Kɔleŋtiɛŋ Veerɛi 12
12
Ɣâla è mɛni-sôli tɛ̀ɛ Pɔ̂ɔ kpono mɛni ma
1Fɛ̂ɛ ŋa yoŋka tée, berei máŋ fé pâi sɛŋ da kulâi la zui, kɛ́lɛ, ŋa pâi lônoi é pîlaŋ zee-woo-ŋai dîa da mɛni-ŋai Kúnuu-namui è nɛ̀ ḿâi. 2Ŋa núu tɔnɔ kɔ́lɔŋ Kôrai kponôi nyíi tɛ Ɣâla-taa kóraŋ puu kao náaŋ pôlu mái, fé gɔ́lɔŋ à kɛ̀ gbono ƃé kɛ̀ la kpaa máŋ ŋɔmɔlêŋ, Ɣâla ƃe gɔ́lɔŋ. 3Ǹyaŋ ŋá gɔ́lɔŋ a gɛ́ɛ nalôŋ ŋí è tɛ̀ Paredai fé gɔ́lɔŋ à kɛ̀ gbono ƃé kɛ̀ la kpaa máŋ ŋɔmɔlêŋ, Ɣâla ƃe gɔ́lɔŋ. 4Nalôŋ ŋí è mɛni-ŋa mɛni nyíi-ŋai va ƃôi, ǹyaŋ núu da fé naa a pɔ̂ri môi. 5Ŋa pâi yoŋka teêi nalôŋ ŋí mɛni ma, kɛ́lɛ, fé pâi yoŋka teêi ńyãa kpîŋ mɛ̂ni ma, fɛ̂ɛ ŋáfii-kpɛɛ-ŋai. 6Ŋà kɛ̀ ŋ̀wɛ̂lii ŋá yoŋka tée, fé pâi ƃoo kɛ̂i, kpɛ́ni fêi, ŋa pâi dɔ̃yâi ƃôi. Kɛ́lɛ, ŋa pâi kperâi ma a gɛ́ɛ núu da fé gíli ŋá sìa a gɛ́ɛ ŋ́gɛtɛ̂i é tɛ́ɛ berei ma a ŋ́gaâi la da mɛni-ŋai a mɛnîi ǹái. 7A gɛɛ ńii fé nɛ̃ɛ é tɛ́ɛ gɛ̂i ma mɛni kpaya-kpayai mɛni ma nyíi Kúnuu-namui è nɛ̀ ḿâi. È mɛni-soli tɛ̀ɛ ŋ́gbonôi mɛni ma. Sêtɔŋ ŋɔkélai ƃe fũa-fũa tɔ̀ɔ mâ a gɛ́ɛ ńii fé nɛ̃ɛ é tɛ́ɛ gɛ̂i ma. 8Ŋa Kúnuu-namui kpera fé la kɛ́ saaƃa m̀ɛnii ŋí mɛ̂ni ma a gɛ́ɛ m̀ɛnîi kpîŋ é síɣe ḿbôlu. 9Kɛ́lɛ, è mò mâ, ǹyɛɛi, “Ŋáƃɛlɛ-sêei ŋɔ ƃé yâ ŋwɛlii. Kpɛ́ni fêi, ŋáwala-walai maa waâi fii-kpɛɛ su.” Mɛni ma lii-nɛ̃ɛ kɛ́tɛ su ŋa pâi yoŋka teêi ŋáfii-kpɛɛ-ŋai su a gɛ́ɛ Kôrai ŋɔwála-walai é kɛ́ ḿɛi. 10Gɛ̀ ní Kôrai maa-mɛni ma, ńii lâai fii-kpɛɛ su, ƃaa-kula-maa su, mɛni-kpɔ̂lu su, kpɔara su, da mɛni-soli su. Kpɛ́ni fêi, ŋà kɛ̀ a ḿvii kpɛɛ, gɛ̀ ní ŋ́walaai.
Pɔ̂ɔ kpáaŋɔɔ̂i Kɔleŋtiɛŋ Korai-ƃelai mɛ̂ni ma
11Ŋá ŋ́gbîŋ kùla a ƃoo-nuu! Kɛ́lɛ, káa ƃe ŋ́gɛ ŋá gɛ́ ti, kpɛ́ni fêi, káa ƃêi pɔ̂ri ńɛ̂i. Kpɛ́ni fêi, fé a núu-doo-mu pere sii kélee da su zia-ƃelai ŋí sama nyíi-ŋai da díkpîŋ kɛ́tɛ̂i, berei máŋ ŋ́gaa la nɔ́ kpɛ́ni-kpɛnii. 12Tɔ̃yâ-sia-nuu maa-ŋɛi-kɛ-maa-ŋai dí kɛ̀ kásama a lii-kpele-sii kélee. Dí kɛ̀ a ŋɛi-kɛ-maa-ŋa da mɛni kpaya-kpaya, é pɛ́lɛ tíi kpaya-kpaya dîa. 13Lé mɛni lɛ́lɛɛ ƃe Kôrai-toli-kpɔŋ kpeli-ŋai da zɔlɔ ƃô é tɛ́ɛ kâa, mɛni tɔnɔi nɔ́ ŋá gɛ̀i, ǹyaa ƃa fé kɛ́ ni ŋ̀wɛ̂lii a gɛ́ɛ ŋa kákpaaŋ? Mɛni nyɔ́mɔɔ ká ŋí ŋá gɛ̀, ka ńzu mɛni lɛɛ!
Pɔ̂ɔ è gbîŋ kpɛ̀tɛ ŋɔsiai zaaƃai mɛni ma
14Ka gáa, ŋa nâa ŋ́gbîŋ kpɛtɛ a tãi zaaƃa-ɣelei ŋá pá kápɔ. Ǹyaŋ fé pâi kákpaanîi, kpɛ́ni fêi, zɛŋ gáa káyêei fé gɔ́rii, kɛ́lɛ, ŋa káa kpîŋ kákɔ̂ri. Kpɛ́ni fêi, m̀aa fé nɛ̃ɛ ni nîa-pɛlɛɛ dí sɛŋ lâai kɛ́ díkaa-ƃelai mɛni ma, kɛ́lɛ, díkaa-ƃelai da sɛŋ lâai kɛ̀ dímɛni ma. 15Ŋa pâi ńyee ŋá-sɛŋ kélee kɔlɛɛ̂i a lii-nɛ̃ɛ ŋá ŋ́gbîŋ kɔlɛ kámɔlêŋ mɛni ma. À kɛ̀ wɛli-kɛ-maa támaa káa ńyêei kámɛni ma, wɛli-kɛ-maa-loŋ a pâi kɛ̂i káyêei ḿɛni ma? 16Kɛ́lɛ, gɛɛ ńyãa kpîŋ fé kákpaaŋ ni, ka mò káa ŋa káfili a wôya. 17Ŋá sɛŋ da kùla káyêei ǹûai ŋa dítɛ̀ɛ kápɔ naai dɔnɔ kpîŋ sarâi? 18Ŋa Taitɔ lia-woo ƃò a gɛ́ɛ é lí, ŋá dɛɛ da ḿarâŋ. Taitɔ è sɛŋ da kùla káyêei? Kúfe tua ni a bere-sii tɔnɔi? Kúfe bere-sii tɔnɔi siɣe ni?
19Ká kɛ̀ kákili ŋa siâi a tãi kélee a gɛ́ɛ kú kɛ̀ kúkpîŋ maa kɔ̃ɔ̂i káŋɛi? Ŋáwɛli-kɛ-maa-ƃelai, kú kɛ̀ lônoi Kôrai kponôi Ɣâla ŋɛi, ǹyaŋ nyíŋi kélee káa nɔ́ káƃɔlɔ mɛni ma. 20Kpɛ́ni fêi, ŋ́gaa yáôi a gɛ́ɛ tãi da ŋà pà fa kákàa yɛ̂ɛ berei ŋa ŋ̀wɛ̂lii lai, káa máŋ káfa ŋ́gaa yɛ̂ɛ berei ka ŋ̀wɛ̂lii lai. Tãi da laa-saa a pâi kɛ̂i kásama, tólo, lii-ŋwana, ŋɛi-kpala, laa-kara, laa-ƃo, lii-kɛtɛ, da woo-taa-taa. 21Ŋ́gaa yáôi a gɛ́ɛ ŋà pà ŋɔ́nɔ Ŋáɣâlai a pâi ḿaa yenîi káŋɛi. Ǹyaŋ tãi da fɛ̂ɛ ŋá wɔ́lɔ diai da sɔnyɔ̂ŋ kɛ́ a maa-ŋuŋ dámaa mɛni ma, nyíi-ŋai dífe niî dípôlu tɔɔ̂ni mɛni-maa-liƃiɛ-ŋa dia, wulu-wulu kɛ́ɛ, da wolii-kpɔlɔ, nyíi-ŋai da m̀aa kɔ́rii.
Currently Selected:
Kɔleŋtiɛŋ Veerɛi 12: KWB
Highlight
Share
Copy
Want to have your highlights saved across all your devices? Sign up or sign in
