Zôo 8
8
Beeda è lòno Zôo pɔ́
1Zôo kɛ́ɛ a kpɛɛ a lónoɔɔ̂i, Sûa lɔii su nuui Beeda è ŋ̀óo su tòo ǹyɛɛ mai,
2“Yâa lóno, ǹyaŋ mɛni-ŋai ya môi,
gáa nɔ́ yɛ̂ fãa kɛ́tɛ ƃé va kpêra.
3Ɣâla fa mɛni ŋá tèe a wôya.
Ŋ̀wála-wâla kélee Ɣalai a mɛni ŋá tèe a zãa.
4Tãi da ínîa-pɛlɛɛi dí sɔnyɔ̂ŋ kɛ̀ a Ɣâla,
ǹyaŋ a díkula maa kɛ́ díkpɔɔ̂i sɔnyɔ̂ŋ m̀ɛni mà yɛ̂ɛ berei gáa lai.
5Ye Ŋ̀wála-wâla kélee Ɣalai fɛ́li a gɛɛ é íŋɛi malôŋ káa.
6À kɛ̀ íkaa a teniŋ ƃô nuu maa waa,
gɛ̀ ní a pâi ímɛi kâai,
é ísãâi da pɔɔ tôo tɛɛ.
7Zãâi pâi kɛ̂i íyêei a gbɛ̀ɛ-ŋai,
a pâi kɛ̂i a dámaa é tɛ́ɛ duɛ-tuɛi ma nyii Ɣâla è dɛ̀ɛ ípɔi ma.
8“Kúnûa pɔlɔ-ŋai dítûa-perei maa kpɛ́ɛ,
Í dítarei maa kɔ́ri nyii-ŋai díwɔlɔ ǹɛi.
9Kúkɛ ɣéniɛi káa nɔ́ a tãi kpua, ǹyaŋ kúfe mɛni da kɔ́lɔŋ.
Nàa a kɛ̀ tí, kúfulu-laai é tɛ́ɛ nɔ́ yɛ̂ɛ ninîŋ ƃé siâi ǹɔii ma.
10Kúnûa pɔlɔ-ŋai da pâi dítarei lɛ̂i yâ.
Da nɛ̀ yâ fɛ̂ɛ í íyee sée mù.
11“Yá-wuru da fa lɛ̂lɛ yá ŋɛ́i pôlu.
Yá kɔlɛ nɔ́ ƃé da lɛ̂lɛ naa.
12À kɛ̀ ǹyái a kpàla, dia ƃa kɛ̂ a maa-ŋuŋ dí sáa.
Da lɛ̂ɛ a dítɔɔ nyii núu fa pɔ̂ri dêei dí sáa.
13Diai da Ɣâla wóo pìlii, da kɛ̂ nɔ́ yɛ̂ɛ ŋ̀úru-ŋai ŋí.
Diai Ɣâla ŋɔyao-maai fé díyêei kili-kɛ-zu fé pâi kɛ̂i díyêei a dísaa tãi.
14Da díkili tɔ̀ɔ nɔ́ zɛŋ ma nyii vé kpanaŋ nii.
Dí mɛi-kaa-sɛŋ ŋɔkpanaŋɔɔ káa nɔ́ yɛ̂ɛ sĩi-nãanɔ̂ɔ.
15Da díkili tɔ̀ɔ nɔ́ dítɔɔ-laai ma a gɛɛ dí dímɛi káa, kɛ́lɛ pere fa kɛ̂ naa.
Da díkili tɔ̀ɔ díkɔ̃liŋ ma kɛ́lɛ va nâmu díyêei.
16“Díkaa nɔ́ yɛ̂ɛ wúru-ŋa nyii-ŋai sí-sɛŋ sí-nuu a yá pù mà a ɣele wâla pɛpɛi.
Ǹyaŋ à kɛ̀ tí, dí pɔmûŋ a kûla zûai gwaa kélee ma.
17Dísame a kpîniŋ a gɔni-ŋai,
díkɛ díkɛ̂i kɔ̀ri gɔni-ŋai sáma.
18À kɛ̀ núu da a dí ƃùleŋ é díkula dí tɔɔ̂i,
gɛ̀ ní ǹûai da pâi môi dîyɛɛ sɛŋ da fé tá tɔɔ-ni ƃɛ́.
19Ŋ̀wana-lɔ̂ɔ-ƃelai dí lii-nɛ̃ɛi su fa kɛ̂ a gôyaa.
À kɛ̀ tí, ŋ̀wana-lɔ̂ɔ-ƃelai da kpɛ́ni-ŋa da pâ dítɔɔ dí pɔ́ɔ ŋá.
20“Ɣâla a ǹyée sèe diai dísɔŋ fé dîai mu,
kɛ́lɛ va kpɔŋ mâa tɛ̀ɛ ŋ̀wana-lɔ̂ɔ-ƃelai pɔ́.
21A pâi gɛ̂i íɣɛlɛ,
íkɛ làɣi a koi-nɛ̃ɛ-pere.
22Diai dítɔ̂ɔ yâi, Ɣâla a pâi dí ŋumɛi.
Ɣâla a pâi ŋ̀wana-lɔ̂ɔ-ƃelai dípɛrɛ-ŋai wôloi.”
Currently Selected:
Zôo 8: KWB
Highlight
Share
Copy
Want to have your highlights saved across all your devices? Sign up or sign in
