Zôo 22
22
Dí zɛpɛ-wooi zaaƃai
(22:1--27:23)
Ɛlifa è lòno Zôo pɔ́ naa pôlu ŋɔ́nɔ
1Nàa kɛ́ɛ tíi, Tema naloŋ Ɛlifa è Zôo wóo su tòo ǹyɛɛi,
2“Zôo, ílâai la a gɛɛ
táre-nuu ŋɔtárei káa Ɣâla ŋɛ́i a sɛŋ da?
3À kɛ̀ íkaa a teniŋ ƃô-nuu, lé ƃé Ŋ̀wála-wâla kélee Ɣalai a pâi gulâi zui?
À kɛ̀ ísɔŋ fé yâ, lé ƃé Ɣâla a pâi gulâi zu?
4Ílaai la yɛ̂ɛ Ɣâla a ímɛnii ŋá têei gɛ́ í kula maa kɛ̂
kpɛ́ni fêi ƃa yâo ma íkɛ tíi kɛ̀ mì?
5Kpao! Ɣâla a íkula maa kɛ̂i kpɛ́ni fêi,
yaâ sɔnyɔ̂ŋ támaa kɛ́, ǹyaŋ ísɔnyɔ̂ŋ kɔyaŋ fé ma.
6Í mɛni nyɔ́mɔɔ kɛ̀ a sɛŋ-kao piliɛɛ ínûai dîa a kpa íkɛ dísãâi kùla díyêei
kpɛ́ni fêi dífa pɔ̂ri gbai têei. Íkɛ díseɣe-ŋai kùla dîa díkɛ lɛ̀ɛ a díkaŋ.
7Ífe yá tɛɛ-ní ǹûai pɔ́ kpele wɛ̂li è kɛ̀ díkɛ̂i.
Kpaa máŋ í mii-sɛŋ-loŋ tɛ̀ɛ diai pɔ́ puru è kɛ̀ díkɛ̂i a dɔnɔ kpîŋ.
8Ya ǹûai dílɔii kúla díyêei a íwala-wala-laai.
9Tãi bɔɔ-nɛyãai da ímarê kɛ̀ la sɛŋ da mɛni mai, ífa kpɔŋ mâa tɛ̀ɛ dípɔ.
Yâ ípôlu tɔɔ dee-loŋ-ŋai dîa.
Ífa kpɔŋ mâa da tɛ̀ɛ dípɔ.
10Maa mɛni ma, mɛni-kpɔlu a tínaŋ yâ.
Ǹyaŋ íkaa nâa yaôi a ŋánaa.
11Kpíni a too yâ ífa ŋɔ́nɔ kwaa kâa.
Ǹyaŋ ya lɛɛ ǹyá fɛ̂ɛi su.
12“Ɣâla káa Ɣâla-taa ŋ̀elei su.
Ye ŋ̀elei su káa í gáa berei bɛmɛlɛŋ-kao-ŋai díkaa la kwaa kôyaa mai.
13M̀ɛni ma, ya môi yɛ̂ɛ, ‘Ɣâla fa pɔ̂ri m̀ɛnii kɔ́lɔnîi gáa kɛ̂i.
A pɔ̂ri núu-kpune ŋɔmɛnii ŋá têei léŋ à kɛ̀ ŋ̀ele-kɔlɔŋ su kpíniɛɛi a ǹoo?’
14Gáa íkili-ŋai a gɛɛ ŋ̀ele-kɔlɔŋ su kpiniɛi a ǹoo va pɔ̂ri sɛŋ da kélee kâai,
gɛ́ sìa ŋ̀ele-kɔlɔŋ da ŋ̀ele-kɔlɔŋ kolei loai.
15“Ya gbɛ̀tɛ íkili-ŋa a gɛɛ
í íkɛ-ɣeniɛi kɛ́ yɛ̂ɛ berei ŋ̀wana-lɔ̂ɔ-ƃelai da gɛ̀ lai?
16Ya fɛ̂ɛ kɛ́tɛ è tɛ̂ɛ a dia
dí saa tãi é lɛ́ɛ pâi serîi.
17Ǹûai tí dí mò Ɣâla ma dîyɛɛi, ‘Ye tée kûa kúkɛ kúkpîŋ yèe ma.’
Dílâai la Ŋ̀wála-wâla kélee Ɣalai fa pɔ̂ri mɛni ŋánaa kɛ̂i a dia.
18É máŋ kɛ́ tí, Ɣâla a gɛ́ da sãâ támaa sɔlɔ ƃó.
Kɛ́lɛ ḿva târe ŋ̀wana-lɔ̂ɔ-ƃelai tûa-pere su.
19Tãi Ɣâla a ŋ̀wana-lɔ̂ɔ-ƃelai kula maa kɛ̂ lai,
deniŋ ƃô-ƃelai da kɛ̂ ɣɛ́lɛ-maa kulâi díkponôi.
20Tɔ̃yâ ma Ɣâla a díkɔ̃liŋ kélee síɣe,
ǹyaŋ díkɔ̃liŋ nyii a lɛɛ pôlui, ŋɔŋ a gélee kèreŋ.
21“Ka Ɣâla ka káloai kpɛtɛ laoi laa é kɛ́ káloai.
À kɛ̀ tí, Ɣâla a pâi gɛ̂i ílii é nɛ̃ɛ.
22Íwoli tɔ́ɔ Ɣâla ŋɔsɛŋ-lɛɛi ma.
Í ŋ̀óo lâai kɛ́ ílii su.
23À kɛ̀ ya pâi lâai a Ŋ̀wála-wâla kélee Ɣalai,
a pâi ítɔɔ̂i ítɔɔ̂i pɔlɔi ma. À kɛ̀ ya sɔnyɔ̂ŋ kɛ̂i, ípôlu tɔɔ ma í mɛni sãa kɛ́.
Gɛ̀ ní mɛni sãa a pâi kɛ̂i ípɛrɛi mu.
24Ye ígôo-ŋai kélee píli,
í ígôo lɛ́lɛɛ-ŋai píli gɔni-ŋai sáma ǹya kpâlai su.
25Tɔɔ Ŋ̀wála-wâla kélee Ɣalai é kɛ́ a ígôoi.
Tɔɔ é kɛ́ yɛ̂ɛ káne ƃé da ŋaa tɛ́ gîe ma.
26À kɛ̀ tí, Ŋ̀wála-wâla kélee Ɣalai a pâi kɛ̂i a íkili tɔɔ-maai.
A pâi ílii-nɛ̃ɛi su kɛ̂tɛi.
27Ya Ɣâla fɛ̀li, a pâi íwoo mɛnîi,
ǹyaŋ ya pâi íkono têei ŋa-see kɛ̂i nyii í gɛ̀ mìi.
28M̀ɛnii nyii kélee ya pâi gbɛtɛ̂i a gɛɛ í gɛ́i ŋ̀á a pâi kulâi ma.
Ƃɛ́i kélee kpɔ́ ya pâi siâi naai, nàa a pâi kɛ̂i a bonoɔɔ.
29Ɣâla a pâi zu-mɛni kɛ̂tɛ-ƃelai maa yenîi,
é diai maa tɛ́ da dí maa yêŋ ŋ̀ɛi-tuɛi.
30A pâi íŋuŋ maa ƃôi à kɛ̀ ísɔŋ fé yâ
íkɛ teniŋ ƃô mɛni kɛ̀.”
Currently Selected:
Zôo 22: KWB
Highlight
Share
Copy
Want to have your highlights saved across all your devices? Sign up or sign in
