Mâki 3

Nalôŋ yée saá mai

(Maafîu 12:9-14; Lûu 6:6-11)

1Zîsɛ è lɔ̀ ŋɔ́nɔ Zûu-ŋai díkɔyâŋ too kwaai ma. Nalôŋ yée saá ma tɔnɔ è kɛ̀ naa. 2Ǹûai dí kɛ̀ m̀aa kpɛɛ̂i a gɛ́ɛ dí gáa à kɛ̀ a pâi ǹalôŋ ƃâloi a Vii-tɔɔ-ɣelei. 3Zîsɛ mò ǹalôŋ yée saá m̀ai ma, “Pá í tɔ́ɔ ƃɛ́.” 4E dímarê kɛ̀ ǹyɛɛ dîai, “Nênɛ ƃé gáa dɔ̂ŋ lá-wooi mai, a gɛ́ɛ núu é mɛni lɛ́lɛɛ kɛ́ a Vii-tɔɔ-ɣelei, kpaa é mɛni nyɔ́mɔɔ kɛ́, é núu ƃálo kpaa é núu páa?” Kɛ́lɛ, dífe ŋ̀óo su tòo ní. 5È kɛ̀ díkâai a lii-ŋwana pere. Ǹíi è kɛ̀ solîi díwoli-kpɔlɔ̂i mɛnii ma. Nya ƃe è m̀o ǹalôŋ ma ǹyɛɛi, “Íyee sã́a.” E ǹyée sã̀a é gáa a gɛ́ɛ a ƃálo. 6Faresii-ŋai dí kùla ŋini ŋá, dí díŋuŋ pîlaŋ a maa félaa da Ɛɛlɔ pôlu-ƃelai-ní a gɛ́ɛ dí bàa pere kɔ́ri.

Kpɔŋ támaa dí pà Zîsɛ kɔlɛ

7Zîsɛ è tɔ̀ɔ ŋɔpôlu-ƃelai túɛ da dia ní dí lí yúo-loŋ kɔlɛ. Kpɔŋ támaa su-ƃela dí pìlaŋ bôlu. Ǹûai ŋí da-ŋa dí kùla Galalii, Zuda da 8Zerusâlɛŋ. Da-ŋa dí kùla Idumia da Zɔdiŋ Ya-leei ma vóloi kulâi-pere gwaa kélee. Da-ŋa dí kùla máŋ Taya taa-lee-ŋai ma lɔii-kpiniŋ-ŋai ma da Sidɔŋ. Gbɔŋ kɛ́tɛi ŋí su-ƃela dí mɛnii kélee mɛ̀ni Zîsɛ e gɛ̀i, dí pà bɔ́. 9Nya ƃe Zîsɛ è mò ŋɔpôlu-ƃelai dîa a gɛ́ɛ dí yá-ŋá keleŋ kɔ́ri mi a gɛ́ɛ é tɛ́ zu gbɔŋ su-ƃelai dí kpéra fũa-fũaa tɔɔ̂i ma. 10Zîsɛ kɛ́ɛ a nûa támaa ƃâloi, kɔlɔ-fela nuu da è pà é gbera fé gɛɛ nɔ́ é ǹyée pɛ́lɛ mà. 11Ǹyînaŋ nyɔ́mɔɔ-ŋai da kâa Zîsɛ kàa nɔ́ dí tóo gɔ́ɔ mu díkɛ làɣi, dîyɛ mai, “Yá ƃa Ɣâla Ǹóŋ.” 12Kɛ́lɛ, è dília-woo ƃò a gbanaŋɔɔ a gɛ́ɛ dífe m̀o núu ma ǹúui ǹyaa Zîsɛ gáa lai.

Zîsɛ è ŋɔpôlu-ƃela puu kao feerɛi sìɣe

(Maafîu 10:1-4; Lûu 6:12-16)

13Zîsɛ è ŋɔpôlu-ƃelai da-ŋa marê kɛ̀ a gɛ́ɛ da dia ní dí tɛ́ ǹyéei su. Ǹyaŋ dí fàa da dia ní dí lí 14Nya ƃe ǹûai ŋí buu kao feerɛ sìɣe zu (é dísee a ŋɔsia-ƃelai) a gɛ́ɛ dí kɛ́ bôlu, a gɛ́ɛ gɛ́ dítɛ̀ɛ Ɣâla-woo ƃôi 15È wála-wala-laa tɛ̀ɛ dípɔ máŋ a gɛ́ɛ díkɛ nyînaŋ nyɔ́mɔɔ-ŋa kpɛ̀ nûa pôlu. 16Ǹúu puu kao feerɛi è dísiɣei dílaa ká ŋí: Samaŋ nyíi è ǹáa sèe a Pitɛi, 17Zɛƃɛdi ǹóŋ Zĩi da Zɔ̂ŋ. È dílaa sèe a Boanizɛ. Boanizɛ laai ŋí su-kulâi ƃa ŋ̀ele-gbana-lonii Ibulu-wooi su, 18Aŋdulu, Fele, Batâlomio, Maafîu, Tama, Afîa ǹóŋ Zĩi, Tâadia, Samaŋ nyii kɛ̀ a ŋɔlɔii wɛ́liɛɛi da 19Zudasi Sekaria. Zudasi Sekaria ƃé kùla Zîsɛ pôlu.

Zîsɛ da Bɛɛziƃɔ

(Maafîu 12:22-32; Lûu 11:14-23; 12:10)

20Nya ƃe Zîsɛ è lì bɔ́-naa. Gɛ́ɛ naai, kpɔŋ è ŋɔ́nɔ ŋ̀á tɛ̀ ma gɔlɛ ma. Gbɔŋ ŋí su-ƃelai tâma pere è gɛ̀ Zîsɛ da ŋɔpôlu-ƃelai dífe kpîŋ máŋ pɔ̂ri ní dílaa miî. 21Ŋɔnûai kɛ́ɛ da m̀ɛnii mɛni è kɛ̀ gɛ̂i, díkɛ̀ gâai yɛ̂ɛ ŋ̀uŋ su a kɛ́ ma. Ǹya ƃé dí sìɣe dípɔ-taai dí lí a gɛ́ɛ dí gula naa. 22Dɔ̂ŋ lɛ́-ƃelai da-ŋa dí kùla Zerusâlɛŋ dí pá naa. Dia máŋ díkɛ̀ m̀ôi, dîyɛɛi, “Ǹyînaŋ nyɔ́mɔɔ-ŋai díkâloŋ Bɛɛziƃɔ káa bôlu. Ǹyaa ƃa wála-wala tɛ̀ɛ bɔ́ nyînaŋ nyɔ́mɔɔ-ŋa kpɛ́ mɛni ma.” 23Zîsɛ è dítòli pôlu é dímarê kɛ́ mɛni kɔɔŋ maa pere su ǹyɛɛ dîai, “Sêtɔŋ a Sêtɔŋ kpɛ̀ pere kɛ̀ léŋ? 24À kɛ̀ lɔii-ŋuŋ da su-ƃela da díŋaa kɔ̀lɛ díkpulu ma dítɔɔ díkîe ní dîa maa lɔii-ŋuŋ a tòo. 25À kɛ̀ káa-laa tɔnɔ su-ƃela da díŋaa kɔ̀lɛ dítɔɔ díkîe ní dîa gaa-laai kpîŋ fa ƃûu ƃò. 26À kɛ̀ Sêtɔŋ ŋɔkâloŋ-laai su-ƃela da tɔ̀ɔ díkîe ní dîa da tòo. Díwala-wala-laai kpɛɛ ŋá nɔ́ ká tí a kɛ̀.

27“Núu da fa pɔ̂ri wála-wala nuu da ŋɔpɛ́rɛ wôloi é m̀u sãâi síɣe, fɛ̂ɛ nɔ́ a fúlɔi é ŋ̀wála-walai nuui ɣíri, gɛ̀ ní, a pɔ̂ri ŋɔpɛ́rɛi wôloi é m̀u sãai siɣe.

28“Tɔ̃yâ ma, ŋá m̀ó kâa, zɔnyɔ̂ŋ-ŋai kélee núu-kpune a gɛ̀i kpaa máŋ dɛ-ŋɛi-ŋai zu-mɛni a pɔ̂ri lɛɛ̂i m̀ɛni mà. 29Kɛ́lɛ, núu da à mɛni nyɔ́mɔɔ da ƃò a M̀ɔlêŋ Maa Waai láa kpaa máŋ é tɛ-ŋɛi kɛ́ la, maa nuui su-mɛni fa wɔ́lɔ lɛɛ. Zɔnyɔ̂ŋ ŋí káa a wɔlɔ-wɔlɔ da wɔlɔ-wɔlɔ sɔnyɔ̂ŋ.” 30Zîsɛ è m̀ɛni ŋí ƃò, kpɛ́ni fêi, nûa da-ŋa dí kɛ̀ m̀ôi dîyɛɛi, “Nyînaŋ nyɔ́mɔɔ káa ǹyaa Zîsɛ bôlu.”

Zîsɛ ǹeɣê-ni é pɛ́lɛ dílee ma

(Maafîu 12:46-50; Lûu 8:19-21)

31Zîsɛ ǹêɣe-ní da dílee ní dí pà dí ƃo tɔɔ̂ni bɛ́rɛi lá. Dí kéla tɛ̀ɛ a gɛ́ɛ é m̀ó Zîsɛ ma a gɛ́ɛ da ŋ̀wɛ̂lii dí gáa. 32Kpɔŋ è kɛ̀ a dínaŋɔɔ Zîsɛ ma. Ǹûai dí m̀ó m̀a dîɛi, “Ílee da ílêɣe-ní da tɔɔ̂ni bɛ́rɛi lá, da ŋ̀wɛ̂lii dí lóno ípɔ.” 33E díwoo su tòo a marê kɛ̂ɛ ǹyɛɛ dîai, “Gbɛ̂ɛ ƃa ńee da ńêɣe-níi?” 34E ŋ̀ɛ́i pìlaŋ ǹûai dîa kɛ̀ seêni gɔlɛ mai, ǹyɛɛ dîai, “Ǹûai ŋí ƃé díkaa a ńee da ńêɣe-ni! 35Ǹúui a Ɣâla nîa-mɛni kɛ̀i ǹyaa ƃé gáa a ńêɣe-surɔŋ, ńêɣe-nɛni kpaa máŋ ńee.”

Currently Selected:

Mâki 3: KWB

Highlight

Copy