Zôo 1
1
Sêtɔŋ è Zôo su kɔ̀ɔŋ
1Nalôŋ tɔnɔ è wɔ́lɔ kɛ̀ naa, ǹáa ƃé kɛ̀ a Zôo. È wɔ́lɔ kɛ̀ a Uzi lɔii su nuu. Nalôŋ ŋí a kâa yao Ɣâla ma, kili-tɔɔ maa kɛ́ ƃò ǹyêei. 2Zôo ǹônii díwɔlɔ kɛ̀ puu. Sinâa lɔ́ɔlu mɛi feerɛ da nɛyâa saaƃa. 3Núu da fé kɛ́ ní a dɔ̂ɔ é seri Zôo pɔ́ nyii kɛ̀ Eezuɛ-lɔii ŋɔfólo kulâi pere. Ƃála wála lɔ́ɔlu mɛi feerɛ (7,000) da soo-fáleŋ wála saaƃa (3,000) da tíi-kɛ-niŋa sirɛ wála tɔnɔ (1,000) é pɛ́lɛ wɛlɛ-sôo ŋuŋ lɔ́ɔlu (500) ma. Nalôŋ ŋí yée-mu-ƃelai díwɔlɔ kɛ̀ kpɔ́ a dítamaa pólo-polo.
4Zôo ǹônii sinaai da kâa kɛ̀ kúu kɛ̂i dí pɛ́rɛ-ŋai lá tɛi-tɛi. Tãi da kâa kɛ̀ gúu-ŋai ŋí kɛ̂i lai, da kâa dísaaƃɔlɔ saaƃai tòli naa a gɛɛ dí dílaa míi, díkpele-sãa kpele gîe ma. 5Gúui ŋí kélee a kpɛ̀ɛ, bôlu ma ɣele walai, Zôo a kâa mu sìɣe é sâla kula díkelee dí mɛni ma tɛi-tɛi a gɛɛ é dímaa-waa Ɣâla ŋɛ́i-tuɛ. A kâa m̀ɛnii ŋí kɛ̀ kpɛ́ni fêi a kâa kɛ̀ gíli-ŋa-siai gɛ́ mò ǹyɛɛi, “Tãi da ǹîa-pɛlɛɛi ŋí dɔnɔ è pɔara mâ kɛ̀ é tua-nyɔŋ kɛ́, é Ɣâla larâŋ ǹíi su-pere.”
6È kɛ̀ a tãi tɔnɔ da ŋ̀âla-taa kela-ŋai kélee dí pà a gɛɛ dí díkoraŋ ƃó Yâwɛɛ mì. Sêtɔŋ ǹyaa máŋ è pà naa. 7Nya ƃe Yâwɛɛ è Sêtɔŋ marê kɛ̀ ǹyɛɛ mai, “Mí ƃé ya kulâi naai?”
Sêtɔŋ è Yâwɛɛ wóo su tòo ǹyɛɛ mai, “Ŋ́gaa nɔ́ sia-siai, ŋ́gɛ tɛ̀, ŋ́gɛ yèŋ ǹɔii gwaa kélee ma.”
8Yâwɛɛ è Sêtɔŋ marê kɛ̀ ǹyɛɛ mai, “Yâa ŋátii kɛ́-nuui Zôo káa a gɛɛ gáa a núu sã́a, deniŋ ƃôɔɔ é tɛ́ɛ ǹûai kélee dîa ǹɔii ŋí mai? A bôlu tɔɔ mɛni nyɔ́mɔɔ kɛ́ɛ ma gɛ́ yào ḿâ.”
9Sêtɔŋ è Yâwɛɛ wóo su tòo ǹyɛɛ mai, “Zôo kɛ̂ɛi mɔ̃ɔi a tíi kɛ̂i yɛ̂ɛ kpɛ́ni-kpɛni? Vé tí a dɔnɔ kpîŋ. 10Ya Zôo da ŋɔnûai dí gɔ̃liŋ kélee mɛi kâai. Ya lûwa láa m̀ɛnii kélee ma nyii a gɛ̂i. Ya gɛ́ ŋɔtaa-tulɛ-ŋai da poo da ǹɔii láa fɛ́ɛ. 11Kɛ́lɛ à kɛ̀ yà íyee pɛ̀lɛ ma ígɔ̃liŋ kélee su kara, a pâi ílarânii íŋɛi.”
12Nya ƃe Yâwɛɛ è Sêtɔŋ wóo su tòo ǹyɛɛ mai, “Aà, gɛ̀ ní zãai kélee gáa ǹyêei gáa íwala-wala-laai mu, kɛ́lɛ ífe mɛni da kɛ̀ a ŋɔfúlu-laai.” Gɛɛ tíi, Sêtɔŋ è nâa kùla naa é lí.
Zôo ǹônii da gɔ̃lîŋ kélee su è kàra
13Naa pôlu ma, Zôo ǹônii kélee díkɛ̀ dílîa kɛ́tɛi ŋɔpɛ́rɛi mu díkɛ dílaa mìi, díkɛ kpele-sãa kpèle. 14Nya ƃe kéla tɔnɔ è kɛ̀ kîrɛ siɣêi é pá Zôo pɔ́naa bɛ́rɛi mu ǹyɛɛ mai, “Kúkɛ̀ ǹɔii wɔ̂rɔi a díi kɛ́-niŋa-sirɛ-ŋai, ŋ̀wɛlɛ-sôo saa-ŋai díkɛ dílaa mìi kúkɔlɛ ma galai ŋá. 15Nya ƃe ŋúma-ƃela dí kùla Siƃa-ŋai sáma dí pá dítoo kúsama dí ítii-kɛ-ƃelai kélee kpúŋ páa, dí díi kɛ́-niŋa-sirɛ-ŋai da ŋ̀wɛlɛ-sôo-ŋai kélee kpúŋ síɣe. Ńyãa tɔnɔ nɔ́ ƃé pù ŋá pá a gɛɛ ŋá mó yâ!”
16È lɛ̀ɛ nɔ́ pâi ŋ̀óo-ŋuŋ lâai gélai dɔnɔ kɛ́ ŋɔ́nɔ pà ǹyɛɛ mai, “Ŋ̀ele-gbana è tòo kpɔ́ kûa é m̀ála-ŋai da dímɛi káa-ƃelai kélee kpúŋ páa, ńyãa tɔnɔ nɔ́ ƃé lɛ̀ɛ a gɛɛ ŋá pá ŋá mó yâ!”
17Gélai veerɛi è kɛ̀ nɔ́ pâi ŋ̀óo-ŋuŋ lâai, dɔnɔ kɛ́ ŋɔ́nɔ pà ǹyɛɛ mai, “Too-maa kɛ́-ƃela dí kùla Babelɔŋ dí díŋa kɔ̀lɛ a díkpulu saaƃa dí pá dítoo kûa dí ítii kɛ́-ƃelai kélee kpúŋ páa dí zoo-faleŋ-ŋai kélee kpúŋ síɣe, ńyãa tɔnɔ nɔ́ ƃé lɛ̀ɛ a gɛɛ ŋá pá ŋá mó yâ.”
18Gélai zaaƃai é lɛ́ɛ pâi ŋ̀óo-ŋuŋ lâai, dɔnɔ kɛ́ ŋɔ́nɔ pà ǹyɛɛ mai, “Ínîa-pɛlɛɛi kélee díkɛ̀ kúu kɛ̂i dílîa kɛ́tɛi ŋɔpɛ́rɛi mu. Díkɛ̀ mii-sãa miî díkɛ kpele-sãa kpèle. 19Nya ƃe fãa kɛ́tɛ è kùla vɛ̃ɛ-kpâlaŋ su-pere é bɛ́rɛi wólo é pú dímɛi é díkelee kpúŋ páa. Ńyãa tɔnɔ nɔ́ ƃé kùla. Ŋá pà a gɛɛ ŋá mó yâ!”
20Nya ƃe malôŋ è tòo Zôo ma è mù sìɣe é tɔ́ɔ é ŋɔseɣei fála ma, é ŋuŋ kálaŋ ma é pîlaŋ ŋ̀úme ŋá, é dôŋ-la pîlaŋ ǹɔii ma gɛ́ Ɣâla fɛ̀li. 21È mò ǹyɛɛ, “Ḿve pá ní ƃɛ́ a sɛŋ da, ǹyaŋ fé pâi liî a sɛŋ da. Yâwɛɛ ƃé dɛ̀ɛ ǹyaŋ, Yâwɛɛ aâ ŋɔ́nɔ zìɣe pôlu. Laa ma-tɛ é tɛ́ɛ Yâwɛɛ pɔ́.”
22Berei máŋ m̀ɛni-ŋai ŋí kélee è kɛ̀ la a Zôoi, vé sɔnyɔ̂ŋ dɔnɔ kɛ́ ní a Ɣâla kpaa máŋ é Ɣâla sɔŋ síɣe.
Currently Selected:
Zôo 1: KWB
Highlight
Share
Copy
Want to have your highlights saved across all your devices? Sign up or sign in
