Hechos 5

Pa lhsasch'e pa Ananías shi' lhpa Safira

1Caaj pa ve'lha nivacle, lhey Ananías, pa lhech vatpeya'shelh lhpa lhch'acfa Safira ti tcashayeshelh pa lhcac'ovat. 2Pa lhech nivacle vatpeya'shelh ti mônlheesh pa pacham pa peso pa yicha'jey pa t'iya'esh japi vat'eyjatsjanjas. 3Pa yit'esha ja Pedro ti yiyôjaa:

—Ananías, ¿ta t'e lhayaash ti lhanshi' acachi' pa Satanás, pa jaspa acuts'ajeem pa Espíritu Santo ti amônlheesh pa pacham pa peso lhasha' pa acac'ovat? 4Natsôt'ajtajesh t'emma ti lhatcasha'yesh pa acac'ovat, pa natsôt'ajtajesh t'emma pa peso. ¿Ta t'e lhayaash ti lhavclanjat'atam côque? Tanca acuts'ajeem napi nivacle vooy pa Dios.

5C'oya ti yipe'ya côque pa Ananías, pa nicôôtsha'ne ti vaf. Pa lhacôm'a papi tpeeychayesh cavôque pa nijovaych'e jum. 6Pa lhechesh pa nam papi nich'acsha'ne pa yip'ooj'e pa sivôclôclhayeech pa yichaajfach'ee pa tishc'oya.

7Pa chinc'oya ti nam shta lhpa lhch'acfa ca Ananías, pa yuy'ôcji shta pa jpôyich, taj ti jôjjeclay nintô'ya pa lhjunash pa vaclan. 8Pa niyôs ja Pedro:

—Anfacyam cum, ¿yijô' ajalh ti lhet'ajôjqu'e ti lhatcashaayshelh pa acac'ovat'elh?

Lhpa lhech pa yit'esh:

—Jech, lhet'ajôjqu'e.

9Pa lhechesh pa yit'esha ja Pedro:

—¿Ta t'e lhayaash ti p'alha ti lhavatpeyashelh ti lhc'alhtanelhshi pa lh'Espíritu pa Lhcaanvacle? Napucôô julh napi yifos ca ach'acfa, pa nôqueesh pa nachaaj jayu vitsha.

10Pa tatsha ti nicôt'apee java lhafoc ja Pedro lhca Safira pa lhetlha yitshi ti vaf. Meelh ti nach'ôcji shta pa jpôyich papi nich'acsha'ne pa yivaneylhavc'oya ti vaf. Pa yichaajfach'ee shta pa yicha'jey pan chitish'ec'oya ca lhch'acfa pa ve'lha chiyinelh'e. 11Meelh ti tavanchayesh cavôque lhacôm'a papi ve'lheesham pa nilhcacujayasha shi' pant'ajôôj papi yaya'esh pava matas pa uj ti nijovayeshem.

Acloj pava lhasnôyjes shi' pava chinôclitesh pa'na

12Tô'lha japi vat'eyjatsjanjas ti acloj pava yivclanjat nimatasa papu ca nitô'yish shi' pava chinôclitesh pa'na yieshi papi nivacle; pa lhacôm'a ti tayesh'evane pa lhasnatsech pa Salomón. 13Nive'lhaa pap'elh ca nifiiyshem ca namelhvatsham japi lhech, taj ti papi nivacle uj ti yinvacleyanesha'ne japi lhech. 14Pa yaash papi yamey ti ninatcacujanesh pa Lhcaanvacle, pa acloj papi yitsjôy t'ajôôjjulh papi ôcjeclôy. 15Jô'tajesh papi aôytesvatsham'in ti chinchaajsham'in pava lhcaavjuc chiyipjôclônesh pava lhmôjôvtes, lhayaash ca naashtajop ja Pedro pa vo'ya pa lhajpec ca nitsavalh'apee ts'ivee pa ca naôvtaj'e papi lhech. 16Shi' shta papi tôlhey'in pav'elh yitsates pava nashch'e lhavôôj ja Jerusalén, pa nicha'jey'in papi acloj aôytes'in, shi' papi côccheyjesesh; pa lhacôm'a papi lhech ti chiyilhjensha'ne.

Papi vat'eyjatsjanjas ti chitanachanesh

17Pa lhechesh pa yijuctsenesh pa lhanvacleesh papi vatcasinôc shi' papi vatvenchat saduceos papin yi'shi' jô lhech. 18Pa t'acum'evatam ts'ivee japi vat'eyjatsjanjas pa yan'ôcji lhpa uj vatvanc'ôcfajayte. 19Taj ti vooy ti tulhey pa nacheyshicham pa ve'lha lh'ángel pa Lhcaanvacle, pa nic'at'ec'oya pa lhashiesh lhpa vatvanc'ôcfajayte pa yichaajfach'ee, pa yit'esha:

20“Meelhey jan yie' ja vatishjanjavat pa anfaclelhem napi nivacle nava ya'clishayesh na nich'a vatmônlhajayash.”#5.20 Jn 11.25; 14.6; Ro 6.4.

21Pa yajulhjatey cavôque ti yipe'ya ts'ivee, pa vooy ti nalhu ti nich'a nalhu pa yich'ôcji ts'ivee ja vatishjanjavat, pa lhech tôlhesh'e ti vanqu'eyjatsjan ts'ivee.

Pa lhan'e vitsha pa uj lhanvacleesh papi vatcasinôc shi' pant'ajôôj papi lhcavosesh nôquee papi nitaôvclasaesh lhchifas na Israel pa tc'aelhvane, pa vancachenjaney japi vat'eyjatsjanjas yiey lhpa vatvanc'ôcfajayte. 22Taj ti meelh ti yamtajey lhpa vatvanc'ôcfajayte papi cafoquelhay, pa ampapu ca ni'van; pa vapecl'in ts'ivee pa nifac pa lhjunash, 23pa yit'esh ts'ivee:

—Pa meelh ti jamelhey lhja vatvanc'ôcfajayte pa javanelh ti yijôt'ajey jum ja lhashi, shi' japi lhashi lhavos mônlhatajop ts'ivee; pa meelh ti janc'aatajelhey ja lhashi pa ampapu ca yivanelh ca nôv'ôcji.

24Pa meelh ti tpeeycheyesh pa lhanvacleesh papi vatcasinôc shi' papi yiclôvalhchiyinesh pa vatishjanjavat, nôquee papi chiyinvacliyanesh papi vatcasinôc, pa taniyôsesh ts'ivee: ¿Ta t'e ca nôj'e' lhacôm'a cavôque? 25Pa nivinshaa ti nam pa ve'lha pa yit'esh:

Japi nivacle lhantajelh'ôcji lhja vatvanc'ôcfajayte, yi'ôcji lhôn ja vatishjanjavat ti yeyjatsjan japi nivacle.

26Pa vooy pa lhanvacleesh papi cafoquelhay yaôychi papi lhcavos pa vooysha'ne pan yie' pa yichaaj ts'ivee, taj ti ninteesh pa ca lhfanisheesh, lhayaash ti nijovayeshjulh papi nivacle ca nôôtjatesh'in pava utes. 27Pa lhechesh pa yamjateyshi pan yie' papi lhcaanvacles, pa yit'esha pa lhanvacleesh papi vatcasinôc:

28C'acônitshieshelh aven'na ca lhech ôjeshelh'e ti lhavanqu'eyjatsjaneshelh côque vatey. ¿Taj ti ta afanishelh'avach? Nôqueesh pa lhamjatelhey lhac'o' lhacôm'a na Jerusalén cava lhavanqu'eyjatsjaneshelh, tam'ey ti lhentajelh ca anfaatjatelhyam pa lhtinclôncheyash cô lhech nivacle.#5.28 Mt 27.25.

29Pa lhechesh pa yicuulh ja Pedro shi' jap'elh vat'eyjatsjanjas pa yit'esha:

—C'ashjatelh apee pa Dios ti tsiqu'ishamelhem a'lheesh napi nivacle. 30Vooy pa lh'Dios papi catsicchevot p'alha yinenjatchisham ja Jesús, lhech lhavaatsha jô lhech lhclônelh pa lhneshelh lhja cruz. 31Jô lhech yinenjatchisham ti yiney lhfayish pa Dios, pa lhe'naa ca Nanvacleyan shi' ti Lhavqu'ilhjenajesh, eem ti yijuteyjop napi Israel lhavos pa lhtatvaych'aclajayashesh pa lhjunash shi' ca chinvômjatemch'e pava lhsasch'esha'ne. 32Cavôque ts'ôôclhaeshelha ti javanchayeshelh shi' shta pa Espíritu Santo, pa lhech yijutey pa Dios pa yie' papu niqu'ishamem.

33Meelh ti yipe'yach'e cavôque pa yisuyinatvatsham'in ts'ivee, pa yen ca niclônsha'ne. 34Pa lhechesh pa nitshaam pa ve'lha fariseo yi'shi' papi lhech tay'evane caanvacles, pa lhech lhey Gamaliel, vanqu'eyjatsjanesh pava lhfanishlhavach. Pa lhech tanch'anjayesh pa lhcliish. Pa lhech vatsavat pa tayôjijanesh ca chinchaajfach'ee cum japi vat'eyjatsjanjas. 35Pa nijooylhach'e ti yit'esha papi lhcaanvacles:

—Vacjayijes, Israel avoselh, anujumatseneshelh avach pa ca afanishtajeeshelh napuque nivacle. 36Aychavalhelhch'e ja t'elhesh ti nitshaam ca Teudas ti yeetajeshlhavne ca na'shesh pa ca lhjunasha, ti lhts'avootajesh papi cuatro cientos nivacle. Taj ti chiyiclôn pa lhech, shi' papi lhts'avootajesh vacôtsônvatc'oya pa shan ti nôj'e' papi lhech. 37Pa nijooylhach'e shta pava nalhus ti chiyitsjuulh lhacôm'a papi nivacle, pa caaj shta pa ve'lha Judas, tôlh'e' ja Galilea. Pa lhech t'aplhuqu'e ti nayjatvane papi acloj lhcavos. Pa lhech mônlheesh jô ti chiyiclôn shta, pa vooy papi lhcavostajesh vacôtsôn'in. 38Pa lhe'naa ti janfaclelh'am cavôque ca an'ateelh napuque nivacle. Lhayaash ca nitôôlhtaja napuque nivacle nava lhfanishlhavach pa nivôômji jayu; 39jô pa ca nitôôlhtaja pa Dios navôque, pa sasjop jayu ca avômjatelhshi. Anujumatsenelh'avach; pa jaspa tanca anjuyjayeelhjulh pa Dios. Cavôque lhacôm'a ti ve'lhansham pa t'ônashjop ts'ivee.

40Pa lhechesh pa chitôney japi vat'eyjatsjanjas pa chiyc'ônsha'ne pa nifaclem shta ti ya aj ca t'ôyisheey ca nasinôqui na lhey na Jesús. Pa nijooylha pa yichenfach'ee ts'ivee. 41Japi vat'eyjatsjanjas tayeyshi papi lhcaanvacles, pa uj ti nishamesh ts'ivee, lhayaash pa Dios ti yivashanem ti chiyclôyit'apee ts'ivee pa lhey ja Jesús. 42Pa lhacôm'a pava nalhus ti ninvô'meshjop ti vanqu'eyjatsjanesh pava isisch'e lhfacjes ja Jesús ti yiey ja vatishjanjavat lhjunashjulh shta ti yiey pava jpôyjey.

Currently Selected:

Hechos 5: NIVA

Highlight

Copy