Hechos 4

Pa Pedro shi' pa Juan ti yie' t'ajuyish papi lhcaanvacles

1Jôjjeclay mônlheesh ti tasinôyem'in papi nivacle ja Pedro shi' ja Juan, pa lhechesh pa namelhey'in papi vatcasinôc pa lhanvacleesh pa vatishjanjavat shi' papi saduceos. 2Papi lhech yisuyinat ts'ivee ti yipe'yeesh ja Pedro shi' ja Juan ti yeyjatasjan papi nivacle ti nifaclem pa lhneetshamjayash capi vafsha'ne, ti apis ti netshaam ja Jesús. 3Pa t'acum'evatam ts'ivee japi lhech pa yicha'jey lhpa vatvanc'ôcfajayte ti yan'ôcji pa yamjey ti nalhu shta. 4Taj ti acloj papi tach'ansha pa ya'clish pa nincacuesh; pa t'ajôôj papi nicacujanjasa, ti chiyitsjuulh tsi'sha papi yitsjôy, pa yameyshi cinco mil.

5Vooy ti nalhu pa tayshelh'evane ja Jerusalén papi lhanvaclesesh papi judíos, papi nitaôvclasa lhanvacles nôquee shta papi vanqu'eyjatsjanesh pava lhfanishlhavach. 6Pa lhech yie' shta pa uj lhanvacle papi vatcasinôc lhey Anás. Pa nam shta pap'elh lhanvaclesesh papi vatcasinôc, pa Caifas, pa Juan, pa Alejandro, pa shi' shta lhacôm'a papi ve'lheelhsham pat'ajôôjam papi lhanvaclesesh papi vatcasinôc. 7Pa tayôjijanesh ti chinchajey ja Pedro shi' ja Juan, pa yivatsavatjatshi lhcachivat ts'ivee pa niyôs'in:

—¿She t'e papi t'unaj ja't'ajesha pa lhey ti lhchenshelh ti lhech afanisheshelh cavôque?

8Lhan'e ja Pedro, pa yamqu'een pa Espíritu Santo, pa yit'esha:

—Lhanvacleselh'ash napi achifaselh jô'tajesh ti niataôvclasaelhc'oya: 9avaatsheelh lhtsiôseshelh'in jum ja lhanfanash ja aôytej'in ca jaspa natô'yelha jô lhech ti vatsjan. 10Nôqueesh c'atôyjatelha jayu ca jaspa nitô'ya lhacôm'a napi lhchifas na Israel, jô lhech nivacle nôque yie' ti yielh'e ajuyishelh alhacôm'aelh ti yivatsjanchat na lhey ja Jesucristo Nazaret lhavo', jô lhech lhneshelh lhja cruz, jan yinenjatchishamshi capi vafsha'ne pa Dios. 11Jô lhech Jesús utejesh lhavaatsha, lhan'e avaatsheelh pa lhapunelh jpôyjey avoselh. Lhech jô lhech nôqueesh yiey t'afcato' pa jpôyich.*xy* 12Ampa caelhchaa ca nicaaj pa lhqu'ilhjenjayash, lhayaash pa Dios tanca nanjutjooy paelh vatey ca jaspa isa'jop ca shinalhjensha'ne.#4.11 Sal 118.22.,#4.12 Jn 14.6.

13Meelh ti yivanesh papi lhcaanvacles ti yifi'yesh pava tasinôyesh ja Pedro shi' ja Juan, pa tamp'oyeshem ts'ivee papi lhech, lhayaash ti yitô'ya ti niujaesh ca chineyjatsjan japi lhech, jô'tajesh ti yitô'ya ts'ivee ti lhech ti t'eyjatsjanjasesh ja Jesús. 14Jô'tajesh ti yi'shi' ts'ivee pa lhech chiyvatsjanchat, pa lhe'naa ti sasemjop pa ca niteetsha ca natjuyjulh. 15Pa lhechesh pa tayôjijanesh ca nayjatlhavcop ts'ivee. Pa vatsi'shanatjop ts'ivee ti yasinôqui. 16Pa yit'eshvatsham'in:

—¿Ta t'e ca casfanisheesh japuque nivacle? Lhayaash ti caaj cava yivclanjat ts'ivee nimatasa papu ca nitô'yish, cavôque yitôôysha lhacôm'a napi tsitenasshi na Jerusalén, pa sasjop ca shtatanchatesh casvaatsha. 17Jô'lhaa taney ti shtat'esha ca shtanjovatsjan'apee ca ya aj ca t'ôyisheey ca nasinôquic'oya ca lhech vatey, teya ca namqu'een nava yitsates ca chintôya'.

18Tifeshch'e atesha cavôque pa t'a'lhey shta japi lhech vat'eyjatsjanjas ca napecleyshi. Pa yit'esha ca ya aj ca t'ôyisheey ca nivanqu'eyjatsjanesh na lhey ja Jesús. 19Pa lhechesh pa yit'esha ti yicuulh ja Pedro shi' ja Juan:

—Lhaychavalhtajelhey ca nitajulhe'mey pa Dios ca naash ca yueshelh'a ca yi'alhinatshelh pa Dios. 20Yivaatsheelh saselhjopyam ca vômeshelhjop ti jasinôquielh cava javanelh shi' cava jape'yeelh.

21Pa lhechesh papi lhech lhcaanvacles nijovatsjan, taj ti yivashan ti yich'in. Pa ninvanjop pa ca lhfanisheesh ca nivalha ts'ivee, lhayaash ti nijovayeshjulh papi nivacle, tôlh'ejop ti lhacôm'a ti yôclôjey pa Dios, lhayaash ti yi'van pava vaclan. 22Pa lhech nivacle chiyvatsjanchatesh pava nimatasa papu ca nitô'yish palha t'ônshi' pava cuarenta lhnincôpes.

Papi nicacujanjasa t'a'lha pa lhniyitsjayash jaspa nifiiy

23Meelh ti chinuqueesh ja Pedro shi' ja Juan pa yichey jap'elh lhô'yôvôt pa tayelhvane pa chayeshlhatch'e lhacôm'a pava t'ônashaan papi vatcasinôc lhanvacles shi' papi nitaôvclasa lhanvaclesesh. 24Tifeshch'e ti tach'aneshvane cavôque pa t'a'lheyvatjuulh pa Dios, pa yit'esh ts'ivee: “Lhcaanvacle, avaatsha lhasnatesh pa vôôs, na cotsjaat, na uj tovôc shi' shta lhacôm'a nava caaj.*xa* 25Avaatsha, lhtôlhjata pa Espíritu Santo ti lhanshi' lhashi pa acavo David ti lhteetsha: #4.24 Ex 20.11; Neh 9.6; Sal 146.6.

“¿Ta t'e lhayaash ti tavacôyvatsham'in

papi ninantôfa'clesh pa Dios,

pa vooy papi lhtachifas yiey na cotsjaat

cha'lheesh pava yaychavalhtajey?

26Papi lhcaanvaclesesh'e na cotsjaat

shi' papi tanch'anjayesh papi lhanvacles

pa ve'lha t'ôs'ejop ti t'ajuyjulh

pa Lhcaanvacle shi' pa Chivo'tajemeyshi Lhavqu'ilhjenaj.'#4.25-26 Sal 2.1-2.

27Yijô' ja Herodes shi' ja Poncio Pilato ti tc'ashelh'evane nôque yitsaat japi nijudiosa shi' japi Israel lhavos ti t'ajuyjulh ja issha'ne Aôs Jesús, jan lhatcumeyshi ti Lhavqu'ilhjenajesh.*xc* *xd* *xe* 28Lhech japi lhech yôfisjatch'e lhacôm'a pava lhtatômjalhesh ti lhanfac pan t'elhesh pavan vaclan jayu. 29Vooy nôqueesh, Lhcaanvacle, anovalheshelhyiy na lhafjunchayashelhyi, pa ajutem napi acavos pa t'unaj ca jaspa ya aj ca nitats'ufiyeshlhtapee cava asinôc ca nifactaj'in. 30Anajayeshicham pa unaj pa jaspa nivatsjanchat papi aôytes'in, pa asnatesh shta pava nimatasa papu ca nitô'yish, nitô'lhajop na lhey ja issha'ne Acavo Jesús.” #4.27 Lc 23.7-11.,#4.27 Mt 27.1-2; Mr 15.1; Lc 23.1; Jn 18.28-29.,#4.27 Is 52.13; Fil 2.7.

31Meelh ti tifeshch'e ts'ivee ti t'aalh, pa yalhalha ti nayuuynayuych'e na cotsjaat pan tay'evane ts'ivee; pa lhechesh pa yamqu'een ts'ivee pa Espíritu Santo, pa yifi'yeshlhtapee ti nifac cava Dios lhasinôc.

Lhacôm'a pava matas ti yitsôt'ajeshvatam

32Lhacôm'a papi nicacujanjasa ve'lhasham pa lhaychavalhjayash pa ve'lhasham shta pa lhfanishlhavach. Pa ampapu ca ve'lhaa ca niteetsha ca nivôôttsôtjatesh pa'na, pa yit'esha ti lhacôm'a pava matas ti yitsôt'ajesh vatam.*xf* 33Pa lhech t'aplhuqu'e ti yifi'yeshlhtapee japi vat'eyjatsjanjas ti tanôôclhaniteshlhavne ts'ivee pa lhneetshamjayash ja Lhcaanvacle Jesús, vooy pa Dios uj ti yefenesh lhacôm'a. 34Ampapu ca ve'lhaa ca suyeeshi pa'na, lhayaash ti lhacôm'a ti caajem pava lhcootsjativshay shi' pava lhajpôyjey pa tcashayesh'in, 35pa nicha'jey pava lhpesoc pa yijutey'in papi vat'eyjatsjanjas, ca jaspa nicatsônjatesh'in lhacôm'a papi caaj pava suyeshi. 36Nan lhjunash pa José, pan lhqueyesh shta japi vat'eyjatsjanjas Bernabé (nôque yich'e' “Lhaôs pa Vancashanat”), pa lhech levita nivat'aj'e pa yichjop'in pa tovôc lhey Chipre. 37Pa lhech nivacle tcashayesh pa lhcac'ovat, pa yicha'jey pava lhpesoc japi vat'eyjatsjanjas. #4.32 Hch 2.44-45.

Currently Selected:

Hechos 4: NIVA

Highlight

Copy