Zôo 21
21
Zôo è Zofa wóo su tòo ŋɔ́nɔ
1Nya ƃe Zôo è Zofa wóo su tòo ǹyɛɛi, 2“Ŋ̀aa-nɛnɛi nɔ́ ya pɔ̂ri gɛ̂i ḿîi
ƃa í íwoli tɔ́ɔ ḿâ a ǹɛ́lɛɛ.
3Ka kálii kpéle ká káwoli tɔ́ɔ ḿâ a ǹɛ́lɛɛ. Ŋà kpɛ̀ɛ a lónoɔɔ,
gɛ̀ ní ka pɔ̂ri ɣɛ́lɛ maa kulâi ŋ́gbonôi.
4“M̀ɛnii ŋa zaâi, vé pîlaŋ-ní núu-kpune ma.
M̀ɛni ƃé fé pâi ńii maa sonîi la.
5Ka ŋ́gaa. M̀ɛnii kɛ̂i a ńyãai gáa a laa kpâla maa mɛ̂ni
nyii a pɔ̂ri gɛ̂i ká fa pɔ̂ri lônoi.
6Ŋá máŋ ŋ́gili-ŋa sía é pîlaŋ ŋá mɛni kpɔ̂lui mâ, ŋa yào kpɔ́ a ŋánaa.
Ŋ́gbonôi gwaa kélee a kɛ̂ kpɛ̃linii ḿâ a ŋánaa.
7“Lé mɛni ƃé Ɣâla a ǹɛɛ̂i la naa a gɛɛ ŋ̀wana-lɔ̂ɔ-ƃelai díkɛ nâmu ɣele mâ
é lɛ́ɛ la zu dípɔlɔ díkɔ̃liŋ támaa kɛ́ ƃò mai?
8Dínîa-pɛlɛɛi da kɛ̂ díkɔlɛ mâ é lɛ́ɛ la zu
dílônii díwɔ̂-lonii díkula zu.
9Da kɛ̂ dípɛrɛ-ŋai mû lii-see su, dífa yào a gɛɛ núu da a pâi dípɛrɛi wôloi.
Ɣâla fa dímɛnii ŋá tèe a ŋɔsia-tuaŋ.
10Tãi nɔ́ ŋ̀wana-lɔ̂ɔ-nuui ŋɔniŋa-sirɛi a tɛ̂ la záa-ŋai dîai da díkaa a ǹɛ́lɛɛ.
Ŋ̀wana-lɔ̂ɔ-nuui ŋɔniŋa sâa-ŋai da díkaa kpɔ́ a ǹɛ́lɛɛ.
11Dínîa-pɛlɛɛi da kɛ̂ pêle kɛ̂i díkɛ kîrɛ sìɣe
yɛ̂ɛ ƃála-lonii-ŋa díkɛ mãla.
12Dínîa-pɛlɛi da kɛ̂ wule tôoi nûa díkɛ nyɛ́ŋ-nyɛŋ ɣàle da kɔnîŋ.
Dínîa-pɛlɛɛi díkɛ mãla ƃɔɔ fɛ́ɛ woo ma.
13Ŋ̀wana-lɔ̂ɔ-ƃelai da nâmu ɣele mâ díkɛ ƃò a dítɔɔ.
Ǹyaŋ dífa mɔ̃lɛ díkɛ sàa.
14“Ŋ̀wana-lɔ̂ɔ-ƃelai da kɛ̂ Ɣâla mà ‘Tée kúpôlu.
Kúfe ŋ̀wɛlii a gɛɛ kú mɛni da kɔ́lɔŋ é pîlaŋ yâ.
15Gbɛ̂ɛ ƃa Ŋ̀wála-wâla kélee Ɣalai nyii ŋ̀wɛ̂lii a gɛɛ kú ǹîa mɛni kɛi?
Kwa vɛ̀li, lé ƃé kwa zɔlɔ ƃô zui?’
16Gáa díkili-ŋa a gɛɛ díkpîŋ wala-wala-laai ƃé da tíi kɛ̂i la.
Fa ŋ́gili ŋá sìa yɛ̂ɛ dia a dɔnɔ kpîŋ.
17“Lé tãi ƃé ka tá gáa ŋ̀wana-lɔ̂ɔ-ƃelai díŋɔŋ é líiŋ?
Lé tãi ƃé ka tá gáa la kpalo é ƃéla dîai?
Ɣâla fé tá ǹíi ŋwána-ní dîa a gɛɛ dí mɔ̃lɛ.
18Dífe yɛ̂ɛ kala a gɛɛ vãai é tɛ́ɛ a dia.
Vãai a pɔ̂ri koôŋ-nii a dia?
19“Í mò yɛ̂ɛ Ɣâla a pâi dísɔnyɔ̂ŋ maa tɔ̂ŋ kpɛ̂i dínîa-pɛlɛi dîa.
Tɔɔ Ɣâla é ǹâŋ-ƃelai kula maa kɛ́ a gɛɛ dí dísɔnyɔ̂ŋ kɔ́lɔŋ.
20Tɔɔ ŋ̀wana-lɔ̂ɔ-ƃelai ŋí dia kpîŋ dí díkpîŋ sɔnyɔ̂ŋ maa mɔ̃lɛ-laai sɔlɔ ƃó.
Tɔɔ dí Ŋ̀wála-wâla kélee Ɣalai ŋɔlii ŋwânai kɔ̂ɔŋ.
21Dífa kɛ̂ a díkpaaŋɔɔ a gɛɛ
dí sɛŋ da lɛɛ dínîa-pɛlɛɛi mɛni ma dí lɛ́ɛ pâi saâi.
22Núu da fa pɔ̂ri sɛŋ lɛ̂i Ɣâla ma kpɛ́ni fêi,
wála-wala káa ǹyêei ŋ̀âla-taa kela-ŋai mɛi.
23“Núu da-ŋa dí kɛ̀-ɣeniɛi a lɛ̂ɛ a ǹɛ́lɛɛ
é lɛ́ɛ la zu dísaa. 24A mii-sɛŋ lɛ́lɛɛ támaa mìi.
Gɔlɔ kɛ́ ƃò mà nɛ̃ɛ-nɛ̃ɛ.
25Ǹúui da-ŋa lii-see fa kɛ̂ díyêei dí kɛ̀-ɣeniɛi su.
Da lɛ̂ɛ mɛni kpɔ̂lu su é lɛ́ɛ la zu dí sáa.
26Kɛ́lɛ núu kélee a pâi saâi dí díloo,
gbéli-ŋai dí dímii.
27“Ŋá kákili-ŋa sîai kɔ́lɔŋ é pîlaŋ ḿâ.
Ka gbɛ̀tɛ a gɛɛ ká mɛni nyɔ́mɔɔ kɛ́ a ńyãa.
28Ká mare kɛ̂ɛ kɛ̀ kâai,
‘Ŋ̀wana-lɔ̂ɔ kaloŋ tí ŋɔpɛ́rɛi kɔɔ?’
29Ka diai marê kɛ́ da sîa bere-ŋai mai,
a gɛɛ dí ká kíli-ŋa pono.
30Ɣâla a ǹíi ŋwàna à kɛ̀ pâi nûa kula maa kɛ̂i,
zɔnyɔ̂ŋ-ƃelai ƃé a dí malôŋ kàa.
31Núu da fé naa a gɛɛ é zɔnyɔ̂ŋ-ƃelai dí sɔnyɔ̂ŋ ƃó dîa
kpaa máŋ é dí kula maa kɛ́.
32Ǹyaŋ tãi da kɛ̂ liî la molôŋ lai,
ǹûa da kɛ̂ naa díkɛ m̀olôŋ mɛi kâa.
33Núu-kpulu kɛ́tɛ a kɛ̂ zàa mâ.
Ǹɔii a kɛ̂ líi nɛ̃ɛ̂i kulâi a gɛɛ é ǹyée sée mu.
34“Ka ŋáa nɛnɛ̂i a ƃoo-woo-ŋa.
Mɛni-ŋai nyii kélee kaâ ŋ́oo su tòo lai, gáa a lɛ́ɛ tèe-tee.”
Currently Selected:
Zôo 21: KWB
Highlight
Share
Copy
Want to have your highlights saved across all your devices? Sign up or sign in
