Hechos 12

Ti vaf pa Santiago shi' pa lhnôôcfajayash pa Pedro

1Pa lhech t'aplhuqu'e ti nachan pa lhcaanvacle Herodes ca niclônsha'ne papi ve'lheesham pa nilhcacujayasha. 2Pa tayôjijanesh ca chintsefeshesham pa clesataj ja Santiago, ja lhchecla' ja Juan. 3C'oya ti tavanchayesh papi judíos pa uj ti nishamsha, pa lhechesh pa chit'acum'e shta ja Pedro ti chiyôcfa'. Côque vaclanshi pa nalhu ti chituj lhpa yucuve ninôveyshi pa t'ajuya. 4Vooy ti vacalhesh ti chiyôcfa' ja Pedro pa tayôjijanesh pa Herodes ca chinan'ôcji lhpa vatvanc'ôcfajayte, yiey pan yie' papi yiclôvalh yitshatjulhsham pat'ajô'jesh papi c'afoquelhay, pa yitshatjulhvaneen pa ve'lha t'ajôj'esham papi c'afoquelhay. Yaychavalhtajey ca nan'e' t'ajuyish papi lhchifas ca nôjtajeshch'e pa Pascua.*xg* 5Pa nôque lhjunash ja Pedro ti yie' lhpa vatvanc'ôcfajayte, pa chivanujumatsenesh jum. Lhan'e papi ve'lheesham pa nilhcacujayasha lhetipaesh ti t'alhemey pa Dios pa uj ti vaniyitesh.

Pa Dios nijôôcshey pa Pedro lhpa vatvanc'ôcfajayte

6Velhasham pa lhech tulh tavaya pa nalhu pan yantaj'ejop pa Herodes ca nanchajey t'ajuyish papi lhchifas, lhan'e ja Pedro pa yimô' ti yishi' papi c'afoquelhay, pa vanôôcfeesh pava napu' calenas. Vooy pap'elh c'afoquelhay vanujumatsenesh pa yishi' pa lhashi lhpa vatvanc'ôcfajayte. 7Pa nivinshaa ti yameyshi pa ve'lha lh'ángel pa Lhcaanvacle, pa tif'ôcji pa lhqu'isjuyaj lhpa vatvanc'ôcfajayte. Vooy pa ángel t'ajaya pa lhavlhi' ja Pedro ti nijat'ôtsjan, pa yit'esha: “¡Aneetsham tatsha!” Pa tatsha ti namesh'e ts'ivee pava calenas java t'itjuy ja Pedro. 8Pa yit'esha pa ángel: “Uyjatshiyiy pa ôsch'e shta nava acfiyis.” Pa lhech lhfanishlhavach ja Pedro, pa yit'esha shta pa ángel: “Avatclôpjalhesh na aclô'vat pa atatvoyich'e.” #12.4 Ex 12.1-27.

9Pa nôque lhayashch'e ja Pedro pa ángel ti yichfach'eec'oya, taj ti nintô'ya ti lhechtaj pa ángel ti lhech lhfanisheshem. Yilheclôjtajesh ca natvanchay atesha. 10Taj ti pa naashjop papi tavaya c'afoquelhay, pa nijooylha ti naashjop papi tavaych'e c'afoquelhay. Meelh ti yamey pa lhashi'esh pa clesanilh tavaysham pa lhcaavju, pa tatc'at'ey lhavaatsha pa lhashi. Pa yichfach'eeen pa nijooylha ti t'ôtaych'e pa lhcaavju, pa lhech vômesh'e pa ángel pa ve'lha.

11Pa lhechesh pa yitôyc'oya ja Pedro, pa yit'esh: “Nôqueesh tsitô'ya jô pa Lhcaanvacle ti nichenyi ja lh'ángel ti tsijôôcshey ja Herodes shi' lhacôm'a japi judíos japin yentaj pa ca lhfanishayish.”

12Pa yaychavalhey côque ja Pedro pa yichey pa lhajpôyich lhja María, lhamimi ja Juan, jan lhanquey shta Marcos, pan yie' papi acloj nivacle tayvane ti t'alhey pa Dios. 13C'oya ti yipôcôjey pa lhashi tavaysham pa lhcaavju, pa yichey lhpa ve'lha lhutsja lhey Rode, ca nivan pan lhey papi lhech. 14C'oya ti nichafacch'e pa t'ôjôj ja Pedro, pa ninanc'at'ey pa lhashi, pa nifayueshey pap'elh ti vacumajey ti nifaclem ti caaj ja Pedro ti yishi' ja lhashi. 15Pa lhechesh pa yit'esha ts'ivee:

—¡Naacajôyshay avaatsha!

Taj lhpa lhech yijô'em ti lhech lhavaatsha. Taj ti papi lhech yit'esha ts'ivee:

—Ameesh nilhecha; lhech jayu pa lh'ángel.

16Pa ninvômeshjop ja Pedro ti yipôcôjey pa lhashi. C'oya ti nicat'ey pa lhashi ti yi'van pa uj ti nitôyiyjat. 17Pa nôclitem ja Pedro java lhpôcôtôy ti yishanat, pa nifaclemch'e pa lhjunashesh pa Lhcaanvacle ti yayjat'ôcji lhpa vatvanc'ôcfajayte. Pa yit'eshem shta:

—Anfacle'lhem côque ja Santiago shi' jap'elh lhtatvelhavot'esh pa nilhcacujayasha.

Pa lhechesh pa yich'in pa yichey paelh ca nôv'e'.

18Pa meelh ti nalhu pa uj ti vaniistanesh papi c'afoquelhay, lhayaash ti nintô'yish pa lhjunash ti vaclanem ja Pedro. 19Vooy pa Herodes tayôjijanesh ca chinvooysha'ne. Vooy ti nitônt'ajtajesh ti ninvan, pa tayôjijanesh papi c'afoquelhay ca chinclônsha'ne. Pa lhechesh pa tay'e pa Herodes ja Judea pa t'ajuyey ja Cesarea pa lhech yie'in shta.

Pa lhavafi pa Herodes

20Pa lhech t'aplhuqu'e ti yicônitshi jum pa Herodes papi Tiro shi' papi Sidón lhavos. Taj ti nachey lhavaatsha papuque ti yisclana ts'ivee pa lhech. Taj ti esh lhôn ti yijutsjatey ts'ivee pa lhcavo lhey Blasto pa t'aalhsha ca piieelhvach, lhayaash ti tô'lha pa lhôc ts'ivee pa lhcootsjat pa Herodes. 21Pa lhechesh pa yinôôclhanita pa Herodes pa nalhu ti tasinôyshi jayu. Vooy ti yameyjop pa lhech nalhu pa yuych'e lhpa is t'uyjatshiy pa yie'sha'ne pa lhc'ovatjop papu ti yisclanch'e pa tasinôyc'oya papi tc'aelhvane. 22Lhechesh pa vats'ôôj'e papi nivacle pa tônesh'apee:

—“¡Nôque tasinôy'in ninivaclea, lhech pa dios lhavaatsha!” 23Pa lhech t'aplhuqu'e ti nivinshaa ti namey pa lh'ángel pa Lhcaanvacle ti yisnatshem pa Herodes pa lh'ôôyteyash, lhayaash ti ninlhechenat pa Dios ca chinôclôj, pa tuj pava lhavos pa yivômjat.

24Lhan'e cava Dios lhasinôc pa lhetipa ti tac'uychisham pa chivanqu'eyjatsjanesh'e lhacôm'a pava yitsates.

25C'oya ja Bernabé shi' ja Pablo ti yivaclhitesh lhacôm'a pa lhcumjayash, pa vapecley'in ts'ivee ja Jerusalén, pa yôôychi ts'ivee ja Juan jan lhey shta Marcos.

Currently Selected:

Hechos 12: NIVA

Highlight

Copy