Zôo 20
20
Zofa è lòno a tãi veerɛ ɣelei
1Nya ƃe Naama-nuui Zofa è Zôo wóo su tòo ǹyɛɛi,
2“M̀ɛnii ya môi, aâ ńii tóo pôlu.
M̀ɛni ma tɔɔ ŋá íwoo su too.
3Tãi íkɛ̀ lônoi lai, ínàraŋ.
Mɛni ma ŋa pâi íwoo su toôi.
4“Ífe nîi gɔ́lɔni é síɣe tãi ma
Ɣâla è núu-kpune kpɛ̀tɛ la é bú ǹɔii ma ƃɛ́i,
5zɔnyɔ̂ŋ-ƃelai dílii-nɛ̃ɛi káa nɔ́ a tãi kpua?
Tɔ̃yâ ma, diai Ɣâla kíli fa lɛ̂ɛ dí ŋái dílii-nɛ̃ɛi káa nɔ́ tãi kpua yée mu.
6É máŋ kɛ́ a mù siɣɛ́ɛ dôŋ kɛ́ sèri Ɣâla-taa,
kpaa máŋ dɔɔ-mɛi kɛ́ ƃò yɛ̂ɛ ŋ̀ele-kɔlɔŋ,
7vãai a pâi tɛɛ̂i la yɛ̂ɛ muluŋ.
Diai kɛ̀ a gɔlɔŋɔɔi da pâi kɛ̂i díkili ŋá siâi mí ƃé a lí naai.
8Ŋ̀wana-lɔ̂ɔ-nuui a pâi tɛɛ̂i nɔ́ yɛ̂ɛ núu a sèe ƃô nyii gíli fé lɛɛ ní ŋái.
A pâi tɛɛ̂i nɔ̂ yɛ̂ɛ zĩ̂a a tɛ̀ɛ a núu.
9Diai kɛ̀ a gɔ́lɔŋɔɔi da dîa-ni díkɛ ƃò kwaa tɔnɔ mai,
dí fé pâi ŋɔ́nɔ wɔ́lɔ gâai.
10Ŋ̀wana-lɔ̂ɔ-nuui ǹônii da pâi zãai kélee
dínâŋ è gùla gôlo-ƃelai yêei bɔɔ-ŋa tôo tɛɛ̂i dípɔ.
11Berei máŋ gáa la a nyáŋkpa gbonôi kpanaŋɔɔi,
a pâi sâai dí nòo.
12“Ŋwana-lɔ̂ɔ nɛ̃ɛ̂i ŋ̀wana-lɔ̂ɔ-nuui lá.
M̀ɛni ma a ŋwana-lɔ̂ɔ líyeŋ lɔ́ ǹɛ́ŋ mu,
13gɛ́ ƃò naa a tãi su kôyaa ŋ̀aa-nɛɛ kula mɛni ma.
14Ǹyaŋ é máŋ ŋ̀wana-lɔ̂ɔ líyeŋ kpéle é yéŋ goi,
a kɛ̂ yɛ̂ɛ núu a kali ŋwâna kpèle.
15Gáa a wôya-nuu, a ǹûai kɔ̃liŋ kùla díyêei, kɛ́lɛ va pɔ̂ri m̀ɛi kâai.
Ɣâla a ǹûai kɔ̃liŋ kùla ǹyêei.
16Zɛŋ nyii è kɛ̀ gbelêi gáa a ŋ̀ale-maa.
Ǹyaŋ a pâi baâi yɛ̂ɛ kali ŋwâna.
17Ŋwana-lɔ̂ɔ-nuu fé pâi lɛɛ̂i ɣele ma a gɛɛ é kɔ̃́iŋ-wulɔ da niŋa ŋini-ya káa
gɛ́ ɣíliŋ yɛ̂ ya-lee a gɛɛ é ŋ̀aa-nɛ̃ɛ kula.
18Fɛ̂ɛ é zãai kélee è zɔlɔ ƃôi pɔɔ-ŋa tôo tɛɛ.
A pâi zɔlɔ-ƃo sãai kélee è gɔ̀rii tɛɛ̂i pôlu.
Vé pâi ŋɔsãai kélee da ŋaa-nɛ̃ɛ kulâi.
19Zu kulâi ƃa vé niî mɛni da kɛ́ ní a gɛɛ é kpɔŋ mâ tɛɛ gôlo-ƃelai pɔ.
A ǹûai dípɛrɛ-ŋai kùla díyêei.
20M̀ii-sɛŋ wɛliɛɛi, ǹíi fa lâa.
21A ǹáa mìi, da fa lɛ̂ɛ.
M̀ɛni ma, ŋɔtɔɔ-laai su fé pâi kôyaai.
22A nɛ̃ɛ ma é dɔɔ-sãai kélee sɔlɔ ƃó, lii-see fé pâi kɛ̂i ǹyêei.
Ŋɔmɔ̃lɛ-laai su a pâi nɔ́ kɛ̂tɛi.
23Tɔɔ é ǹáa míi é píla!
Ɣâla a pâi ǹíi ŋwânai kpɔ́ mà a ŋánaa é mɔ̃lɛ.
Ɣâla ŋɔlii-ŋwanai a pâi kɛ̂i a ŋɔmii-sɛŋ.
24É máŋ pú a gɛɛ kɔkuluƃa fé bàa a kpála nyii dí gbɛ̀tɛ a kɔlii,
da pâi baâi a ƃara sɔ̂la.
25Da pâi m̀óŋ-nii a sɔla é tɛ́ɛ ńii su é kúla bôlu-pere.
Mɛni kpɔ̂lu a pâi lâai mà.
26Da pâi gɔ̃liŋ kélee kulâi ǹyêei dí dísu kara.
Ŋɔŋ nyii núu-kpune fé doo nii,
a pâi gérenîi, gɔ̃liŋ dɔnɔ kpîŋ fé pâi lɛɛ̂i ǹyêei.
27Ŋ̀ele-kɔlɔŋ a pâi ŋɔmɛni nyɔ́mɔɔi maa-sere-faa kɛ̂i.
Ǹyaŋ ǹɔii a pâi ŋɔmɛnii ŋá têei yɛ̂ɛ mɛni-saa ƃó-nuu.
28Ya-fɛɛ a pâi tɛɛ̂i a ŋɔpɛ́rɛi
a tãi Ɣâla a pâi zɔnyɔ̂ŋ-ƃelai dímɛnii ŋá têei la a lii-ŋwânai.
29Bere sîi ŋí ƃé Ɣâla a pâi zɔnyɔ̂ŋ-ƃelai dímɛnii ŋá têei la.
M̀ɛni ŋá téɛɛ sii ŋí ƃé gáa Ɣâla yêei zɔnyɔ̂ŋ-nuui mɛni ma.”
Currently Selected:
Zôo 20: KWB
Highlight
Share
Copy
Want to have your highlights saved across all your devices? Sign up or sign in
