Zôo 32
32
Ɛliu lóno-ŋai
(32:1--37:24)
1Zôo m̀araa saaƃai kɛ́ɛ da gáa a gɛɛ è kɛ̀ a maa waa gbîŋ ŋɛ́i, dí nâa dí mɛi sâa dífe ŋɔ́nɔ ŋ̀óo su too ní a dɔnɔ kpîŋ. 2Nya ƃe Ɛliu nyii kɛ̀ tɔɔ̂ni naai è nâa ǹíi ŋ̀wana Zôo ma kpɛ́ni fêi, Zôo è kɛ̀ môi a gɛɛ vé niî mɛni nyɔ́mɔɔ da kɛ́ ní. Kɛ́lɛ Ɣâla ƃé mɛni nyɔ́mɔɔ kɛ̀. Ɛliu è kɛ̀ a Barasiɛ ǹóŋ. Barasiɛ kɛ́ ƃò a Buzi-nuu. È kɛ̀ a Laŋ ŋɔsuui su nuui da. 3Ɛliu è ǹíi ŋwàna Zôo ǹâoi-ni dîa, kpɛ́ni fêi dífe pɔ̂ri ní môi a gɛɛ Zôo è kɛ̀ mɛni nyɔ́mɔɔ kɛ̂i. Dí gɛ̀ yɛ̂ɛ sɛŋ ƃé Ɣâla ƃé kɛ̀ mɛni nyɔ́mɔɔ kɛ̂i. 4Ɛliu è mɛi sâa é lɛ́ɛ la zu díkelee díkpɛɛ a lónoɔɔ kpɛ́ni fêi, nya ƃé kɛ̀ a ǹôloŋ ɣelei dí sáma. 5Ɛliu kɛ́ɛ a gáa a gɛɛ Zôo ǹâoi-ni dífe kɛ́ ní ŋ̀oo su toôi, è ǹíi ŋwàna dîa. 6È nâa pɛ̀lɛ lônoi.
Ŋ́gaa a lôloŋ.
Ǹyaŋ kákaa a núu pɔ̂lɔ-ŋa.
M̀ɛni ma ŋá kɛ̀ yaôi a gɛɛ ŋá ŋákili-ŋa sîai lɛ́ kâa.
7Ŋákɛ̀ môi ŋ́goi-pere ńyɛ̂ɛi
Tɔɔ ǹúu-pɔlɔ-ŋai dí lono a gɛɛ dí dítarei lɛ́.
8Gáa a tɔ̃yâ a gɛɛ núu kélee táreɛɛ̂i.
Kɛ́lɛ a dárei ŋí sɔlɔ ƃô Ŋ̀wála-wâla kélee Ɣalai yêei.
9Pɔlɔ-pɔlɔ-laa fa pâ a táre
kpáa máŋ é kpɔŋ kûa kú mɛni sãa ŋá káa.
10Mɛni ma, ka káwoli tɔ́ɔ ḿâ
ŋá m̀ɛnii lɛ́ kâa nyii ŋá gɔ́lɔŋ.
11Ŋá ŋ́oli tɔ̀ɔ kâa a gɛɛ ŋá berei káa ká mɛni ŋákaai káa lai.
Ká kɛ̀ kákili-ŋa siâi m̀ɛnii ma ka pâi môi.
12Ŋá ŋ́oli tɔ̀ɔ kpɔ́ kâa a ǹɛ́lɛɛ.
Kɛ́lɛ ḿve gáa ní ká ta é nɛ́ Zôo ma a gɛɛ m̀ɛnii è kɛ̀ môi vé a tɔ̃yâ.
13Káfe mò a gɛɛ kátareɛ̂ɛi.
Ɣâla nɔ́ ƃa pɔ̂ri Zôo wóo su toôi núu-kpune fêi.
14Zôo fé ŋɔmɛni ŋá lɛ́ɛi téniŋ tɔɔ ní ḿâ.
Berei máŋ vé gɛ́ ní tí lai, fé pâi ŋ̀óo su toôi yɛ̂ɛ berei ká gɛ̀ lai.
15Zôo, ílaôi-ni wóo a láŋ díla,
m̀ɛni ma dífe berei kɔ́lɔŋ dí íwoo su too lai.
16M̀ɛni ma ŋá lɛ́ɛ a ḿɛi saá fé lòno ípɔ kpɛ́ni fêi dí mɛi saâi?
Dítɔ̂ɔi naa dífe mɛni da ƃôi yâ.
17Ńyãa máŋ ŋa pâi íwoo su toôi.
Ŋa pâi ŋákili-ŋa siâi lɛ̂i yâ.
18Wóo támaa káa ńa mó mɛ̂ni ma.
Ḿva pɔ̂ri ńii ma sonîi mó mɛ̂ni ma.
19Ńa fɛ̂ɛi kpɔ́ yɛ̂ɛ núu a lɔɔ pû sua-kɔlɔ gonoŋ su a ǹá tɛ̀.
À kɛ̀ ŋa wàla lóno, ŋa pâi ƃêlai.
20Tɔ̃yâ ma, fɛ̂ɛ nɔ́ ŋá lóno.
Ḿva pɔ̂ri lɛɛ̂i a mɛi sâa.
21Ḿve pâi tɔɔ̂i núu da pôlu.
Ḿve pâi núu da mu tɛ̂i a ńa-woo folo.
22Kpɛ́ni fêi, ḿve berei kɔ́lɔŋ ŋa pɔ̂ri núu da mu tɛ̂i la a ńa-woo foloi.
Ŋà gɛ̀ tí, gɛ̀ ní Ŋ́gbɛ̀tɛ nuui a pâi ḿbaâi.
Currently Selected:
Zôo 32: KWB
Highlight
Share
Copy
Want to have your highlights saved across all your devices? Sign up or sign in
