Galesiɛŋ 4

1Ŋa nâa m̀ôi a gɛ́ɛ bɔɔ-sɛŋ mɛi-loŋ, à kɛ̀ a lôloŋ, vé tɛɛ ní yée-mu-nuu ma, berei máŋ la bɔ́ɔ ƃa a díkeleei. 2Kɛ́lɛ, gáa mɛi-kaa-pere su é lɛ́ɛ la zu tãi ǹâŋ è ǹɛ̂i, é seri. 3Bere nɔ́ ƃe kúa máŋ, tãi kú kɛ̀ la a nîa-pɛlɛɛi, kú kɛ̀ la a luɛ-ŋa ŋ̀éniɛi su-ƃelai tûa-perei yée mu. 4Kɛ́lɛ, tãi kpîŋ páai, Ɣâla è Ǹóŋ tɛ̀ɛ, nyíi nɛnî è zɔlɔ ƃôi. È pà dɔ̂ŋ yée mu. È pà a gɛ́ɛ é diai maa tée kɛ̂ dɔ̂ŋ mui, 5a gɛ́ɛ kú lóŋ-laa maa sɔlɔ ƃó. 6A gɛɛ ŋɔ́nɔ kákaa a lônii, Ɣâla a Ǹóŋ Ŋɔmɔlêŋ tɛ́ɛ kúlii su, gɛ laɣi, ǹyɛɛi, “Aƃa! Ńâŋ!” 7Mɛni ma Ɣâla sarâi, káfe ŋɔ́nɔ a yée-mu-ƃela, kɛ́lɛ, kákaa a lônii, à kɛ̀ kákaa a lônii, gɛ̀ ní kákaa a pɔɔ-sɛŋ mɛi-ƃela.

Káfè kɛ̀ ŋɔ́nɔ a luɛ-ŋa

8Tãi maa-ŋuŋ, tãi káfe kɛ́ ni a Ɣâla kɔ́lɔŋɔɔ lai, ká kɛ̀ a luɛ-ŋa ɣâla-ŋa yée mu nyíi-ŋai dífe kɛ́ ni ɣele mai. 9Kɛ́lɛ, ka nâa Ɣâla kɔ́lɔŋ, ǹyaŋ m̀ɛnii gbanaŋɔɔ̂i ƃa, Ɣâla a nâa kákɔlɔŋ. Ka pɔ̂ri tínaŋ-pere kɛ̂i leŋ ŋɔ́nɔ ŋ̀éniɛi-su-ƃelai tua-pere fii-kpɛɛ-ŋai dîa nyíi-ŋai díkaa nɔ́ kpɛ́ni-kpɛni, ká kɛ́ ŋ̀wɛli a gɛ́ɛ ká kɛ́ ŋɔ́nɔ a díluɛ-ŋai? 10Ka ɣele kûu da-ni lâai kɛ̀, ɣáloŋ da-ni, tãi da-ni, da kóraŋ da-ni! 11Ŋ́gaa ŋ́gili ŋá siâi a gɛ́ɛ mɛni-ŋai ŋá tɛ̀ɛ zu kámɛni mai, tãi da, da pâi kɛ̂i nɔ́ kpɛ́ni-kpɛni.

12Ŋánûa, ŋa kákpera fêi, ká kɛ́ yɛ̂ɛ ńyãa, kpɛ́ni fêi, ńyãa máŋ ŋá kɛ̀ yɛ̂ɛ káa. Káfe mɛni nyɔ́mɔɔ kɛ́ ni a ńyãa. 13Ká gɔ́lɔŋ a gɛ́ɛ ŋá Duŋ Lɛ́lɛɛi ƃò kápɔ naa fulɔi, kpɛ́ni fêi, kɔlɔ-fela è kɛ̀ ŋ́gbonôi. 14Berei ŋ́gɛ-perei è kɛ̀ la kâa a kpîri wuyɛ̂ɛi, káfe lono ni mâ, kpaa máŋ, káfe káŋɛi nàɣîŋ ni ḿɛi, kɛ́lɛ, ká káyee see mû yɛ̂ɛ Ɣâla ŋɔkéla, yɛ̂ɛ ŋɔ́nɔ Zîsɛ Kôrai. 15Lé ƃa kɛ́ a ǹii-laai kɛ̂ káyêei? Kpɛ́ni fêi, ŋá kámaa sêre-faa kɛ̀ a gɛ́ɛ pere eêi kɛ̀ naa, kâi pɔ̂ri káŋɛi-kao kulâi ká dɛɛ ḿbɔ. 16Ŋa nâa kɛ́ a kákpɔara-nuu, kpɛ́ni fêi, ŋa dɔ̃yâi ƃó kâa? 17Da ŋ̀wɛ̂lii ká kɛ́ díƃelai mâ-pere, kɛ́lɛ, sâpo lɛ́lɛɛ fé m̀a. Da ŋ̀wɛ̂lii dí kwa kâa-ni kúŋa kɔ́lɛ a gɛ́ɛ ká kɛ́ díƃelai mâ-pere. 18Kpɛ́ni fêi, ǹɛ́lɛɛ̂i a gɛ́ɛ núu é kákɛ ká kɛ́ ŋɔƃelâi mâ-pere sâpo lɛ́lɛɛ mɛni ma, ǹyaŋ ve nɔ́ a sɛŋ fɛ̀ɛ tãi ŋa kɛ̂ la kákɔlɛi. 19Ŋánîa-pɛlɛɛi, ŋ́gaa ŋɔ́nɔ mɛni-soli su kámɛni ma, é lɛ́ɛ la zu Kôrai é kɛ́ kákponôi a ǹɛ́lɛɛ! 20Ŋâi kɛ̀ kákɔlɛ tãi ŋí su ŋâi ńono-woo ma faleŋ, kpɛ́ni fêi, ŋ́gili puɔɔ̂i kámaa-mɛni ma.

Eega da Seera maa-mɛni káa yɛ̂ɛ saŋ-woo

21Ka m̀ó mâ, káai ŋ̀wɛ̂lii ká kɛ́ dɔ̂ŋ mui, káfe pâi káwoli tɔɔ̂i dɔ̂ŋ ma? 22Kpɛ́ni fêi, bɔ̃yɛɛ̂i a gɛ́ɛ Eberaɣɛ̃ɛ è lóŋ-surɔŋ feerɛ maa sɔlɔ ƃô. È dɔnɔ sɔlɔ ƃô luɛ-nɛni ma é gbeli sɔlɔ ƃó nɛnî ŋuŋ-ma-ƃoɔɔ ma. 23Kɛ́lɛ, nyíi è zɔlɔ ƃô ǹuɛ-nɛnii mai, è zɔlɔ ƃô nɔ́ a lóŋ maa sɔlɔ ƃó-pere. Kɛ́lɛ, nyíi è zɔlɔ ƃô nɛnî ŋuŋ-ma-ƃoɔɔi mai, è zɔlɔ ƃô Ɣâla ŋɔkono-teei sarâi. 24Mɛni-ŋai ŋí káa nɔ́ yɛ̂ɛ saŋ-woo mɛni ŋá lɛ́ mɛni ma. Ǹɛnî feerɛi ŋí díkaa a gbanaŋ-woo kɛ́ɛ feerɛi. Dɔnɔ è kùla Sana Yeei ma, nyíi ŋɔnîa-pɛlɛɛi díkaa a luɛ-ŋai. M̀aa-nuui ƃa Eega. 25Eega maa-mɛni káa nɔ́ yɛ̂ɛ Sana Yeei nyíi gáa Arebia-lɔii sui. M̀óloŋɔɔ̂i Zerusâlɛŋ ma nyíi gáa sâa naai, kpɛ́ni fêi, gáa luɛ-laai da ŋɔnîa-pɛlɛɛi. 26Kɛ́lɛ, Zerusâlɛŋ nyíi gáa ɣelêi-perei, ŋuŋ ma ƃoɔɔi, ǹyaŋ gɛ ƃo a kúlee. 27Kpɛ́ni fêi, bɔ̃yɛɛ̂i,

“Lii-nɛ̃ɛ kula, yái íkpomâi ífa lóŋ kàai,

láɣi a ɣelêi-woo, yái ífe koi-tee-pɛrɛ pôlui,

kpɛ́ni fêi, gbóma-nɛnii lonii támaâi

é tɛ́ɛ nɛnîi ma surɔ̂ŋ káa ǹyêei.”

28Gɛ̀ ní, ŋánûa, yɛ̂ɛ bere la Aise è kɛ̀ la a kono-tee ŋ̀aa-see kɛ́-loŋ, bere nɔ́ ƃe kúkaa la kúa máŋ. 29Kɛ́lɛ, tãi ti su, ǹúui dí zɔlɔ ƃô a núu-kpune maa sɔlɔ ƃó-perei, è ǹúui kpɔ̀ara nyíi dí zɔlɔ ƃô M̀ɔlêŋ sui. Bere ƃe gáa la sâa máŋ. 30Kɛ́lɛ, lé ƃe Ŋ̀âla-kɔlɔi a mòi? “Ǹuɛ-nɛnîi kpɛ́ da ǹóŋ. Kpɛ́ni fêi, ǹóŋ da nɛnî ŋuŋ-ma-ƃoɔɔi ŋɔlóŋ dífe pâi kɛ̂i a bɔɔ-sɛŋ sɔlɔ ƃó-nia-pɛlɛɛ gîe ma.” 31Mɛni ma, ŋánûa, kúfe a ǹuɛ-nɛnîi ǹónii, kɛ́lɛ, kúkaa a ŋuŋ-ma-ƃo-nɛnii ǹônii.

Currently Selected:

Galesiɛŋ 4: KWB

Highlight

Copy