Ɛtɛ 4
4
Mɔdikai è Ɛtɛ marê kɛ̀ kpɔŋ mâa mɛni ma
1Tãi Mɔdikai è m̀ɛni-ŋai kɛ̂i maa tûŋ mɛ̀ni lai, ǹíi è too pôlu. È ŋɔseɣei fâla-fala ma é luu sía ma é maloŋ tôo-maa sêɣe too mà é lí daa lêei sámai gɛ́ wɔ̀lɔ a ŋ̀ánaa. 2Kɛ́lɛ è lì nɔ́ é kóyaŋ gâloŋ-pɛrɛi lá, kpɛ́ni fêi, dífa kâa fàa ma ǹúui maloŋ tôo-maa seɣe káa mai é lɔ́ ziɣãŋ su. 3Ƃɛ́i kélee Zuda-ŋai paa mɛni duŋ è sèri naai, Zuda-ŋai kélee kɛ̀ naai dí sèe malôŋ-pere su. Díkɛ̀ sûŋ siɣêi díkɛ wɔ̀lɔ. Dámaa ɣele dí kɛ̀ nɔ́ luu siâi dîa dí kɛ́ maloŋ tôo-maa seɣe tòo dîa.
4Ɛtɛ yée mu-nɛyãai da m̀ɛi káa sinaai dí lì dí m̀ɛnii ŋí ƃó ma. Ǹíi è tòo pôlu a ŋ̀ánaa. È seɣe sîɣe é dɛ̀ɛ Mɔdikai mì a gɛɛ é m̀aloŋ tôo maa seɣei kúla ma. Kɛ́lɛ Mɔdikai fé zoŋ ní. 5Nya ƃe Ɛtɛ è Atasi tòli nyii kɛ̀ a gâloŋ ŋɔnɛyâai mɛi káa ǹúui dɔnɔi. Ǹalôŋ ŋí ƃé kɛ̀ Ɛtɛ mɛi kâai. È dɛ̀ɛ Mɔdikai pɔ́ naa a gɛɛ é gáa lé ƃé kɛ̂i lai. 6Nya ƃe Atasi è lì gâloŋ-pɛrɛi lá Mɔdikai pɔ́ naa. 7Mɔdikai è m̀ɛnii kélee su kùla ma. È zɛŋ kâoi láa lɛ̀ ma Emaŋ è góno tèe a gɛɛ a pâi bûi ǹɔii ŋɔsɛŋ kâo lâai kɛ́ kwaai ma a gɛɛ dí Zuda-ŋai paai. 8Gɔlɔi gâloŋ è dɛ̀ɛ Susa taa-leei su Zuda-ŋai paa mɛ̂ni mai, Mɔdikai è dɔnɔ tɛ̀ɛ Atasi pɔ́ a gɛɛ é lí la Ɛtɛ pɔ́ é ŋ̀áa lɛ́ ma. È mò ma a gɛɛ é mó Ɛtɛ ma é lí gâloŋ pɔ́ naa é dímaa kpera fe kɛ́ a gɛɛ gâloŋ é dísu mɛni lɛɛ. 9Atasi è lì pôlu Ɛtɛ pɔ́ é m̀ɛnii su kula ma nyii Mɔdikai è mò mai. 10È mò Ata ma a gɛɛ é mò Mɔdikai ma ǹyɛɛi, 11“Mó Mɔdikai ma a gɛɛ núu da fa lî gâloŋ ŋɛ́i-tuɛ kpɛ́ni à kɛ̀ vé maa nuui tóli ní. A wàla kɛ́ tí, fɛ̂ɛ dí maa nûui paa. Ŋɔtíi kɛ́-ƃelai kélee dí m̀ɛnii ŋí kɔ́lɔŋ da ǹɔii kpîniŋ-ŋai su-ƃelai. Ǹúui nɔ́ gâloŋ a fâa ma é pá ŋ̀ɛ́i-tuɛi ǹyaa ƃa ǹúui nyii gâloŋ a ŋɔkâloŋ wurui lɛ̀ mai. É kúla nyíŋi pôlu, ŋ́gulaa gâloŋ pɔ́ naa a tɛɛ fólo buu saaƃa ma.”
12Ata è lì pôlu é m̀ɛnii ŋí ƃó Mɔdikai ma. 13Mɔdikai è mò Ata a gɛɛ é mó Ɛtɛ ma, “Vé kɛ̀ íkili ŋá a gɛɛ ya pâi ŋuŋ ma ƃô sɔlɔ ƃôi kpɛ́ni fêi íkaa gâloŋ ŋɔpɛ́rɛi mu. 14Ya lɛ̀ɛ a ímɛi sáa ífe mɛni da kɛ́ ní é pîlaŋ m̀ɛnii ŋí ma, kpɔŋ mâa a pâi kulâi núu da kpɛ́ni yêei Zuda-ŋai mɛni ma ǹyaŋ kɛ́ a gɔ́lɔŋɔɔ a gɛɛ yá, ka ísuui su-ƃelai kélee káŋuŋ lá a pâi pilîi. Gbɛ̂ɛ ƃé gɔ́lɔŋ a kɛ̀ í pà gâloŋ-pɛrɛi mu a tãi ŋí kúŋuŋ ma ƃó mɛni ma?”
15Nya ƃe Ɛtɛ è ŋ̀óo su tòo ǹyɛɛ mai, 16“Lí í Zuda-ŋai kélee ŋáa tɛ́ díkîe ma Susa taa-leei su ka dîa-ni ká sûŋ siɣe ḿɛni ma. Ka sûŋ siɣe a fólo saaƃa. Kwa ńyee mu-ƃelai kwa pâi gɛ̂i tí máŋ. Zûŋ ŋá ɣále tãi ŋa pâi liî gâloŋ pɔ́ naa berei máŋ vé tí la dɔ̂ŋ lá-woo mai. À kɛ̀ ŋa pâi saâi m̀ɛnii ŋí su, gɛ̀ ní é kɛ́ tí.”
17Mɔdikai è lì pôlu é m̀ɛnii kélee kɛ́ yɛ̂ɛ berei Ɛtɛ è mò la mai.
Currently Selected:
Ɛtɛ 4: KWB
Highlight
Share
Copy
Want to have your highlights saved across all your devices? Sign up or sign in
