Kɔleŋtiɛŋ Veerɛi 10
10
Pɔ̂ɔ è ŋɔtíi maa kɔ̃ɔ
1Ńyãa Pɔ̂ɔ, ńyãa kpîŋ ŋa môi kâa Kôrai ŋɔmaa-yêŋ da ŋɔsɔŋ-lɛ̂lɛi sarâi, ŋà kɛ̀ ká ŋɛ́i ḿaa yeŋɔɔ̂i, kɛ́lɛ, ŋà wàla kɛ́ ká ŋɛ́i, ńii kpelêɛi! 2Ŋa kákpera fêi a gɛ́ɛ ŋà kɛ̀ kásama, vé kɛ̀ a sɛŋ ŋá ŋálii-kpêlei lɛ́ a wála-wála nyíi ŋá ŋálii-kpelei lɛ̀ la diai dîa gáa díkili ŋá a gɛ́ɛ kúkaa tûai nɔ́ yɛ̂ɛ ŋ̀éniɛi ŋí su-ƃelai. 3Kpɛ́ni fêi, berei máŋ kúkaa la ŋ̀éniɛi ŋí sui, kúfe ŋ̀éniɛi ŋí su-kɔi da kɔ̂i. 4Kúkɔ-kɔ-sãai dífe a ŋ̀éniɛi ŋí su-kɔ-kɔ-sãa, kɛ́lɛ, Ɣâla ŋɔwála-walai káa díyêei a gɛ́ɛ dí siɣãŋ wólo. 5Kwa sia-mɛni kélee su kàra, kúkɛ yoŋka-mɛni kélee su kara nyíi a tɔ̂ɔ Ɣâla maa-tarei ŋɛi tuɛi, kúkɛ kili-ŋa-sia kélee kɛ́ a gɛ́ɛ ku Kôrai wóo mɛni. 6Kúkpɛtɛ̂i a gɛ́ɛ kú tɔ̂ŋ kpɛ́ diai dîa dífa woo-mɛni kɛ̀i, tãi káwoo-mɛnii láa a fɛ̂ɛ lai.
7Zɛŋ gáa káŋɛi tuɛi ka gáa. À kɛ̀ núu da lâai la a gɛ́ɛ gáa a Kôrai pɔ́ɔ, tɔɔ é gbîŋ kíli ŋá pono a gɛ́ɛ berei gáa la a Kôrai pɔ́ɔi, bere nɔ́ ƃe kúa máŋ kúkaa la. 8Kpɛ́ni fêi, à kɛ̀ máŋ ŋà yoŋka támaa tèe kúwala-walai mɛni ma, nyíi Kúnuu-namui è dɛ̀ɛ kúpɔ a gɛ́ɛ kú kátɔɔ lai, ǹyaŋ kasu-kara-mɛni fei, gɛ̀ ní ŋumɛ fé pâi ŋ́gɛ̂i. 9Ḿve ŋ̀wɛ̂lii ká kákili ŋá sía a gɛ́ɛ ŋa ŋ̀wɛ̂lii ŋá kámaa yáo a ŋákɔlɔ-ŋai. 10Kpɛ́ni fêi, da mò diɛ, “Ŋɔkɔlɔ-ŋai wuyɛɛ̂i, díkpanaŋɔɔ, kɛ́lɛ, gbono kpîŋ à kɛ̀ ƃɛ vii kpɛɛ̂i, ǹóno-woo ŋuŋ fé mà.” 11Ŋa ŋ̀wɛ̂lii maa-ƃelai tí dí táre zu a gɛ́ɛ kwa wàla kɛ́ kwaa ma, ŋ̀óoi kwa bu kɔlɔ̂i kú dɛɛ naai, kwà kɛ̀ naa, maa-wooi tí nɔ́ ƃe kwa mò. 12Zu-kulâi fa a gɛ́ɛ kwa ŋ̀wɛ̂lii kú kɛ́ diai sama, kpaa máŋ, kú kúkɔɔ̂ŋ diai dîa da díkpîŋ lɛ̀i. Kɛ́lɛ, à kɛ̀ da díkɔɔ̂ŋ díkîe-ni dîa, gɛ̀ ní mɛni-ŋa-kaa fé díyêei.
13Kɛ́lɛ, kúfe pâi yoŋka téei é tɛ́ɛ gɛ̂i ma, kɛ́lɛ, kwa pâi yoŋka téei nɔ́ díi mɛni ma Ɣâla è dɛ̀ɛ kúpɔi, a gɛ́ɛ máŋ kú seri la kâa. 14Kpɛ́ni fêi, díi Ɣâla è dɛ̀ɛ kúpɔi, kúfe da pui ma yɛ̂ɛ nya ƃe kúfe níi seri ni kâa. Kú kɛ̀ a ǹûai maa-ŋuŋ-ŋai kú sía kú pá kápɔ a Kôrai ŋɔtuŋ lɛ́lɛɛi. 15Kúfa yoŋka tèe núu da kpɛni-ŋa dítii mɛni ma é tɛ́ɛ gɛ̂i ma. Kɛ́lɛ, kúkili-kɛ-zui ƃa a gɛ́ɛ berei kálaa-lai a ƃɔ̂lɔ lai, bere ƃe kútii su a pâi kɛ́tɛ̂i la kásama, 16a gɛ́ɛ kú Duŋ Lɛ́lɛɛi ƃo lɔii da kpɛni-ŋa su kápôlu-pere, kúfe yoŋka tèe díi mɛni ma núu da kpɛni-ŋa da wɔ́lɔ gɛ́i. 17“Tɔɔ ǹúui a yoŋka tèei, é dée Kúnuu-namui mɛni ma.” 18Kpɛ́ni fêi, ǹúui Kúnuu-namui a ǹyée sèe mui va gbîŋ lɛ̀, kɛ́lɛ, Kúnuu-namui ƃa maa-nuui lɛ̂.
Currently Selected:
Kɔleŋtiɛŋ Veerɛi 10: KWB
Highlight
Share
Copy
Want to have your highlights saved across all your devices? Sign up or sign in
