Mâki 2

Zîsɛ e mɛ̃lɛ-mɛ̃lɛŋ-nuu ƃàlo

1Ɣele kûu kpɛ́-kpɛ̂ɛ tɛ̂ɛ pôlu ma, Zîsɛ è pà pôlu Kapɔ̂nia. Ǹûai dí mɛ̀ni a gɛ́ɛ a pá pôlu bɔ́-taâi. 2Núu támaa dí díŋa tɛ̀ ma naa. Núu tɔnɔ kpîŋ lɔ̂i fé kɛ́ ní ŋɔ́nɔ bɛ́rɛi mu kpaa bɛ́rɛi lá pere. Nya ƃe Zîsɛ è Ɣâla-woo ƃò naa ǹûai dîa. 3Gɛ́ɛ ɣâla-woo ƃôi núu náaŋ dí pà bɛ́rɛi lá mɛ̃lɛ-mɛ̃lɛŋ naloŋ tɔnɔ kɛ́ ƃò díyêei gára su. 4Kɛ́lɛ pere fé kɛ́ ní naa a gɛ́ɛ dí lɔ́ bɛ́rɛi mu. Nya ƃe dí lóa tèe bɛ́rɛi tôŋ su Zîsɛ ŋ̀uŋ mɛi dí mɛ̃lɛ-mɛ̃lɛŋ naloŋ yéŋ a gárai ma. 5Zîsɛ kɛ́ɛ a dílaa-lai káai, è mò mɛ̃lɛ-mɛ̃lɛŋ ǹalôŋ ma ǹyɛɛi, “Ńoŋ, ŋa ísu-mɛni lɛɛ zɔnyɔ̂ŋ-ŋai yâ gɛ̀i m̀ɛni ma.” 6Dɔ̂ŋ lɛ́-ƃelai kɛ̀ naai dí kɛ̀ m̀ôi dílii su pere dîyɛɛi, 7“Lé ƃé ǹalôŋ ŋí a lônoi la tíi? A tɛ-ŋɛi kɛ̂i! Gbɛ̂ɛ ƃa pɔ̂ri su-mɛni lɛɛ kɛ̂i é kúla Ɣâla pôlui?” 8Zîsɛ è gɔ́lɔŋ a maa félaa a gɛ́ɛ dí kɛ̀ m̀arê kɛ̂i ŋí kɛ̂i dílii su. Nya ƃe è dímarê kɛ̀ ǹyɛɛ dîai, “Lé mɛni ƃé ka m̀ôi kálii sui? 9Nênɛ ƃé gɛ́-la nɛ̃ɛ̂i, a gɛ́ɛ ŋá m̀ó mɛ̃lɛ-mɛ̃lɛŋ naloŋ ŋí ma, ‘Ŋa ísu-mɛni lɛɛ,’ kpaa máŋ, ‘Ímu siɣe í ígarai síɣe lí ípɔ-taa’? 10Ŋa pâi ǹɛ̂i kâa a gɛ́ɛ ńyãa, Núu-kpune Ǹóŋ, wála-wala-laa káa ńyêei nûa su-mɛni lɛɛ mɛni ma ǹɔii ma ƃɛ́.” Nya ƃe è mò mɛ̃lɛ-mɛ̃lɛŋ naloŋ ma, 11“Ŋá m̀ó yâ, ímu siɣe í ígarai síɣe í lí ípɔ naa.” 12Nya ƃe ǹaloŋ è m̀u sìɣe a maa félaa díkelee díŋɛi é ŋɔgárai síɣe é lí. M̀ɛnii ŋí è dípɛlɛ pù, dí Ɣâla ŋɔfólo-laai maa tɛ, dîyɛɛi, “Kúfe nîi m̀ɛnii ŋí da naa káa ní!”

Zîsɛ è Liiva tòli

(Maafîu 9:9-13; Lûu 5:27-32)

13Zîsɛ è lì ŋɔ́nɔ pôlu Galalii Poai kɔlɛ. Kpɔŋ kɛ́tɛ è pà bɔ́ é pɛ́lɛ sɛŋ lɛ̂i dîa. 14Gɛ́ɛ tɛɛ̂i ǹaa kɔlɛ mai, è Afîa ǹóŋ Liiva kàa seêni ŋuŋ-fela-fei kula pɛrɛi lá. Zîsɛ è mò mà, “Pîlaŋ ḿbôlu.” È m̀u sìɣe è pîlaŋ bôlu.

15Gbínii tí, Liiva è ƃɛlɛ toli ƃò a Zîsɛ da ŋɔpôlu-ƃelai ŋɔpɛ́rɛi lá a gɛ́ɛ dí dílaa míi. Ŋuŋ-fela-fei kula-ƃela támaa da sɔnyɔ̂ŋ-ƃela dí kɛ̀ seêni Zîsɛ kɔlɛ da ŋɔpôlu-ƃelai. Dítama ɣele dí pìlaŋ Zîsɛ pôlu. 16Dɔ̂ŋ lɛ́-ƃelai dí kɛ̀ naa. Dɔ̂ŋ lɛ́-ƃelai ŋí díkɛ̀ a Faresii-ŋa. Dí gàa Zîsɛ, ŋ̀uŋ fela-fe kula-ƃelai da zɔnyɔ̂ŋ-ƃelai ŋí ní díkɛ̀ dílaa miî gîe. Nya ƃe dí Zîsɛ ŋɔpôlu-ƃelai marê kɛ̀ dîɛ dîai, “Lé mɛni ƃé Zîsɛ, ŋuŋ-fela-fei kula-ƃelai da zɔnyɔ̂ŋ-ƃelai ní da dílaa mìi díkɛ díkpele gîe mai?” 17Zîsɛ è m̀ɛni é m̀o dîa ǹyɛɛi, “Diai díkɔlɔ̂i ponoɔɔ̂i dífa sále kɛ́-nuu kɔ̀ri. Kɔlɔ-fela ƃela nɔ́ ƃa sále kɛ́-nuu kɔ̀ri. Fé pá ní a gɛ́ɛ ŋá tɔ̃yâ-ƃela tóli, fɛ̂ɛ sɔnyɔ̂ŋ-ƃela.”

M̀are-kɛ̂i bîlaŋɔɔi suŋ siɣe mɛni mai

(Maafîu 9:14-17; Lûu 5:33-39)

18Zɔ̂ŋ ŋɔpôlu-ƃelai da Faresii-ŋai dí kɛ̀ suŋ siɣêi. Nya ƃe nûa da-ŋa dí pà Zîsɛ pɔ́ dí m̀arê kɛ́ dîyɛ mai, “Lé ƃé Zɔ̂ŋ ŋɔpôlu-ƃelai da Faresii-ŋai dípôlu-ƃelai da suŋ siɣêi la? Kɛ́lɛ, ípôlu-ƃelai dífa pîli suŋ siɣei?” 19Zîsɛ è díwoo su tòo a marê kɛ̂ɛ ǹyɛɛ dîai, “À kɛ̀ nɛnî-kula surɔŋ à kɛ̀ nɛnî kula kûui su, nɛnî-kula kuui su-ƃelai da píli suŋ su? Ǹɛnî-kula surɔŋ à kɛ̀ naa, va kɛ̀ tí. 20Ɣele da a pâi pâi da pâi nɛnî-kula surɔŋ kulâi díyêei. Maa ɣelei ti ƃé da pâi pilîi la suŋ su. 21Núu fa seɣe pɔ̂lɔ pɛ́ŋ pɛ̀lɛ a seɣe nína. À kɛ̀ tí, zeɣe nína kpuai a zeɣe pɔ̂lɔi fàla ǹóai su é kɛ́tɛ. 22Núu fa ŋwã̂ai nina pù sua-kɔlɔ-gonoŋ pɔlɔ-ŋa su. À kɛ̀ à gɛ̀ tí, ŋwã̂ai nínai a pâi zua-kɔlɔ-gonoŋ pɔlɔ-ŋai ƃɔ́i ŋwã̂ai é pú, zua-kɔlɔ gonoŋ-ŋai dí kara. Kɛ́lɛ, da ŋwã̂ai nína pù sua-kɔlɔ-gonoŋ nína-ŋa su.”

Vii-tɔɔ-ɣelei maa mɛni

(Maafîu 12:1-8; Lûu 6:1-5)

23Vii-tɔɔ-ɣele dɔnɔ Zîsɛ è kɛ̀ tɛɛ̂i wîi kpâlaŋ da ŋá da ŋɔpôlu-ƃelai. Díkɛɛ tɛɛ̂i naai ŋɔpôlu-ƃelai dí pɛ̀lɛ wîi ƃai da kulâi ŋ̀á. 24Nya ƃe Faresii-ŋai dí mò Zîsɛ ma dîyɛɛi, “Gáa, m̀ɛnii ŋí ípôlu-ƃelai da gɛ̂i dɔɔ̂i dɔ̂ŋ ma. M̀aa fé ǹɛ̃ɛ ní dí gɛ̀ tí a Vii-tɔɔ-ɣelei.” 25Nya ƃe Zîsɛ è díwoo su tòo ǹyɛɛ dîai, “Káfe tá m̀ɛni pɔ̂lɔi ŋí lóno ní Ŋ̀âla-kɔlɔi su é pîlaŋ Deeƃé ma? Da ǹyée mu-ƃelai puru è dípàa a ɣele tɔnɔ da 26dí lɔ̀ Ŋ̀âla-pɛrɛi mu gbóloi dí dɛ̀ɛ Ɣâla pɔ́ dí mii? Dí m̀ɛnii ŋí kɛ̀ a Abiata kɛ́ɛ a zâla láa soŋ-nuu kɛ́tɛi? Kútɔ̂ŋ lá-wooi ma, zâla láa soŋ-ƃelai nɔ́ ƃé gbóloi ŋí káa dímɛni ma. Kɛ́lɛ Deeƃé è m̀ii é da tɛ̀ɛ máŋ ǹyée mu-ƃelai pɔ́.” 27Nya ƃe Zîsɛ è ŋ̀óo lá kùla ǹyɛɛ dîai, “Ɣâla è Vii-tɔɔ-ɣelei kpɛ̀tɛ mɛni lɛ́lɛɛ kɛ́ mɛni ma núu-kpune mi, vé núu-kpune kpɛ̀tɛ ní mɛni lɛ́lɛɛ kɛ́ mɛni ma Vii-tɔɔ-ɣelei mi. 28M̀ɛni ma, núu-kpune Ǹóŋ ŋɔwála-walai káa Vii-tɔɔ-ɣelei mɛi, Vii-tɔɔ-ɣelei ŋɔwála-walai fé núu-kpune mɛi.”

Currently Selected:

Mâki 2: KWB

Highlight

Copy