Zôo 30
30
1Ǹîa-pɛlɛɛi nyii-ŋai dífe tɛ́-ni ḿbɔi díkaa nâa ɣɛ́lɛ-maa kulâi ŋ́gbonôi.
Dínâŋ-ni kpɛ́ni-kpɛniɛi kpɔ́ a sɛŋ nyii ḿva pɔ̂ri dí marê kɛ̂i a gɛɛ dí kpɔŋ mâa tɛɛ ŋáɣila-ŋai pɔ́ a gɛɛ dí ŋáƃála-ŋai mɛi kaa.
2Lé mɛni lɛ́lɛɛ ƃé ŋa pɔ̂ri gulâi núu kɛ́ɛ-ŋai tí kponôi,
díkpono su a gbâa sàa.
3Ǹûai ŋí díkɛ̀ kpɔ́ a díkôloɔɔ díkɛ sàa a puru,
díkɛ wúru-same kulâi ǹɔii kpalai ma vɛ̃ɛ-kpâlaŋ su a kpíni díkɛ mìi.
4Díkɛ̀ wúru-ŋa wêyenii vɛ̃ɛ-kpâlaŋ su díkɛ zame mîi.
É máŋ kɛ́ yɛ̂ɛ wawa-wuru-same nyii nɛ̃ɛ pɔ̂ɔ fé mai.
5Ǹûa díkɛ̀ lâɣii dîa díkɛ dí kpɛ̀
yɛ̂ɛ da kɛ̀ ŋúma-ƃela kpɛ̂i. 6Díkɛ̂i nɔ́ ƃé kɛ̀ a nóa-ŋai su
da kɔni wôlo-ŋa.
7Díkɛ̀ wɔ̂lɔi yɛ̂ɛ fɛnɛ-sãa ƃé wɔ̂lɔi kwaa kôyaa ma.
Da díŋa tɛ̀ gîe ma kpɔlɔ mu.
8Díkaa a ǹûa kpɛ́ni-kpɛni ŋá kpɛ̂ɛ dîa.
Nyii-ŋai dí díkpɛ dílɔii ma.
9Ǹyaŋ dínîa-pɛlɛɛi da pá díkɛ ɣɛ́lɛ-maa kûla ŋ́gbonôi.
Ŋ́gaa nɔ́ nâa a díɣɛlɛ maa-sɛŋ.
10Da tûa a ńyãa a nyɔ́mɔɔ da dípôlu tɔɔ ḿâ.
Ḿɛlɛ è kɛ̀ a gbɛ́ɛ díkoi da ŋ́gàa díkɛ dílâya pù.
11Ɣâla a ŋákerâŋ ɣɛli tée. M̀ɛni ma pɔ̂ri fé ŋɔ́nɔ mî.
Tãi dí ŋ́gàa lai, dí dínîa kɛ̀ a ńyãa.
12Díkɛ a díkpulu dípɛlɛ ḿâ.
Dí ŋ́gɛ̀ ŋá pú.
Dí pɛ̀lɛ ḿâ díkɛ ŋ̀wɛli dí ḿbaa.
13Dí ḿberêi pù a gɛ́ɛ ḿva lâa pú la.
Dí gɛ̀ ƃâa é kúla ḿâ.
Núu da fé naa é kpɔ́ŋ mâa tɛɛ ḿbɔ.
14Ziɣãŋ nyii kɛ̀ ḿaa kɔ̃ɔ̂i, dí ŋ̀olo.
Dí kɛ̀ pâi ḿâ yɛ̂ɛ ya ɣîliŋ.
15Ŋá yào kpɔ́ a ŋánaa é tɛ́ɛ ńii pôlu.
Ḿaa kɛ́-maai nûa da kâa dɛ̀ɛ ḿbɔi a tɛɛ̂i nɔ́ yɛ̂ɛ fãa a tɛ̀ɛ.
Gili kɛ́-zui nyii gáa ńyêei é pîlaŋ ŋáwala-wala-laai mai a tɛɛ̂i nɔ́ yɛ̂ɛ ŋ̀ele-kɔlɔŋ kolei.
16Ŋákɛ̀-ɣeniɛi a nâa pá kpɛɛ̂i.
Ŋámɔ̃lɛ-laai kɔ́yɛŋ fé mà.
17Kpíni a pɛ̀lɛ, ŋ́gao kélee a kɛ̂ sôlii ŋ́gbonôi.
Zɛŋ sôli-maai a mɔ̃lɛi kpɔ́ gɔ́yaŋ fé ma.
18Ɣâla è ńzòŋ kpɔ́ a ŋáseɣei a wála-wala-laa
é kánaŋ kpɔ́ ŋ́gɔŋ ma yɛ̂ɛ yɛkɛ-kɔŋ lá koro-te a kànaŋ nâmu kɔŋ mâ.
19Ɣâla a ńdoo ǹɔii ma bɔ̂rɔi su
ŋa kɛ́ yɛ̂ɛ muluŋ da luu.
20Óo Ɣâla, ŋá ítòlii,
kɛ́lɛ, ífe íwoli tɔɔ̂i ḿâ.
21Ya tûa kpɔ́ a ńyãa a ŋwana-lɔ̂ɔ-pere.
Ya ḿɔ̃lɛ a íwala-wala-laai kélee.
22Ya gɛ́ vãai a ńziɣe a koôŋ a ńyãa,
gɛ́ ńdòo-too.
23Ŋá gɔ́lɔŋ a gɛɛ íkaa nâa liî a ńyãa dɔ̃yâ kanai
ƃɛ́i núu kélee à sàa a lî naai.
24Lé mɛni ƃe ƃa pɛ̀lɛ la ǹúui mà nyii gáa mɔ̃lɛi,
ǹúui nyii va pɔ̂ri mɛni da kɛ̂i fɛ̂ɛ nɔ́ é fɛli kɛ́ kpɔŋ mâa mɛni mai?
25Diai mɔ̃lɛi ŋá dímaa wɔ̂lɔ kɛ̀ a tãi támaa.
Diai sɛŋ-da fé díyêei, ŋá dímalôŋ sèe.
26Tãi kili kɛ-zu è kɛ̀ la ńyêei a gɛɛ ŋá mɛni lɛ́lɛɛ sɔlɔ ƃôi,
lii-too pôlu ƃé ŋá zɔlɔ ƃô.
27Ńii káa nɔ́ kpɛ̃linii ŋ́goi.
Ŋá mɔ̃lɛ-laai su kɛ́ kɛ̀tɛ nɔ́ a ɣele kélee.
28Ńii toɔɔ̂i kpɔ́ pôlu, vóloi fa pɔ̂ri toôi é ŋánɛnɛ.
Ŋá tɔ̀ɔ daa-ƃelai díkɔ̃yɛŋ su ŋ́gɛ ǹûai marê kɛ̀ a gɛɛ díkpɔŋ mâa tɛ̀ɛ ḿbɔ.
29Ŋ́gaa nɔ́ yɛ̂ɛ fɛnɛ-sɛŋ,
ŋá maloŋ-too-maai su, kpaa máŋ yɛ̂ɛ mûu.
30Ŋ́gɔlɔ a tɛ̂i ḿâ ŋ́olo-woloŋ kɛ́ ƃò.
Ŋ́gɔlɔ a fãa kpɔ́ ḿâ a ŋánaa ŋ́gbonoi kɛ́ kèreŋ.
31Ŋá ɣale-sãai wóo a kɛ́ a wɔ́lɔ-woo,
ŋáturu-wooi kɛ́ ƃò yɛ̂ɛ saa wɔ̂lɔ kɛ́-ƃela wóo.
Currently Selected:
Zôo 30: KWB
Highlight
Share
Copy
Want to have your highlights saved across all your devices? Sign up or sign in
