Galesiɛŋ 5

Ka tɔɔ ŋuŋ-ma-ƃo su a gbanaŋɔɔ

1Ŋuŋ-ma-ƃo-mɛni ma, Kôrai è kúŋuŋ ma ƃò; mɛni ma ka tɔɔ a gbanaŋɔɔ, káfè kɛ̀ ŋɔ́nɔ luɛ-laa ŋɔkpîri wuyɛ̂ɛi mu.

2Mɛni ma, ńyãa Pɔ̂ɔ, ŋa m̀ôi kâa a gɛ́ɛ à kɛ̀ ká káyee sèe núu-seɛɛ kpono mâ mɛni mu, gɛ̀ ní Kôrai fé pâi mɛni da kélee kɛ̂i kámɛni ma. 3Ŋá m̀ó ŋɔ́nɔ diai kélee dîa dí díyee sèe núu-seɛɛ kpono mâ mɛni mui a gɛ́ɛ fɛ̀ɛ dí dɔ̂ŋ kélee mɛi káa. 4Káai ŋ̀wɛ̂lii a gɛ́ɛ dɔ̂ŋ é kákɛ a tɔ̃yâ-ƃelai, ka kula Kôrai mu, gɛ̀ ní ka kúla Ɣâla ŋɔƃɛlɛ-sêe mu. 5Kpɛ́ni fêi, kwa tɔ̃yâ laa-la maa-kili kɛ-zui maa kpɛ̂ŋ a laa-la M̀ɔlêŋ sarâi. 6Kpɛ́ni fêi, diai díseɛɛi kpono mai da diai dífe see-ní, kpono mai, dímaa-mɛni fé a mɛni kpanaŋ Kôrai kponôi, kɛ́lɛ, fɛ̀ɛ laa-la nyíi a tíi kɛ̀ wɛli-kɛ-maa sarâi. 7Ká kɛ́ tíi kɛ̂i a ǹɛ́lɛɛ. Gbɛ̂ɛ ƃe kákpèra dɔ̃yâi kɛ́ɛ ma? 8Nia-woo-sii ŋí fé kúla ní ǹúui yêei kátolii. 9Kpólo-tɛ-sɛŋ kuro-te a gbólo-kane kélee tɛ̀. 10Náâi a Kúnuu-namui a gɛ́ɛ káfe pâi kili-ŋa-sia da kpɛni siɣêi é tɛ́ɛ ŋ́ɔ̂i ma. Ǹúui a káwoo tàa-taai, maa-nuui a pâi tɔŋ-kpɛ́-maa sɔlɔ ƃôi, a ǹɛɛ ma kpîŋ é kɛ́ a le-nuu. 11Kɛ́lɛ, ŋánûa, à kɛ̀ ŋà nuu-seɛɛ kpono mâ mɛni ƃò, ká ŋ́gbɔara lé mɛni ma? A kɛ̀ a bere sii tí, gɛ̀ ní zaa-wurui fé ŋɔ́nɔ pâi kɛ̂i a núu perêi-kpáaŋ sɛŋ. 12Diai káwoo ŋá táa-taai dí díkpîŋ ƃéla!

13Kpɛ́ni fêi, ŋánûa, dí kátòli ŋuŋ-ma-ƃo ma. Káfe tíi kɛ̀ nɔ́ a káŋuŋ-ma-ƃoi kákpîŋ-tua-perei ma, kɛ́lɛ, ka tíi kɛ́ la wɛli-kɛ-maa sarâi, ká kɛ́ a kákîe-ni yée-mu-ƃela. 14Kpɛ́ni fêi, dɔ̂ŋ kélee ŋ̀aa-see kɛ́ɛ̂i wóo tɔnɔ ŋí su, “Íkɔlɛ-ma-nuui wɛ́li yɛ̂ɛ yá kpîŋ.” 15Kɛ́lɛ, ká kákîe-ni nyìŋ, kákɛ kákîe-ni mii, ká kámɛi káa a gɛ́ɛ káfe kákîe-ni su kara.

M̀ɔlêŋ ŋɔƃá da tua-pere-nyɔŋ ŋɔtíi

16Kɛ́lɛ, ŋá m̀ó kâa, ka sia M̀ɔlêŋ su, gɛ̀ ní káfe pâi ǹúu ŋɔkɛ-pere-nyɔŋ wɛ́liɛɛi maa-tua kɛ̂i. 17Kpɛ́ni fêi, núu ŋɔkɛ-pere-nyɔŋ tɔɔ̂i M̀ɔlêŋ ma, M̀ɔlêŋ ǹyaŋ tɔɔ núu ŋɔkɛ-pere-nyɔŋ ma. Kpɛ́ni fêi, nyíi-ŋai tɔɔ̂i díkîe-ni dîa, a gɛ́ɛ káfe m̀ɛnii kɛ̂ ka ŋ̀wɛ̂lii ká gɛ́i. 18Kɛ́lɛ, à kɛ̀ M̀ɔlêŋ à tɔ̀ɔ kátuɛ, gɛ̀ ní káfe dɔ̂ŋ mu. 19Ǹyaŋ núu ŋɔkɛ-pere-nyɔŋ ŋɔtíi-ŋai su ponoɔ̂i. Dia ƃa, wulu-wulu-kɛɛ, núu kɛ́ɛ maa fé waa ni, wolii-kpɔlɔ, 20ɣâla-pɔkɔɔŋ fɛliɛ, wúlu-mɛni, kpɔara, laa-sâa, tólo, lii-ŋwâna, woo-taa-taa, ŋa-kɔlɛ, núu-kpulu-ŋa, 21sɛŋ maa-lii téɛɛ, (núu paá,) lɔɔ kpeleɛ, lɔɔ-kpele-kuu, da gbeli-ŋai díkaa yɛ̂ɛ nyíi-ŋai. Ŋa kalia-woo ƃôi yɛ̂ɛ berei ŋá kália-woo ƃò la a maa-ŋuŋ, a gɛ́ɛ ǹúui a mɛni-ŋai ŋí kɛ̀i, ve pâi Ɣâla ŋɔkâloŋ-laai maa sɔlɔ ƃôi. 22Kɛ́lɛ, M̀ɔlêŋ ŋɔƃá-ŋai ƃa, wɛli-kɛ-maa, lii-nɛ̃ɛ, lii-sêe, lii-kpele, sɔŋ-lɛlɛ, mɛni lɛ́lɛɛ kɛ́ɛ, kili-kɛ-maa, 23maa-yeŋ, da núu kpîŋ mɛi káa; ǹyaŋ tɔ̂ŋ fé nyíi-ŋai ŋí dîa. 24Ǹyaŋ diai díkaa Zîsɛ Kôrai kponôi da núu ŋɔtùa-pere-nyɔŋ paa da ŋɔtûa-pere-nyɔŋ maa-sɛŋ-wɛliɛ.

25A kɛ̀ kúɣeniɛi káa M̀ɔlêŋ su, ǹɛ́lɛɛ̂i kú sía M̀ɔlêŋ su. 26Kúfe kɛ́ a yoŋka-ƃela, kúfe kúkîe-ni líi ŋwana-mɛni kɛ̀, kpaa máŋ kú tólo kúla kúkîe-ni dîa.

Currently Selected:

Galesiɛŋ 5: KWB

Highlight

Copy