Kɔleŋtiɛŋ Veerɛi 9
9
Kpɔŋ mâa tɛɛ ǹaa-la-ƃelai pɔ́ nyii pɔ̂ri mâa fé dîɛi
1Ve a sɛŋ a gɛ́ɛ ŋá kɔlɔ pɔ̃yɛ kápɔ é pîlaŋ la zama-sɛŋ mɛni ma nyíi gáa Ŋ̀âla-ƃelai mɛni mai. 2Kpɛ́ni fêi, ŋá gɔ́lɔŋ a gɛ́ɛ kákpɛtɛɛ̂i, nyíi ŋa maa-yoŋka teêi kámɛni ma a gɛ́ɛ ká kpɔŋ-mâa tɛɛ Masadonia-ƃelai ŋɛ́i. Ŋá mò a gɛ́ɛ Ɛkeya è gbîŋ kpɛ̀tɛ góraŋ tɛ̀ɛ ti zu. Ǹyaŋ káwɛli-kɛ-maai a ǹúui dámaa líi mu siɣe. 3Kɛ́lɛ, ŋa kúƃarâai tɛɛ̂i a gɛ́ɛ kámaa-yoŋka téɛɛi fè kɛ̀ kpɛ́ni-kpɛni m̀ɛnii ŋí su a gɛ́ɛ ka kɛ́ a kákpɛtɛɛ yɛ̂ɛ berei ŋá mò la a gɛ́ɛ ka pɔ̂ri kɛ̂i a kákpɛtɛɛ lai. 4À wàla kɛ́ ti à kɛ̀ kwà Masadonia-ƃelai da-ni kwà pà ku kákaa káfe kpɛtɛ ni, gɛ̀ ní kwa pâi ŋumɛ̂i-káwɔ̂i fa ƃô-kpɛ́ni fêi, kú kúkili pu kpɔ́ kâa a gbanaŋɔɔ. 5Mɛni ma ŋá ŋ́gili ŋá sîa a gɛ́ɛ gáa a mɛni lɛ́lɛɛ ŋá kúƃarâai lia-woo ƃo a gɛ́ɛ dí pa kápɔ naa ńduɛ a gɛ́ɛ zama-sɛŋ ka maa-kono-tèe kɛ̀i, ká maa-mɛni su kpɛtɛ nàa tuɛ a gɛ́ɛ maa-mɛni su fé kpɛ́tɛ a wála-wala-laa, kɛ́lɛ, é kɛ́ a sama-sɛŋ nyíi ká kùla kálii sui.
6M̀ɛnii ká ŋí, ǹúui à sí-sɛŋ kuro-te sîi, a m̀á kùla a guro-te, ǹúui à sí-sɛŋ kɛ́tɛ sîi, a m̀á kùla a gɛ́tɛ. 7Fɛ̂ɛ núu kélee é gɛ yɛ̂ɛ berei è gbɛ̀tɛ la gíli ŋái, vé gɛ̀ a lii-wuyɛɛ, kpaa máŋ a wála-wala-laa, kpɛ́ni fêi, Ɣâla è líi-nɛ̃ɛ sɛŋ-tɛɛ-nûu wɛ́li ní. 8Pɔri káa Ɣâla mì é lûwa-sii kélee tɛɛ kápɔ a zu kɛ́tɛ a gɛ́ɛ sɛŋ kélee é kɛ́ káyêei a dámaa a tãi kélee a gɛ́ɛ ká kpɔŋ-mâa kɛ́ a zu kɛ́tɛ tíi lɛ́lɛɛ kélee mɛni ma. 9Yɛ̂ɛ berei bɔ̃̀yɛ lai,
“È zí-sɛŋ-kaoi taa-taa é sɛŋ tɛ̀ɛ gôlo-ƃelai pɔ́.
Ŋɔtɔ̃yâ laa-lai káa nɔ́ naa wɔlɔ-wɔlɔ.”
10Ǹúui a sí-sɛŋ-kao tɛ̀ɛ zí-sɛŋ sí-nuui pɔ gɛ kpólo tɛɛ mii mɛni mai, a pâi kási-sãai kɛ̂i dí kpɛtɛ kpɔ́ a zu kɛ́tɛ é kátɔ̃yâ laa-lai ŋɔƃa kɛ́ é ƃɔlɔ. 11A pâi kákɛ̂i ká kɛ́ a tɔɔ-ƃela pere-sii kélee su, kpɛ́ni fêi, ká ƃɛlɛ-sêe kɛ̀ a dámaa, nyíi pâi nûa kɛ̂i dí sɛɣɛi-fei tɛɛ Ɣâla pɔ kúsarâi, 12kpɛ́ni fêi, kátii ŋí kɛ́ɛ su, káfe sɛŋ tɛɛ̂i nɔ́ nyíi Ŋ̀âla-ƃelai da ŋ̀wɛlii, kɛ́lɛ, kákaa máŋ tíi támaa kɛ̂i a gɛ́ɛ dí sɛɣɛi-fei támaa tɛ́ɛ Ɣâla pɔ́. 13Díi ŋí su-kɔɔ̂ŋɔɔ yée mu, da pâi Ɣâla ŋɔfólo-laai maa tɛ̂i, kpɛ́ni fêi, woo-mɛ̂ni káa káyêei Kôrai ŋɔtuŋ lɛ́lɛɛi mɛni ma, kákɛ ƃɛlɛ-sêe kɛ́ sama-sɛŋ tɛɛ mɛni su dímɛni ma da ǹúu kpeli-ŋai. 14Káwɛli káa díkɛ̂i, díkɛ Ɣâla fɛli kámɛni ma Ɣâla ŋɔƃɛlɛ-sêe kɛ́tɛi kákponôi mɛni ma. 15Sɛɣɛi-fei é tɛ́ɛ Ɣâla pɔ́ ŋɔsama-sɛŋ mɛni ma nyíi gɛ́tɛ̂i a sɛŋ kúfa pɔ̂ri maa kulâi!
Currently Selected:
Kɔleŋtiɛŋ Veerɛi 9: KWB
Highlight
Share
Copy
Want to have your highlights saved across all your devices? Sign up or sign in
