Lûu 3

Batâi-kɛ-nuui Zɔ̂ŋ Ŋɔɣâla-woo-ƃoɔi

(Maafîu 3:1-12; Mâki 1:1-8; Zɔ̂ŋ 1:19-28)

1Tãi Tabîliɔ-Siizɛ e kɛ̀ la a gɔmɛnɛ-nuu kɛ́tɛi ŋɔkóraŋ buu kao lɔ́ɔlui sui, Pɔ̃ŋtiɛ Pâle kɛ́ ƃo a gɔmɛnɛ-nuu Zuda-lɔii mɛi, Ɛɛlɔ kɛ́ ƃo ŋɔ́nɔ a kâloŋ kɛ́tɛ Galalii-lɔii mɛi, ǹîa Fele kɛ́ ƃo a kâloŋ kɛ́tɛ Eturîa da Telɛkonaitɔ-lɔii mɛi, Laisenia kɛ́ ƃo ŋɔ́nɔ a kâloŋ kɛ́tɛ Abelînɛ lɔii mɛi, 2Ɛnaa da Kaifa díkɛ ƃo a zâla láa soŋ-ƃelai, Ɣâla ŋɔwóoi e pà Zɛkɛraya ǹóŋ Zɔ̂ŋ pɔ vɛ̃ɛ-kpâlaŋ su a maa-tãi ti. 3Nya ƃe e lì ǹɔii kélee su Zɔdiŋ Ya-leei kɔlɛ mai, gɛ Ɣâla-woo ƃo e pîlaŋ batâi kɛ́ɛ ma lii-pene sârai a gɛɛ sɔnyɔ̂ŋ-su-mɛni e lɛɛ. 4Yɛ̂ɛ berei bɔ̃yɛɛ̂i la Ɣâla ŋɔlóno-kɛ-nuui Azaya ŋɔkɔlɔi sui, ǹyɛɛi,

“Ǹyaa ƃa ǹúui ŋ̀óo káa tɛ̂i vɛ̃ɛ-kpâlaŋ su, ǹyɛɛi:

Ka Kúnuu-namui ŋɔperei kpɛtɛ,

ka ŋɔpere-ŋai su sã́a.

5Poto kélee lá a pâi fɛɛ̂i,

yée kpaya-kpaya da bɛlɛ-pɛlɛɛi kélee dímaa a pâi yenîi,

bere kpĩlaŋɔɔ-ŋai su a pâi sã́âi,

bere kilɛ-kilɛ-ŋai su a pâi kɛ̂i nɛ̃ɛ-nɛ̃ɛ.

6À kɛ̀ tí, núu-kpune kélee a pâi Ɣâla ŋɔƃálo-laai kâai.”

7Nya ƃe e mò gbɔŋ kɛ́tɛi ma, diai pa kɛ̀ bɔ́ a gɛɛ e díbatâi kɛ́i, ǹyɛɛi, “Káai a kali nyɔ́mɔɔ koi-lônii! Gbɛ̂ɛ ƃe kálîa-wôo ƃò a gɛɛ ká pú ǹii-ŋwânai yêei gáa pâi? 8Maa-mɛni ma, ka ǹɛɛ naa káƃa e kálii-penêi lɛ́. Káfe pɛ̀lɛ m̀óɔ ma kákpîŋ koi-pere, ‘Eberaɣɛ̃ɛ káa kúyêei a kúnâŋ,’ kpɛ́ni fêi, ŋá m̀ó kâa, Ɣâla a pɔ̂ri gɔni-ŋai ŋi kɛ̂i a Eberaɣɛ̃ɛ nonii. 9Loníi ma máŋ ǹyuɔ̂i ŋá seɛɛ̂i ŋ̀úru-ŋai same ḿâ. Maa-mɛni ma ŋ̀úrii nyii kélee va ƃâ a m̀á lɛ́lɛɛi, da bɔ̀ŋ dí bili ŋɔŋ ŋá.”

10Nya ƃe gbɔŋ kɛ́tɛi e m̀arê kɛ̀, ǹyɛɛ ma, “À kɛ̀ ti, le ƃe fɛ̂ɛ ku gɛ?” 11E díwoo su tòo, ǹyɛɛi, “Ǹúui yɛkɛ feerɛ káa ǹyêei, ǹɛɛ naa e dɔnɔ tɛɛ ǹúui pɔ da fé ǹyêei. Ǹúui mii-sɛŋ káa ǹyêei é gɛ́ nɔ ti máŋ.” 12Ŋuŋ-fela-fei kula-ƃelai máŋ dí pà a gɛɛ e díbatâi kɛ̀. Dí mò ma, dîyɛɛi, “Kaamɔ̂ɔ, le ƃe fɛ̂ɛ ku gɛ?” 13Nya ƃe e mò dîa, ǹyɛɛi, “Káfe ŋuŋ-fela-fei kula e tɛɛ nyii ma dɔ̂ŋ sui.” 14Gɔkuluƃa-ŋai máŋ dí m̀arê kɛ̀, dîyɛɛi, “Le ƃe fɛ̂ɛ ku gɛ?” Nya ƃe e mò dîa, ǹyɛɛi, “Káfe sɛŋ-kao kula núu da yêei a wôya-pere. Káfe lɛ́ɛ-mɛni pɛlɛ núu da ma. Ka ǹɛɛ naa káfela-fei é kálii láa.”

15Ǹûai kɛ́ɛ kɛ̀ maa-kpɛŋ kɛ̂i, díkelee dí kɛ̀ díkili ŋá siâi dílii su e pîlaŋ Zɔ̂ŋ ma, à kɛ̀ ǹyaa ƃa Kôrai. 16Zɔ̂ŋ e díkelee díwoo su tòo, ǹyɛɛi, “Ŋa kábatâi kɛ̀ a yá, kɛ́lɛ, ǹúui ŋɔwala-wala-laai tɛɛ̂i ŋ́ɔ̂i mai, gáa pâi, nyii ḿaa fé nɛ̃ɛ ni a gɛɛ ŋa ŋɔkɔ́ɔ-ŋa-kɔlɔi ɣɛli fuloŋ. À pâi kábatâi kɛ̂i a M̀ɔlêŋ Maa Waai da ŋɔŋ. 17Ŋɔlâai káa ǹyêei a gɛɛ é ŋɔmɔlɔŋ tánîi kɔ̀ɔ é vɛ́ɛ a gɛɛ é dɛ́ ŋɔkêrei su. Kɛ́lɛ, a pâi mɔlɔŋ-kalai kérenîi a ŋɔŋ nyii va niîŋ.”

18E tuŋ lɛ́lɛɛ ƃò ǹûai dîa a lia-woo támaa. 19Kɛ́lɛ, gâloŋ kɛ́tɛi Ɛɛlɔ, nyii Zɔ̂ŋ e lòno bɔ a gbanaŋɔɔ e pîlaŋ ǹîa ŋɔnɛnîi Ɛɛlôdia mɛni mai, e pîlaŋ ŋɔ́nɔ mɛni nyɔ́mɔɔ-ŋai kélee dîa Ɛɛlɔ a gɛ́i, 20è nyíŋi pù gbéli-ŋai kélee ma a gɛɛ é Zɔ̂ŋ pú kpini-pɛrɛ mu.

Dí Zîsɛ batâi kɛ

(Maafîu 3:13-17; Mâki 1:9-11)

21Tãi e ǹûai kélee díbatâi kɛ̀ lai, tãi ǹyaŋ e Zîsɛ máŋ ŋɔbatâi kɛ̀ lai, Zîsɛ kɛ́ɛ Ɣâla fɛlîi, ŋele-kɔlɔŋ lá e ƃò, 22M̀ɔlêŋ Maa Waai e yeŋ tòloŋ kponôi e pîlaŋ ma, nya ƃe wóo e kùla Ɣâla-taa, ǹyɛɛi, “Ya ƃa Ŋáwɛli-kɛ-maa-Loŋ. Ńii lâai a ímaa-mɛ̂ni.”

Zîsɛ ŋɔsuui

(Maafîu 1:1-17)

23Zîsɛ ǹyaa kpîŋ kɛ́ɛ a pɛlɛ ŋɔtíi mai, ŋɔkóraŋ e kɛ̀ nâa a kóraŋ buu saaƃa. È kɛ̀ díkili ŋá a gɛɛ è kɛ̀ a Zosɛ ǹóŋ, nyii kɛ̀ a Ɛɛli ǹóŋ, 24nyii kɛ̀ a Mɛ̂tɛ ǹóŋ nyii kɛ̀ a Liiva ǹóŋ, nyii kɛ̀ a Mɛɛkai ǹóŋ, nyii kɛ̀ a Zɛ̂nai ǹóŋ, nyii kɛ̀ a Zosɛ ǹóŋ, 25nyii kɛ̀ a Mɛtɛtaiɛ ǹóŋ, nyii kɛ̀ a Eemɔ ǹóŋ, nyii kɛ̀ a Neeuŋ ǹóŋ, nyii kɛ̀ a Ɛsili ǹóŋ, nyii kɛ̀ a Nagai ǹóŋ, 26nyii kɛ̀ a Maatɛ ǹóŋ, nyii kɛ̀ a Mɛtatiɛ ǹóŋ, nyii kɛ̀ a Semiɛŋ ǹóŋ, nyii kɛ̀ a Zosɛi ǹóŋ, nyii kɛ̀ a Zôda ǹóŋ, 27nyii kɛ̀ a Zoanɛŋ ǹóŋ, nyii kɛ̀ a Lesɛ ǹóŋ, nyii kɛ̀ a Zɛrubabɛɛ ǹóŋ, nyii kɛ̀ a Siatiɛ ǹóŋ, nyii kɛ̀ a Nɛɛri ǹóŋ, 28nyii kɛ̀ a Mɛɛkai ǹóŋ, nyii kɛ̀ a Adii ǹóŋ, nyii kɛ̀ a Koosaŋ ǹóŋ, nyii kɛ̀ a Ɛmadaŋ ǹóŋ, nyii kɛ̀ a Ɛɛ̂ ǹóŋ, 29nyii kɛ̀ a Zîsɛ ǹóŋ, nyii kɛ̀ a Iliezɛ ǹóŋ, nyii kɛ̀ a Zoriŋ ǹóŋ, nyii kɛ̀ a Mɛ̂tɛ ǹóŋ, nyii kɛ̀ a Liiva ǹóŋ, 30nyii kɛ̀ a Simiɔŋ ǹóŋ, nyii kɛ̀ a Zudasi ǹóŋ, nyii kɛ̀ a Zosɛ ǹóŋ, nyii kɛ̀ a Zonaŋ ǹóŋ, nyii kɛ̀ a Iliakiŋ ǹóŋ, 31nyii kɛ̀ a Mɛlia ǹóŋ, nyii kɛ̀ a Mɛɛna ǹóŋ, nyii kɛ̀ a Mɛtɛta ǹóŋ, nyii kɛ̀ a Neetaŋ ǹóŋ, nyii kɛ̀ a Deeƃé ǹóŋ, 32nyii kɛ̀ a Zɛse ǹóŋ, nyii kɛ̀ a Obɛɛ ǹóŋ, nyii kɛ̀ a Boa ǹóŋ, nyii kɛ̀ a Samɔŋ ǹóŋ, nyii kɛ̀ a Nâsuŋ ǹóŋ, 33nyii kɛ̀ a Aminɛda ǹóŋ, (nyii kɛ̀ a Adimiŋ ǹóŋ,) nyii kɛ̀ a Aani ǹóŋ, nyii kɛ̀ a Ɛzɔrɔŋ ǹóŋ, nyii kɛ̀ a Pɛrɛzi ǹóŋ, nyii kɛ̀ a Zudasi ǹóŋ, 34nyii kɛ̀ a Zeeka ǹóŋ, nyii kɛ̀ a Aise ǹóŋ, nyii kɛ̀ a Eberaɣɛ̃ɛ ǹóŋ, nyii kɛ̀ a Tîra ǹóŋ, nyii kɛ̀ a Neɔ ǹóŋ, 35nyii kɛ̀ a Siru ǹóŋ, nyii kɛ̀ a Lîu ǹóŋ, nyii kɛ̀ a Pelɛ ǹóŋ, nyii kɛ̀ a Ibɛ ǹóŋ, nyii kɛ̀ a Siila ǹóŋ, 36nyii kɛ̀ a Kâinɛ ǹóŋ, nyii kɛ̀ a Aafɛ̂sɛ ǹóŋ, nyii kɛ̀ a Sɛ̂ŋ ǹóŋ, nyii kɛ̀ a Nôa ǹóŋ, nyii kɛ̀ a Lamɛ ǹóŋ, 37nyii kɛ̀ a Mɛtusela ǹóŋ, nyii kɛ̀ a Inɔsi ǹóŋ, nyii kɛ̀ a Zeerɛ ǹóŋ, nyii kɛ̀ a Maɣalɛliɛ ǹóŋ, nyii kɛ̀ a Kâinɛ ǹóŋ, 38nyii kɛ̀ a Inɔsi ǹóŋ, nyii kɛ̀ a Sɛ̂ɛ ǹóŋ, nyii kɛ̀ a Adaŋ ǹóŋ, nyii kɛ̀ a Ɣâla ǹóŋ.

Currently Selected:

Lûu 3: KWB

Highlight

Copy