Hechos 11

Pa Pedro nifaclemch'e papi ve'lheesham pa nilhcacujayasha papi yie' pa Jerusalén

1Japi vat'eyjatsjanjas shi' papi lhavelhavot yie' pa Judea tpeeycheyesh ti t'acuumjulh shta papi nijudiosa cava Dios lhasinôc. 2C'oya ti vapecley ja Pedro ja Jerusalén, pa nayie'in papi naashelhvanôcji papi ninatcacujan judíos, 3pa yit'esha ts'ivee:

—¿Ta t'e lhayaash ti lhôcjaam papi nijudiosa, jô'tajesh ti lhattsaccunelh lhôn papi lhech?

4Pa lhechesh pa chayemch'e ja Pedro pa tôlhesh'e ti nich'a pa lhjunash ti vaclan, pa yit'esh:

5—Ti jôv'e' ja yitsaat Jope, pa meelh ti jayaalh pa jayvanchay: Pa ja'van ja lhayyasha ja uj sivôclôclhayeech, yitshatjulh'e java vanôôcfeesham, tôlheychisham na vôôs pa namyiyshicham jan jôv'e'. 6Pa jovalhjulh jum pa javanjulh java yi'shi', pa ja'van java yi'shi' yaquisetes suy yitshatjulh'e java lhcaclôy, shi' java t'ôta'yesh pa t'oot shi' java ajôclôs. 7Pa jape'ya pa vat'ôjôj pa yit'eshyiy: ‘Aneetsham, Pedro; ca aclôn pa atuj.’ 8Pa jacuulh: ‘Am, Lhcaanvacle, lhayaash ti nive'lhaaesh ca tuj pa tanôjtsiyiy shi' pa sas. 9Pa lhechesh pa ve'lheesh jape'ya pa vat'ôjôj tavaysham na vôôs pa yit'eshyiy: ‘Pa ti yiisiyan pa Dios pa ya aj ca at'esha ca sasa.’ 10Côque vaclan pu'janaesh ti lhech yit'eshyiy, pa nijooylhach'e ti vapecleychisham shta na vôôs. 11Pa lhech t'aplhuqu'e ti namey tatsha japi pu'jana nivacle ja jpôyich jan jôv'ôcji, chinchenyiy tôlhey ja Cesarea ti vo'yiysha'ne. 12Pa lhechesh pa niyôjiyiy pa Espíritu Santo ti javoqu'e japi lhech pa nitatvijatan. Pa jatanôycheelh shta japi ve'lhayama yivelhavot. Pa jôquelh'ôcji ja lhajpôyich ja ve'lha nivacle. 13Jô lhech nifaclelhyam pa lhjunash ti yivan'e ja lhajpôyich pa ve'lha ángel, ti vatsavatjop'in ti yit'esha lhôn: ‘Acheney papi nivacle pa yitsaat Jope ca niyôjiaan ja Simón jan lheyesh shta Pedro; 14Jô lhech nifac'am jayu pa ajunash ca anilhjen avaatsha shi' lhacôm'a nan ajôôjam. 15Meelh ti jatôôlhshem'e ti jayasinôyc'oya, pa nacheyshicham pa Espíritu Santo ti yi'apee ts'ivee yiey jan casjunash lhapesh ti nich'a namjooyshicham. 16Pa lhechesh pa jaychavalhch'e java yit'esh ja Lhcaanvacle: ‘Yijô' ja Juan ti vancanajayanshi pa yinôôt, pa a'lhan'eelh avaatsheelh pa chinanajayanshelh pa Espíritu Santo.’xd* 17Lhayaash pa Dios ti yivashanem yitsha pa is papi lhech yiey nan casjunash ti nishtacacuelh ja Lhcaanvacle Jescristo, ¿Ya she t'e yivaatsha ca jayvayeshc'oya t'e pa Dios pa'na? #11.16 Hch 1.5.

18Meelh ti yipeyach'e cavôque papi lhtatvelhavot'esh yi'shi' ja Jerusalén, pa canoqu'enshi ts'ivee, pa yôclôjey pa Dios pa yit'esh:

—¡Nôque t'emna lhfanishesh pa Dios ti yijutey papi nijudiosa ca nitatvaych'aclajesh pa lhjunash pa jaspa nicaajem pa lhamônlhajayash ôyjôlhôyech!

Papi ve'lhaesham pa nilhcacujayasha yiey pa Antioquía

19Ti apis ti nôjeshch'e ti chiyiclôn pa Esteban pa chitôlhesh'e shta ti chinachan pap'elh nicacujanjasa, pa caaj papi yiclôtey pa Fenicia, pa Chipre, nôquee pa Antioquía. Pa lhech yiesh'e ti nifaclem pa is ya'clish papi judíos, pa amjop pap'elh nivacle.*xe* 20Esh lhôn ti caaj papi nicacujanjasa tôlh'e pa Chipre shi' pa Cirene pa yamjey pa yitsaat Antioquía, pa yasinôquiem shta papi nijudiosa pava isis ya'clishay tô'lha ja Lhcaanvacle Jesús. 21Vooy pa t'unaj ja Lhcaanvacle yi'shi' papi lhech, pa nôque lhjunash pa acloj papi vômeshjop pa apis lhfanishlhavach, pa nincacu ts'ivee ja Lhcaanvacle. #11.19 Hch 8.1-4.

22Meelh ti yayaesh papi ve'lheelhsham pa nilhcacujayasha papi yi'shi' ja Jerusalén, lhech papuque yicheney ts'ivee ja Bernabé pa Antioquía. 23C'oya ti yamey ja Bernabé, pa yi'van pa lhjunash pa Dios ti yefenesh pa is, pa uj ti nishamesh. Pa yicajôyshiyanesh lhacôm'a papi lhech ca niyitesh ca lhetlha nôqueshi ca nanc'ashamem pa Lhcaanvacle. 24Lhayaash jô lhech Bernabé issha'ne, yamqu'een pa Espíritu Santo shi' pa nilhcacujayasha. Pa nôque lhjunash pa acloj papi nivacle ti yicaôvjoychishi'em pa Lhcaanvacle.

25Vooy ti nôjeshch'e côque pa t'ajuyey ja Bernabé pa yitsaat Tarso ti vooysha'ne ja Saulo; 26c'oya ti yi'van pa yicha'jey pa Antioquía. Meelh ti yamey papi lhech'e ve'lheelhsham pa nilhcacujayasha pa ve'lha yincôôp ti lhech yie', pa yeyjatasjan papi acloj nivacle. Yiey pa lhech Antioquía pa lhechesh ti nich'eesh ti lhanqueyesh “cristianos” papi nicacujanjasa.

27Lhech t'aplhuqu'e ti tôlh'e ja Jerusalén papi t'ajôôj jô chiytôyjata pava ti vaclan ti t'ajuyey pa Antioquía. 28Ve'lha pa tô'lha papi lhech lhanquey Agabo, vatsavatshi papi lhech pa yasinôyanesh pa Espíritu Santo pa yit'esha ti nam jayu pa uj yipcu' pan tuc'a'e pa cotsjaat. Pa lhech yôfisemch'e pan t'ônashesh pan t'aplhuqu'e ti lhcaanvacleesh pa Claudio.*xf* 29Pa lhechesh papi nicacujanjasa yiey pa Antioquía vatpeya'esh ca nicheney pa t'efenjayasha papi lhavelhavot yiey ja Judea, yiey pan tc'a' ca ve'lhaae ts'ivee pa ca natcufa'yesh. 30Pa nôque lhfanishesh ts'ivee ti yicheney'in pa lhcufayjat papi nitaôvclasaesh yiey ja Judea ca natjuya ja Saulo shi' ja Bernabé. #11.28 Hch 21.10.

Currently Selected:

Hechos 11: NIVA

Highlight

Copy