Kɔleŋtiɛŋ Veerɛi 11
11
Pɔ̂ɔ da ǹɛ́ɛ sia-ƃelai
1Ka káwoli tɔ́ɔ ḿâ ŋáƃoo-lono-wooi su. Ka káwoli tɔ́ɔ ḿâ a lii-kpêle! 2Ɣâla-tolo káa ńii su kámɛni ma, kpɛ́ni fêi, ŋá kátɛ̀ɛ Kôrai pɔ́ a gɛ́ɛ ŋá ká lɛ́ yɛ̂ɛ núu à kɛ̀ nɛnî maa-waa tɛɛ̂i ŋɔsurɔ̂ŋ pɔ́ nyíi gɔli-kao lai. 3Kɛ́lɛ, ŋ́gaa yaôi a gɛ́ɛ yɛ̂ɛ berei nɔ́ galii è Iî pɛ̀lɛ la a ŋɔwôyai, bere ƃe kákili-ŋa-siai a pâi kákulâi la Kôrai ŋɔsã́a-laai da ŋɔtɔ̃yâ laa-lai maa-wɛli-kɛ-maai ma. 4Kpɛ́ni fêi, à kɛ̀ núu da à pà é Zîsɛ da kpɛ́ni maa-mɛni ƃó káa é kúla nyíi pôlu kú maa-mɛni ƃò kâa a maa-ŋuŋ, kpaa máŋ kà mɔlêŋ da kpɛ́ni sɔlɔ ƃô é kúla nyíi pôlu ká zɔlɔ ƃô a maa-ŋuŋ, kpaa máŋ kà káyee sèe tuŋ da kpɛ́ni mu é kúla nyíi pôlu ká káyee sèe mu a maa-ŋuŋ, gɛ̀ ní káyee-see-mui a pâi kɛ̂i a nàa fii kpɛ̂ɛ. 5Gáa ŋ́gili ŋá a gɛ́ɛ fé a nuu-doo-mu pere sii kélee su zia-ƃelai ŋí sama nyíi-ŋai da díkpîŋ kɛ̀tɛi. 6À kɛ̀ máŋ fa pɔ̂ri lônoi a ǹɛ́lɛɛ, táre lɛ́lɛɛ káa ńyêei. Pere sii kélee su kwa nyíŋi ŋá lɛ̀ kâa a ǹɛ́lɛɛ mɛni kélee su.
7Ŋá sɔnyɔ̂ŋ kɛ̀ a ŋ́gbîŋ maa-yeŋɔɔ a gɛ́ɛ kámaa é tɛ́, kpɛ́ni fêi, ŋá Ɣâla Ŋɔtuŋ lɛ́lɛɛi ƃò káa káfe ḿvela fe ni? 8Ŋa ŋuma kɛ̀ Kôrai-toli-kpɔŋ da kpɛni-ŋai dîa a díkɛ ḿve fé ŋ́gɛ tíi kɛ́ kâa. 9Tãi ŋá kɛ̀ la kákɔlɛi, ŋá sãâ wɛ́li kɛ̀, fé kákpaaŋ ni, kpɛ́ni fêi, zãâi ŋá kɛ̀ ŋ̀wɛ́li kɛ̂i, ḿarâai nyíi-ŋai kùla Masadoniai dí dɛ̀ɛ ḿbɔ. M̀ɛni ma fé kákpaaŋ ni. Ḿve tela pâi kákpaanîi pere sii kélee da su. 10Berei Kôrai ŋɔtɔ̃yâi káa la ŋ́gbonôi, ŋáyoŋkai ŋí fé pâi kperâi Ɛkeya kpiniŋ su. 11Lé mɛni ma? Kpɛ́ni fêi, fé káwɛli ni? Ɣâla è gɔ́lɔŋ a gɛ́ɛ ŋa káwɛli ni.
12M̀ɛnii ŋa gɛ̀i, ŋa pâi kɛ̂i nɔ́ gɛ̂i a gɛ́ɛ ŋá diai kpera da dítii maa-yoŋka tèe a gɛ́ɛ da dítii kɛ̀ yɛ̂ɛ berei kwa kúwɛi kɛ̂ lai. 13Kpɛ́ni fêi, nuu sii kɛɛ-ŋai tí díkaa a woya-sia-ƃela, dí ƃo a núu-pɛlɛ tii-kɛ-ƃela, díkɛ díkpîŋ kɛ̀ yɛ̂ɛ Kôrai ŋɔsia-ƃela. 14Ǹyaŋ ve a la-kpala maa-mɛni, kpɛ́ni fêi, Sêtɔŋ a gbîŋ kɛ́ máŋ yɛ̂ɛ gwaa-ponoɔi ŋɔkéla. 15Mɛni ma ve a mɛni nina à kɛ̀ Sêtɔŋ yée-mu-ƃelai máŋ da díkpîŋ kɛ̀ yɛ̂ɛ tɔ̃yâ laa-la maa-yee-mu-ƃela. Dísaai a pâi kulâi nɔ́ dítûa-perei su.
Pɔ̂ɔ kɛ́ɛ a sia-nuui è mɛni-sôli káa
16Ŋa nyíŋi ƃôi ŋɔ́nɔ, núu da fé ńziɣe a ƃoo-nuu. Kɛ́lɛ, à kɛ̀ kà ńziɣe máŋ a ƃoo-nuu, gɛ̀ ní ka ńziɣe la a gɛ́ɛ ńyãa máŋ ŋa yoŋka tée a guro. 17Ŋà kɛ̀ ǹyoŋkai ŋí teêi, m̀ɛnii ŋa m̀ôi, fé m̀ôi a Kúnuu-namui ŋɔwála-wala-laai, kɛ́lɛ, ŋa m̀ôi yɛ̂ɛ ƃoo-nuu. 18Núu támaa da ŋ̀éniɛi ŋí su-sãai maa-yoŋka tèe, mɛni ma ńyãa máŋ ŋa pâi yoŋka têei. 19Táre-ƃela kɛ́ɛ yɛ̂ɛ káa lii-kpele káa káyêei ƃoo-ƃela mɛni ma! 20Ka fâa ma à kɛ̀ núu à ká kɛ̀ a ŋɔluɛ-ŋa, é ǹîa kɛ́ kákɔ̂liŋ su, núu à wôya kɛ̀ a káa, núu à gbîŋ kɛ̀tɛ kámɛi, núu à tela kálôkwa káŋɛi. 21Ŋúmɛ káa ŋ́ɛi a gɛ́ɛ ŋá m̀ó a gɛ́ɛ kú kɛ̀ a kúfii kpɛɛ a gɛ́ɛ kú túa yɛ̂ɛ núu-sii kɛ́ɛ ti!
Kɛ́lɛ, à kɛ̀ núu da à sɛŋ da maa-yoŋka tèe-berei máŋ ŋ́gaa ƃoo-lono kɛ̂i lai a tɛ̀ɛ-ŋai ŋa pâi m̀aa-yoŋka têei ǹyaa máŋ. 22Díkaa a Ibulu-ŋa? Ŋ́gaa la ńyãa máŋ. Díkaa a Eezuɛ-ŋa? Ŋ́gaa la ńyãa máŋ. Díkaa a Eberaɣɛ̃ɛ ŋɔsuui da? Ǹyaa máŋ ŋ́gaa a da. 23Díkaa a Kôrai yée-mu-ƃela? Berei máŋ ŋ́gaa ƃoo lôno kɛ̂i lai, ńdɛɛ̂i dîa kpɔ́ a ŋ̀ánaa tíi kɛ́ɛ su, kpini-pɛrɛ siɣeɛ su, lókwa su, ŋá kɛ̀ pâi saâi máŋ. 24Ŋa lókwa buu saaƃa kao lɔ́ɔlu mɛi náaŋ sɔlɔ ƃô la kɛ̀ Zûu-ŋai yêei lɔ́ɔlu. 25Dí ńokwa la kɛ̀ saaƃa a fáa-ɣiri. Dí ńzɔɔ a kɔni tɔnɔ. Yá-ŋa-keleŋ è pù a ńyãa saaƃa. Ŋá kpini tɔnɔ da fólo tɔnɔ kɛ̀ ǹyái ŋá. 26Ŋá sia támaa kɛ́, ŋá mɛni kâa ya-lee-ŋa yêei, ŋá mɛni kâa ŋuma-ƃela yêei, ŋá mɛni kâa ŋ́gbɔɔi-ƃelai yêei. Ŋá mɛni káa Zɛ̃tai-ŋai yêei, ŋá mɛni káa daa kɛ́tɛi su, ŋá mɛni káa vɛ̃ɛ-kpâlaŋ su, ŋá mɛni káa yúo su, ŋá mɛni káa ŋánûai yêei nyíi-ŋai díkaa a wôya-ƃelai. 27Ŋá tíi kpanaŋ támaa kɛ̀, ŋá mɛni-soli támaa káa, ŋá ŋɛi-kpala siɣe a kpini támaa, ŋá puru síɣe da kpele-wɛli, tãi támaa mii-sɛŋ fa kɛ́ naa, ŋá kɔ́lɛ támaa síɣe da seɣe-saa-maa. 28É kúla mɛni-ŋai ŋí pôlu m̀ɛnii kpɔ́ gáa mâ a ŋwuyɛɛi a ɣele kéleei, ǹyaa ƃa Kôrai-toli-kpɔŋ-ŋai kélee maa-lii-sɛlɛŋ. 29Gbɛ̂ɛ ƃe víi à kpɛ̀ɛ, ḿvii fa kpɛ̂ɛ ńyãa máŋ? Gbɛ̂ɛ ƃa pîli mɛni-kpɔ̂lu su, ǹyaŋ fa pîli zu a dámaai?
30Ŋà kɛ̀ ŋ̀wɛ̂lii a gɛ́ɛ ŋá yoŋka tée, ŋa dèe zãâi mɛni ma da ŋáfii-kpɛɛi lɛ̀i. 31Ŋ̀âlai gáa a Kúnuu-namuí Zîsɛ Ǹâŋ, nyíi lûwa káa mà wɔlɔ-wɔlɔ da wɔlɔ-wɔlɔi, è gɔ́lɔŋ fé lɛ́ɛ kɛ̂i. 32Tãi ŋá kɛ̀ la Dimɛikai, gɔmɛnɛ-nuui nyíi kɛ̀ Gâloŋ Kɛ́tɛi Elɛtɛ yée mui, è kɔ-kuluƃa-ŋa pù daai su a gɛ́ɛ dí ńzoŋ. 33Kɛ́lɛ, ŋáwɛ́li- kɛ-maa ƃelai dí ńdòo kpɔ̂lɔ su dí ŋ́gula wênai la dí ǹyeŋ galai pôlu-pere ŋá pú.
Currently Selected:
Kɔleŋtiɛŋ Veerɛi 11: KWB
Highlight
Share
Copy
Want to have your highlights saved across all your devices? Sign up or sign in
