Ɛtɛ 3
3
Emaŋ è gbɛ̀tɛ a gɛɛ é Zûu-ŋai dísuui su kara
1M̀ɛni-ŋai ŋí kɛ́ɛ pôlu ma, Gâloŋ Atasɛra è Emaŋ kɛ̀ a gɔlɛ ma nùu. E gɛ̀ a ŋɔlɔii kâloŋ-ŋai kélee láa túɛ-nuu. Emaŋ ǹâŋ láa ƃé kɛ̀ a Amedata. Amedata è kɛ̀ a Aga ŋɔsuui su ǹúui da. 2Gâloŋ Atasɛra è mò ŋɔtíi kɛ́-ƃelai kélee dîa kɛ̀ tíi kɛ̂i ŋɔpɛ́rɛi lái, a gɛɛ tãi kélee da Emaŋ kàa lai, dí dímaa pɛ́lɛ. Ǹûai kélee da kâa gɛ̀ tí. Kɛ́lɛ Mɔdikai è mò nyɛ̀ɛ vá pɔ̂ri gɛ̂i tí. 3Nya ƃe ǹɔii kpîniŋ mɛi-ƃelai da-ŋa dí m̀arê kɛ̀ dîyɛ mai, “Lé ƃé ífe ƃaa kɛ́-maa tɛɛ̂i la Emaŋ pɔ́ yɛ̂ɛ berei gâloŋ è mò lai?” 4Dí ǹia-woo ƃò a tãi támaa kɛ́lɛ vé ŋ̀óli tɔɔ ní dîa. È mò dîa ǹyɛɛi, “Ḿva pɔ̂ri gɛ̂i, kpɛ́ni fêi, ŋ́gaa a Zuda-nuu.” Dí lì dí mó Emaŋ ma a gɛɛ dí gáa à kɛ̀ Mɔdikai wóoi a pɔ̂ri lɛɛ̂i ma. 5Tãi Emaŋ è gàa la a gɛɛ m̀ɛnii gâloŋ è mòi Mɔdikai fé gɛ̂i, è ǹíi ŋwána a ŋ̀ánaa. 6Tãi è gɔ̀lɔŋ la a gɛɛ Mɔdikai è kɛ̀ a Zuda-nuui, è gbɛ̀tɛ a gɛɛ é Zuda-ŋai kélee páa Gâloŋ Atasɛra ŋɔlɔii kpîniŋ kélee su.
7Gâloŋ Atasɛra ŋɔkâloŋ laa kóraŋ buu káo feerɛi ŋɔɣáloŋ maa-ŋuŋ nyii da dòli a Nisãŋ Ibulu-wooi sui, Emaŋ è ŋɔnûai marê kɛ̀ a gɛɛ dí tãi lɛ́ mà a pɔ̂ri ǹûai ŋí su-karai lai. Nya ƃe dí kpɛɛŋ tôo nyii dòli a Puriŋ Ibulu-wooi su a gɛɛ dí ŋ̀ele kúui kɔ́lɔŋ. Gbɛɣɛŋ è ǹɛ a gɛɛ dí m̀ɛnii ŋí kɔ́ɔ pîlaŋ a ŋ̀áloŋ puu káo feerɛi ŋɔfólo puu káo saaƃa ɣele. Da ŋ̀áloŋ ŋí toli a Adai Ibulu-wooi su.
8Gɛ́ɛ tíi, Emaŋ è mò Gâloŋ Atasɛra ma ǹyɛɛi, “Núu sîi da-ŋa díkaa ílɔii kpîniŋ-ŋai su nyii-ŋai díwɔ̂ tua-perei káa a da kpɛ́ni ǹúu kpéli-ŋai díwɔ̂i ma. Dífe siâi a ǹɔii ŋɔtɔ̂ŋ wóo. M̀ɛni ma, ya íyee sèe dímu, vé pâi kɛ̂i a ǹɛ́lɛɛ ímɛni ma. 9A kɛ̀ íyee seɛɛ̂i ŋ́ooi ŋí mu, m̀ó a gɛɛ dí ǹúu suui ŋí su kara ílɔii kpîniŋ-ŋai su. Ya gɛ̀ tí, ŋa pâi káne pãŋ ŋuŋ lɔ́ɔlu mɛi feerɛ pôlu buu lɔ́ɔlu (750) pûi ǹɔii ŋɔsɛŋ-kao lâai kɛ́ kwaai ma ǹɔii ŋɔtíi kɛ́ mɛni ma.”
10Nya ƃe gâloŋ è ŋɔgbònoi kùla ǹyée ma nyíi kɛ̀ a ŋɔwála-walai é dɛɛ Aga ŋɔsuui su ǹúui Amedata ǹóŋ, Emaŋ pɔ́ nyii kɛ̀ a Zuda-ŋai díkpɔara-nuui. 11È mò ma ǹyɛɛi, “Ísɛŋ kaoi é lɛ́ɛ naa. Kɛ́lɛ m̀ɛnii kélee ya ŋ̀wɛ̂lii í gɛ́ a diai, gɛ́.”
12Nya ƃe Emaŋ è gâloŋ ŋɔkɔlɔ pɔ̃yɛ-ƃelai kélee ŋáa tɛ̀ gîe ma a ŋ̀áloŋ maa-ŋuŋ ŋɔfólo puu káo saaƃa ɣele. È mò dîa a gɛɛ dí gâloŋ wóoi ŋí pɔ̃yɛ ǹɔii kpîniŋ-ŋai láa túɛ-ƃelai pɔ́ ǹûai dísîi-woo-ŋai su tɛi-tɛi. Gɛ́ɛ da gɔlɔ-ŋai ŋí pɔ̃yɛɛi, è gâloŋ ŋɔgbònoi pɔ́ɔ kɛ̀ gɔlɔ-ŋai ŋí su gâloŋ láai su. 13Dí gɔlɔ-ŋai ŋí tɛ̀ɛ ǹɔii kpîniŋ-ŋai lá túɛ-ƃelai kélee pɔ́ naa a tɛɛ-ŋa. Gɔlɔi ŋí wóo ƃé kɛ̀ a gɛɛ dí fólo tɔnɔ siɣe dí Zuda-ŋai kélee paa, ǹúu kpaya-kpayai da bɛlɛ-pɛlɛi, a ŋ̀áloŋ buu káo feerɛi nyii Ibulu-ŋai da dòli a Adai ŋɔfólo puu káo saaƃa ɣele ti-ti, dí díkɔ̃liŋ kélee síɣe. 14Ŋ̀óoi kɛ̀ gɔlɔi ŋí sui è kɛ̀ a sɛŋ dí m̀ó ǹûai kélee dîa tɛi-tɛi díkwaa ŋai ma, a gɛɛ díkɛ a díkpîŋ kpɛtɛɛ ŋ̀ele kûui ŋí mɛni ma.
15Dí gɔlɔi ŋí su woo ƃò ǹûai kélee dîa yɛ̂ɛ berei gâloŋ è m̀o lai. Dí gɔ́ɔ pîlaŋ Susa taa-leei su dí gbéli kpɛ́ɛ ǹɔii kpîniŋ-ŋai su. Nya ƃe gâloŋ da Emaŋ dí lì dí kɛ́ kpele-sãa kpèle gîe ma, Susa taa-leei su kɛ́ ƃò wúlee.
Currently Selected:
Ɛtɛ 3: KWB
Highlight
Share
Copy
Want to have your highlights saved across all your devices? Sign up or sign in
