Galesiɛŋ 3

Dɔ̂ŋ da Laa-laa

1Óo káƃoɔɔ̂i káai a Galesia-ŋai! Gbɛ̂ɛ ƃe wúlu kɛ̀ kâa, káai dí Zîsɛ kpamo-mɛnii ƃò káŋɛi pono ŋái? 2Tɔɔ ŋa kámarê kɛ́ nɔ́ a nyíŋi. Ka M̀ɔlêŋ Maa Waai sɔlɔ ƃô dɔ̂ŋ ŋɔtíi kɛ́ɛ sarâi, kpaa ka zɔlɔ ƃô maa mɛni mɛniɛɛ da laa-la sarâi? 3Káƃoɔɔ̂i bere sii tí su? Ka káfulu-laa ninai kɔ́ɔ pîlaŋ a M̀ɔlêŋ, ǹyaŋ ka pâi nâa gbɛɛ-ŋai kɛ̂i a kákpono? 4Ka tɛɛ nɔ́ mɛni támaa su kpɛni-kpɛni? À kɛ̀ nɔ́ dí kɛ̀ kpɛni-kpɛni a tɔ̃yâ. 5Ǹúui a M̀ɔlêŋ tɛ̂ɛ kápɔ, gɛ ŋɛi-kɛ-maa-ŋa kɛ̀ kásamâi, a gɛ̀ tí dɔ̂ŋ ŋɔtíi kɛ́ɛ sarâi, kpaa a gɛ̀ tí maa mɛni mɛniɛɛ da laa-la sarâi?

Ɣâla ŋɔkono-teei è gɛ̀ Eberaɣɛ̃ɛ yêei

6Bere nɔ́ ƃe Eberaɣɛ̃ɛ è “làa la a Ɣâla, ǹyaŋ Ɣâla è ŋɔlaa-lai siɣe a tɔ̃yâ laa-la.” 7Mɛni ma ka gàa a gɛ́ɛ diai laa-la káa díyêei dia ƃa Eberaɣɛ̃ɛ ǹônii. 8Ŋ̀âla-kɔlɔi è gàa nàa tuɛ a gɛ́ɛ Ɣâla a pɔ̂ri Zɛ̃tai-ŋai kɛ̂i a tɔ̃yâ-ƃela laa-la sarâi, ǹyaŋ Ŋ̀âla-kɔlɔi è Duŋ Lɛ́lɛɛi ƃò Eberaɣɛ̃ɛ ma nàa tuɛ, ǹyɛɛi, “Lûwa a pâi kɛ̂i ǹɔii-ŋûŋ-ŋai kélee dîa ísarâi.” 9Mɛni ma diai kélee laa-la káa díyêei, lûwa káa dîa da Eberaɣɛ̃ɛ-ni, nyíi laa-la è kɛ̀ ǹyêei.

10Ǹyaŋ diai kélee díkili káa dɔ̂ŋ ŋɔtíi mai, díkaa naɣâŋ-laa yée mu; kpɛ́ni fêi, bɔ̃yɛɛ̂i, “Náɣâŋ káa diai kélee dîa dífa mɛni-ŋai kélee lâai kɛ̀ dí maa-tua kɛ́ nyíi-ŋai bɔ̃yɛɛ̂i dɔ̂ŋ ŋɔkɔlɔi sui.” 11Ǹyaŋ zu ponoɔ̂i nâa a ǹɛ́lɛɛ a gɛ́ɛ núu da kélee fa kɛ̂ a tɔ̃yâ-nuu Ɣâla ŋɛi dɔ̂ŋ sarâi. Kpɛ́ni fêi, “Ǹúui nyíi gáa a tɔ̃yâ-nuu laa-la sarâi, fulu-laa a pâi kɛ̂i ǹyêei”. 12Kɛ́lɛ, dɔ̂ŋ kɔ́ɔ fa tɔɔ laa-la ma, kpɛ́ni fêi, “Ǹúui nyíi a dɔ̂ŋ ŋ̀asee kɛ̂i a pâi ŋɔfúlu-laai kɛ̂i dɔ̂ŋ sarâi.” 13Kôrai è kúŋuŋ ma ƃò dɔ̂ŋ ŋɔnáɣaŋ-laai yêei, kpɛ́ni fêi, ǹyaa kpîŋ è kɛ̀ a naɣâŋ-laa kúmɛni ma-kpɛ́ni fêi, bɔ̃yɛɛ̂i, “Naɣâŋ-laa káa núu kélee ma a sɛ̂lɛŋ wúru mai,” 14a gɛ́ɛ ǹûwai è kɛ̀ Eberaɣɛ̃ɛ ma é kɛ́ Zɛ̃tai-ŋai dîa Zîsɛ Kôrai sarâi a gɛ́ɛ kú M̀ɔlêŋ ŋɔkono-teei sɔlɔ ƃó laa-la sarâi.

Dɔ̂ŋ da maa kono-teei

15Ŋánûa, ŋa pâi mɛni kɔɔŋ-maa kulâi fúlu-laa su, à nɛ̃ɛ ma máŋ é kɛ́ a núu-kpune ƃó-woo, tãi è mò la a gbanaŋɔɔ̂i, núu da fa da kùla ma, kpaa máŋ é da pɛlɛ ma. 16Ǹyaŋ Ɣâla è kono-tee-ŋai kɛ̀ Eberaɣɛ̃ɛ yêei da ǹóŋ. Ve m̀ó ni, ǹyɛɛi, “Da ǹônii,” nyíi-ŋai dítamaâi, kɛ́lɛ, è mò, ǹyɛɛi, “Da íloŋ,” nyíi gáa tɔnɔɔi. Maa nuui ƃa Kôrai. 17Zu-kulâi ƃa dɔ̂ŋ nyíi pà kóraŋ ŋuŋ náaŋ pôlu buu saaƃa (430) yée mui, va pɔ̂ri ŋ̀óoi kperâi Ɣâla è mò nàa tuɛi, a gɛ́ɛ ŋɔkono-teei é kɛ́ kpɛni-kpɛni. 18Kpɛ́ni fêi, à kɛ̀ bɔɔ-sɛŋ a kûla dɔ̂ŋ su, gɛ̀ ní va kûla gono-teei su ŋɔ́nɔ. Kɛ́lɛ, Ɣâla è dɛ̀ɛ Eberaɣɛ̃ɛ pɔ kono-tee su.

19Dɔ̂ŋ ŋɔsapoi ƃa ŋaŋ a le? Ɣâla è dɛ̀ɛ sɔnyɔ̂ŋ mɛni ma, é lɛ́ɛ la zu ǹóŋ é pá nyíi dí gono-teei kɛ̀ ǹyêei. Dí dɛ̀ɛ a Ɣâla-taa kela-ŋa ǹúu-loai-nuui sarâi. 20Núu-loai-nuu fé tɔnɔ. Kɛ́lɛ, Ɣâla káa tɔnɔ.

Dɔ̂ŋ ŋɔsapoi

21À kɛ̀ tí, gɛ̀ ní, dɔ̂ŋ tɔɔ̂i Ɣâla ŋɔkono-tee-ŋai dîa? Vé tí a dɔnɔ kpîŋ. Kpɛ́ni fêi, à kɛ̀ da pɔ̂ri tɔ̂ŋ tɛɛ̂i nyíi a pá a fulu-laai, gɛ̀ ní tɔ̃yâ laa-la a kûla dɔ̂ŋ su a tɔ̃yâ. 22Kɛ́lɛ, Ŋ̀âla-kɔlɔi a nyíŋi kélee pû sɔnyɔ̂ŋ mu, a gɛ́ɛ gono-teei nyíi gáa laa-la su Zîsɛ Kôrai kponôi é tɛ́ɛ diai pɔ́ laa-la káa díyêei.

23Kɛ́lɛ, laa-la é lɛ́ɛ pâi, kú kɛ̀ kpini-pɛrɛ mu dɔ̂ŋ mu, kúpiliɛ pɔ̂rɔŋ kúkɛ naa-lai maa kpɛ̂ŋ nyíi kɛ̀ pâi pâi. 24Mɛni ma dɔ̂ŋ ƃé kɛ̀ a kúmɛi-kaa-sɛŋ é lɛ́ɛ la zu Kôrai é pá, a gɛ́ɛ laa-la e kúkɛ a tɔ̃yâ-ƃela. 25Kɛ́lɛ, laa-la kɛ́ɛ a pâi, kúfe ŋɔ́nɔ mɛi-kaa-sɛŋ yée mu. 26Kpɛ́ni fêi, kákelee kákaa a Ɣâla ŋɔnîa-pɛlɛɛ Zîsɛ Kôrai kponôi laa-la sarâi. 27Kpɛ́ni fêi, káai kélee kábatâi kɛ̀ Kôrai kponôi, ká Kôrai sɔlɔ ƃó. 28Zûu-nuu fé ŋɔ́nɔ ma kpaa máŋ Gurii, luɛ kpaa wɔ̂lɔ, surɔ̂ŋ kpaa nɛnî. Kpɛ́ni fêi, kákelee kákaa tɔnɔ Zîsɛ Kôrai kponôi. 29Ǹyaŋ à kɛ̀ kákaa a Kôrai pɔ́ɔ, gɛ̀ ní kákaa a Eberaɣɛ̃ɛ ŋɔsuui da ŋɔpɔɔ-sɛŋ mɛi-ƃela gono-teei lá-woo ma.

Currently Selected:

Galesiɛŋ 3: KWB

Highlight

Copy