcshi' lhja t'uyjatshiy. 31Jô lhech yit'eshyi': ‘Cornelio, pa Dios yipe'ya pa alhjayash pa yajulhjatey ca afanish'avach ti t'efen papi ts'aclaaysha'ne. 32Acheney papu ja yitsaat Jope ca ninôôycheay ja Simón jan lhey shta Pedro. Yie'in muc ja lhajpôyich jaelh Simón tinôjis lhavo', jan yie' lhavôôj ja uj tovôc. Ca namtaj pan tasinôy'ac'oya jayu.’ 33Pa lhechesh pa javancachenjan'ay tatsha, pa nôqueesh tajulhey ti lhnamyiy. Pa yalhacôma'elh nôqueesh ti jôvelh'e t'ajuyish pa Dios, pa jayeetshelh ca jaych'anelha lhacôm'a pava yiyôjiesh'a pa Lhcaanvacle ca at'eshalhayam.
Tasinôy'ôcji pa Pedro pa lhajpôyich pa Cornelio
34Pa lhechesh pa tôlhesh'e ja Pedro ti tasinôy'in, pa yit'esh:
—Nôqueesh tsitôyc'oya ti yijô' t'emma pa Dios ti nive'lhaa papu ca nivenchatc'oya pap'elh,*xc* 35pan yie' papi t'acuumjulh papi lhtachifas papu ti yen ti nincacu pa lhech papin yivooyshemch'e shta pa ti lhfanishlhavach. 36Tasinôyem pa Dios japi Israel lhcles, pa nifaclem pa ya'clishesh pa vatcanoyash tô'lha pa Jesucristo, jô lhech vatvacleesh lhacôm'a. 37Natôôyshelh lhacôm'a ja lhjunash ti vaclan'e jan tuc'a'e ja lhcootsjat japi judíos, ti tôlhesh'e ja Galilea ti tifeshch'e ca Juan ti vanqu'eyjatsjan shi' ti vancanajayan. 38Natôôyshelha pa Dios ti yamjatch'een pa t'unaj pa Espíritu Santo ja Jesús Nazaret lhavo', jan lhjunash jô lhech yajatesh ti is ja lhfanish lhavach ti yivatsjanchatsha'ne lhacôm'a japi yiclôyit pa t'unaj pa tsich'e'. Côque lhfanishlhavach, lhayaash pa Dios ti yi'jop jô lhech. 39Ya caajelhjop yivaatsheelh ti javanshelh lhacôm'a jant'ajôôj java lhfanishlhavach'e ja lhcootsjat Judea shi' ti yie' ja Jerusalén. Lhech jô lhech Jesús jan yiclôn ts'ivee ti yinesh lhja cruz. 40Taj ti jô lhech vooy pa Dios yinenjatchisham ti pu'jana java nalhus jô'tajesh ti tanôclitelhyam yivaatsheelh. 41Pa nilhacôm'aa papi nivacle ca nivatvanjiyinesh, vooy yivaatsheelh napin t'acumeyshilhatam pa Dios lhapesh, napin jayvanchayeshelh. Pa yalhechelh ti jaytsaccunelh pa c'ayôelh shta jô lhech ti apis ti netshaamshi capi vafsha'ne. 42Yivaatsheelh niyôjieshelhyiy pa Dios ca janfaclelhem lhacôm'a napi nivacle, shi' ti jatônôclhanitshelhyivne jô lhech Jesús ti yitsôôtjatesh pa Dios papi mônlhasha'ne shi' capi vafsha'ne ca nasclanvatich'e. 43Lhech jô lhech Jesús yasinôqui lhapesh papi nivacle chiytôyjata pava ti vaclan. Pa yit'esha ti lhacôm'a jayu papu ca nu'tajesha jô lhech ca natcuumtajulh ja lhey, pa chinvômjatemch'e pava lhsasch'esha'ne. #10.34 Dt 10.17.
Ts'ôteyesh pa Espíritu Santo papi nijudiosa
44Jôjjeclay tasinôy'in ja Pedro ti nameyshicham pa Espíritu Santo lhacôm'a papi tach'anasha pava lhclishay. 45Lhan'e papi ninatcacujansha'ne judíos papin nachey ja Pedro pa tamp'oyeshem jum ts'ivee ti tavanchayesh ti tisesh pa Dios pa Espíritu Santo papi nijudiosa. 46C'oya ti yipe'yeesh pava tavujuych'esha'ne ya'clishay ti tasinôyesh, pa yôclôjesh pa Dios. 47Pa lhechesh pa yicuulh ja Pedro:
—¿Tam'ey t'e ti isjop ca chinshiyanem ca ninaysha'ne napuque nivacle ti p'alha ti ts'ôteyesh pa Espíritu Santo yiey nan casjunash?
48Pa lhechesh pa tayôjijanesh ca ninajayanshi pa lhey ja Jesucristo. Pa nijooylha ti t'alha ja Pedro ca mônlhaajop'in cum pava t'ajôôj jô nalhus.
Currently Selected:
Hechos 10: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
