Hechos 15
15
Pa vatayjayashvane yiey pa Jerusalén
1Pa lhech t'aplhuqu'e ti t'ajôôj jô papi nivacle tôlhey ja Judea t'ajuyey pa Antioquía, pa lhech tôlhesh'e ti yeyjatsjanesh papi lhtatvelhavot ti sasjop ca chinalhjen ti tanca chinseej clee, yiey pan t'ônashesh pava lhayôjijates pa Moisés. *xd* 2Ja Pablo shi' ja Bernabé pa uj ti vaniyitesh ti naashelhvanôcji papi lhech, pa yamja pa yôj'e' ja Pablo shi' ja Bernabé nôquee pap'elh ti t'ajuyelhey ja Jerusalén pa yasinôquielh cavôque japi vatcachenjas shi' papi ve'lheelhsham pa nilhcacujayasha yiey pa lhech'e yitsaat. #15.1 Lv 12.3.
3Lhayaash ti yicheney papi ve'lheelhsham pa nilhcacujayasha yiey pa Antioquía pa naasham ts'ivee pava cotsjatis pa Fenicia shi' pa Samaria ti nifaclem papi nijudiosa ca nivômesh pava apis lhfanishlhavach ca nivoqu'e pa Dios. Pa lhacôm'a papi lhtatvelhavot ti nishamesh jum pava isisch'e ya'clishay.
4Meelh ja Pablo shi' ja Bernabé ti yamey'in ja Jerusalén, pa t'acuumjulh papi lhech'e ve'lheelhsham pa nilhcacujayasha shi' papi vatcachenjas nôquee papi nitaôvclasaesh, pa nifaclemch'e lhacôm'a pava lhfanisheshem pa Dios japi lhech. 5Taj ti nayie' papi fariseos, papin ninatcacujan, pa nitshamch'e pa yit'esh ts'ivee:
—Chiysuytajeshi ca chinseej clee papi nijudiosa, pa chiyôji'sha ca chinôfisjatemch'e pava lhayôjijates pa Moisés.
6Lhechesh pa tayshelhvane papi vatcachenjas shi' papi nitaôvclasaesh ca nivôntôyitesh côque. 7Vooy ti cajueshch'e ti na'sheshvanôcji pa vooy ja Pedro pa netshaam pa yit'esha:
—Yivelhavot, avaatsheelh natôôyshelh pa t'elhesh pa Dios ti t'acumelhyishi ti tsitôlhjatelh'atsham ca jaspa janfacle'lhem nava isis ya'clishayesh pa vatnilhjenjayash japi nijudiosa, jaspa nit'ujanesh japi lhech.*xe* 8Pa vooy pa Dios nitôfaclesh pava lhcachic pa tanôclitem ca natcuumjulh pa jaspa nijutem pa Espíritu Santo japi lhech yiey na casjunash.*xf* *xg* 9Pa Dios nive'lhaaesh ca nivenchat pa ca lhfanisheesh papi lhech caschi' shta, pa yiisiyan jayu shta pava lhcachic ca nitôôlhtajesha pa nilhcacujayasha. 10Pa nôqueesh, ¿ta t'e lhayaash ti lhavijatayanelhem pa lhfanisheshem pa Dios ti lhane'lhem cavôque napi nicacujanjasa nava caclec, ti tanca yalhecheelh tanca lhecha shta papi catsicchevot p'alha' ca isa'emjop ca nasnatesh cavôque? 11Lhan'e casvaatsha ca sht'ueshelha ca shtanilhjeneshelh ti catsits'ôt'esh pa lh'isiyasha'ne ja Lhcaanvacle Jesús pa lhech lhjunasha shta japi lhech. #15.7 Hch 10.1-43.,#15.8 Hch 10.44.,#15.8 Hch 2.4.
12Pa lhacôm'a ti nits'iseey ts'ivee pa tach'ansha ja Pablo shi' ja Bernabé ti tasinôyesh pava nimatasa papu ca nitô'yish shi' pava yinôôclhanitsha pa'na ti lhech lhfanisheshem pa Dios ti yieshi papi nijudiosa. 13C'oya ti yivaclhitesh ts'ivee ti tasinôyesh pa yit'esh ja Santiago:
—Yivelhavot, ach'anelhyi cum: 14Na Simón chayelhch'ejoom pa lhjunash pa Dios ti nich'a ve'lheesh ti tisesh papi nijudiosa, pa t'acumeyshijop shta japi lhech ca lhchifaseesh shta lhavaatsha. 15Côque yivooyjulh ca yi'sesh'e lhapesh papi chiytôyjata pava ti vaclan, yiey nan t'ônashesh nava Vani'sesh'e ti yit'esh:
16‘Ca ninôjtajeshch'e côque pa jatpec jayu
pa jachajeyc'oya jayu ca jasnatesh
ca yafalh lhajpôyich ca David;
pa jachajeshch'e jayu java yafalh'eshamsha'ne
pa jachajeyc'oya jayu ca janenjatchisham.
17Ca jaspa nivooysha'ne pap'elh
pa Lhcaanvacle
shi' lhacôm'a papi lhtachifas,
ca jaspa nivatvenchatesh na yey
18Pa lhech Lhcaanvacle shintôyjata
cavôque matas
nan t'aplhuqu'e java vatjutsa' nalhus
ti nijutjooy nava lhclishay.'#15.16-18 Am 9.11-12.
19“Lhe'naa ti jayeetshelh'a ti ya aj ca shtavijatayanelhem japi nijudiosa ti vômesh java apis lhfanishlhavach jaspa nôfiis pa Dios. 20Vo'ya jô ca sht'iisshem'e ts'ivee ca ya aj ca chinvanesh pava yidiosiyan ts'ivee, pa ya aj na papu ca namelhvane papi nilhjayasa, shi' ca ya aj ca nituj pa t'asjaan pava yaquisetes ti chinvoc'aclajsha'ne atesha shi' pava lhavoyey.*xi* *xj* *xk* 21Lhayaash pava lhech vatjutsa' nalhus caaj papi lhtachifas ti chinfacleem pava lhayôjijates pa Moisés, ti chiyetônemch'e ti yiey pava vatvanqu'eyjatsjanjavtes pava nalhus ti chit'ichayshi. #15.20 Ex 34.15-17.,#15.20 Lv 18.6-23.,#15.20 Lv 17.10-16.
Pa lhqu'isjayanach papi nijudiosa
22Japi vatcachenjas shi' papi nitaôvclasaesh shi' lhacôm'a papi ve'lheesham pa nilhcacujayasha vatculhesh ts'ivee ti vatvooyshi ts'ivee papi lhech pa yicheney ts'ivee pa Antioquía ja Pablo shi' ja Bernabé. Pa yetônjop shta ja Judas jan lheyesh shta Barsabás, nôquee ja Silas, japi lhech nivacle yashjatesh ts'ivee papi lhavelhavot. 23Papi lhech yichajchiyinesh ts'ivee pa lhqu'isjayanach, yit'esh:
“Yivaatsheelh, yivatcachenjaselh shi' napi nitaôvclasaesh avelhavot'elh avaatsheelh c'acjuelhey japi casvelhavot nijudiosa japin yie' ja Antioquía, shi' ja Siria nôquee ja Silicia. 24C'aya'shelh'ay japi tôlheelhyitsham ti yichelh'ay niyôjeelhajop, japi lhech navijatayanshelh java lhclishay ti nastanjateshelh'in, yit'eshelh'a ti tajulhey ca chinase'jelh clee shi' ca anc'ashamshelh java lhayôjijates pa Moisés. 25Lhe'naa ti tajulhelheyam ti yônasheshelh vatjulh ti jetônelhjop japi t'ajôôj jô tôlheelhyitsham pa jaspa nôquelh'ay ca navanelh avaatsheelh nôquee shta japi yenjas yivelhavot na Bernabé shi' na Pablo, 26napin ninajulhjatsham pa lhamônlhajayash ca nanjovaayjulh pa vatclôyitsjayash ti t'acumem'in ja Cascaanvacle Jesucristo. 27Nôque lhjunash ti jachenelh'ay na Judas shi' na Silas: napi lhech tasinôyelh'am jayu jô avaatsheelh pa jaspa ninôclitelhch'eam lhacôm'a côque. 28Eem ti yajulhjatey pa Espíritu Santo, pa yachi'elh shta, ca ya aj ca yinelh'am avaatsheelh pava tavijatay, vooy pava yaash ti chisuyeshi ca chinanfaclelh'am: 29Ca ya aj ca atujelh pa t'asjaan pava yaquisetes vatcufayjatesem pava chiydiosiyan; pa ya aj ca atujelh shta pava lhavoyey, pa ya aj na shta pa t'asjaan pava yaquisetes chinvoc'aclaj; pa ya aj na shta papu ca namelhvane papi nilhjayasa. Ca asnatajeshelhch'e cavôque pa avoyjateshelhch'e. Lhecheesh pa anshameshelh'avne.”
30Nôque lhjunash japi lhech ti ve'lheesh ti yichen t'ajuyey'in ja Antioquía. Pa lhech'e ti tayelhvane papi nicacujanjasa pa yijutey ts'ivee pa vatqu'isjayanach. 31Pa meelh ti yetônch'e papi lhtatvelhavot pa ujesh ti nishamsha ti chiyvômjatesh pa lhtacshinjayash. 32Lhan'e yitsha ja Judas shi' ja Silas yitô'ya pava nifaclem tôlhesha pa Dios, pa yishantesh papi lhech pa lhtacshinjayash pa ujesh ti yic'usinatesh'in papi lhavelhavot pava lhclishay. 33Pitoj'e clee ti lhech yie' ts'ivee, pa vaneecjueshelh papi lhavelhavot pa vatcanoyash pa jaspa vapecley'in papin lhech yichenshi. 34Lhan'e ja Silas pa nimônlhajayue pa lhech'e. 35Taj ti vooy ja Pablo shi' ja Bernabé pa mônlheelh'e pa Antioquía jap'elh acloj, pa lhetlha yicheshi ti yeyjatsjan ti nifaclem java lhclishay ja Lhcaanvacle.
Pa Pablo tôlhesh'e shta ti napu'esh ti t'ôta'yesh pa lhcumjayash ti vatcachenach'esh
36Pa vooy ti t'onshi' paelh nalhu, pa yiyôjaa ja Pablo ja Bernabé:
—Istaa ca shtajôchiey cum shta japi casvelhavot jant'ajô'jesh java yitsates jan yie' japi shtanfacle'lhem nava lhclishay ja Lhcaanvacle, pa shtavanelh pa lhjunash.
37Vooy ja Bernabé yeetajesh ca nôôychielh japi lhech ja Juan, jan lheyesh shta Marcos. 38Taj ti vooy ja Pablo ninteesh ca nôôychi, lhayaash ja Marcos ti yivôm'e ts'ivee yiey pa Panfilia pa nit'oyi'sheey ca nivoojqu'esha'ne japi lhech pa lhcumjayash. 39Pa neeeshch'e ti na'sheshvanôcji ts'ivee pa vacôtsônvatc'oya. Pa vooy ja Bernabé pa yôôychi ja Marcos pa yicheyshi ts'ivee pa Chipre. 40Vooy yitsha ja Pablo pa yijutlhavne ja Silas ca nitônôycheelhsha'ne. Vooy ti yich'in pa t'alhemey papi lhavelhavot ca mônlhaaesh pa lhencheyash pa Lhcaanvacle. 41Pa nashey pa Siria shi' pa Cilicia pa nishamitjatey papi lhavelhavot ve'lheelhsham pa nilhcacujayasha.
Currently Selected:
Hechos 15: NIVA
Highlight
Share
Copy
Want to have your highlights saved across all your devices? Sign up or sign in
Nivacle Bible © Sociedades Bíblicas Unidas, 1994.
