Lûu 2
2
Zîsɛ maa-sɔlɔ-ƃoɔi
(Maafîu 1:18-25)
1Nya ƃe e kɛ̀ ti, ŋele-ŋai ti su Gâloŋ Siizɛ Agɔtɔɔ e tɔ̂ŋ tɛɛ a gɛɛ dí ǹûai láa siɣe ǹɔii gwaa kélee ma. 2Ǹûai láa siɣɛɛ duɛ-tuɛi ká kɛ̀ ŋi tãi Kɔrinia e kɛ̀ la a gɔmɛnɛ-nuui Siria-lɔii sui. 3Nya ƃe, ǹûai kélee dí lì díkpɔɔ̂i taa-ŋai su tɛi-tɛi a gɛɛ dí dílaa siɣe. 4Zosɛ máŋ e kùla Nâzarɛ Galalii-lɔii su, e li Deeƃé ŋɔtaai su da dòli a Bɛpeleɣɛ̃ɛ, Zuda-lɔii sui, kpɛ́ni fêi, è kɛ̀ a Deeƃé ŋɔpɛ́rɛi-mu-nuu da, gɛ ƃo ŋɔnɔ a ŋɔkáayɔɔ da, 5a gɛɛ dí dílaa siɣe da Mere nyii dí ǹáa sèe kɛ̀ mà a gɛɛ e kɛ́ a ŋɔnɛnîi, nyii gôo e kɛ̀ mai. 6Nya ƃe è kɛ̀ tí, díkɛɛ kɛ̀ naai, tãi è sèri a gɛɛ maa é fúloŋ. 7Nya ƃe m̀aa è fùloŋ a ŋɔlóŋ-surɔŋ vulɔ-fúlɔi. È seɣe ŋwã̂aŋ kpìniŋ la, é ǹáa kala kpâla ŋá niŋa laa-mii-gãla su. Kpɛ́ni fêi, dílaâi fé kɛ́ ni naa ŋɔ̃yâ-laa-pɛrɛi mu.
Ŋ̀âla-taa kela-ŋai da m̀ála mɛi-kaa-ƃelai
8Ǹɔii ti su ƃála mɛi-kaa-ƃela dí kɛ̀ naa, díkɛ díƃala-ŋai mɛi kaa vieŋ ŋá a kpini. 9Nya ƃe Kúnuu-namui ŋɔkéla e kùla díkɔlɛ, Kúnuu-namui ŋɔfólo-laai e díkɔlɛ ma pòno. Dí yào kpɔ a ŋ̀ánaa. 10Nya ƃe Ŋ̀âla-taa-kelai e mò dîa, ǹyɛɛi, “Káfe yào, kpɛ́ni fêi, ka gáa, ŋa pá kápɔ a tuŋ lɛ́lɛɛ e pîlaŋ lii-nɛ̃ɛ kɛ́tɛ ma nyii pâi kɛ̂i ǹûai kélee mɛni mai, 11kpɛ́ni fêi, sâa da Káƃalo-nuui maa sɔlɔ ƃó Deeƃé ŋɔtaai su, nyii gáa a Kôrai, Kúnuu-namui. 12Nyíŋi káa a ŋɛi-kɛ́-maa káyêei: ka pâi ǹôloŋ kâai seɣe ŋwã̂aŋ kpíniŋɔɔ la, gɛ́ ƃò laa-ni kala kpâla ŋá niŋa láa-mii-gãlai su.” 13A ǹaa maa félaa kpɔ́ Ɣâla-taa-kela kpɔŋ kɛ́tɛ e pà Ŋ̀âla-taa-kelai pɔ, díkɛ Ɣâla láa maa tɛ, dîyɛɛi,
14“Laa-maa-tɛ é tɛ́ Ɣâla pɔ ɣelêi-pere póŋ-póŋ.
Lii-see é kɛ́ ǹûai sama ǹɔii ma diai ǹíi lâai dímɛni mai!”
15Nya ƃe e kɛ̀ ti, Ŋ̀âla-taa-kela-ŋai kɛ́ɛ da dílɛɛ naa da lí Ɣâla-taai, m̀ála mɛi-kaa-ƃelai dí mò díkîe-ni dîa, dîyɛɛi, “Ka pá kwaa li Bɛpeleɣɛ̃ɛ a gɛɛ ku mɛnii ŋi káa a kɛ̂i nyii Kúnuu-namui a ǹɛ́ kûai.” 16Nya ƃe dí lì a maa felaa, dí Mere da Zosɛ kaa, bɛlɛɛ gwâtarai ma gɛ ƃo laa ni kala kpala ŋá niŋa laa-mii-gãla su. 17Díkɛɛ da gáai, dí mɛnii ƃò nyii ƃò dîa e pîlaŋ ǹôloŋ mai. 18Ǹûai kélee mɛnii dípɛlɛ e pù e pîlaŋ mɛnii ma m̀ála mɛi-kaa-ƃelai dí mò diai. 19Kɛ́lɛ, Mere e ŋ̀óo-ŋai ŋi kélee lâai kɛ̀, gɛ gíli ŋá sia ǹíi su e pîlaŋ dîa. 20Nya ƃe m̀ála mɛi-kaa-ƃelai dí pène pôlu. Dí kɛ̀ Ɣâla ŋɔfólo-laai maa tɛ̂i, díkɛ ǹáa maa tɛ mɛni-ŋai kélee mɛni ma dí mɛ̀ni, dí gáa, yɛ̂ɛ berei e ƃò la diai.
Dí Zîsɛ láa sèe
21Ǹyaŋ, tãi ɣele-kuu lɔ́ɔlu mɛi saaƃa e tɛ̀ɛ, díkɛɛ da kpɛɛ a gbɛ̀tɛɛ̂i, dí ǹáa sèe a Zîsɛ, ǹáai Ŋ̀âla-taa-kelai e zèe ma maa-koo e lɛɛ pâi kɛ̂i ǹee mai.
Dí Zîsɛ tɛ̀ɛ Kúnuu-namui pɔ́ Ŋ̀âla-pɛrɛ Kɛ́tɛi mu
22Tãi kɛ́ɛ a séri dímɛni ma a gɛɛ dí dímaa waa yɛ̂ɛ berei Mose ŋɔtɔ̂ŋ è mò lai, dí pà la Zerusâlɛŋ a gɛɛ dí dɛɛ Kúnuu-namui pɔ́, 23(yɛ̂ɛ berei bɔ̃yɛɛ̂i la Kúnuu-namui ŋɔtɔ̂ŋ sui, ǹyɛɛi, “Lóŋ-surɔŋ vulɔ-fulɔi kélee a koo-ƃɔlɔŋ lá ƃôi da pâi dólîi a maa waa Kúnuu-namui mi”) 24a gɛɛ dí sâla kula yɛ̂ɛ berei e ƃò la Kúnuu-namui ŋɔtɔ̂ŋ sui, ǹyɛɛi, “Tòloŋ-sirɛ pɛlɛɛ zaa ma à wàla kɛ́ ti, popo-lonii feerɛ.” 25Nalôŋ tɔnɔ ƃe kɛ̀ naa Zerusâlɛŋ, ǹáa ƃe kɛ̀ a Simiɔŋ, nyii kɛ̀ a sɔŋ-lɛlɛ-nuu, gɛ ƃo a Ɣâla mɛni wɛliɛ, nyii kɛ̀ Eezuɛ ŋá-nɛnɛ-ɣele maa kpɛ̂nii. M̀ɔlêŋ Maa Waai e kɛ̀ mɛ̀i. 26Nya ƃe M̀ɔlêŋ Maa Waai e nɛ̀ ma a gɛɛ ve pâi saâi e lɛɛ zu e Kúnuu-namui Ŋɔkôrai kaa. 27Ǹyaŋ M̀ɔlêŋ Maa Waai e lì la Ŋ̀âla-pɛrɛ Kɛ́tɛi mu. Tãi ǹee da ǹâŋ dí pa kɛ̀ a ǹôloŋ Zîsɛ a gɛɛ dí mɛnii kɛ́ mì yɛ̂ɛ berei dɔ̂ŋ-kɔlɔi è mò lai, 28è ǹôloŋ lâa ǹyée-tɔ̃ɔi, é lûwa tôo Ɣâla ma, ǹyɛɛi,
29“Kúnuu-namui, ya nâa ǹɛɛ̂i naa íyee-mu-nuui é lí lii-sêe su
yɛ̂ɛ berei íwoôi káa lai,
30kpɛ́ni fêi, ŋ́ɛi a íƃalo-laai káa,
31nyii ya gbɛtɛ ǹûai kélee ŋɛi.
32Gáa a kwaa-ponoɔ a gɛɛ e Zɛ̃tai-ŋai ŋɛi lá ƃó.
Gáa a folo-laa ínûai Eezuɛ-ŋai mɛni ma.”
33Nya ƃe ǹâŋ da ǹee dípɛlɛ e pù a mɛni-ŋai ƃò e pîlaŋ mai; 34Simiɔŋ e lûwa tòo dîa, ǹyɛɛ ǹee Mere ma,
“Gáa, ǹôloŋ ŋi seɛɛ̂i Eezuɛ-ŋai dámaa-ɣele too-mɛni da dímu siɣe-mɛni ma,
gɛ ƃo ŋɔnɔ a ŋɛi-kɛ-maa nyii da pâi wóo nyɔ́mɔɔ ƃôi e pîlaŋ mai
35(ƃóa-sɔkpɔ a pâi ƃɔ́i ímɔ̂leŋ su máŋ) a gɛɛ gili-ŋa-sia-ŋai gáa líi támaa sui é lɛ́.”
36Ɣâla ŋɔlóno-kɛ-nɛni tɔnɔ ƃé kɛ̀ naa, ǹáa kɛ́ ƃò a Ana, nyii kɛ̀ a Fɛ̂nuɛ ŋɔlóŋ-nɛni, gɛ ƃo a Asɛ-sii-nuui da. E kɛ̀ nâa a bɔlɔɔ a ŋ̀ánaa. Da ŋɔsurɔ̂ŋ dí kɛ̀ díkîe ma a kóraŋ lɔ́ɔlu mɛi feerɛ é kúla gbela tãi ma. 37E kɛ̀ nâa a pɔɔ-nɛni a kóraŋ buu lɔ́ɔlu mɛi saaƃa kao náaŋ, nyii kɛ̀ Ŋ̀âla-pɛrɛ Kɛ́tɛi mu a tãi kélee, gɛ pɛlɛ Ɣâla kɔ́ɔ mu a biliɛ suŋ su da Ɣâla-fɛliɛ kpini da foloi. 38Gɛɛ pâi aƃai tí sui, è sɛɣɛi-fêi tɛ̀ɛ Ɣâla pɔ́, gɛ́ maa-mɛni ƃò dîa diai kélee kɛ̀ maa-têe-laai kɔ́rîi Zerusâlɛŋ mɛni mai.
Dípaa pôlu kɛ̀ Nâzarɛ
39Díkɛɛ da kpɛɛ a mɛnii kélee kɛ́ yɛ̂ɛ berei Kúnuu-namui ŋɔtɔ̂ŋ e mò lai, dí lì pôlu Galalii-lɔii su díkpɔɔ̂i-taai su Nâzarɛ. 40Nya ƃe ǹôloŋ è ƃɔ̀lɔ, kponôi e kpanaŋ, ǹáa é fɛ́ɛ a táre; Ɣâla ŋɔƃɛlɛ-sêei kɛ́ ƃo ma.
Zîsɛ surɔ̂ŋ-lo káa Ŋ̀âla-pɛrɛ Kɛ́tɛi mu
41Kóraŋ kélee ǹâŋ da ǹee da kâa lì Zerusâlɛŋ Dɛɛ-mɛi Kûui mɛni ma. 42Tãi e kɛ̀ la a kóraŋ puu kao feerɛi, dí lì gúui su yɛ̂ɛ berei da wɔlɔ gɛ̀ lai. 43Gúu-ɣele-ŋai kɛ́ɛ da kpɛ̀ɛi, dí kɛ̀ liî pôlui, zurɔ̂ŋ-loi Zîsɛ e lɛ̀ɛ pôlu Zerusâlɛŋ. Ǹâŋ da ǹee dífe kɛ́ ni a gɔ́lɔŋɔɔ. 44E kɛ̀ díkili ŋá a gɛɛ e kɛ̀ zia-ƃelai sama. Nya ƃe dí lì a ɣele tɔnɔ-sia, díkɛ gɔ̀ri díkaayɔɔ-ŋai da díƃarâa sama. 45Kɛ́lɛ, díkɛɛ dífe gáa níi, dí pène pôlu Zerusâlɛŋ, díkɛ gɔ̀ri. 46Nya ƃe e kɛ̀ ti, ɣele-kuu saaƃa e tɛ̀ɛ, dí gáa Ŋ̀âla-pɛrɛ Kɛ́tɛi mu, gɛ ƃo seêni dɔ̂ŋ-lɛ-ƃelai sama, gɛ ŋ̀óli tɔɔ dîa, gɛ mare-kɛɛ-ŋa kɛ̀ dîa. 47Ǹúui kélee ŋ̀óo mɛnii, dípɛlɛ è pù é pîlaŋ ŋɔtárei ma da ŋɔmɛni su-too wóo-ŋai ma. 48Díkɛɛ da gáai, dípɛlɛ è pù. Ǹee ǹyɛɛ mai, “Ǹóŋ, le ƃe kɛ̀ ya tûa a kûa a gɛɛ ŋi? Gáa, kwa ínâŋ ku kɛ̀ íkɔ̂rii a lii-sɛlɛŋ.” 49Kɛ́lɛ, è mò dîa, ǹyɛɛi, “Le ƃe kɛ̀ ka ŋ́gɔrîi? Káfe gɔlɔŋ fɛ̂ɛ ŋa kɛ́ Ńâŋ ŋɔpɛ́rɛi mu?” 50Nya ƃe dífe táre ni ŋ̀óoi su e mò diai. 51Gɛɛ ti, da dîa-ni dí lì, dí pa Nâzarɛ, gɛ díwoo siɣe. Kɛ́lɛ, ǹee e ŋ̀óo-ŋai ŋi kélee lâai kɛ̀ ǹíi su.
52Nya ƃe Zîsɛ ŋɔtárei su è kɛ̀tɛ da ŋɔkóraŋ, da ŋɔƃɛlɛ-sêei Ɣâla da ǹûai ŋ́ɛi-tuɛ.
Currently Selected:
Lûu 2: KWB
Highlight
Share
Copy
Want to have your highlights saved across all your devices? Sign up or sign in
