Mâki 4

Záŋ bîlaŋɔɔi zí-sɛŋ sí-nuui mai

(Maafîu 13:1-9; Lûu 8:4-8)

1Zîsɛ è ŋɔ́nɔ kɛ̀ Ɣâla-mɛni lɛ̂i Galalii Poai kɔlɛ. Kpɔŋ kɛ́tɛ e ŋ̀á tɛ̀ ma gɔlɛ. Gbɔŋ su kɛ́tɛ pere è gɛ̀ é kùla dísama é píli yá-ŋa keleŋ tɔnɔ da su ǹyái ŋá. Gbɔŋ su-ƃelai kélee dí kɛ̀ ǹyái kɔlɛ zîŋ ŋá. 2È mɛni támaa lɛ̀ dîa mɛni pɔ̂lɔ-ŋa ƃóɔɔ su, ǹyɛɛ dîai, 3“Ka káwoli tɔ́ɔ! Sí-sɛŋ sí-nuu tɔnɔ è lì sí-sɛŋ-kao sîi. 4Gɛ́ɛ zí-sɛŋ-káoi pilîi, da è tòo berei ma. Ŋɔni-ŋa dí pà dí gbele. 5Da-ni dí tòo kɔni-lɔii ma, ƃɛ́i pɔ́rɔ támaa fé kɛ́ ní naai. Dí pɔ̀muŋ a maa félaa, kpɛ́ni fêi, bɔ̂rɔi è kɛ̀ a ǹɛ́lɛɛ kɛ́lɛ zu fé siŋ ní kɛ̀. 6Vóloi kúlaai, dí fãya, dí kpála. 7Da-ni dí tòo ɣalêŋ-kpɔlɔ su. Ŋ̀álêŋ è kpìniŋ a dîa. Dífe pɔri ní kɛ̀ kpɛtɛ̂i díƃa. 8Kɛ́lɛ, zí-sɛŋ-káoi da e tòo lɔii lɛ́lɛɛ ma. È pɔmûŋ è ƃɔ̀lɔ é ƃá. M̀á da-ŋa díkɛ ŋ̀á buu saaƃa, da-ni buu lɔ́ɔlu mɛi da, da-ni ŋuŋ tɔnɔ.” 9Nya ƃe è m̀o dîa ǹyɛɛi, “Ǹúui wóli káa ma é mɛni mɛ́nii, tɔɔ e m̀ɛni.”

Zã́ŋ-ŋai maa-sâpoi

(Maafîu 13:10-17; Lûu 8:9, 10)

10Ɣele tɔnɔ da Zîsɛ è kɛ̀ ǹyaa tɔnɔ kwaa ma. Nûa da-ŋa dí m̀aa tuŋ m̀ɛni. Ǹûai ŋí da ŋɔpôlu-ƃela puu kao feerɛi dí pà naa. Dí m̀arê kɛ̀ a gɛ́ɛ é m̀ɛni pɔ̂lɔi ŋí ŋáa lɛ́ dîa. 11È mò dîa, ǹyɛɛi, “Káa ƃé Ɣâla a ŋɔkâloŋ-laai su loo-mɛnii lɛ́ kâa. Kɛ́lɛ, m̀ɛni pɔ̂lɔi ŋí káa nûa da kpɛ́ni-ŋa mɛni ma, 12a gɛ́ɛ dí m̀ɛni kpɔ́, kɛ́lɛ, dífe ŋ̀á kàa, dí m̀ɛni kɛ́lɛ, dífe tàre zu, dífe lâa dílii pene la ŋɔ́nɔ dí tínaŋ Ɣâla pɔ́ naa pere é dísu mɛni lɛɛ!”

Zîsɛ è zí-sɛŋ sí-nuui maa mɛni pɔlɔi ŋá lɛ̀

(Maafîu 13:18-23; Lûu 8:11-15)

13Nya ƃe Zîsɛ è ŋɔ́nɔ dímarê kɛ̀, ǹyɛɛ dîai, “Káfe nîi táre ní m̀ɛni pɔ̂lɔi ŋí su? Ka pâi táre pere kɛ̂i léŋ zu? 14Zí-sɛŋ sí-nuui ƃa ŋ̀ooi táa-tàa. 15Ǹûai da-ŋa díkaa yɛ̂ɛ zí-sɛŋ kao-ŋai da too berei mai. Da ŋ̀óoi m̀ɛni, kɛ́lɛ, Sêtɔŋ a pâ a maa félaa é gɛ́ ŋ̀óoi é kúla díwolii. 16Nyii-ŋai da tòo gɔni-lɔii mai, dîa ƃa ǹûai da ŋ̀óoi mɛ̀nii, dí ziɣe m̀aa mɛni é dílii-nɛ̃ɛ a maa félaa, 17kɛ́lɛ, va lɛ̀ɛ díkili ŋá. Mɛni kpɔ̂lu loŋ da a làa nɔ́ dîa kpaa máŋ nûa da díkpɔara mɛni ŋ̀óoi mɛni ma, da díyee kùla mɛni su a m̀aa félaa. 18Nyii-ŋai máŋ kɛ̀ ŋ̀álêŋ kpɔlɔi sui, dia ƃa ǹûai da ŋ̀óoi mɛ̀nii. 19Kɛ́lɛ, lɔii su mɛni lii-sɛlɛŋ, tɔɔ-laa mɛni, lii-nɛ̃ɛ mɛni-ŋa, sɛŋ da kpɛ́ni-ŋa wɛ́li da lɔ̂ dí ŋ̀óoi kpáaŋ, va ƃɔ̀lɔ é ƃá. 20Kɛ́lɛ, nyii-ŋai tòo ǹɔii lɛ́lɛɛi mai, dia ƃa ǹûai da ŋ̀óoi mɛ̀ni dí ziɣe a tɔ̃yâi. A kɛ̀ tí, da ƃûu ƃò, dí ƃá, díƃa da-ŋa kɛ́ ƃò ŋ̀á buu saaƃa, da-ni buu lɔ́ɔlu mɛi da, da-ni ŋuŋ tɔnɔ.”

Laŋpo seɛɛ kpɔ̂lɔ mu mɛni

(Lûu 8:16-18)

21Zîsɛ è lì ŋɔ́nɔ tuɛ pere ǹyɛɛ dîai, “Da pâ a laŋpo pɔ́rɔŋ dí zee kpɔ̂lɔ mu kpaa máŋ dí zee gbìŋ mu? Dífa zèe bɛ́rɛi sâmai? 22Sɛŋ kélee ǹoôi a pâi kulâi panaŋ ma sɛŋ kélee mɛi pɛlɛ̂i mɛi é síɣe. 23À kɛ̀ núu da wóli káa ma é mɛni mɛ́ni, tɔɔ é m̀ɛnii ŋí mɛ́ni.” 24Zîsɛ è mò dîa máŋ ǹyɛɛi, “Ka káwoli tɔ́ɔ a gɛ́ɛ ká m̀ɛnii ŋí mɛni kpɔ́ a ǹɛ́lɛɛ. Berei ka nûa da kpɛ́ni-ŋa dímɛni sâa ŋá tèe lai, bere sîi tɔnɔi tí nɔ́ ƃé Ɣâla a pâi káwɔ̂ mɛni-ŋai ŋá teêi la. A pâi gɛ̂i a gbanaŋɔɔ máŋ é tɛ́ɛ káwɔ̂i kɛ́ pere ma. 25Ǹúui sãâ támaa káa ǹyêei, a pâi dámaa sɔlɔ ƃôi. Ǹúui sãâ támaa fé ǹyêei, guro-têi ǹyêei da pâi gulâi ǹyêei máŋ.”

Zã́ŋ bîlaŋɔɔi zí-sɛŋ ma a pɔ̂muŋ é kpɛtɛ

26Nya ƃe Zîsɛ è mò dîa ŋɔ́nɔ, ǹyɛɛi, “Ɣâla ŋɔkâloŋ-laai ƃóloŋɔɔ̂i kpâlaŋ ŋá tii kɛ́-nuu tɔnɔ ma. È lì é zí-sɛŋ káoi pîli gbâlaŋ ŋá 27È lì é láa é nyíi a gbínii é m̀u siɣe a ɣele ƃɔ́ɔ. Berei máŋ è lì é láa la ɣele é ƃɔ́i zí-sɛŋ kaoi è pɔ̀mɔŋ, gɛ́ ƃɔ̀lɔ vé berei kɔ́lɔŋ m̀ɛnii ŋí è kɛ̀ kɛ̂i lai. 28Ǹɔii è zí-sɛŋ kpɛ̀tɛ. Ǹáa è kùla a maa-ŋuŋ, é kpɛtɛ, é pôa, gbɛɛ ŋái, é ƃá. 29Tãi zí-sɛŋ ŋí è pɔ̀lɔ lai, ǹalôŋ è gùla, kpɛ́ni fêi, zí-sɛŋ ŋí ƃá tãi ká tí sèri.”

Záŋ bîlaŋɔɔi mɛsɛ-káoi mai

(Maafîu 13:31, 32, 34; Lûu 13:18, 19)

30Zîsɛ è mò, ǹyɛɛi, “Lé ƃé kwa pɔ̂ri Ɣâla ŋɔkâloŋ-laai kɔɔ̂nii mai, kpaa máŋ, lé saŋ ƃé kwa pɔ̂ri zɔɔ̂i é m̀aa mɛni ŋá lɛ́ kûai? 31Gáa yɛ̂ɛ mɛsɛ-kao, nyíi guro-têi é tɛ́ɛ sí-sɛŋ-kao kélee ma ǹɔii ma ƃɛ́i. 32Kɛ́lɛ da zì, a kpɛ̂tɛ é kôyaa é tɛ́ɛ sí-sɛŋ kpɔlɔ kélee ma, ŋ̀oŋo kpaya-kpaya-ŋa dí kúla ma. À kɛ̀ tí ŋɔni-ŋa da dítaa tɔɔ ǹinîŋ m̀u.” 33Zîsɛ è ɣâla-woo ƃò ǹûai dîa sáŋ-woo támaa su. È ŋ̀ooi ƃò dîa sáŋ-woo támaa su nyii dí pɔ̂ri mɛnîi. È gɛ̀ tí a gɛ́ɛ ŋ̀âla-wooi m̀ôi dîai dí ŋ̀á káa. 34Vé ɣâla-woo ƃó ní dîa sáŋ-woo ŋɛ́i pôlu. Kɛ́lɛ, è m̀ɛnii kélee ŋáa lɛ̀ ŋɔpôlu-ƃelai dîa da dia-ní dítee-tee kwaa ma.

Zîsɛ e vãa kɛ́tɛi kpèra

(Maafîu 6:23-27; Lûu 8:22-25)

35Maa ɣele-wulii tí su, Zîsɛ è mò ŋɔpôlu-ƃelai dîa ǹyɛɛi, “Kwaa lí yúo-loŋ pôlu pere.” 36Nya ƃe dí kùla gbɔŋ su dí lí. Ǹyá ŋá-keleŋ nɔ́ Zîsɛ è tɛ̀ zui ǹyaa nɔ́ ƃé dia máŋ dí tɛ̀ zu. Kéleŋ da kpɛ́ni-ŋa dí kɛ̀ naa kɔlɛ ma máŋ. 37Ǹaa kɛ́ɛ tíi, fãa su kpanaŋɔɔ è pɛ̀lɛ tɛɛ̂i, ǹyái é pɛ́lɛ tumo-tumoi, gɛ̀ pìli géleŋ su. È gɛ̀ géleŋ láa kɛ́ pà fɛɛ̂i a yá. 38Zîsɛ è kɛ̀ lâani géleŋ kpóŋ ŋá, sɛŋ da láa ŋ̀uŋ mu gɛ́ ǹyii. Bôlu-ƃelai dí gɛ̀ é ŋ̀ɛi lá ƃo, dîɛ mai, “Kaamɔ̂ɔ, ífe kpáaŋ ní kúmɛni ma? Kúŋuŋ lá a pilîi yo!” 39Nya ƃe Zîsɛ è ŋ̀ɛi lá ƃò ǹyɛɛ vãai mai, “Ye kpera!” Ǹyɛɛ ǹya-ɣiliŋ mai, “Ye see tɔ̀ŋ!” Vãai è kpèra, ǹyái é sée tɔ̀ŋ, naa mɛi é sáa. 40Nya ƃe Zîsɛ è ŋɔpôlu-ƃelai marê kɛ̀ ǹyɛɛi dîai, “Ka kpɛlîni le-mɛni ma? Laa-la fé káyêei?” 41Dí kɛ̀ nyɔ̃ɔ, dí m̀ó díkîe-ní dîa, “Lé nuu ƃé ŋí? Vãai kpîŋ da ǹyái da ŋ̀óo mɛ̀nii.”

Currently Selected:

Mâki 4: KWB

Highlight

Copy