Zôo 31
31
1Ŋ́âa ḿvoo a gɛɛ ḿve pâi ŋ́gili-ŋa siâi
é pîlaŋ nɛnî-kpela kélee da mà lɔ-pɔ̂rɔŋ mɛni ma.
2Lé ƃé Ɣâla a pɔ̂ri gɛ́i a ńyãa?
Ŋ̀wála-wâla kélee Ɣalai nyii gáa Ɣâla-taai fé pâi fela-fei lɛ́lɛɛ da tɛɛ̂i ḿbɔ.
3Tɔ̃yâ ma, Ɣâla a ŋ̀wana-lɔ̂ɔ-ƃelai kɛ̀ dímɔ̃lɛ,
é mɛni kpɔ̂lu láa dîa.
4Ɣâla è berei kɔ́lɔŋ ŋákɛ̀-ɣeniɛi káa lai.
Ɣâla a m̀ɛni-ŋai kélee kàa ŋa gɛ̂i.
5Ḿve ta lɛ́ɛ kɛ́-ní núu da ma
kpaa máŋ ŋá núu da pɛlɛ.
6Tɔɔ Ɣâla é ŋámɛnii ŋá tée a teniŋ ƃô-pere,
é gɔ́lɔŋ a gɛɛ ńzɔŋ fé m̀ɛnii ŋí su.
7À kɛ̀ ŋaâ pɔara berei mâ è nɛ̀ ḿâi,
ŋ́ɛi a zɛŋ káa nyii ḿve ŋ̀wɛ̂lii ŋá gáai,
à kɛ̀ mɛni nyɔ́mɔ kɛ́ɛ a bɔ́ɔ lɛ́ɛ ḿâ,
8Ɣâla é ŋá mii-sãai tɛ́ɛ núu da kpɛ́ni-ŋa pɔ́ a gɛɛ dí mii,
é ŋási-sãai kélee kpɔ́ su kara.
9À kɛ̀ ŋ́gili káa ḿarâŋ-nuu da ŋɔnɛnî ma,
ŋ́gɛ m̀aa nûui maa kpɛ̂ŋ a gɛɛ é kúla ŋɔpɛ́rɛi mu a gɛɛ ŋá lɔ-pɔ̂rɔŋ kɛ́ a ŋɔnɛnîi,
10gɛ̀ ní ŋá nɛnîi é kɛ́
a ḿarâŋ surɔŋ pɔ́ɔ.
11Tɔɔ zɔnyɔ̂ŋ sii ŋí gula maa é kɛ́ a saa.
12À kɛ̀ ŋa lɔ-pɔ̂rɔŋ kɛ̀ a m̀arâŋ surɔŋ ŋɔnɛnî,
gáa nɔ́ yɛ̂ɛ ŋɔŋ a kɛ̀ ŋ́gerenîi nyii a ŋ́gɔ̃liŋ kélee su karai.
13À kɛ̀ ǹɛyâai kpaa máŋ zinaai da tíi kɛ̀ mîi,
da a kɛ̀ ŋ̀wɛ̂lii é lóno é pîlaŋ ŋá mɛni nyɔ́mɔɔi ma, ḿva gbèra mà.
14À kɛ̀ ḿve tûa-ni a dia a ǹɛ́lɛɛ,
gɛ̀ ní Ɣâla a pà ŋá mɛnii ŋáteêi, ŋa pâi kɛ̂i ma lé?
15Bere sii nɔ́ ńee è maa sɔlɔ ƃô lai,
bere nɔ́ ƃé ŋátii kɛ́-ƃelai dílee-ni dí dímaa sɔlɔ ƃô la.
Ŋ̀âla tɔnɔi nɔ́ ŋ́gbɛ̀tɛi, ǹyaa ƃé díkpɛ̀tɛ máŋ.
16Zɛŋ kélee gôlo-ƃelai da ŋ̀wɛlii,
ŋa dɛ̀ɛ dípɔ, ŋ́gɛ kpɔŋ mâa tɛ̀ɛ bɔɔ-nɛyãai pɔ.
17Kpaa máŋ ḿve tá ǹɛɛ ní naa puru é dee-loŋ-ŋai da pàa
tãi nɔ́ mii-sɛŋ káa la ńyêei.
18Ŋá kâa dí kùla zu yɛ̂ɛ sɛŋ ƃé ŋákɛ̀ a dí nâŋ.
Ŋá bɔɔ-nɛyãai maa kɔ̃ɔ kpɔ́ a tãi kélee.
19Tãi kélee ŋá kôlo-nuu kàa
gɛ́ sàa kpɛ́ni fêi seɣe fé kɛ́ ní ǹyêei,
20ǹyaŋ dí lûwa tòo ḿâ kpɛ́ni fêi,
ŋa kâa ƃála-leɣa-seɣe tɛ̀ɛ dípɔ díkponôi fãa mɛni ma.
21Ḿve tá máŋ ní ŋáwala-wala-laai ma,
ŋá tee-loŋ da fili.
22À kɛ̀ ŋá gɛ̀ tí,
gɛ̀ ní tɔɔ ŋ́garaŋ é ɣále é kúla gbulɔ̂ŋ ŋa.
23Ŋá kɛ̀ yaôi Ɣâla ma
nya ƃe gɛ̀ ḿve m̀ɛni nyɔ́mɔɔ-ŋai ŋí da kɛ́ ní.
24Ḿve tá ŋ́gili tɔɔ ní ŋátɔɔ-sãai ma,
ḿve tá gɛ́ ní tí a dɔnɔ kpîŋ,
25kpaa máŋ ŋá yoŋka tée ŋá tɔɔ-sãai mɛni ma
kpɛ́ni fêi ŋa sɛŋ támaa sɔlɔ ƃó.
26Ḿve tá wɔ́lɔ vóloi fɛli-ni berei máŋ a fôloi lai,
kpaa máŋ ŋá ŋ̀áloŋ fɛ́li ǹɛ́lɛ mɛni ma.
27Ḿve ta wɔ́lɔ ńyee see-ni dímu,
kpaa máŋ ŋá ƃaa kɛ́-maa tɛ́ɛ dí pɔ́ pere sîi kélee da su.
28À kɛ̀ ŋa gɛ̀ tí, gɛ̀ ní ńdɔɔ̂i Ɣâla ma.
Tɔɔ Ɣâla é ŋ́gula maa kɛ́ zɔnyɔ̂ŋ sii ŋí mɛni ma a saa.
29Ńii fé tá nɛ̃ɛ ní tãi ŋá ŋ́gbɔara-ƃelai kâa la mɛni kpɔ̂lu sui.
Ḿve tá lii-nɛ̃ɛ kula ní a tãi laa-kpala maa mɛ̂ni a kûla la dîai.
30Ḿve tá Ɣâla fɛli ní dí su-kara mɛni ma.
31Ŋ́gaayɔɔ-ŋai kélee dí gɔ́lɔŋ a gɛɛ diai kélee kùla ḿâ a ŋɔ̃yai,
ŋá díseêi kùla kpɔ́ a ǹɛ́lɛɛ.
32Ḿve tá nɛ̀ɛ ní naa ŋ̀ɔ̃ya-ŋai dí nyíi banaŋ mâ.
Ŋá kpôŋ lá a kɛ̂ nɔ́ a móɔɔ a tãi kélee dɛ̀ɛ-a-pere-ŋai perêi.
33Ḿve tá ŋásɔnyɔ̂ŋ loo-ni,
yɛ̂ɛ berei núu da-ni da sɛŋ lôo la díseɣei mui.
34Ḿve kɛ́ ní seêi ŋápɛrɛi lá mɛi-saa,
kpɛ́ni fêi ŋá kɛ̀ yaôi ǹûai dîa a gɛɛ dífa lâa ńaa ƃó la,
kpaa máŋ dí mɛni nyɔ́mɔɔ ƃó a ńaa.
35Eé ŋá ŋ̀wɛ̂lii núu da é ŋ̀óli tɔ́ɔ ḿâ!
Ŋa ḿvooi a gɛɛ m̀ɛni-ŋai kélee ŋa môi gáa a tɔ̃yâ.
Tɔɔ Ŋ̀wála-wâla kélee Ɣala é ŋ́oo su too.
Ŋ́âi pɔ̂ri ŋápɔara-mɛni maai kâai eêi kɛ̀ ǹúui ńzɔŋ lâai eêi bɔ̃yɛ kɔlɔ ma.
36Gɛ̀ ní ŋâi pà ǹâai ŋ́garaŋ ŋá, ŋá lí la a gɛɛ núu kélee é gáa.
Ŋâi pà ǹɔ̂i ŋ́ûa yɛ̂ɛ kâloŋ-ƃɔrɔ.
37Ŋâi pà m̀ɛni-ŋai ŋá gɛ̀i, gélee ŋá lɛ̂i mà.
Ŋâi pà lônoi bɔ́ yɛ̂ɛ kâloŋ nyii zɔŋ fé m̀ɛnii su.
38À kɛ̀ ǹɔii ŋa tíi kɛ̂i mai ŋá ŋùma ǹâmu yêei,
kpaa máŋ ŋá ǹɔii sóŋ a nyɔ́mɔɔ,
39à kɛ̀ ŋá ǹɔii ma si-sãai m̀á mìi
diai tíi kɛ̂i naai dí kɛ́ sàa a puru,
40gɛ̀ ní ŋalêŋ é sóo ŋá wîi pɔ́ɔ ŋá,
kpaa máŋ ŋumɛ-bàa é sóo ŋábalei pɔ́ɔ ŋá.
Ƃɛ́i ŋí ƃé Zôo è ŋ́oo ŋuŋ lâa naa.
Currently Selected:
Zôo 31: KWB
Highlight
Share
Copy
Want to have your highlights saved across all your devices? Sign up or sign in
