Zôo 7
7
1“Ŋ̀éniɛi ŋí su, núu-kpune ŋɔkɛ ɣéniɛi káa nɔ́ yɛ̂ɛ núu ƃé kɔ-kuluƃa tii kɛ̂i.
Díkɛ̀ ɣéniɛi su, dímɔ̃lɛ-laai káa nɔ́ yɛ̂ɛ diai da tíi kɛ̀ dí dífela fé a ɣele-wulii.
2Núu-kpune ŋɔkɛ ɣéniɛi káa nɔ́ yɛ̂ɛ luɛ ƃé ninîŋ maa kpɛnîi a gɛɛ é víi tɔɔ,
yɛ̂ɛ tíi kɛ́-nuu ƃé ŋɔfela fêi maa kpɛnîi.
3Ŋá kɛ̀ ɣéniɛi káa nɔ́ kpɛ́ni-kpɛni,
ɣele láa ƃoɔɔ da kpíni pɛlɛɛ yée mu a berei ŋa ḿɔ̃lɛ̂i lai.
4Tãi ŋà kɛ̀ lâai lai, ŋa kɛ̂ ŋ́gili-ŋa siâi, ŋ́gɛ mò ńyɛɛ,
‘Lé tãi ƃé ɣele a pâi ƃɔ̂i lai?’
Gbínii su kôyaai, láa fé ḿâ,
ŋa lɛ̂ɛ kpɔ́ penêi ńaa gbìŋ ŋá é lɛ́ɛ la zu ɣele é ƃɔ́.
5Kpêle da pala-kareŋ da ŋ́gbono gwaa kélee ma siɣe.
Pala a tée ŋ́gbono gwaa kélee ma vɔ̃́iŋ kɛ́ pù.
6Ŋá kɛ̀ ɣéniɛi a tɛɛ̂i a maa félaa yɛ̂ɛ berei seɣe pala-nuu a ŋɔkenai tɛ̀ɛ la a maa félaai.
Ŋá ɣele kûui káa tɛɛ̂i a maa félaa.
Kɛ ɣéniɛ maa kili kɛ-zu fé ŋɔ́nɔ ńyêei.
7“Óo Ɣâla, é lɛ́ɛ íkili-ŋa a gɛɛ ŋáfulu-laai káa nɔ́ yɛ̂ɛ fãa.
Ḿve ŋɔ́nɔ pâi koi-nɛ̃ɛ kulâi a dɔnɔ kpîŋ.
8Íkaa nɔ́ ŋ́gâai lonii ma. Kɛ́lɛ nàa-loŋ a kɛ̀ tí,
ífe pâi ŋɔ́nɔ ŋ́gâai kpɛ́ni fêi, ŋa pâi saâi ŋá kúla íŋɛi.
9-10Núu é máŋ sáa, va ŋɔ́nɔ pà pôlu ɣele ma.
A kɛ̂ nɔ́ yɛ̂ɛ berei tí lúu a pɛ̂lɛ la gɛ́ taai.
M̀aa mɛ̂ni kíli a kpɛ̂ɛ ǹûai da dîa-ni díkɛ̀ naai díkili-ŋa.
11Mɛni ma, ḿve pâi mɛi-saai.
Ŋa pâi lônoi ŋá lii-too pôlui su.
Ńii ŋwânai kpɔ́ a ŋ̀ánaa.
12“Ḿve a yúo kpaa máŋ yúoi-zele kali
a gɛɛ ípa ńdoo kpɔnɔ-ŋa.
13Ŋá máŋ lí lâai a gɛɛ ŋá ńyii,
14ya ŋ́gɛ̀ ŋá see nyɔ́mɔɔ ƃó ŋ́gɛ yào.
15Eêi pɔ̂ri kɛ̂i a ǹɛ́lɛɛ à kɛ̀ núu da a ŋ́zòŋ a ŋ́gwana.
A pɔ̂ri kɛ̂i a ǹɛ́lɛɛ a gɛɛ ŋá sáa é tɛ́ɛ la ŋá lɛ́ɛ a ŋ́gao ma.
16Ŋá kɛ̀ ɣéniɛi ƃɛlɛ a kpɛɛ ŋ́goi.
Ḿve ŋɔ́nɔ ŋ̀wɛ̂lii ŋá kɛ́ ɣele ma.
Ye tée ḿâ kpɛ́ni fêi ŋá kɛ̀ ɣéniɛi su fé ŋɔ́nɔ kôyaa-ni.
17“Núu-kpune káa a lé ǹyaa m̀aa mɛ̂ni kpanaŋɔ̂ɔi yâ a gɛɛ tii?
Eêi pɔ̂ri kɛ̂i a ǹɛ́lɛɛ eê kɛ̀ ífe núu-kpune maa mɛ̂ni siɣe ní a gbanaŋɔɔ.
18Ya nàa kàa a ɣele wâla kélee,
íkɛ m̀aa kpɛɛ a ŋ̀ánaai.
19Ífa íŋɛi sìɣe ḿâ a da-loŋ,
í nɛ̀ɛ naa ŋá ǹá-ya kpîŋ kpele?
20À kɛ̀ ŋa sɔnyɔ̂ŋ kɛ̀, lé ƃé a pâi gɛ̂i a yá?
Yái ya núu maa kpɛ̂ɛ a ŋánaai,
lé mɛni ƃé ya ḿonîi nɔ́ la gîe mɛi a tãi kéleei?
Lé mɛni ƃé ŋaâ kɛ́ la yɛ̂ɛ kpîri wuyɛɛ à kɛ̀ íŋûai?
21Lé ƃé ífa íyee sèe ŋá pɔara mɛni mai mu,
í nia ŋá mɛni nyɔ́mɔɔi mai?
Ŋuŋ-la a pá pilîi tãi kpua yée mu.
Ya pâi ŋ́gɔ̂rii a ŋ̀ánaa kɛ́lɛ fé pâi ŋɔ́nɔ kɛ̂i naa.”
Currently Selected:
Zôo 7: KWB
Highlight
Share
Copy
Want to have your highlights saved across all your devices? Sign up or sign in
