Zôo 19
19
Zôo è Beeda wóo su tòo
1Nya ƃe Zôo è Beeda wóo su tòo ǹyɛɛi,
2“Lé mɛni ƃé kákaa ńii toôi la pôlu a kálono támaai ŋí,
ká kɛ́ gɛ̀ ńii kɛ́ tòo pôlu a gɛɛ ŋíi?
3Kákaa nɔ́ ńarânii a ɣele kélee,
ŋumɛ fé ká ŋɛ́i a gɛɛ m̀ɛni-ŋai kákaa môi káa gɛ̂i ŋ́gɛ mɔ̃lɛ?
4À kɛ̀ ŋa mɛni nyɔ́mɔɔ kɛ́,
ká mɛni da fé zu.
5Ka gâai yɛ̂ɛ sɛŋ ƃé ká kɛ̂tɛi é tɛ́ɛ ḿâ.
Ka gâai yɛ̂ɛ ŋa mɔ̃lɛi kpɛ́ni fêi ŋá mɛni nyɔ́mɔɔ kɛ̀.
6Ka kɛ́ a gɔ́lɔŋɔɔ a gɛɛ Ɣâla ƃé gɛ̂i ŋ́gɛ mɔ̃lɛ.
A ŋɔdeɣaŋ kpíniŋ a ńyãa.
7Ŋa tóli ƃôi a gɛɛ ká kpɔŋ ḿâ nuu da fa ŋ̀oli tɔ̀ɔ ḿâ.
Ŋa tóli ƃôi kpɔŋ mâa mɛni ma,
kɛ́lɛ núu da fé naa é kpɔŋ ḿâ a teniŋ ƃô-pere.
8Ɣâla a siɣãŋ tínaŋ mâ a gɛɛ fé pɔ̂ri tɛɛ̂i.
A ńɛɛ kpînii a gɛɛ ḿve ńdɛ̀ɛ-pere kàa.
9A ŋátɔɔ-laai da ŋáƃaa kɛ́-maa kélee kúla ńyêei.
10A ŋ̀olo-wolo yɛ̂ɛ núu a pɛ́rɛ-kâŋ wòlo.
A ŋákili tɔɔ-maai ƃúleŋ yɛ̂ɛ núu a wúru ƃùleŋ.
11Ŋɔlii ŋwânai a ŋ́gerenîi.
A kɔ̂i ḿbɔ yɛ̂ɛ núu ƃé kɔ̂i ŋɔkpɔara-nuu pɔ́.
12Ɣâla a ŋɔkɔ-kuluƃa-ŋai tɛ́ɛ a gɛɛ dí pɛ́lɛ ḿâ.
Da gbã tée ŋápɛrɛi ma díkɛ díkpîŋ kpɛ̀tɛ a gɛɛ dí pɛlɛ ḿâ.
13“Ɣâla a gɛ́ ŋánûai da dípôlu tɔ̀ɔ ḿâ.
Diai kɛ̀ a ŋ́gɔlɔŋɔɔi da nia ḿâ.
14Ŋánûai da ḿarâai da dípôlu tɔ̀ɔ mâ.
15Diai kélee ŋá ńyee sèe dímui da nia ḿâ.
Ǹɛyâai da tíi kɛ̀ ŋápɛrɛi mui dífa ŋɔ́nɔ díwoli tɔ̀ɔ ḿâ.
Ŋ́gaa nɔ́ nâa díŋɛi yɛ̂ɛ ŋɔ̃́ya.
16Nalôŋ tíi kɛ̂i ŋápɛrɛi mui ŋá máŋ dóli,
va ŋ́oo su tòo a nɛ̃ɛ ma ŋá pɛ́lɛ a gɔ́ɔ.
17Ńa-kuŋ a nâa nyɔ́ŋ ŋánɛnîi sũai.
Ńîa kpaa máŋ ńêɣe sinaai da dímaa kôyaa ḿâ.
18Ŋ́gaa nâa a ɣɛ́lɛ-maa sɛŋ ǹîa-pɛlɛɛ-ŋai yêei.
Ŋá máŋ mu-siɣe a gɛɛ ŋá sía, da kɛ̂ ɣɛ̂lɛi ḿâ.
19Ḿarâai kwa dîa-ni kwa kâa kúlaa mìi gîe mai da dípôlu tɔɔ ḿâ.
Diai kélee ŋá kɛ̀ a díwɛ̂liɛɛi, da dípôlu tɔɔ ḿâ.
20Ŋa kpála ŋ́gɔlɔ sɛ̂lɛŋɔɔ nɔ́ ḿâ.
Naa è lɛ̀ɛ nɔ́ té a gɛɛ ŋá sáa.
21“Óo káai a ḿarâai, kákpera kâa ká malôŋ káa,
kpɛ́ni fêi Ɣâla a ńzoŋ a ńdoo ǹɔii ma.
22Lé mɛni ƃé ka ƃâa kulâi la ḿâ, yɛ̂ɛ berei Ɣâla a gɛ́ la a ńyãai?
Lé mɛni ƃé ka mɔ̃lɛi ŋí la a ŋ̀ánaai?
23“Eêi pɔ̂ri kɛ̂i a sɛŋ núu da é ŋ́oo pɔ̃yɛ
kɔlɔ ma nyii zu fa pɔ̂ri karâi.
24Tɔɔ núu da é bɔ̃yɛ kɔni ma
a kɔlɔ-pɔ̃yɛɛ kɔli a gɛɛ zu fa lâa kara la.
25Kɛ́lɛ é máŋ kɛ́ tí, ŋá gɔ́lɔŋ a gɛɛ núu da káa naa nyii pâi ḿaa kɔ̃ɔ̂i.
Nya ƃe pâi ŋá lónoi gbɛɛ-ŋai kɛ̂i.
26Kɛ́lɛ berei máŋ kɔlɔ-fela a ŋ́gbono kélee su kara lai,
ŋa pâi Ɣâla kâai.
27Ńyãa kpîŋ ŋa pâi gâai a ŋ́gbîŋ ŋɛi-gao.
Ǹyaŋ ŋa pâi gâai a ŋ́gɔlɔŋ nuu.
“Ńii a pâi tôoi pôlu, kpɛ́ni fêi ká mo kâai,
28‘Kwa pɔ̂ri gɛ̂i léŋ é mɔ̃lɛ a ŋánaa?
Ǹyaa kpîŋ ƃé pà a mɔ̃lɛ-laai gbîŋ pɔ.’
29Ka yao Ɣâla ŋɔmɛni ŋáteɛi ma.
Kpɛ́ni-fêi Ɣâla ŋɔlii ŋwânai a pâ a mɛni ŋáteɛɛ.
M̀ɛni ma kɛ́ a gɔ́lɔŋɔɔ a gɛɛ Ɣâla a mɛni ŋátèe sɔnyɔ̂ŋ-ƃela sáma.”
Currently Selected:
Zôo 19: KWB
Highlight
Share
Copy
Want to have your highlights saved across all your devices? Sign up or sign in
