Hechos 14

Pa Pablo shi' pa Bernabé ti yie' ts'ivee pa Iconio

1Ti yie' ts'ivee pa Iconio ja Pablo shi' ja Bernabé pa yich'ôcji ts'ivee pa lhavanqu'eyajtsjanjavat papi judíos, pa ujesh ti tasinôyc'oya pa acloj papi ninatcacujansha'ne papi judíos shi' papi nijudiosa. 2Taj ti papi judíos papi ninuesha pa yifaycuta papi nijudiosa ca naychavalhemey pa nisa' ca nasnatshem papi lhtatvelhavot. 3Pa nôque lhjunash papi vatcachenjas pa cajuqu'e ti lhech mônlheeen pa yicafiyanesh pa Lhcaanvacle ti tasinô'yesh pa yiyitsjatesh pa Lhcaanvacle pava yit'esh'in ti tasinô'yesh pa lhencheyash pa Dios pa yunitjatesh shta ti yivclanjat pava nimatasa papu ca nitô'yish shi' pava yinôôclhanitsha pa'na. 4Taj ti papi nivacle yi'shi' pa yitsaat pa vanicatsônjat, caaj papi t'acuumjulh papi judíos vooy pap'elh t'acuumjulh yitsha japi vatcachenjas. 5Pa lhechesh papi judíos shi' papi nijudiosa vatpeya'shelh papi lhcaanvacles pa ya aj ca nasclaneshi ts'ivee ca nôôtjatesh'in pava utes. 6Meelh ti tpeeycheyesh ja Pablo shi' ja Bernabé pa yiclôtey ts'ivee pa Listra shi' pa Derbe, pava lhech yitsates yi'shi' pa Licaonia, shi' pa cotsjaat yichjop, 7yiey pan nifacl'e shta nava isis ya'clishay.

Chiyôôtjatesh'in pava utes pa Pablo ti yiey pa Listra

8Yiey pa yitsaat Listra pa ve'lha nivacle sasjop ca nit'ôtay. Lhayaash pa lhech ancoqu'esh ti nich'a nivat'aj. Pa lhech nivacle yi'sha'ne, 9pa tach'ansha ja Pablo pava yit'esh'in. Pa vooy ja Pablo pa yovalhsha'ne pa lhech pa yi'van ti yaash pa nilhcacujayasha pa jaspa chinvatsjanchat. 10Pa lhechesh pa yisitsenesha pa t'ôjôj ti yit'esha:

—¡Aneetsham ca atsôôtjatch'e nava acaclôy!

Pa lhechesh pa vatsavat pa lhech nivacle pa t'ecletchisham lhech tôlh'e'jop ti vacleech. 11C'oya ti yivanesh ts'ivee pa lhfanishesh ja Pablo pa lhech tôlh'e' ti tônesh'apee papi nivacle yi'eshi pa lhcliish papi Licaonia:

—¡Namjooyshicham lhavaam napi nivacle vatjônch'e pa Dios!

12Pa lhqueyesh ts'ivee ja Bernabé dios Júpiter, pa vooy ja Pablo dios Mercurio, lhayaash jô lhech ti lhavasinônaj. 13Vooy pa lhcasinôyanach pa Júpiter yie' lhavôôj pa vatishjanjavat pa chiyuy'ejop'in pa yitsaat pa nichajey'in pava vôcôc jayanjas shi' pava isis lhavôs; vooy pa lhech shi' papi nivacle yen ti yôclôjesh ti yiclônjop'in pava jayanjas ti lhcufayjatesesh. 14Pa meelh ti yitôôysha japi vacachenjasesh ja Bernabé shi' ja Pablo, pa lhech tôlhesh'e ti yic'asteshlhtapee pava yuych'e pa yôôtjatesham papi nivacle pa tônesh'in pa yit'esh:

15—Vacjayijes, ¿ta t'e lhayaash ti lhasnatshelh côque? Yivaatsheelh ya nivacleelh nan ajunashelh. Janamjelh'ay jô avaatsheelh ti janfaclelh'am ca avôômjelh cavôcô'i ti ampa ca nitô'lha. Tajulhey ca mapeclelha pa Dios pan mônlha, pa lhech yisnatesh pa vôôs, na cotsjaat shi' pa tovôc shi' lhacôm'a nava caaj. 16Lhama'taj jav'elh nalhus pa Dios ti yivashanelh'am ti avelhaelh'e ts'ivee pava natsôt'ajeshelh anôyshayelh, 17lhama' ti yajatesh ti tanôcliteshelh'am pa lhech pa is ti yisnatshelh'am; pa lhech nichenelh'ay pa tsha'nu shi' pava isis acavcalhjaselh pa nin'amiyanc'oya pa ti lhtujelh pa jaspa lhanshameshelh.

18Lhama'taj ti yit'eshem cavôque matas, ti tavijataytajem ti yishiyantajem papi nivacle ca niclônsha'ne pa jayanjas ti lhcufayjates japi lhech ti yôclôjesh.

19Pa lhech t'aplhuqu'e ti yamey'in papi judíos tôlh'e' pa Antioquía shi' pa Iconio, ca nanvaych'aclajem pa lhjunash papi nivacle; pa lhechesh pa yôôtjatesh'in pava utes ja Pablo. Pa yilheclôjtajesh ca nivômjat ts'ivee pa yitojonfach'eec'oya pa lhavtsaat. 20Taj ti meelh ti t'afayjop papi nicacujanjasa ja Pablo pa nitshaam pa vapecsham shta pa yitsaat; pa vooy ti nalhu pa yiche'lhey ja Bernabé pa yitsaat Derbe.

21Vooy ti tifeshch'e ti nifacl'e cava isis ya'clishay yiey pa Derbe, pan yie' ti acloj papi ti yicaôvjoychishi nicacujanjasa, pa vapecley'in pa Listra, pa Iconio nôquee pa Antioquía. 22Pava lhech yitsates uj ti nishamsha papi nicacujanjasa pa yiyôjiesha ca lhetlha nôqueshi ca niyitesh pa nilhcacujayasha, pa yit'esha shta ts'ivee ca nôcjaam pa lhanvacleyash pa Dios ca nivôtclôyitesh ts'ivee pava tavijatay. 23Pa chiyetônjop shta papi ve'lha ts'ivee nitaôvclasaesh pa nivatcacujayasha. Pa vooy ti tifeshch'e ti t'aalh shi' ti vat'ayipcuyanjop ti t'a'lheyjop ts'ivee pa Lhcaanvacle, pan yie' papi nincacu.

Pa Pablo shi' pa Bernabé ti vapecley'in pa Antioquía yi'shi' pa Siria

24Naasham pa cotsjaat Pisidia pa yamey pa cotsjaat Panfilia. 25Pa nifaclem pa is ya'clish yiey pa Perge, pa nijooylha ti t'ajuyey pa Atalia. 26Pa lhech'e ti yi'shi' lhpa vatôvjatshi ti t'ajuyey pa Antioquía, pa lhech yitsaat yi'shi' papi t'a'lheyjop pa lhencheyash pa Dios t'ajuya pa lhcumjayash pan yivaclhitsham nôqueesh. 27Pa meelh ti yamey'in pa Antioquía pa tayelhvane papi ve'lheesham pa nilhcacujayasha pa nifaclemch'e lhacôm'a pava matas pavan yisnatshem pa Dios papi lhech, nan lhjunash pa Lhcaanvacle ti nic'at'emey pa lhashi papi nijudiosa, pa jaspa isa'jop vitsha ca ninatcacujanasha'ne papi lhech. 28Vooy ja Pablo shi' ja Bernabé pa cajuqu'e ti lhech mônlheeen yiey papi nicacujanjasa.

Currently Selected:

Hechos 14: NIVA

Highlight

Copy