Ɛtɛ 5
5
Ɛtɛ è ƃɛlɛ tôli ƃò a gâloŋ da Emaŋ
1Vólo saaƃa suŋ Ɛtɛ è m̀o Mɔdikai ma a gɛɛ díziɣe gbɛ̀ɛ ŋa ɣelei, Ɛtɛ è ŋɔkâloŋ-nɛni seɣei ɣîri ma é lí é tɔ́ɔ gâloŋ ŋɔpɛ́rɛi ŋɛ́i-tuɛ. Gâloŋ see-sɛŋ è kɛ̀ ƃɛ́i núu a kâa kɛ̀ seei-ni naa gɛ́ ŋ̀énii ŋá pere kàai. Maa tãi tí, gâloŋ è kɛ̀ seêni gâloŋ see sɛŋ ŋá. 2Ɛtɛ káa mii, maa mɛ̂ni è ǹíi làa. È ŋɔgôo kaloŋ-wuruii sãa ma. Ɛtɛ è lɛ̀ɣɛ la é ǹyée lɛ́ɣɛ ŋ̀úrii ma. 3Gâloŋ è marê kɛ̀ ǹyɛɛ mai, “Ɛtɛ, lé ƃé kɛ̀? Lé ƃé ya ŋ̀wɛ̂lii ŋá gɛ́ yɛ̂i? Ya kɛ̀ kpîŋ ŋ̀wɛ̂lii ŋá ŋákâloŋ lɔii ŋáa kɔ́lɛ zâmai ŋá gbua tɔ̂nɔ tɛɛ ípɔ, ŋa pâi dɛɛ̂i ípɔ.”
4Nya ƃe Ɛtɛ è mo ma ǹyɛɛi, “À kɛ̀ gáa a ílii laa mɛni, ŋa ƃɛlɛ tôli ƃôi a yá ka Emaŋ sâa gbínii su. Ŋa pâi kúu kɛ́tɛ kɛ̂i kâa.”
5Gâloŋ è Emaŋ tòli ǹyɛɛ mai, “Pá a maa félaa. Ɛtɛ a kútôlii a gɛɛ é kúu kɛ́ kûa.” Emaŋ è pà da gâloŋ dí lí Ɛtɛ pɔ́ naa. 6Díkɛɛ ŋwãai kpèlei, gâloŋ è ŋɔ́nɔ Ɛtɛ marê kɛ̀ ǹyɛɛ mai, “Lé ƃé ya ŋ̀wɛ̂lii ŋá gɛ́ yɛ̂i? M̀ɛnii kélee ya ŋ̀wɛ̂lii ŋá gɛ́ yɛ̂, ŋa pâi gɛ̂i a nɛ̃ɛ ma kpîŋ ŋá ŋákâloŋ lɔii ŋáa kɔ́lɛ zâmai ŋá gbua tɔ̂nɔ tɛɛ ípɔ, ŋa pâi dɛɛ̂i ípɔ.”
7Ɛtɛ è mò ma ǹyɛɛi, 8“À kɛ̀ ḿaa mɛ̂ni a ílaa láa, ífaa ma a gɛɛ í m̀ɛnii kɛ́ ŋa pâi môi yâi, gɛ̀ ní, ŋa ítolîi ŋɔ́nɔ ka Emaŋ a ƃɛlɛ-pere. Ka pá tínaa, ŋa pâi ŋɔ́nɔ kúu kɛ́tɛ kɛ̂i kâa. Zɛŋ ŋa ŋ̀wɛ̂lii lai, nàa ƃé ŋa pâi maa m̀ɛnii kpîŋ ƃôi naa yâ.”
Emaŋ è gbɛ̀tɛ a gɛɛ é Mɔdikai paa
9Emaŋ è kùla gúui su a lii-nɛ̃ɛ gɛ́ yoŋka tèe. Tãi è kùla la ŋ̀énii ŋái, è Mɔdikai kàa. Emaŋ è ŋ̀á kàa a gɛɛ Mɔdikai fé ŋumɛ maa tɛɛ-ni bɔ́ yɛ̂ɛ berei ǹúui gbéli-ŋai díkɛ̀ gɛ̂i lai. M̀ɛnii ŋí è gɛ̀ gbɔara lîi kɛ̀ Emaŋ líi su é pîlaŋ Mɔdikai mai, zu é kɛ́tɛ. 10Gɛ́ɛ tíi, Emaŋ è ǹíi maa sòŋ é tɛ́ɛ mà é lí ŋɔpɛ́rɛi lá. È ŋɔwɛli kɛ́-maa-ƃelai kélee tòli ƃɛlɛ-pere su. È ŋɔnɛnîi Zɛrɛ tòli máŋ gbɔŋ ŋí su. 11Dí páai, è yoŋka tèe díŋɛi ǹônii-sinaai da gɔ̃liŋ mɛni ma. È ŋɔ́nɔ yoŋka tèe ŋ̀wála-wala laai mɛni ma gâloŋ è dɛ̀ɛ bɔ́ a gɛɛ gɛ́ ƃò ǹûai da ǹɔii mɛi-ƃelai kélee láa túɛi. 12Vé kóyaŋ nɔ́ tí, è mò máŋ dîa ǹyɛɛi, “Ɛtɛ aâ gâloŋ tóli a gɛɛ é kúu kɛ́tɛ kɛ́ mà. Ńyãa tɔnɔ nɔ́ ƃé è mò a gɛɛ kwa gâloŋ kwa pɔ̂ri liî m̀ɛlɛ-tolii tí ma tínaa. 13Kɛ́lɛ nyíŋi kélee fé ḿâ a lii-laa mɛni a kɛ̀ nɔ́ ŋà kɛ̀ Zuda-naloŋ Mɔdikai kâai gâloŋ ŋɔpɛ́rɛi lá a vúlu.”
14Nya ƃe ŋɔnɛnîi da m̀arâai dí mò ma dîyɛɛi, “Yeŋkêŋ tɔɔ mɛi kɛ́ ƃò a kɔ́ɔ ƃɔ́rɔni buu lɔ́ɔlu mɛi feerɛ káo lɔ́ɔlu. À kɛ̀ tí, m̀ó gâloŋ ma é Mɔdikai sɛ̂lɛŋ ma a tínaa ɣele-wala. Gɛ̀ ní ya pâi liî gúui su a lii-nɛ̃ɛ.”
Ǹia-wooi ŋí è ǹíi làa. È gɛ̀ dí ǹyeŋkêŋ tɔ́ɔ.
Currently Selected:
Ɛtɛ 5: KWB
Highlight
Share
Copy
Want to have your highlights saved across all your devices? Sign up or sign in
