Zôo 9
9
Zôo è Beeda wóo su tòo
1-2Tɔ̃yâ ma ŋá m̀ɛnii kɔ́lɔŋ ya lônoi é pîlaŋ mai.
Kɛ́lɛ núu da fa pɔ̂ri kɛ̂i Ɣâla ma ńdûa-pere fé nyɔ́ŋ-ni.
3Núu da Ɣâla dífa pɔ̂ri mɛni-sâa ƃôi.
Ɣâla é máŋ m̀arê kɛ́,
va pɔ̂ri zu kulâi a dɔnɔ kpîŋ.
4Ɣâla táreɛɛ̂i, ŋ́wala-wala.
Núu da a pɔ̂ri tɔɔ̂i Ɣâla ma é Ɣâla yée mɛi ɣále?
É folôŋ mà.
5Ɣâla a ǹyée kpaya-kpayai tûmo-tumo é díwolo.
Va mò núu da ma.
A díwolo-wolo kpɛ́ni-fei a ǹíi ŋwàna dîa.
6Ɣâla a ǹɔii tûmo é síɣe gɔ́ɔ pîlanii,
é gɛ́ gɔni-ŋai díkɛ kpɛ̃liŋ.
7Ɣâla a lôno vóloi pɔ́ a gɛɛ vé ƃèla,
é mó bɛmɛlɛŋ-kaoi ma a gɛɛ vé fôlo.
8Ɣâla ǹya tɔ̂nɔ ƃé ŋ̀ele-kɔlɔŋ kpɛ̂tɛ é ǹáa ǹâai,
é ƃɔ́rɔŋ ǹyúo-zele kalii ma a gɔ́ɔ.
9Ɣâla è Bɛmɛlɛŋ-kaoi kpɛ̂tɛ nyii da kɛ̂ dîa ǹiyeŋ-kpului,
é dípu yá-ŋua-pere ŋ̀elei su,
é nyii-ŋai da kɛ̂ dîa géleŋ-ma-wûui pú ŋ̀ele-kɔlɔŋ su máŋ.
È yá kwára-pere pɛmɛlɛŋ-kao-ŋai kpɛ̂tɛ é dí pú ŋ̀elei su.
10A zûgbɛlɛ-gbɛrɛ mɛni-ŋa kɛ̀ nyii núu fa târe zu.
Ŋɔzugbɛrɛ-gbɛrɛ mɛni-ŋai tâmaai, núu da fa pɔ̂ri ǹônoi.
11Ɣâla è tɛ̀ɛ ḿâ ńdɛ̂i-pere.
Ḿve kɛ́ ní a gɔ́lɔŋɔɔ a gɛɛ è kɛ̀ naa.
12A sɛŋ da sìɣe núu da fa pɔ̂ri gulâi ǹyêei,
núu da fa pɔ̂ri kɛ̂i mà, “Lé mɛni ƃé í gɛ̀ tí lai?”
13Ɣâla ŋɔlii ŋwânai fa sîɣe dɔɔ̂i.
È yúo-zele-kalii ŋɔkpɔŋ maa-ƃelai yée mɛi ɣâle.
14Ŋa pɔ̂ri ŋ́gbîŋ maa kɔ̃ɔ-woo kâai mí
ŋá maa kɔ̃ɔ la Ɣâla ŋɛ́i-tuɛ?
15Berei máŋ ḿve mɛni da kɛ́ ní lai,
ḿva pɔ̂ri ŋ́gbîŋ maa kɔ̃ɔi ǹyêei.
Ŋa pâi m̀arê kɛ̂i a gɛɛ é malôŋ kaa.
16À kɛ̀ ŋa Ɣâla sɔŋ lâa gâloŋ ŋɛ́i a gɛɛ kú mɛni-saa ƃó,
ḿve pâi lâai la a gɛɛ Ɣâla a pâi ŋ̀oli tɔɔ̂i ḿâ.
17È gɛ̀ vãai é ǹókwa, ŋ́gbono gwaa kélee ma gbimiliŋ é tɛ́,
berei máŋ ńzɔŋ fé kɛ́ ní la zui.
18Vé ǹɛ̂ɛi naa ŋá ḿvîŋ lá kúla,
a ŋá kɛ̀ ɣéniɛi kpona ńyêei.
19À kɛ̀ a wála-wala mɛni, Ɣâla wála-walai é tɛ́ɛ ḿâ.
À kɛ̀ a mɛni sâa ƃó-mɛni, gbɛ̂ɛ ƃé pâi dôlii m̀ɛni sâa ƃóɔɔ sui?
20Berei máŋ ńzɔŋ fé la m̀ɛnii ŋí sui,
Ɣâla a pɔ̂ri gɛ̂i ŋ́gbɔɔi-wooi é m̀ɛnii lɛ́ɛ ḿâ.
21Ńzɔŋ fé m̀ɛnii su.
Ḿve nâa kpáaŋ-ni mɛni-sii kélee da mɛni ma.
Ŋá kɛ̀ ɣéniɛi mɛni ƃɛlɛ fé ŋɔ́nɔ ŋ́goi.
22Mɛni da maa kpâaŋ fé ŋɔ́nɔ ḿâ.
Ɣâla a zɔŋ-lɛlɛɛ-ƃelai da ŋ̀wana-lɔ̂ɔ-ƃelai kélee
dífulu-laai kûla díyêei.
23À kɛ̀ ya fɛ̂ɛ kɛ́tɛ da fãa kɛ́tɛ da núu támaa pàa,
Ɣâla a ɣɛ́lɛ maa kùla diai dísɔŋ fé dîai díkponôi.
24Ɣâla a ǹɔii tɛ́ɛ ŋ̀wana-lɔ̂ɔ-ƃelai pɔ́.
A ǹyée pɛ́lɛ m̀ɛni-sâa ƃó-ƃelai ŋɛ́i a gɛɛ dífe mɛni-sâa ƃò a teniŋ ƃô-pere.
À kɛ̀ Ɣâla fé mɛni-ŋai ŋí kɛ́ ní, gɛ̀ ní gbɛ̂ɛ ƃé dí kɛ̀i?
25Ŋáfulu-laai aâ gbâa kpɛ́ɛ,
fé mɛni lɛ́lɛɛ da kula ní zu.
26Ŋáfulu-laai a tɛɛ̂i a maa félaa yɛ̂ɛ yá-ŋa keleŋ.
Yɛ̂ɛ kuɛ ƃé yenîi gɔ́nɔŋ ma.
27Ɣâla, à kɛ̀ ŋa kpèra mɛni saâi yâ,
ŋa pâi ŋ́ɛi ponôi íperêi a lii-nɛ̃ɛ.
28Ŋá gɔ́lɔŋ a gɛɛ mɛni kpɔ̂lu da kpɛ́ni a pâi lâai ḿâ.
Ŋá gɔ́lɔŋ máŋ a gɛɛ ífe pâi môi a gɛɛ ńzɔŋ fé m̀ɛnii ŋí su.
29Ŋá gɔ́lɔŋ a gɛɛ m̀ɛnii ŋí káa a ńzɔ̀ŋ.
Lé mɛni ƃé ŋa pâi kɛ̂i ńa ŋá ŋánai lai?
30À kɛ̀ ŋa ŋ́wàa a yá séɣeŋɔɔ,
kpaa máŋ ŋá ńyee ŋá wáa a dîleŋ-kpolo ŋwana,
31ya pâi nɔ́ ńdôoi lóa su liƃiɛɛ su,
ǹyaŋ ḿɛ̀lɛ a pâi kpɛɛ̂i ŋ́gbîŋ seɣei koi.
32Eêi kɛ̀ Ɣâla káa a núu-kpune yɛ̂ɛ ńyãa, ŋ́âi pɔ̀ri ŋ̀óo su toôi
a gɛɛ kwa ǹyaa kú lí m̀ɛni-sâa ƃó-kerei mu kú mɛni-sâa ƃó.
33Kɛ́lɛ núu da fé naa é lɔ́ kú kúloai.
Núu da fé naa a gɛɛ é kú m̀ɛnii ŋá tée kwa Ɣâla.
34Núu da fé naa é Ɣâla kpera mɛni ŋánaa kɛ̂i a ńyãa,
é gbera ḿaa yaôi a ŋɔmɛni kula maa kɛɛi.
35Ŋa pɔ̂ri lônoi a lii kpêle-pere
kpɛ́ni fêi, ŋá ŋ́gbɔɔi líi su kɔ́lɔŋ.
Currently Selected:
Zôo 9: KWB
Highlight
Share
Copy
Want to have your highlights saved across all your devices? Sign up or sign in
