Hechos 13

Pa Saulo shi' pa Bernabé tôlhesh'e pa lhcumjayash ti vatcachenjasesh

1Ti yie' papi ve'lheesham pa nilhcacujayasha yie' pa Antioquía caaj papi chiytôyjata pava ti vaclan shi' papi vanqu'eyjatsjan. Lhech ja Bernabé, shi' ja Simón (pan lhey shta Yacut), ja Lucio Cirene lhavo', ja Manaén (jan ve'lheelhsham pan lhanvacleyashelh pa Herodes yiey pa Galilea) shi' ja Saulo. 2Ve'lha pa nalhu ti yisnatshem ts'ivee pa lhishjanjayash pa Lhcaanvacle pa vat'ayipcuyanjop, pa vooy pa Espíritu Santo pa yit'esha: “Avenchateshelhyam na Bernabé shi' na Saulo pa lhcumjayash ti lhechin jayônshey.”

3Lhechesh, pa nôjeshch'e pa t'alhjayash shi' ti vat'ayipcuyansha'ne, pa yan'apee pava lhpôcôtôy japi lhech pa yecjuesh ts'ivee ti yichen'in.

Papi vatcachenjas vanqu'eyjatsjan'e pa Chipre

4Pa nijooylhach'e ti yichen'in pa Espíritu Santo ja Bernabé shi' ja Saulo pa t'ajuyey pa yitsaat Seleucia. Pa lhech'e ti yi'shi' ts'ivee lhpa vatôvjatshi pa t'ajuyey pa cotsjaat yichjop'in pa tovôc lhey Chipre. 5C'oya ti yamey pa chiyie'shiin pava vatôvjatshiyis tajulhshi pa Salamina, pa lhech tôlhesh'e ti vanqu'eyjatsjanesh'e cava Dios lhasinôc yiey pava lhavanqu'eyjatsjanjavtes papi judíos. Voqu'e shta ja Juan japi lhech ti yefenesh.

6Pa yitsavalheshch'e lhacôm'a pa yichjop pa tovôc, pa yamey pa yitsaat Pafos. Pa lhech yivan'e pa ve'lha judío lhey Barjesús, pa lhech tôye'jesh. Cuts'aaj lhavaatsha, yit'esha ca nitasinôyesh pava tô'lha pa Dios. 7Pa lhech tôyeej yi'jop pa lhech'e lhcaanvacle lhey Sergio Pablo, pa lhech nivacle tcajôyshay. Pa lhech lhcaanvacle tayôjijanesh ca chinôque'mey ja Bernabé shi' ja Saulo, lhayaash ti yen ca nach'ana cava Dios lhasinôc. 8Pa lhech tôyeej pan lhqueyesh shta papi griegos Elimas, ninancôtsitaytajesha pa lhcaanvacle ca nit'ujanesh cava Dios lhasinôc. 9Lhan'e ja Saulo jan lhanquey shta Pablo, yamqu'een pa Espíritu Santo, pa yovalhsha'ne chin 10pa yit'esha:

—¡Ajôts'ôclônjanaj, naavsasha'ne, lhôs'ash pa tsich'e', lhcônitshi pa yivo'yeshch'e! ¿Ta lhayaash ti naavô'mesh ti lhecjetc'oya nava yitsôt'as lhnôyishay pa Lhcaanvacle? 11Nôqueesh pa yivalh'a jayu pa Lhcaanvacle pa naclôyit: pa atacluqu'eesh jayu muc, pa tan jayu ca avan na lhqu'isjuyaj na jumcuclaay.

Pa nivinshaa ti tjonshajayem'in pa Elimas, pa na t'apacuneshi papu ca nipôycôj, lhayaash ti tacluqu'esh. 12C'oya ti yi'van côque pa Lhcaanvacle pa ninatcacujanesh, lhayaash ti tamp'oyem pava chivanqu'eyjatsjanesh tô'lha ja Lhcaanvacle.

Pa Pablo shi' pa Bernabé ti yie' pa Antioquía yi'shi' pa Pisidia

13Ja Pablo shi' japi lha'yôvot tôlh'e' ts'ivee pa Pafos ti t'ajuyey pa Perge, yi'shi' pa cotsjaat Panfilia; taj ti vooy ja Juan lhech yivôm'e pa vapecley ja Jerusalén. 14Tôlh'e' ts'ivee pa Perge pa na'shey pa Antioquía shalheema pa Pisidia. Lhech'e ti yama pa nalhu ti chit'ichayshi pa yich'ôcji ts'ivee pa vatvanqu'eyjatsjanjavat pa yich'esha'ne. 15Pa nijooylha ti yetônch'e pa vatqu'isjayanach yi'shi' pava vatyôjijates shi' pa lhqu'isjayanach papi chiytôyjata pava ti vaclan, pa yiyôjiajop papi lhanvaclesesh pa vatvanqu'eyjatsjanjavat pa yit'esh ts'ivee:

—Yivelhavot, ca nicaajtajelh'am ca at'eshelha pa ca anshamitjateshelh napuque nivacle, pa anfaclelhem nôqueesh.

16Pa lhechesh ja Pablo pa netshaam, pa yiclôyanjop lhpôcôt papi nivacle ca ya aj ca ts'iseey, pa yit'esha:

—Ach'anelhyi cum avaatsheelh Israel avoselh shi' shta avaatsheelh napin vena tôlhshi' nincacu pa Dios. 17Pa lhech lh'Dios papi lhtachifas Israel lhavos chit'acumeyshisha'ne lhapesh papi catsicchevot; jô'tajesh ti yiclonat'e papi lhech lhtachifas jan t'aplhuqu'e ti yie'in ts'ivee ja nintsôt'ajesh cotsjaat Egipto. Pa nijooylhach'e ti yayjatesh'e pa t'unaj pa lhech'e cotsjaat.*xh* *xi* 18Pa Dios yisclaneshemshi jum pa lhfanishesh ti cuarenta pava lhnincôpes ti yie' ts'ivee pa ampa ca nôv'e'.*xj* 19Pa yivômjatsha'ne papi napu'yama lhtachifasesh yie' pa lhech'e cotsjaat Canaan, pa jaspa yijutem pa lhech cotsjaat papi catsicchevot p'alha.*xk* *xl* 20Lhacôm'a cavôque ti yicheshch'e pava cuatrocientos cincuenta yincôpes.*xm* *xn*

“Pa yinvacleyanesh papi tcaasclanchaysha'ne pa yamjeyshi pa chiytôyjata pava ti vaclan lhey Samuel. 21Pa lhechesh pa t'a'lha ts'ivee pa ve'lha lhcaanvacle ca niclôvalh ts'ivee. Vooy pa Dios yijutem pa ve'lha lhanvacle lhey Saul, lhaôs pa Cis, tô'lha pa Benjamín, pa cuarenta pava yincôpes ti yicheshch'e.*xñ* *xo* 22Pa nijooylha ti yayjatshi pa Dios pa lhech Saul pa lhanvacleyash, pa yic'uyjatem pa lhcaanvacle David, pan yit'esha: ‘Ja'van ja David, lhaôs pa Isaí, jô lhech nivacle ts'ishamitjat yajulhjatey ti yisnatesh lhacôm'a nava jayeesh.’*xp* *xq* 23Ve'lha pa lhech David tôlhshaam ja Jesús, jan yicheney pa Dios ca nalhjen papi Israel lhavos, pan lhjunash ti chinfacleem lhapesh. 24Jôjjeclay ninam ja Jesús ti yeyjatsjanesh ja Juan japi nivacle Israel lhavos, pa yit'eshem ca nitatvaych'aclaja pa Dios pa chinajayansha'ne jayu shta.*xr* 25Pa meelh pa Juan ti yujaa pa yôj'e' pa lhamônlhajayash pa yit'esh: ‘Niyalhecha jan lhaychavalhtajelhyijop, taj ti nijooylha yich'e' jayu pa lhech ve'lha jatanapuneshjulh ca januqueem'e pava tacfiyis pava lhavtes.’*xs* #13.17 Ex 1.7.,#13.17 Ex 12.51.,#13.18 Nm 14.34; Dt 1.31.,#13.19 Dt 7.1.,#13.19 Jos 14.1.,#13.20 Jue 2.16.,#13.20 1 S 3.20. #13.21 1 S 8.5.,#13.21 1 S 10.21.,#13.22 1 S 13.14.,#13.22 1 S 16.12; Sal 89.20.,#13.24 Mr 1.4; Lc 3.3.,#13.25 Jn 1.20.,#13.25 Mt 3.11; Mr 1.7; Lc 3.16; Jn 1.27.

26“Yivelhavot lhtôlhelhsham pa Abraham, shi' napi vena lhtôlhelhshi ti lhôclôjelhey pa Dios, t'ajuyelh'a avaatsheelh nôque ya'clishesh pa vatnilhjenjayash. 27Ey ca lhecha japi yie' na Jerusalén shi' japi lhanvacles ca nitô'ya jô lhech Jesús. Pa nintôyc'oya ts'ivee shta pava lhclishay papi chiytôyjata pava ti vaclan ti yetôntajch'een ts'ivee pava nalhus ti chit'ichayshi yiey java vatvanqu'eyjatsjavtes; nôque lhjunash ts'ivee ti yivalha ja Jesús pa yôfisch'e pava chitatômjalhesh lhapesh. 28Lha'ma ninvantajesh pa ca lhfanisha lhavach ti nivôncaclônjatsuesh ts'ivee, pa t'alhajop pa Pilato ca nitôyôjijanesh ca chinclôn.*xu* 29Pa nijooylha, meelh ti yivaclhitesh lhacôm'a pava vat'ônashesh jô lhech java yi'shi' nava Vani'sesh'e, pa yijônesha'ne lhja cruz pa yanch'e' pa lhanvalheech.*xv* 30Vooy pa Dios yinenjatchisham. 31Pa yicheshch'e java acloj nalhus ja Jesús ti tanôclitem'in japi lha'yôvot'esh ti tôlh'e' ja Galilea pa t'ajuyelhey ja Jerusalén; pa vooy nôqueesh japi lhech tasinôyeshc'oya ja Jesús napi nivacle.#13.28 Mt 27.22-23; Mr 15.13-14; Lc 23.21-23; Jn 19.15.,#13.29 Mt 27.57-61; Mr 15.42-47; Lc 23. 50-56; Jn 19.38-42.,#13.31 Hch 1.3.

32“Nôque lhjunash yivaatsheelh ti janfaclelh'am nava isisch'e ya'clishay: Na lhfaclech pa Dios nan yisnatshem lhapesh papi catsicchevot, 33nan yôfisjatch'ejoom casvaatsheelh ti shtatôôlhsham lhapesh. Côque lhfanishesh ti yinenjatchisham ja Jesús jan lhjunash ti vani'seshi ja napu'eyshi ja Salmos: ‘A'lhech avaatsha c'ôs'ash, tsicavat'aj'ash nôqueesh.’*xx* 34Pa Dios p'alha lhapesh ti nifac ti yinenjatchisham jayu pa lhavu'vat pa tanca lhoclashi, nan t'ônashesh nava Vani'sesh'e: ‘C'ôfisjatch'e jayu nava isis yivo'yeshch'e yifacjes jasnatshem ja David.’*xy* 35Pa lhe'naa ti yit'esha shta paelh yie'shi: ‘Tanca avashanem jayu ca lhoclashi pa lhavu'vat pa is acavo.’*xz* 36Nôqueesh yijô' lhapesh pa David ti t'acuumjiin papi lhech pa lhech nalhu yiey pan t'ônashesha pa Dios ti yiyôjiesha. Pa nijooylhach'e ti vaf pa chineyshi papi lhnavot, pa vooy pa lhavu'vat pa lhocji. 37Taj ti vooy ja lhavu'vat jô lhech yinenjatchisham pa Dios pa tanca lhoclashi. 38-39Nôque lhjunash yive'lhavot, avaatsheelh tajulhey ca natô'yelha jô lhech Jesús ti yivômjatch'e pava sasch'esha'ne. Jô lhech tô'lha lhacôm'a papu ca nincacutajeesh pa chiyvômjatemch'e jayu, papin nive'lhaaesh ca chinvômjatemch'e papin yi'shi' pava lhayôjijates pa Moisés. 40Tajulhey ca anujumatsenelh avach jaspa tanca ninatelh'atsham pava yi'sesh'e papi chiytôyjata pava ti vaclan #13.33 Sal 2.7.,#13.34 Is 55.3.,#13.35 Sal 16.10.

41‘A'va, acav'ojinjaselh

antôyi'elha, ca avôômtajelhshi;

lhayaash ti ya lhech ya Dios,

javclanjatelh'am jô lhech nalhu

ja uj yicumjat,

taj ti tanca ujaneshelh,

lha'ma ca nanfactajelh'am papu.”#13.41 Hab 1.5.

42Pa meelh ti tayelh'ôcji ja Pablo shi' japi lha'yôvot ja lhavanqu'eyjatsjanjavat japi judíos, pa lhechesh pa yiyôjiajop papi nijudiosa ja Pablo pa nijooylha nalhu ti chit'ichayshi ca nachajeyc'oya shta ca nasinôqui cavôque matas. 43Pa meelh ti yivaclhitesh ts'ivee pa lhayjayashvane yiey pa vatvanqu'eyjatsjanjavat, pa acloj papi judíos shi' papi lhech'e yichajch'e pa lhfanishlhavach papi judíos pa voqu'evatich'e ja Pablo shi' ja Bernabé. Papi lhech yicajôyshiyanesh pa ninanshi ca niyitesh ca natcuumjulh pa lhencheyash pa Dios.

44Vooy ti yama lhap'elh nalhu ti chit'ichayshi, pa eshey ca lhacôm'aa pa yitsaat ti tayeshvane ts'ivee ca nach'ana pa lhcliish pa Lhcaanvacle. 45C'oya ti yivanesh papi judíos ti yaash papi nivacle, pa uj ti yijuctsenesh, pa lhech tôlhesh'e ts'ivee ti t'ajuyeshjulh ja Pablo ti ninancôtsitayesh ts'ivee. 46Pa lhechesh ja Pablo shi' ja Bernabé pa vatfiyitshem ti tasinôy pa yit'esh ti yicuulh:

—Caajelhyam na yinyôjijat'elh ti janfaclelh'am cava Dios lhasinôc ti c'ajutsjateshelh avaatsheelh napi judíos, taj ti apis ti lhatcavo'yelhjulh. Pa niaychavalhelhey ca at'eshelh ca ataasclanelhsha'nec'oya pa vatmônlhajayash ôyjôlhôyech pa jôqueshelhey napi nijudiosa. 47Lhayaash ti lhech t'ônasheshelhyi ja Lhcaanvacle ti yit'esh:

‘C'ajulhjatelhsham ti avatqu'isjuyajshelhc'oya

napi lhtachifas,

ca jaspa natcuumjulh na yiqu'ilhjenjayash

pa amjelhey pa yôj'e' pava toseyshi vatcootsjativshay.#13.47 Is 42.6; 49.6.

48C'oya ti yipe'ya côque, papi nijudiosa pa uj ti nishamesh ts'ivee, pa lhech tôlhesh'e ti yit'esha ca lhcliish pa Lhcaanvacle ti tajulhemey. Pa lhacôm'a papi chiyjuyjata tatsha pa vatmônlhajayash ôyjôlhôyech, pa lhech papi lhech ninatcacujansha'ne. 49Pa nôque lhjunash ti nifaclem cava Dios lhasinôc lhacôm'a pa lhech'e cotsjaat. 50Lhan'e papi judíos pa yasinôquic'oya papi ôcjeclôy chiyinvaccheyansha'ne shi' papi nivacle chiyashjateshchisham pa lhavtsaat, pa yifaycuta ti yicôntayana ja Pablo shi' ja Bernabé ca nayjatshi ts'ivee pa lhcootsjat. 51Lhechesh papuque pa yisichatesh pava lhafoc pa cotsjaat yinôôclhanitsha ti t'ajuuyjulh papi lhech nivacle pa t'ajuyey'in ts'ivee pa Iconio.*xc* 52Taj ti papi lhech nicacujanjasa ti yamqu'een pa lhshamitjayash shi' pa Espíritu Santo. #13.51 Mt 10.14; Mr 6.11; Lc 9.5; 10.11.

Currently Selected:

Hechos 13: NIVA

Highlight

Copy