Zôo 2
2
Sêtɔŋ è ŋɔ́nɔ Zôo su kɔ̀ɔŋ
1È kɛ̀ a tãi tɔnɔ da, ŋ̀âla-taa kela-ŋai kélee dí ŋɔ́nɔ pà a gɛɛ dí díkoraŋ ƃó Yâwɛɛ mì. Sêtɔŋ ǹyaa máŋ è ŋɔ́nɔ pà naa. 2Nya ƃe Yâwɛɛ è m̀arê kɛ̀ ǹyɛɛ mai, “Mí ƃé ya kulâi naai?”
Sêtɔŋ è Yâwɛɛ wóo su tòo ǹyɛɛ mai, “Ŋ́gaa nɔ́ sia-siai, ŋ́gɛ tɛ̀ ŋ́gɛ yèŋ ǹɔii gwaa kélee ma.”
3Nya ƃe Yâwɛɛ è Sêtɔŋ marê kɛ̀ ŋɔ́nɔ ǹyɛɛ mai, “Í ŋátii kɛ́-nuui Zôo kàa a gɛɛ gáa a núu sã́a, deniŋ ƃôɔɔ é tɛ́ɛ ǹûai kélee dîa ǹɔii ŋí mai? A bôlu tɔɔ mɛni nyɔ́mɔɔ kɛ́ɛ ma gɛ́ yào ḿâ. Í ŋ́gɛ a gɛɛ ŋá ǹɛɛ naa í vũa-fũa yɛ̂ɛ muluŋ nyii ŋuŋ fé kɛ́ ní ma, kɛ́lɛ vé mɛni nyɔ́mɔɔ kélee da kɛ́ ni.”
4Sêtɔŋ è Ɣâla wóo su tòo ǹyɛɛ mai, “Zôo fé niî sɔnyɔ̂ŋ kɛ́ ní, kpɛ́ni fêi, ífe niî lɛɣɛ-ni gbono ma. Kɛ́ a gɔ́lɔŋɔɔ núu a pɔ̂ri gɔ̃liŋ kélee kɔlɛ̂i a gɛɛ ŋɔfúlu-laai é lɛ́ɛ ǹyêei. 5Kɛ́lɛ à kɛ̀ yà íyee pɛ̀lɛ mà ísɛŋ sóli mà, a pâi ílarânii íŋɛi-tuɛ.”
6Nya ƃe Yâwɛɛ è Sêtɔŋ wóo su tòo ǹyɛɛ mai, “Áa, mɛnii kélee káa íwala-wala-laai mu. Kɛ́lɛ ye ŋɔfúlu-laai mɛi káa.”
7Naa kɛ́ɛ tíi, Sêtɔŋ è kùla Yâwɛɛ ŋɛ́i-tuɛ é lí é pala tée Zôo kpono gwaa kélee kpúŋ ma. 8Zôo è lì é sée ǹuui su é leɣi-kalaŋ siɣe gɛ́ balai ŋá wɔ̀rɔ la. 9Nya ƃe ŋɔnɛnîi è mò ma ǹyɛɛi, “Íkaa nɔ́ niî Ɣâla pôlu a teniŋ ƃô-pere m̀ɛni sãŋ ŋí kɛ́ kɛ̀ a yá? Lé ƃé ífa ípôlu tɔ̀ɔ Ɣâla mà í sáai?”
10Zôo è ŋɔnɛnîi wóo su tòo ǹyɛɛi, “Ya lôno nɔ́ yɛ̂ɛ ǹɛnî-ŋai nyii-ŋai dífe Ɣâla kɔ́lɔŋ. À kɛ̀ Ɣâla a mɛni lɛ́lɛɛ tɛ̀ɛ kú pɔ́ kúku yée sée mu, lé mɛni ƃé a mɛni kpɔ̂lu làa la kûa kúfa kúyee sèe mui?” Berei máŋ Zôo è mɛni sôli kàa lai, vé lóno-ni a nyɔ́mɔɔ é pîlaŋ Ɣâla ma.
Zôo ǹâoi-ni dí lì nàa kâai
11Tãi Zôo ǹâoi-ni dí ŋɔmɛni kpɔ̂lui duŋ mɛ̀ni lai, ǹâoi-ni zaaƃa dí lì nàa kâai a gɛɛ dí ŋanɛnɛ. Dia saaƃai lì naa kâai dílaa ƃé kɛ̀ a Ɛlifa nyii kùla Temaŋ taa-leei sui, da Beeda nyii kùla Sûa lɔii kpiniŋ sui, é pɛ́lɛ Zofa ma nyii kùla Naama lɔii kpiniŋ sui. 12Dí kɛ́ɛ liî, dílɛ̀ɛ kwaa-koyaa ma dí Zôo káa kɛ́lɛ dífe gɔ́lɔŋ-ni kɛ̀ a dɔnɔ kpîŋ. Kɛ́lɛ tãi nâa dí lɛ̀ɣɛ lai dí gɔ́lɔŋ, dí nâa pɛ̀lɛ wɔ́lɔɔ ma a ɣelêi-pere. Dí díseɣe-ŋai fàla-fala. Díkɛ̀ muluŋ pilîi ŋ̀elei su díkɛ bù díŋua. Dí mɛni-ŋai ŋí kɛ̀ a gɛɛ dí berei lɛ́ Zôo malôŋ è kɛ̀ dísônii lai. 13Tãi dí gàa la a gɛɛ Zôo a mɔ̃lɛi a ŋánaai, dílì dí sée gɔlɛ ǹɔii ma a fólo kûu lɔ́ɔlu mɛi-feerɛ da kpíni kûu lɔ́ɔlu mɛi feerɛ dífa lôno.
Currently Selected:
Zôo 2: KWB
Highlight
Share
Copy
Want to have your highlights saved across all your devices? Sign up or sign in
